Lukas 2
2
Kelahiran Yesus
(Mat. 1:18-25)
1Pas desung iro, Kaisar Agustus nyiu kawan ulun ye nono te kekaisaran Romawi harus ngedaftar aran. 2Ihe penela ye dali ngedaftar aran-aran ulun te suang buku. Ihe terjadi pas desung da Kirenius jaji penguasa provinsi Siria. 3Aji, tiap ulun tulak tong ja'a dali ley di ngedaftar aran dali.
4Belalu da Yusuf tulak tong ja'a ye be aran Nazaret nete provinsi Galilea belalu tulak tong ja'a Betlehem nete provinsi Yudea. Da Yusuf tulak tong ka duh leka da iro turunan Raja Daud ye lahir te biro. 5Da Yusuf tulak tong ka duh di ngedaftar da Maria leka da apu seletamput ali da Maria nelang desung entung.
6Pas da Yusuf ali da Maria empe te biduh, apu niba wayah ye da Maria di belolos. 7Belalu da Maria belolos tia upo. Da nyelampin ali erai ti selampin belalu da ngonok ye te kutak runa ewah pengokan kawan setua gaduhan, leka apu beloh runa nono ye muat di runa onsan.
Kawan gembala
8Pas malem iro, nete daerah Betlehem, te biro na'an kawan gembala ye desung durung kawan domba te padang ikut. 9Belalu mela sulet erai ti malaikat Tuhan petendre unuk ye tong ka kawan gembala iro belalu ama ma'a bene neke kemulian Tuhan pema'a dali. Ye ngene dali tamam bene takut. 10Tapi Malaikat iro ngulek tong ka dali: “Iya'a takut. A'ap sagar sulet di ngulek tong ka ko habar buen tentang arai ego ye solai di pun awus ye kawan ulun.” 11Malem ihe Juruselamat ko apu lahir te tempongan Raja Daud. Da iro Kristus, belalu Da ade Tuhan. 12Belalu ihe lah siri tong ka ko: “Ko sagar ruku erai ti tia mea ye na selampin ali empeng belalu be onok te suang kutak runa ewah pengokan setua gaduhan.” 13Pas desung iro, sulet kawan malaikat ye deo neke surga ye mula timul sendro ali malaikat ye penela sambil dali memuji Tuhan. Ulek dali,
14“Pujilah Tuhan ye te surga, belalu damai sejahtera te denia di kawan ulun ye na kasihi Allah.”
15Ukah iro, kawan malaikat iro tulak tong surga. Kawan gembala iro mengke situk pede dali: “Tuhan nyiu malaikat Da di ngulek habar buen tong ka kain, kaye Tia mea iro lahir malem ihe. Yu taka tulak tong ja'a ye be aran Betlehem pelos nyeruku Ye.” 16Ukah iro dali tulak tong ja'a Betlehem, pas dali ruku da Maria ali da Yusuf dali kite Tia ye be onok te suang kutak pengokan setua gaduhan iro. 17Pas kawan gembala iro kite Tia iro, dali ngisah paket ye na pekempe malaikat iro tong ka Tia mea iro, ali tong ka awus kawan ulun ye na'an te biro. 18Awus kawan ulun ye ngeringa habar neke kawan gembala iro tengkejet. 19Tapi da Maria ngonteh awus ye terjadi iro te suang pikiran da belalu bepikir se arti awus ye iro. 20Ukah iro kawan gembala iro mulik tong runa kawan domba dali, sambil memuji Tuhan. Leka ye na dinga ali na ite dali sameh ngunaw ye na ulek malaikat tong ka dali.
Yesus na sunat pelos na sarah tong ka Tuhan da Simeon ali da Hana
21Pas te olo ye ke walo, dali nyunat ngunaw hukum Tuhan, belalu da Yusuf ali da Maria ngokoi aran Tia iro Yesus. Malaikat apu nyiu da Maria di ngokoi aran ihe tong Tia iro semale da Maria entung.
22Belalu pas ganap wayah ye, ngunaw Hukum Musa, da Yusuf ali da Maria ngoit Yesus tong Bait Allah te Yerusalem pelos nyarah Da tong ka Tuhan. 23Leka na'an na tulis te suang Hukum Musa: “Tiap kawan tia ye paling tuha te suang keluarga, harus na sarah tong Tuhan.” 24Dali ade tulak di ngokoi kurban persembahan, sameh ngunaw ye na perentah neke Hukum Musa. Ye na tulis: “Okoi kurban due ti tempulu merpati atawa due ti anak merpati.”
25Pas desung iro na'an erai ke ulun upo ye be aran Simeon ye nono te ja'a Yerusalem. Da ihe ulun ye bene nelang taat tong ka Tuhan. Da desung ngema ulun ye sagar ngawat bangsa Israel. Belalu Roh Kudus nyendro da. 26Roh Kudus apu ngulek tong ka da Simeon kaye da sa sagar mate semale kite Mesias ye na janyi ali na utus ene Allah. 27Pas da Maria ali da Yusuf ngoit Yesus tong Belai Ibadah ulun Yahudi di ngene se ye na ulek te suang Hukum Musa ye harus na ene di Na Tia ye kado lahir, Roh Kudus nyiu da Simeon di litep tong natar Bait Allah. 28Pas da Simeon kite Tia ye be aran Yesus iro da langsung mi'it ye. Ukah iro da memuji Allah, ulek da:
29“Tuhan, nehe Ko kate pedion a'ap, hamba Ko ihe tulak ngoit damai sejahtera, sameh ali firman Ko.
30Leka ma'te a'ap apu kite Juruselamat ye na siu Ko di ngawat awus kawan ulun.
31Ko apu nyedia ye di na ite kawan ulun awus ye.
32Tia ihe ngunaw ama ye ma'a di nundru ko tong ka kawan ulun ye ba ulun Yahudi pelos ngoit kemulian tong bangsa ko, bangsa Israel.”
33Pas da Yusuf ali da Maria keringa se ye na ulek da Simeon iro, dali due kemawah. 34Ukah iro da Simeon ngeberkati da Yusuf ali da Maria, ulek da tong ka da Maria: “Allah apu meli Tia ihe supaya kawan ulun Israel ngehadap Allah belalu ngawat awus kawan ulun bangsa Israel. Da sagar jaji siri neke Allah, tapi deo ade ulun ye sagar ngelawen Da. 35Koe iro, ko sagar kesa nare aseng tamam bene ngunaw pedang ye na towek tong ate ko.”
36Pas desung iro, na'an ade erai ke ulun nabi ye be aran Hana. Ma da be aran Fanuel ye be asal neke suku Asyer. Da Hana apu tuha bene, da bolum sendro bane da turu taun, da ade na ikah bane da mate. 37Ye ngene da jaji balu be umur walo pulu opat taun. Da nengkawus pengebolum da te Bait Allah, belalu da ade nyembah Allah sambil bepuasa ali bedoa. 38Pas da Simeon desung besurah ali da Maria nyang Yusuf, da sulet sambil memuji Tuhan. Da besurah tentang tia mea ye be aran Yesus iro tong ka awus kawan ulun ye apu ngema nelang ngeharap di Allah nyiu Mesias di pe bebas kawan ulun ye te Yerusalem.
39Ukah da Yusuf ali da Maria ngene koe gawi ngunaw ye te suang Hukum Musa, dali due langsung uli tong ja'a asal dali, te Nazaret, provinsi Galilea. 40Pas Yesus apu solai, Da magin galak nelang be akal, Allah ade ngeberkati Da.
Yesus litep tong ka suang Bait Allah pas umur Da due belas taun
41Tiap taun ulun tuha Da Yesus tulak tong ja'a Yerusalem di merayakan olo Paskah. 42Aji, Pas Yesus be umur due belas taun, Da ali ulun tuha Da tulak tong acara te ja'a Yerusalem ngunaw ye tuju na ene dali dati. 43Pas acara iro di awus, ulun tuha Yesus uli tong belai. Dali sa sadar kaye Yesus te kikah te ja'a Yerusalem. 44Ulun tuha Da ngomon kaye Da tulak sendro ali kawan ulun. Aji, dali ngeto empe erai olo, belalu pas te ahir olo ye dali jape ngeto nete aben luhen ali kawan uyang Da. 45Ulun tuha Da apu ngeto tong hame-hame tapi tatap beloh ruku, ukah iro dali mulik tong ja'a Yerusalem pelos ngeto Yesus te biduh. 46Pas olo ketolu ye, dali ruku Yesus te natar Bait Allah. Da desung tu'et te biduh sendro kawan guru Hukum Musa. Da ngeringa se ye na ajar dali belalu da ade sambil nyituk tong dali. 47Awus kawan ulun ye ngeringa Yesus empe kemawah lian kepintaran Da ali tuingan-tuingan Da pas na situk dali. 48Ulun tuha Da tengkejet pas kite te biduh. Ne'e Da nyituk tong ka Da Yesus: “Anak a'ap, se di Ko ngene koe gawi ihe tong ka kain? A'ap ali ma Ko tamam bene ngeno Ko, kain due apu uyuh ngeto Ko. 49Ukah iro Yesus nuing, se di kam due ngeto A'ap? Me sa sadar kam kaye A'ap harus te bihe, te belai Ma A'ap?” 50Tapi ulun tuha Da sa ketaru se ye na ulek Yesus. 51Ukah iro, Yesus mulik siut ulun tuha Da tong ja'a Nazaret belalu Da ngeringa se ye na ulek dali. Da Maria, tuju ngingat awus ye ihe belalu ringket bepikir awus ye apu terjadi.
52Yesus jaji bijaksana unuk Da ade magin solai. Kawan ulun ketuju ali Da, belalu Da berkenan tong ka Allah.
Currently Selected:
Lukas 2: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
