Lukas 21
21
Persembahan erai balu ye susah
(Mrk. 12:41-44)
1Pas Yesus ali kawan murid Da kea te natar Belai Ibadah ulun Yahudi, Yesus neaw te sekeliling Da, belalu da kite kawan ulun sugih ye pelitep duit dali tong suang kutak persembahan Bait Allah. 2Ukah iro Yesus kite erai ulun balu ye susah sulet. Balu iro ngokoi persembahan 2 kapeng duit tembaga ye sa beka be di. 3Ulek Yesus tong ka kawan murid Da: “Sebujur ye se ye na okoi balu ye susah ihe lebih be di te one wae Allah dari pada kawan duit ye na okoi ulun bali. 4Leka ye bali ngokoi persembahan dali tong ka Tuhan ye lewi daeh neke pengentatau dali. Tapi balu ye susah bene iro, ngokoi tong ka Tuhan awus kawan duit ye na pakai da di betahan te pemolum da.”
Belai Ibadah ulun Yahudi sagar na peruntun
(Mat. 24:1-2; Mrk. 13:1-2)
5Ukah iro, kawan murid Da besurah tentang runa ngonok persembahan ye na ulek Bait Allah ulek dali: “Teneng hiasan kawan batu te Belai Ibadah ulun Yahudi ye bungas ihe! Ade, teneng kawan hadiah ye na persembahankan ulun tong ka Allah di ngehias ye!” Tapi ulek Yesus. 6“A'ap ngulek tong ka ko ye na ite ko ihe. Sagar na'an wayah ye te kame beloh erai batu ye sagar be sisa. Awus batu iro sagar na peruntun.”
Ke tela ye menaya
(Mat. 24:3-14; Mrk. 13:3-13)
7Ukah iro kawan murid Da nyituk tong ka Da: “Guru, kede me Belai Ibadah ulun Yahudi iro sagar na peruntun belalu se siri tong ka kain kaye iro sagar terjadi?” 8Ulek Yesus: “Bebuen supaya ko sa na peta'ang ulun. Leka deo ulun sagar sulet makai aran A'ap. Dali sagar ngulek A'ap ihe Mesias! Belalu Pas desung iro ade ahir denia ihe sagar punah. Iya'a percaya se ye na ulek dali! 9Tapi, pas ko keringa tentang perang ali pemberontakan, iya'a ko takut koe iro pasti terjadi, tapi ukah iro beloh ye sulet.”
10Ukah iro, Yesus ngulek tong dali: “Kawan ulun neke erai negara sagar nyarang kawan ulun neke negara bali. Kawan raja ali pasukan da sagar perang ngelawen kawan raja ali pasukan bali. 11Te runa ye bali te denia ihe, bumi sagar begunsang tamam, wayah lau ye moko akut sagar sulet, belalu kawan penyakit parah sagar tesebar lekah tong kawan ulun deo. Awus le'en siri ye moko akut belalu ye menakjubkan sagar terjadi te surga. 12Tapi, semale iro terjadi, kawan ulun sagar ngedakep ko belalu nguro ko, Dali sagar nenes kawan ulun te antara ko nete belai ibadah ulun Yahudi belalu sagar na pelitep tong suang penjara. Ko sagar na oit tong one wae kawan raja ali kawan penguasa leka ko iro kawan murid A'ap. 13Ihe sagar ngokoi ko kesempatan di besaksi tong ka dali tentang A'ap. 14Koe iro ya na keno tentang ngunaw me cara ye ngamar ko ley-ley. 15Leka A'ap sagar ngokoi ko hikmat di ketoan se ye harus na ulek ko. A'ap be janyi kaye beloh erai ti ulun ye kate nenes ko atawa ngelawen ko ali pesala ko. 16Kam sagar na sarah ulun tuha kam, erai butung kam, ali kawan uyang kam, ye sagar nyarah ko tong ka penguasa, belalu penguasa iro sagar munu nete antara ko. 17Awus kawan ulun sagar sa ketuju ali kam leka kam iro murid A'ap. 18Tapi Tuhan sagar durung ko neke bahaya ye kekal. 19Kaye ko betahan suang wayah iro sa ngelapas iman ko tong ka A'ap, Allah sagar ngokoi bolum ye kekal.”
Wayah ye Yerusalem runtun
(Mat. 24:15-21; Mrk. 13:14-19)
20Ukah iro Yesus nempelos paneran Da: “Pas ko kite ja'a Yerusalem ye na kepung ene tentara musuh, maka ko kate yakin kaye tentara iro sagar pehansur ye. 21Pas wayah iro, ko ye nono nete daerah provinsi Yudea harus buyo tong ka gunung pelos mensiok. Ko ye nono nete ja'a Yerusalem harus tulak ke ro, belalu ko ye nono te ume iya'a budas litep tong suang ja'a. 22Leka pas desung iro Tuhan sagar ngehukum kawan ulun ye te ja'a Yerusalem. Hukuman ihe sagar na peganap awus ye na tulis kawan nabi ali te suang Kitab Suci. 23Ihe sagar jaji olo ye moko akut tong ka kawan bawe ye entung atawa ye desung petete tia mea! Leka kawan ulun sagar kesa menaya tamam bene nete tana Yudea leka hukuman Tuhan tong ka dali. 24Belalu deo ade dali ye kune bunu tentara pakai pedang, belalu ye bali ye ade sagar na dakep na oit tong negara-negara. Kawan ulun ye ba ulun Yahudi sagar nengkaleh Yerusalem pelos nguro kawan ulun empe wayah ye na rencana Allah di dali uwa merentah ye.
25Ukah iro, na'an siri ajaib sagar terjadi te ma'te olo, bulan ali kawan setua ye petendre kaye denia ihe apu dani. Kawan ulun nete denia ali kawan bangsa ihe sagar ngeno ye belalu bingung leka na'an engan rawek danum neke laut. 26Kawan ulun sagar tiras leka takut pas dali ngema bencana ye moko akut ye sagar terjadi te denia. Leka awus bana ye te langit sagar na gunsang. 27Pas desung iro ade, A'ap Anak Meresia sagar petendre unuk A'ap tong ka awus kawan ulun. A'ap sagar sulet te munan ja'un ye nelang petendre kuasa ye solai nyang kemulian ye solai ade. 28Pas desung iro ade, alan jakat ali pengeronu, pelos engkat utek ko supaya ko yakin. Leka Tuhan sagar ngawat ko neke menaya.”
Paribasa tonga ara
(Mat. 24:29-35; Mrk. 13:24-31)
29Ukah iro, Yesus bekisah paribasa tong dali di ngejelaskan akhir zaman. Ulek Da: “Belajarlah neke tonga ara atawa tonga bua ye bali. 30Pas kawan ulun kite daon-daon ye apu timul, dali kate neaw dali leyley belalu dali ketoan kaye apu di wayah ye kemarau. 31Ngunaw cara ye sameh ade, pas ko kite iro ye moko akut ihe terjadi, ko harus ketoan kaye Kerajaan Allah sagar sa ola sulet. 32A'ap ngulek tong ka ko, sebujur ye awus kawan ulun ye bolum nehe pasti sa sagar mate semale iro terjadi. 33Bumi ali langit nene ye sagar jaweh. Tapi, engan ye na ulek A'ap sagar jaji kenyataan empe kengola ye.
Nasehat supaya was-was
34Tapi bebuen ali cara bolum ko, iya'a ngobet waktu ko di gegeh-gegeh, mabuk-mabukan, belalu ade iya'a ngeno masalah-masalah suang pemolum ko. Kaye sa, ko sagar sa siap pas A'ap sulet li leka olo iro sagar sulet tong ka ko ye mula sulet ngunaw jeret ye mula bokas tong ka setua. 35Awus kawan ulun nete denia sagar kune pengaruh ye, pas te olo iro. 36Harus siap sedia! Bedoa tarus di Tuhan ngawat ko nyelalo hal-hal ye da'ai ye sagar terjadi belalu ukah iro ko kate ngehadap dali ponu arai ego te one wae A'ap, Anak Meresia pas te olo penghakiman.”
37Pas botuk olo Yesus ngajar nete natar Bait Allah, belalu tiap malem Da tulak tong ka ongon ja'a belalu onsan te bukit ye na otus Bukit Zaitun. 38Belalu deo kawan ulun sulet pas pita ye di ngeringa Yesus ngajar nete natar Bait Allah.
Currently Selected:
Lukas 21: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
