Lukas 22
22
Rencana di munu Yesus
(Mat. 26:1-5; Mrk. 14:1-2; Yoh. 11:45-53)
1Nehe apu dini di wayah ye kawan ulun Yahudi di ngerayakan Festival Wadai Sa Beragi ye na ulek olo Paskah. 2Kawan pimpinan imam ali pengajar hukum Musa iro kakan munu Da. Aji dali ngeto cara di munu Yesus enteng-enteng, leka dali takut tong ka kawan ulun ye ngeringa Yesus.
Yudas ngehianati tong ka Yesus
(Mat. 26:14-16; Mrk. 14:10-11)
3Ukah iro Iblis litep tong suang ate pikiran da Yudas, ye na to'ok Iskariot, da ihe erai ke ulun murid kedue belas murid Yesus. 4Ukah iro da Yudas tulak nyeruku kawan pimpinan imam ali pengawal Belai Ibadah ulun Yahudi di besurah ali dali ngunaw me cara ye buen di nyarah Yesus tong ka dali. 5Kawan pimpinan imam ali pengawal Belai Ibadah ulun Yahudi ego bene belalu dali sempakat di ngokoi da Yudas duit leka apu ngawat dali ngedakep Yesus. 6Da Yudas setuju ali ye na ulek dali iro, belalu da ngeto wayah ye pas di nyarah Yesus tong ka dali ye beloh na kenentoan ulun deo.
Persiapan di man pas olo Paskah
(Mat. 26:17-19; Mrk. 14:12-16)
7Ukah iro apu wayah ye Olo Raya Wadai Beloh Beragi. Olo ihe olo te kame kawan ulun Yahudi harus ngeleleng domba ye sagar na okan dali di olo perayaan Paskah. 8Aji, Yesus nyiu da Petrus ali da Yohanes ulek Da: “Alan tulak pelos ene pengokan di perayaan olo Paskah, di taka awus ye kate sendro man.” 9Dali nyituk tong ka Da: “Te kame Ko kakan kain nyedia pengokan ye?” 10Ulek Yesus tong ka dali: “Dinga, kaye ko litep tong ka suang ja'a ye be aran Yerusalem, erai ke ulun upo sagar nyeruku ko. Da sagar ngoit kendi ye be isi danum na oit te peluke da. Dasu da iro belalu alan litep tong suang belai ye na asuk da. 11Ukah iro ulek tong ka ulun ye pun belai iro, Guru kain ngulek engan ihe tong ka ko, da kakan ko petendre tong ka kain botuk olang ye, A'ap ali murid A'ap sagar man Paskah. 12Ye pun ye sagar ngoit ko tong dasei te mo'o belalu petendre erai olang ye solai ye siap di na pakai. Sedia pengokan te biduh.” 13Belalu dali tulak tong ja'a te biduh dali kite sameh ngunaw ye na ulek Yesus iro. Maka dali langsung nyedia pengokan di merayakan olo Paskah te biduh.
Penetapan Perjamuan Malem
(Mat. 26:20-29; Mrk. 14:17-25; Yoh. 13:21-30)
14Pas apu dini di wayah ye man pengokan Paskah, Yesus ali kawan rasul Da, tulak tong ka olang dasei ye mo'o belalu tue't te kursi ye na sedia te biduh. 15Ulek Yesus tong ka dali: “A'ap kakan bene man perjamuan Paskah ihe sendro kam semale A'ap menaya pelos mate. 16A'ap ngulek ngunaw he tong ka ko leka: A'ap sa kate li man pengokan Paskah ihe li empe maksud ye bene ye na peganap te suang Kerajaan Allah.” 17Ukah iro Da ngepe sangker ye be isi danum anggur te kami Da belalu Da mengucap Syukur tong ka Allah. Da ngulek tong kawan murid Da: “Epe a'a anggur ihe pelos bagi tong ka ye bali. 18Leka A'ap ngulek tong ka ko: A'ap sa sagar isep anggur ihe li empe Kerajaan Allah sulet.” 19Ukah iro Yesus ngepe wadai te kami Da belalu Da mengucap syukur tong ka Allah. Da nempikak wadai iro belalu ngokoi tong ka dali sambil ngulek: “Ihe lah wadai, unuk A'ap, ye na okoi A'ap tong ka ko. Ene ihe jaji peringatan akan A'ap.” 20Ngunaw cara ye sameh, ukah man malem, Yesus ngepe cawan pelos Da ngulek: “Cawan ihe lah perjanjian baru ye na ene Allah ali umat Da. Perjanjian baru ihe na mulai neke daya A'ap ye na curahkan jaji pengorbanan di engko.
21Tapi A'ap kakan kam awus ye ketoan kaye ulun ye sagar nyarah A'ap tong ka kawan musuh A'ap na'an te bihe man sendro A'ap. 22A'ap, Anak Meresia, dasar sagar mate ngunaw ye apu na rencana ene Allah. Tapi da'ai tong ulun ye nyarah A'ap tong ka kawan musuh A'ap!” 23Pas kawan murid Da keringa iro, dali mulai bekesituk pede dali nome te antara dali ye sagar ngene koe gawi jahat ngunaw ro.
Penyurah pas desung Perjamuan Malem
(Mat. 26:31-35; Mrk. 14:27-31; Yoh. 13:36-38)
24Ukah iro, kawan murid Da mulai be debat nome te antara dali ye harus na anggap murid ye paling penting. 25Yesus ngulek tong ka kawan murid Da: “Te denia ihe raja-raja ali kawan ulun solai kakan kekuasaan penuh te munan rakyat ye, belalu dali kakan na kenentaru jaji sahabat rakyat. 26Tapi ko beloh ahan jaji ngunaw dali. Sebalik ye, ulun ye paling be di te antara ko harus jaji ye sa be di. Ulun ye jaji pemimpin ko harus jaji ngunaw batak ripen ko. 27Leka ko ketoan kaye ulun ye be di iro ulun ye man te meja, beaw batak ripen ye ngoit pengokan ye. Tapi A'ap, pemimpin ko, apu ngokoi contoh tong ka ko pakai cara melayani ko pas A'ap kea te antara ko. 28Kam ihe lah kawan ulun ye apu nguyang A'ap pas kune wayah ye uyuh.” 29Belalu sameh ngunaw Allah Ma A'ap ye apu meli A'ap jaji Raja te munan Kerajaan Da, ngunaw ro ade A'ap meli ko jaji penguasa sendro A'ap te suang Kerajaan A'ap. 30Kaye ko, te suang Kerajaan A'ap, ko sagar man ali isep sendro A'ap te meja A'ap, belalu ko ade sagar tu'et te munan takhta-taktha di memerintah due belas suku bangsa te negara Israel.
31Ukah iro Yesus ngulek tong ka da Simon Petrus: Simon, Simon, dinga A'ap! Iblis apu be kuasa te munan ko awus ye di ngene ko sa percaya li tong ka A'ap. Da sagar mencobai ko ngunaw petani ye ngegiling gandum nepisah ye neke ensoi ye. 32Tapi A'ap apu bedoa di engko, Simon, supaya ko tatap be iman percaya tong ka A'ap. Aji, pas ko apu betobat belalu ngehadap A'ap li, ko harus ngawat erai butung ye bali di percaya tong ka A'ap ali setia tong ka A'ap. 33Tapi da Simon Petrus ngulek tong ka Yesus: “Tuhan, a'ap siap di litep tong ka suang penjara. A'ap ade siap mate sendro Ko!” 34Tapi Yesus ngulek: “Petrus, A'ap ngulek tong ka ko. Semale piak mengkoko pita tane, ko sagar ngulek tolu kali kaye ko sa ketaru ali A'ap.”
35Ukah iro Yesus nyituk tong ka kawan murid Da: “Pas A'ap nyiu ko tulak tong kawan ja'a di nyenghabar buen, ko tulak beloh ngoit dompet atawa tas pas tulak atawa ade sepatu serep, me na'an ye kurang?” Ulek kawan murid: “Sa, kain sa parlu se-se.” 36Ukah iro Yesus ngulek tong ka dali: “Tapi nehe deo ulun ngelawen taka. Koe iro, kaye ko be dompet atawa duit atawa tas, oit iro, Kaye ko beloh be pedang, jual a'a empeng ongon ko belalu pakai duit ye di moli pedang. 37Koe iro A'ap ngulek tong ka ko, te suang Kitab Suci Tuhan be engan tentang A'ap,
Da sagar na ene ngunaw erai ulun penjahat ye na hukum. Iro lah ye apu na tetapkan Tuhan harus terjadi tong ka A'ap.
Leka awus ye na tulis ene nabi sagar jaji kenyataan.”
Te taman Getsamani
(Mat. 26:36-46; Mrk. 14:32-42)
38Ukah iro kawan murid Da peteaw tong ka Da due ti pedang ye na oit dali. “Teneng he Tuhan kain be ihe.” Ulek dali. Belalu ulek Yesus: “Iro apu sukup di nan taka.” 39Ukah iro Yesus tulak neke ja'a Yerusalem belalu da tulak tong ka Bukit Zaitun ngunaw dati ye kawan murid Da ade tulak sendro Da. 40Pas dali empe te runa iro, Yesus ngulek tong kawan murid Da: “Bedoa a'a di Allah ngawat ko, supaya ko sa ngene dosa pas na cobai.” 41Ukah iro Yesus tulak gegales sa oro neke dali. Ukah iro da be sehujud pelos bedoa tong ka Allah. 42Ulek Da: “Ma A'ap, kaye Ko kakan epe a'a cawan menaya ihe neke A'ap. Tapi iya'a Ko ngene ko gawi ye na akan A'ap. Ene a'a se ye na akan Ko.” 43Ukah iro erai ti malaikat Allah timul tong ka Yesus belalu ngokoi kekuatan tong ka Yesus. 44Belalu pas Yesus desung nare aseng, Da bedoa bebujur, ye ngene laha Da lotu tong ka tana jaji ngunaw pitek daya. 45Pas Yesus punah bedoa, Da bu'et pelos da tulak tong runa kawan murid Da. Da kite dali desung turui leka dali tamam nare aseng. 46Belalu Yesus nemu'et dali pelos Da ngulek tong ka dali: “Se di kam turui? Bue'et apu pelos sung bedoa tong ka Allah supaya kam sa na cobai di ngene dosa.”
Yesus kune dakep
(Mat. 26:47-56; Mrk. 14:43-50; Yoh. 18:1-11)
47Pas Yesus desung besurah ali kawan murid Da, selenga mula sulet kawan ulun te biduh. Yudas, murid Yesus te antara due belas murid Da desung ngoit kawan ulun iro. Da neaw Yesus pelos da ngenok Yesus te kuyem. 48Tapi Yesus ngulek tong ka da: “Yudas, Tamam A'ap kesa nare aseng, leka ko ngenok A'ap sebagai salam di ngehianati A'ap, Anak Meresia.” 49Pas kawan murid Da ngerti se ye sagar terjadi tong ka Yesus, dali ngulek tong Yesus: “Tuhan, me harus kain ngelawen dali ihe ali pedang kain?” 50Semale Yesus nuing ye ye, erai ti murid Yesus langsung nyarang erai ulun neke hamba imam solai ali pedang pelos motek kelinge sila sanan ye. 51Tapi Yesus ngulek: “Iya'a ngene koe gawi iro li!” Ukah iro Da mege kelinge hamba iro pelos nawas ye.
52Yesus ngulek tong ka kawan pimpinan imam, ali kawan pengawal Bait Allah, nyang kawan tetuha ye sulet di ngedakep Da: “Ko ketoan kaye A'ap ihe ba penjahat, tapi ko sulet ngedakep A'ap ngoit pedang ali pentung. 53Tiap olo ko sendro A'ap pas A'ap ngajar te natar Bait Allah tapi ko sa ngedakep A'ap. Tapi pas ihe lah kesempatan ko pas Iblis makai kuasa kegelapan.”
Petrus nyangkal Yesus
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54Ukah iro kawan penjaga Belai Ibadah ulun Yahudi ngedakep Yesus pelos ngoit Da tong belai Imam Solai. Petrus ngedasu dali, tapi da sa ronu nyerani dali. 55Pas dali empe, kawan ulun ngene apui ye waha nete botuk natar. Ukah iro dali tu'et sendro te dani apui di pelayeng unuk. Da Petrus ade nyang litep tong suang natar belalu tu'et sendro dali. 56Pas da Petrus desung tu'et te biduh, erai ke ulun hamba bawe kite da Petrus desung tue'et dani apui. Bawe iro memperhati da, belalu bawe iro ngulek tong kawan ulun te sekelimpang da: “Me sa ulun ihe ade na'an sendro Yesus!” 57Ulek da Petrus tong bawe iro: “Ya a'ap empe sa ketoan nome Ulun iro.” 58Sa ola, na'an erai ulun kite da Petrus pelos ngulek: “Ko ihe ade erai ke ulun neke dali ye sendro ali Ulun ye na dakep ihe?” Tapi da Petrus ngulek: “Ya ba, a'ap ba ulun ye sendro dali!” 59Nete erai jam ukah iro, erai ulun li mengaras ngulek: “Ulun ihe pasti ye sendro Yesus, leka da ade ulun Galilea.” 60Tapi da Petrus ngulek: “Temangung, a'ap sa ketoan se ye na maksud ko iro!” Desung iro ade, pas Petrus desung besurah, erai ti piak mengkoko. 61Pas desung iro ade Tuhan Yesus ngelap da Petrus. Belalu da Petrus kingat ye na ulek Tuhan tong ka da malem iro: “Semale piak mengkoko pita tane, ko sagar ngulek tolu kali, kaye ko sa ketaru ali A'ap.” 62Pas da Petrus kingat iro, da losek neke natar iro pelos da ngerodoi.
Yesus te one wae Mahkamah Agung
(Mat. 26:63-68; Mrk. 14:60-65; Yoh. 18:19-24)
63Ukah iro kawan pengawal ye iro ngekupe Yesus belalu mupuk Da. 64Dali nalep mate Yesus ali empeng belalu dali ngulek tong ka Da: “Petendre tong ka kain kaye ko ihe erai ke ulun nabi. Ulek tong ka kain nome ye mupuk ko!” 65Dali ngekupe Yesus ali engan-engan dali.
66Pas olo dini di jolo, kawan tetuha bangsa Yahudi ngene rapat. Kawan pemimpin iro ali kawan pimpinan imam nyang Pengajar hukum Musa. Ukah iro Yesus na oit tong ka one wae dali. 67Belalu dali nyituk tong ka Yesus: “Ulek tong ka kain! Me ko ihe Mesias!” Tapi Yesus ngulek tong ka dali: “Mele A'ap ngulek A'ap ihe Mesias, ko pasti sa sagar percaya se ye na ulek A'ap.” 68Belalu kaye A'ap nyituk tong ka ko, ko sa sagar ngejawab A'ap. 69Tapi sa ola, A'ap Anak Meresia sagar tu'et te runa ye na hormati belalu kekuasaan te sila sanan Allah ye Mahakuasa. 70Ukah iro dali awus ye nyituk tong ka Yesus: “Aji, me ko ihe Anak Allah?” Ulek Yesus: “Ko apu ngulek ye kune kaye A'ap ihe lah Anak Allah.” 71Ukah iro dali besurah pede dali: “Taka ley apu ngeringa se ye na ulek Da tentang Da ley! Aji, taka sa parlu ulun bali di besaksi tentang Da!”
Currently Selected:
Lukas 22: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
