Lukas 24
24
1Pas olo minggu penela iro, pita-pita kawan bawe iro ngoit rerampah ali minyak harum ye apu na ene dali ukah iro dali tulak tong lebeng Yesus. 2Pas dali apu empe biduh, dali kite kaye batu ye ngehalang jaweng runa litep lebeng apu be ensor. 3Belalu pas dali litep tong suang lebeng, dali beloh kite bangkei Tuhan Yesus. 4Kawan bawe iro desung jakat empe kemawah sambil bepikir se ye desung terjadi. Belalu mula sulet due ti upo jakat te sila dali. Due ti upo iro be empeng be ama ngunaw ilap. 5Tamam bene kawan bawe iro takut belalu dali nunduk utek dali tong ka tana sebagai siri hormat. Tapi due ti ulun iro ngulek tong ka dali: “Iya'a ko ngeto Da ye apu bolum te antara kawan ulun mate. 6Yesus apu beloh te bihe leka Da apu bolum li. Ingat se ye na ulek Da tong taka awus ye pas Da kea bolum sendro taka te provinsi Galilea. 7Ulek Yesus: A'ap Anak Meresia, harus na sarah tong suang kekuasaan kawan ulun ye bedosa, belalu dali sagar maku A'ap te kayu salib empe mate, tapi pas olo ye ketolu Allah sagar nemolum A'ap li.” 8Belalu dali kingat se ye na ulek Yesus iro. 9Ukah iro, kawan bawe iro mulik neke lebeng. Dali bekisah tong ka due belas murid Yesus ali tong ka ye bali ye. 10Pas da Maria Magdalena, Yohana, Maria ne'e da Yakobus ali kawan bawe bali ye desung sendro ali dali neke lebeng, dali bekisah awus ye iro tong sebelas rasul ali tong ka ye bali ye. 11Tapi dali sa harap se ye na ulek kawan bawe iro ye ngene kawan murid iro ngomon iro mustahil.
12Apalagi da Petrus langsung mensit tong lebeng, Pas empe lebeng, da neneng tong ka suang. Da beloh kite me-me je empeng kapan daeh ye be onok te biduh tapi bangkei Yesus beloh te biro. Ukah iro da Petrus uli tong belai, sambil da pikir se ye desung terjadi.
Yesus petendre unuk Da tong due ti murid Da desa Emaus
13Ukah iro pas te olo ye sameh, due ti murid Yesus bali ye tulak tong ja'a ye be aran Emaus. Ye sa oro Nete sebelas pal neke ja'a Yerusalem. 14Sambil malan, dali sambil besurah se hal ye kado te terjadi. 15Pas dali desung besurah, Yesus nyerani dali belalu malan sendro dali. 16Bele dali kite Da, dali sa ketaru kaye iro Yesus. 17Ukah iro Yesus nyituk tong ka dali: “Se ye na surah ko sambil malan? Dali due jakat te biduh nelang wae sibe.” 18Ukah iro na'an erai te antara dali due iro, ye be aran Kleopas, ngulek tong ka Yesus: “Ko pasti ulun ye gegales ye nono te Yerusalem ye beloh ketoan se ye desung terjadi te bihe ahir-ahir ihe.” 19Ulek Yesus tong la dali tong ka dali: “Se ye na surah kam due?” Ulek dali: “Kain desung nyurah Da Yesus Ulun neke ja'a Nazaret. Da iro erai ke ulun nabi ye na okoi Allah kuasa di ngajar kawan ulun ali ngene mujizat-mujizat solai belalu Da pekempe paket ye ponu ali kuasa te one wae Allah ali tong ka kawan ulun.” 20Tapi kawan pimpinan imam ali kawan pimpinan bali ye nyarah tong ka penguasa Romawi di kune hukum empe mate. Dali munu Yesus ye na paku te kayu salib. 21Kain be harap kaye Da ye apu na janyi Allah di na utus ngawat bangsa Israel neke bangsa Romawi. Belalu sa je iro daeh. Olo ihe ade olo ketolu ukah Da na bunu. 22Ukah iro awus ye iro terjadi, kawan bawe te antara kain ngene kain kemawah. Dali tulak tong lebeng Yesus pas pita ihe. 23Tapi dali beloh ruku bangkei Yesus te biduh. Ukah iro dali sulet pelos ngulek kaye malaikat petendre unuk ye tong ka dali, belalu ngulek tong ka dali kaye Yesus bolum! 24Ukah iro, kawan ulun te antara kain tulak tong lebeng. Dali neneng kaye unuk Yesus apu beloh, sameh ngunaw ye na ulek kawan bawe iro, tapi dali beloh kite Yesus. 25Belalu Yesus ngulek tong ka dali: “Hai, Ko ye rengarai? Ko uyuh bene percaya ali Kitab Suci ye na tulis kawan nabi. 26Ko ye harus ketoan kaye Kristus harus nangung awus ye iro pelos mate, belalu litep tong suang kemulian Allah!” 27Ukah iro Yesus mulai ngejelaskan tong ka dali se ye na'an te suang Kitab Suci tentang Da ley. Da bekisah akat kitab-kitab Hukum Musa belalu nempelos ye engan dase ye na tulis ene kawan nabi bali te suang Kitab Suci tentang Da ley.
28Pas Yesus ali due ti murid Da iro empe ja'a Emaus ye na tuju due ti murid Da iro, Yesus nempelos pengalan Da. 29Tapi dali laku awat tong ka Yesus, ulek dali: “Mat'e olo sagar leteng belalu olo sagar denem, yu nono sendro kain dile.” Belalu Yesus litep nono sendro dali. 30Pas dali tu'et man, Yesus ngepe wadai te kami Da, sambil mengucap syukur tong ka Allah, pelos Da ngereset ye, Da ngokoi tong kawan murid Da. 31Ukah iro dali ketoan nome Da ihe, belalu pas desung iro ade Da jaweh neke pengite dali! 32Ukah iro dali due bekesituk pede dali: “Aji, ihe lah leka ye kain kesa sanang ye luar biasa ngunaw apui ye waha te suang unuk kain pas Yesus besurah tong ka kain te botuk alan ye ngene kain kate paham ali Firman Tuhan te suang Kitab Suci.”
33Ukah iro dali due langsung bu'et neke kursi ali meja pengokan belalu tulak tong ja'a Yerusalem. Pas empe te biduh, dali tulak tong ka runa sebelas rasul ali kawan murid Yesus bali ye, ye desung bekumpul. 34Pas dali empe, awus kawan ulun nyituk tong ka due murid iro: “Iro bene! Tuhan Yesus dasar bujur bolum li Da ade petendre unuk Da tong ka da Simon Petrus!” 35Ukah iro due ti murid ye kado empe neke ja'a Emaus bekisah tong ka dali ngunaw me Yesus petendre unuk Da tong dali due pas desung te alan, belalu ngunaw me dali due ketaru ali Yesus pas Da desung ngebagi pelos nempilak wadai.
Yesus petendre unuk tong ka kawan murid Da
(Yoh. 20:19-23)
36Pas kawan murid desung bekisah tong awus kawan ulun se ye desung terjadi, ye mula selenga sulet Yesus jakat nete botuk dali sambil ngulek: “Damai sejahtera neke Allah nyendro ko.” 37Pas dali kite ye, dali ngomon Da iro uwok ye ngene dali tamam bene takut. 38Tapi Yesus nyituk tong ka dali: “Se di ko sa ronu ali A'ap? Se di ko ragu sadang kite A'ap? 39Teneng he kami ali po'o A'ap belalu kam harus ketoan kaye A'ap ley ye na'a te bihe! Ege A'ap ukah iro ko ketoan kaye A'ap asli. Kaye uwok beloh be unuk neke daging ali tulang, ngunaw ye kate na teaw ko A'ap ihe be unuk.” 40Ukah Yesus ngulek iro, Da petendre ewah awa te kami ali te po'o Da tong ka dali. 41Ukah iro dali tamam bene ego empe kemawah ye ngene dali sa beka percaya kaye Yesus bolum. Belalu Yesus nyituk tong dali: “Me bihe na'an pengokan ye kate na okan?” 42Belalu dali ngokoi erai ti esa ye na koreng tong ka Da. 43Ukah iro Yesus ngepe ye pelos Da man ye te one wae dali.
44Belalu Yesus ngulek tong ka dali: “Pas A'ap kea sendro ali kam semale A'ap mate, A'ap apu ngulek tong ka kam kaye se ye na ulek A'ap iro dasar bujur terjadi, ye na'an te suang Hukum Musa, kitab kawan nabi ali kitab Mazmur.” 45Ukah iro Yesus ngejelaskan arti Kitab Suci tong ka dali. 46Pelos Yesus ngulek tong ka dali: “Na'an na tulis te suang Kitab Suci kaye Mesias harus menaya pelos mate, tapi Da sagar bolum li neke antara ulun mate pas te olo ye ketolu. 47Suang Kitab Suci ade na'an na tulis kaye kawan murid Kristus harus pekempe paket ihe tong ka kawan ulun ali pengampunan dosa tong ka awus ulun ye betobat. Dali harus nyenghabar ihe penela ye te ja'a Yerusalem belalu ukah iro tong awus kawan ulun nete denia ihe. 48Belalu ko harus jaji saksi tong ka awus kawan ulun. 49Belalu A'ap ley sagar nyiu Roh Kudus tong munan ko, ngunaw ye apu na janyi ene Ma A'ap. Tapi ko harus ngema te bihe, te ja'a ihe, empe Roh Kudus sulet belalu ngokoi tong ka ko kuasa neke surga.”
Yesus mengket tong surga
50Ukah iro, Yesus ngoit kawan murid Da losek neke ja'a, tong runa te dani ja'a Betania. Ukah iro Da ngengkat kami Da tong ka langit pelos ngeberkati dali. 51Pas Da desung ngeberkati dali, Da tulak ngikah dali. Allah ngengkat Da tong surga. 52Belalu kawan murid Da besujud nyembah Da, belalu dali mulik tong ja'a Yerusalem sambil arai ego. 53Belalu dali tulak tong Bait Allah di memuji Tuhan.
Currently Selected:
Lukas 24: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
