Lukas 3
3
Yohanes pembaptis nyedia alan di na Yesus
(Mat. 3:1-12; Mrk. 1:1-8; Yoh. 1:19-28)
1Pas taun kelime belas pemerintah Kaisar Tiberius, te suang kekaisaran Romawi. Pontius Pilatus iro penguasa te provinsi Yudea; Herodes Antipas jaji penguasa te provinsi Galilea, Filipus erai butung upo da Herodes ye jaji penguasa ja'a Iturea ali Trakhonitis; Lisanias jaji penguasa te provinsi Abilene 2Pas desung iro, da Hanas ali Kayafas iro imam solai. Pas wayah ye sameh firman Allah sulet tong da Yohanes, anak da Zakharia, ye nono te padang jone ye karing. 3Da Yohanes tulak tong awus runa nete sunge Yordan pelos bekhotbah tong ka kawan ulun deo ulek da: “Betobatlah neke dosa-dosa ko belalu a'ap sagar ngebaptis ko, belalu Allah sagar ngampuni kawan dosa ko.” 4Ngunaw ye na tulis tentang da Yohanes te suang kitab nabi Yesaya:
“Na'an erai ke ulun ye ngeraring te padang jone ye karing,
sementara ko nyedia alan di penyulet erai ke ulun raja,
sedia ade unuk ko di penyulet Tuhan; Sedia unuk ko di bekeruku ali Da.
5Tiap datai harus na ti'mun, tiap saing ali gunung harus na perata.
Alan ye menikung harus na tengkoreng, belalu alan ye ngeredugul harus na perata.
6Belalu awus kawan ulun sagar kite Juruselamat ye na utus Allah.”
7Leka iro, deo kawan ulun sulet nyeruku da Yohanes, supaya da ngebaptis dali. Ulek da tong ka dali: “Ko ihe Iblis, sameh ngunaw turunan nipe ye be wisa! Nome ye pekingat ko di buyo neke hukaman Allah tong ka kawan ulun ye sa betobat? 8Leka iro sameh ngunaw tonga kayu ye bebua, bolum petendre kaye ko apu betobat neke dosa-dosa ko, belalu iya'a ngulek te antara ko kaye Allah sa nguhukum ko leka datu nini ko da Abraham. A'ap ngulek tong ko kaye Allah sanggup ngene turunan di na Abraham neke kawan batu ihe. 9Allah iro ngunaw ulun ye mege kapak te mat tonga kayu. Ko iro ngunaw tonga kayu leka iro tiap tonga kayu ye beloh bebua buen sagar na toweng pelos na obet te suang apui.”
10Ukah iro kawan ulun ye deo iro nyituk tong da: “Aji, se ye harus na ene kain di sa na hukum Allah?” 11Ulek da Yohanes: “Kaye ko be due ti jubah atawa baju, okoi iro tong ka ulun ye beloh be iro. Belalu kaye ko na'an pengokan, okoi iro ade tong ka ulun ye beloh be pengokan.” 12Na'an kawan penagih pajak sulet nyeruku da Yohanes di na baptis. Dali nyituk tong ka da: “Guru, se ye harus na ene kain?” 13Ulek da Yohanes tong ka dali: “Uwa apu ngepe duit pajak neke kawan ulun ye lewi ke ye na siu pemerintah.” 14Na'an ade kawan prajurit nyituk tong ka da: “Se harus na ene kain?” Ulek da tong ka dali: “Ko harus puas ali upa ko. Iya'a melelew ulun di ngokoi duit tong ka ko belalu iya'a nenes ulun bali ngulek ye jahat ye sa na ene dali.”
15Awus kawan ulun be harap Mesias sagar sulet. Belalu dali mulai bepikir me da Yohanes ihe Mesias. 16Ukah iro da Yohanes ngulek tong ka awus kawan ulun: “A'ap ngebaptis ko ali danum tapi Da ye sagar sulet lebih be kuasa eso ke a'ap belalu a'ap sa pantas di jaji ngunaw hamba Da di pesua sanal Da. Da ade sagar ngebaptis ko ali Roh Kudus ali apui.” 17Da desung mege garpu penampi belalu desung besiap ngene runa pengirik. Da sagar ngonok gandum te lumbung ye tapi da sagar nyuru upak ye iro ali apui ye sa kate na tempate.
18Aji kaye ngunaw ro, da Yohanes ngulek Habar Buen tong ka kawan ulun, belalu da nguni dali ali kawan ajaran di dali betobat. 19Pas te olo ye bali, da Yohanes pini nguni da Herodes leka da pini peruku ali sao erai butung tiri ye, ye be aran Herodias. Da Yohanes ade besurah ngelawen da Herodes leka ngene kejahatan ye na ene da. 20Ukah iro da Herodes ngene koe gawi ye da'ai eso, empe nempasuk da Yohanes tong suang penjara.
Yesus, Anak Allah, ye na baptis
(Mat. 3:13-17; Mrk. 1:9-11; Yoh. 1:32-34)
21Pas da Yohanes desung ngebaptis awus kawan ulun ye sulet tong ka da, da ade ngebaptis Yesus Ukah iro, pas Yesus desung bedoa, langit te buka. 22Belalu Roh Kudus dolui tong munan Da ye le'en ye ngunaw tempulu merpati. Allah be firman neke surga sambil be engan: “Ko ihe Anak A'ap ye na kasih A'ap, belalu A'ap be kenan tong ka Ko.”
Daftar datu nini Yesus
(Mat. 1:1-17)
23Yesus mulai be khotbah te one wae kawan ulun tentang Tuhan pas da be umur tolu pulu taun. Awus kawan ulun ngomon kaye Yesus iro anak da Yusuf. Yusuf iro turunan da Heli. 24Da Heli anak neke da Mathat. Da Mathat iro anak da Lewi. Da Lewi iro anak da Melki. Da Melki iro anak da Yannai. Yannai iro anak da Yusuf. 25Anak da Matica, anak da Amos, anak da Nahum, anak da Hesli, 26Da Nagai anak Maat. Maat anak da Matica. Da Matica anak da Simei. Da Simei anak da Yosekh. Yosekh iro anak Yoda. 27Yoda iro anak da Yohanan. Da Yohanan iro anak da Resa. Da Resa iro anak da Zerubabel. Da Zerubabel iro anak Sealtiel. Da Sealtiel iro anak Neri. 28Da Neri anak da Malkhi. Da Malkhi iro anak da Adi. Da Adi iro anak da Kosam. Da Kosam iro anak Elmadam. Da Elmadam iro anak da Er. 29Anak da Yesua. Da Yesua anak da Eliezer. Eliezer anak da Yorim. Da Yorim anak da Matat. Da Matat anak da Lewi. 30Da Lewi iro anak da Simeon. Da Simeon anak da Yehuda. Da Yehuda da anak Yusuf. Da Yusuf anak da Yonam. Da Yonam anak da Elyakim. 31Da Elyakim anak da Melea. Da Melea anak da Mina. Da Mina anak da Matata. Da Matata anak da Natan. Da Natan anak da Daud. 32Da Daud anak Isai. Da Isai anak da Obed. Da Obed anak da Boas. Da Boas anak da Salmon. Da Salmon anak da Nahason. 33Da Nahason Iro anak da Aminadab. Da Aminadab anak da Admin. Da Admin anak da Arni. Da Arni anak da Hezron. Da Hezron anak da Peres. Da Peres anak da Yehuda. 34Da Yehuda anak da Yakub. Da Yakub anak da Ishak. Da Ishak anak da Abraham. Da Abraham anak da Terah. Da Terah anak da Nahor. 35Da Nahor anak da Serug. Da Serug anak da Rehu. Da Rehu anak da Peleg. Da Peleg anak da Eber. Da Eber anak da Salmon 36Da Salmon Iro anak da Kenan. Da Kenan anak da Arpakhsad. Da Arpakhsad anak da Sem. Da Sem anak da Nuh. Da Nuh anak da Lamekh. 37Da Lamekh anak da Metusalah. Da Metusalah anak da Henokh. Da Henokh anak da Yared. Da Yared anak da Mahalaleel. Da Mahalaleel anak da Kenan. 38Da Kenan anak da Enos. Da Enos anak da Set. Da Set anak da Adam. Belalu Da Adam anak Allah atawa ye na ciptakan Allah.
Currently Selected:
Lukas 3: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
