Lukas 23
23
Yesus te one wae da Pilatus
(Mat. 27:1-2,11-14; Mrk. 15:1-5; Yoh. 18:28-38)
1Ukah awus ye kawan pemimpin bangsa Yahudi ngoit Yesus tong ka penguasa Romawi, ye be aran Pilatus. 2Ukah iro dali ngulek tong ka da Pilatus dali nenes Yesus, ulek dali: “Kain ruku ulun ihe ngene masalah te antara kawan ulun kain. Da ngulek kaye ngebayar pajak tong ka kaisar iro sala, belalu Da ade ngulek kaye Da iro Mesias, raja kain.” 3Belalu da Pilatus nyituk tong ka Yesus: “Me bene Ko ihe raja ulun Yahudi?” Ukah iro Yesus ngulek tong ka da Pilatus: “Oy, bene, ngunaw ye na ulek ko iro.” 4Ukah da Pilatus nyituk Yesus, da ngulek tong ka kawan pimpinan imam ali awus kawan ulun ye bekumpul te biduh: “A'ap kite kaye ulun ihe beloh penyala tong ka arah ye jahat.” 5Tapi dali tatap mengaras ulek dali: “Da ihe ngene masalah te provinsi Yudea ali ye na ajar Da tong ka kawan ulun. Da ngajar ngunaw ro te provinsi Galilea belalu empe he.” 6Pas da Pilatus keringa iro, da nyituk tong ka dali: “Me Da ihe ulun Galilea?” 7Pas da Pilatus sadar kaye Yesus be asal neke ja'a Galilea, daerah da raja Herodes, da ngirim Yesus tong ka da Herodes. Pas desung iro, da Herodes ade desung te Yerusalem.
Yesus te one wae da Herodes
8Da Herodes ego bene kite Yesus. Leka apu ola bene da kakan bekeruku ali Yesus. Da apu keringa se na ene Yesus belalu da ade kakan bene kate kite Yesus ngene mujizat. 9Deo bene ye na situk da Herodes tong ka Yesus, tapi Yesus sa ngejawab ye. 10Kawan pimpinan imam ali kawan pengajar hukum Musa jakat te biduh sambil nenes tamam bene tong ka Yesus. 11Belalu da Herodes, ali kawan prajurit da, ngekupe Yesus sambil koka kite Yesus. Dali pesua jubah kerajaan tong ka Da, belalu da Herodes ngirim Yesus li tong ka da Pilatus. 12Sebagai hasil neke iro, da Herodes ali da Pilatus jaji be uyang. Semale olo iro, dali due be musuh.
Yesus mulik tong ka one wae da Pilatus
(Mat. 27:15-26; Mrk. 15:6-15; Yoh. 18:38—19:16)
13Ukah iro da Pilatus be paket tong ka kawan pimpinan imam, kawan pemimpin, ali kawan ulun Yahudi bali ye. 14Ukah iro da ngulek tong ka dali: “Ko ngoit Ulun ihe tong one wae a'ap, belalu ko ngulek kaye da ngene rakyat ngelawen pemerintah Romawi. Nehe a'ap apu meriksa Da te one wae kam awus ye, belalu a'ap neneng kaye Ulun ihe beloh penyala ngunaw ye na tenes ko. 15Da Herodes ade ngulek kaye Yesus ro beloh penyala. Aji, da nempuli tong ka kain. Puna bene kaye Yesus beloh ngene koe gawi ye harus na okoi hukuman mate. 16Koe iro a'ap je nyiu kawan prajurit a'ap di nyambuk daeh, belalu a'ap sagar pe bebas Da.” 17Da pilatus ngulek iro leka apu jaji kebiasan kaye da harus ngelapas erai ti tahanan Yahudi di dali ngerayakan olo Paskah. 18Tapi kawan ulun merepak: “Bunu Yesus! Belalu lapas da Barabas di neng kain!” 19Da Barabas na penjara leka ngene kerusuhan ali kawan ulun te ja'a Yerusalem belalu da ade munu ulun. 20Da Pilatus kakan ngelapas Yesus, aji da besurah li tong kawan ulun ye deo iro. 21Tapi dali sengke merepak: “Salibkan Da te kayu salib! Salibkan Da te kayu Salib!” 22Ukah iro da Pilatus ngulek tong ka dali ye ketolu kali ye, ulek da: “Se penyala ye na ene Da? A'ap beloh ketoan alasan di ngehukum mate Da ihe. Aji a'ap sagar nyiu prajurit a'ap di nyambuk Da, ukah iro a'ap sagar ngelapas Da.” 23Tapi dali sengke merepak nyiu di Yesus na salibkan, belalu ahir ye engan dali manang. 24Belalu da Pilatus ngeringa se ye na ulek kawan ulun iro. 25Ngunaw ye na ulek kawan ulun iro, da Pilatus ngelapas ulun ye be aran Barabas, ye na penjara leka ngene geger ali munu ulun. Da pilatus ukah iro nyiu kawan prajurit da di ngoit Yesus belalu ngene se ye na akan kawan ulun.
Yesus na oit pelos na salibkan
26Pas kawan prajurit Pilatus ngoit Yesus tong ka runa Da na salib, dali ngedakep erai ulun ye be aran Simon, ulun Kirene. Da sulet tong Yerusalem neke ja'a. Kawan prajurit ngonok salib Yesus te peluke da Simon belalu maksa da di ngoson salib iro pelos malan te odi Yesus. 27Kawan ulun deo nemasu Yesus. Na'an ade kawan bawe te antara kawan ulun ye deo iro. 28Tapi Yesus ngelap tong ka dali ulek Da: “Hai kawan bawe Yerusalem, iya'a ngerodoi di na'ap! Tapi, rodoi se ye sagar terjadi tong ka ko ali kawan anak ko!” 29Dinga! Sagar na'an wayah ye kawan ulun sagar ngulek: “arai ego kawan bawe ye beloh pini be anak!” 30Ukah iro kawan ulun sagar ngulek tong ka gunung-gunung ali bukit-bukit: “Runtun lah tipan kain belalu timun kain! 31Kaye ngunaw ro cara ulun ye beloh penyala na hukum, bayangkan kaye ulun ye be penyala sagar na hukum doyat bene!” 32Na'an ade due ti ulun bali ye na oit sendro Yesus di na hukum mate. Due ti ulun iro penjahat.
Yesus na salibkan
(Mat. 27:33-44; Mrk. 15:22-32; Yoh. 19:17-24)
33Pas dali empe te runa ye be aran “Tengkorak,” dali maku Yesus ali due ti penjahat te sila sanan Da ali sila se'i Da te kayu salib. 34Ukah iro Yesus bedoa di kawan ulun ye nyalib Da: “Ma ampuni dali ihe, leka dali sa ketoan se ye harus na ene dali,” Ukah iro kawan prajurit iro nurak dadu di ngebagi empeng Yesus. 35Kawan ulun jakat neneng ye. Te biro kawan pemimpin ngekupe Yesus ulek dali: “Da ngawat ulun bali! Kaye dasar bene Mesias, ulun ye apu na peli Allah, harus ye Da kate ngawat Da ley!” 36Kawan prajurit iro ngekupe Yesus, dali nyerani Da pelos pe jere pengisep anggur ye semori. 37Ulek dali: “Kaye ko puna bene Raja ulun Yahudi, awat unuk Ko leyley neke kepatean.” 38Na'an ade na tulis te papan te salib te munan utek Yesus: “Ihe lah Raja ulun Yahudi.”
39Ukah kawan prajurit iro ngekupe Yesus, penjahat te dani Yesus ngekupe Da. Ulek da nelang engan ye ngaja: “Maka ko ihe Mesias? Kaye bene, awat Ko ley-ley ali awat kain ade!” 40Tapi penjahat ye erai ti ye ngereket da. Ulek da: “Ko beloh ahan ngulek ngunaw ro. Ko harus ye ngehormati Allah leka ko na hukum mate sameh ngunaw nget Ulun ihe. 41Apu pantas kain na hukum ali cara ye ngunaw he leka kain due mahan hukuman ye setimpal ali ye na koe gawi jahat kain. Tapi Ulun ihe beloh ngene ye sala.” 42Ukah iro ulun iro ngulek tong ka Yesus: “Ingat a'ap ihe, ya Tuhan, kaye Ko apu memerintah te suang Kerajaan Ko.” 43Ukah iro Yesus ngulek tong ka dali: “A'ap janyi tong ka ko: Olo ihe ade ko sagar litep tong suang surga sendro A'ap!”
Yesus mate
(Mat. 27:45-46; Mrk. 15:33-41; Yoh. 19:28-30)
44Pas desung iro olo kira-kira jam due belas, sa ola awus daerah biro mula denem bene empe jam tolu, 45Leka mate olo beloh be ama. Pas desung iro, Bait Suci bereset tebagi due. 46Pas iro desung terjadi, Yesus be engan wale: “Ma, A'ap nyarah roh A'ap tong suang kami Ko!” Ukah Da ngulek iro, Da mate. 47Kepala pasukan Romawi ye nyalib Yesus jakat te biduh. Da kite se ye terjadi belalu da memuji Allah ulek da: “Sebujur ye Ulun ihe beloh penyala.” 48Kawan ulun bekumpul di neneng iro. Tapi pas dali kite se ye desung terjadi, dali mulik tong belai dali ley sambil mupuk dada dali di peteaw kaye dali desung beduka 49Awus kawan ulun ye ketaru ali Yesus, ali kawan bawe sulet neke provinsi Galilea jakat neneng se desung terjadi iro.
50Na'an erai ulun ye be aran Yusuf neke Arimatea, ja'a ye na'an te provinsi Yudea. Da ihe erai ke ulun ye buen ali terhormat, ye desung ngema penyulet Kerajaan Allah. Mele da iro anggota Mahkamah Agama, da sa setuju ali keputusan mahkamah iro.
Yesus na lebeng
(Mat. 27:57-61; Mrk. 15:42-47; Yoh. 19:38-42)
51Da sa setuju ali keputusan ye na epe pimpinan ye ngelawen Yesus. Yusuf be asal neke Arimatea ja'a ulun Yahudi, ja'a ye na'an te provinsi Yudea. Da kakan bene di Allah nyiu Mesias di nemu'et Kerajaan Allah. 52Da Yusuf tulak tong runa da Pilatus, penguasa Romawi, pelos da kaweng izin di da ngepe bangkei Yesus pelos ngelebeng ye. Da Pilatus ngokoi izin ye. 53Ukah iro da Yusuf ali kawan ulun bali pedolui unuk Yesus neke kayu salib. Da ngepe empeng ye buen di mungkus ali empeng iro. Da ngonok bangkei ye te erai ti liang ye apu na kali neke bukit be batu. Lebeng iro kea kado; beloh pini na pakai di pakai ngelebeng ulun. 54Olo ihe olo te ahir neke Olo Persiapan, belalu pas mate olo leteng, olo ye na tentukan di beranai iro sagar mulai.
55Kawan bawe ye sulet sendro Yesus neke provinsi Galilea tulak sendro da Yusuf. Dali kite lebeng iro dali ade kite unuk Yesus na onok te suang ye. 56Ukah iro kawan bawe iro mulik tong belai dali te ja'a. Malem iro dali ngene rerampah ye be ewo harum ali minyak harum di ngonok ye te bangkei Yesus. Ukah iro dali tehur pas te olo ye na tentukan di beranai di taat perintah Allah tentang hal iro.
Currently Selected:
Lukas 23: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
