Lukas 4
4
Iblis mencobai Yesus
(Mat. 4:1-11; Mrk. 1:12)
1Ukah da Yohanes ngebaptis Yesus te sunge Yordan, Yesus tulak ke ro. Roh Kudus nyendro Yesus, belalu ngoit Da tong padang jone ye karing. 2Te suang opat pulu olo iro Yesus nono te biro, Yesus na cobai Iblis. Pas desung iro ade Yesus beloh man empe olo te rahir, ye ngene Da kesa semer. 3Ukah iro, Iblis ngulek tong Yesus: “Kaye Ko puna bene Anak Allah, ubah batu iro jaji wadai.” 4Ulek Yesus: “Na'an na tulis, Meresia bolum sa je ke man wadai daeh.”
5Ukah iro, Iblis ngoit Yesus tong runa ye e'mo da petendre tong Yesus awus ye kerajaan nete denia. 6Ulek Iblis tong ka Yesus: “A'ap sagar ngokoi tong ka Ko kuasa ali kemulian neke bangsa-bangsa ihe, leka kuasa ye apu awus na okoi di na'ap, a'ap ade sagar ngokoi tong nome ye kakan na okoi a'ap. 7Aji, kaye Ko nyembah a'ap, awus ye iro jaji di pun Ko.” 8Ulek Yesus: “Na'an na tulis, Ko harus nyembah Tuhan Allah Ko, belalu harus ngeringa engan Da.”
9Ukah iro, Iblis ngoit Yesus tong ja'a ye be aran Yerusalem da ngoit tong mo'n bungan Bait Allah. Ulek Iblis iro tong Yesus: “Kaye Ko Anak Allah, pelotu unuk Ko tong wa'a duh.” 10Koe na'an na tulis, Allah nyiu kawan malaikat Ye di ngawat Ko. 11Dali ade mege Ko supaya po'o Ko sa be hantuk ali batu. 12Ulek Yesus: “Te suang Kitab Suci na'an na tulis, Iya'a ko mencobai Tuhan Allah ko ley.”
13Ukah Iblis mencobai Yesus, da tulak ngikah Yesus belalu ngema wayah ye pas di mencobai Yesus li.
Yesus mulik tong Galilea
(Mat. 4:12-17; Mrk. 1:14-15)
14Ukah iro, Yesus tulak tong provinsi Galilea, belalu Roh Kudus nyendro Da. Habar Yesus tesebar tong ka awus ye daerah. 15Da nyelalo ja'a iro belalu ngajar dali te belai ibadah ulun Yahudi. Awus kawan ulun ye keringa iro besurah hal buen tentang Yesus.
Yesus sa na terima te Nazaret
(Mat. 13:53-58; Mrk. 6:1-6)
16Ukah iro, Yesus empe te ja'a ye be aran Nazaret, ja'a runa Da na pesolai. Ngunaw ye ketuju na ene Da pas te olo ye na tentukan di beranai, Yesus tulak tong belai ibadah ulun Yahudi belalu Da jakat te one wae sambil ngebaca Kitab Suci. 17Na'an erai ke ulun ye ngokoi kitab nabi Yesaya tong Da, ukah iro Da ngebuka gulungan kitab iro belalu ruku erai engan ye na tulis:
18“Roh Tuhan na'an sendro ali A'ap,
Da apu meli A'ap di ngulek Habar ye Buen tong kawan ulun ye susah. Da ade apu nyiu A'ap di nyenghabar pembebasan tong kawan ulun ye te suang penjara,
pelos ngulek kaye ulun posa sagar kate kite li, belalu pe bebas kawan ulun ye menaya.
19Da ade apu nyiu a'ap di ngulek habar, wayah ihe Tuhan iro sagar petendre kebuenan Da.”
20Ukah Yesus ngebaca ye, Da ngegulung kitab iro. Belalu Da nempuli gulungan kitab tong ka ulun ye be tangung jawab te belai ibadah ulun Yahudi, ye na'an te biro. Pelos Da tu'et ngajar te biro belalu awus kawan ulun te belai ibadah iro memperhati Da. 21Ukah iro, Yesus ngajar tong ka dali, ulek Da: “Pas te olo ihe ayat Kitab Suci apu ganap, pas ko keringa A'ap ngebaca ye.” 22“Awus kawan ulun te biro kemawah leka keringa se ye na ulek Da.” Tapi dali bepaner: “Toan kain a'a kaye Da ihe anak da Yusuf.” 23Ukah iro, Yesus ngulek tong dali: “Ko pasti ngulek paribasa ihe tong A'ap, Tabib, suba tawas unuk Ko ley-ley!” Belalu ko sagar ngulek tong A'ap: “Ene mujizat te ja'a ko ihe, ngunaw ye na ene ko te ja'a ye be aran Kapernaum.” 24Ukah iro Da ngulek: “A'ap ngulek tong ko, puna bene beloh nabi ye na terima nete ja'a da leyley.” 25Pas te zaman da Elia deo balu te negara Israel. Pas wayah iro ade deo ye lau leka tolu setengah taun langit be talep beloh pini uran te awus ye negeri. 26Tapi, Tuhan sa nyiu nabi ye be aran Elia di ngawat semperai ke ulun neke dali te ja'a Sarfat. 27Belalu ade pas Zaman nabi ye be aran Elisa deo kawan ulun ye bepenyakit okan kodong te negara Israel. Tapi Tuhan sa nyiu da Elisa di nawas dali. Da je nawas da Naaman ulun neke ja'a Siria. 28Pas kawan ulun keringa engan Yesus iro, awus kawan ulun ye te suang belai ibadah ulun Yahudi iro bereket. 29Maka ye, dali langsung jakat ngoit Yesus losek neke ja'a iro belalu dali ngoit tong diding saing ye na'an te biro, dali kakan nunyul Yesus di Da lotu. 30Tapi Yesus malan nyelalo kawan ulun ye deo iro, pelos Da tulak ngikah dali.
Yesus te suang belai ibadah te Kapernaum
(Mrk. 1:21-28)
31Pas te olo bali, Yesus tulak tong ja'a ye be aran Kapernaum, te provinsi Galilea, pelos ngajar kawan ulun te biro pas te olo ye na tentukan di beranai. 32Pas Yesus desung ngajar kawan ulun, dali kemawah kite kuasa ye na pakai Da pas desung ngajar. 33Te suang belai ibadah ulun Yahudi iro, na'an erai ti upo ye na rasuk uwok. Belalu upo iro ngeraring ngulek tong ka Yesus, 34“Iya'a ngawer kain dion kain gegales! Se urusan Ko ali kain, hai Yesus, Ulun neke ja'a Nazaret. Me Ko sulet pelos di pejaweh kain? A'ap ketoan Ko ihe Ulun ye Kudus ye na siu neke Allah!” 35Keringa iro Yesus ngereket uwok iro, ulek Da: “Enteng! Losek ko neke unuk ulun ihe!” Sa ola uwok iro ngemapas unuk ulun iro tong tana, te one wae ulun deo, ukah iro uwok iro sa penare ye pelos losek neke unuk ulun iro. 36Pas kite iro tamam kawan ulun kemawah, ulek dali: “Ajaran keme iro? Da pakai lemu di pelosek uwok iro deh” 37Aji, kawan ulun nyenghabar se ye na ene Yesus iro empe awus kawan ulun te ja'a iro ketoan.
Yesus ngawat deo kawan ulun
(Mat. 8:14-17; Mrk. 1:29-34)
38Ukah iro, Yesus tulak ngikah belai ibadah ulun Yahudi pelos Da tulak tong belai da Simon. Pas te belai da Simon, mena da Simon desung tenu'en, leka iro dali laku awat Yesus di nawas ye. 39Ukah iro, Yesus tulak tong ka sila mena da Simon belalu Da merentah tenu'en iro tulak, pelos langsung molak. Ukah iro mena da Simon iro langsung bue'et mayak pengokan ali pengisep di pun dali.
40Pas olo apu doyeng, deo kawan ulun ngoit aben luhen erai butung dali ye beroten di nyeruku Yesus. Ukah iro Da ngonok kami da te munan unuk dali sa ola awus roten iro molak. 41Na'an ade kawan ulun ye kesarungan uwok losek ke unuk kawan ulun deo sambil ngeraring: “Ko ihe Anak Allah!” Tapi dali ketoan kaye Da iro Kristus. Leka dali ketoan kaye Da iro Kristus. Tapi, Yesus ngereket nyiu di dali enteng.
Yesus ngajar te kawan ja'a bali
(Mrk. 1:35-39)
42Pas pita tane ye Yesus tulak gegales tong runa ye luay. Kawan ulun uyuh ngeto Da tong hame-hame belalu pas dali ruku Yesus, dali ngelamen Da di sa ngikah dali li. 43Tapi Yesus ngulek tong dali: “A'ap harus nyenghabar Injil Kerajaan Allah tong ka ja'a-ja'a bali pelos ngulek habar buen tong dali, leka iro A'ap na siu tong he.” 44Aji, Yesus sengke bekhotbah te kawan belai ibadah ulun Yahudi te provinsi Yudea.
Currently Selected:
Lukas 4: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
