Lukas 20
20
Se iro kuasa Yesus
(Mat. 21:23-27; Mrk. 11:27-33)
1Pas te olo ye bali, Yesus desung ngajar kawan ulun te Bait Allah, Da ngulek tong ka dali Habar Buen tentang Kerajaan Allah. Na'an ade kawan pimpinan imam, ali pengajar hukum Musa, ali kawan tetuha ngehadap Da. 2Dali nyituk tong ka Yesus: “Se hak Ko di ngene koe gawi ihe? Nome ye nyiu Ko ngene ye?” 3Ulek Yesus tong ka dali: “A'ap ade kakan nyituk tong ka ko dile.” 4Da nyituk tong ka dali me Allah nyiu da Yohanes ro di ngebaptis ulun atawa ulun bali ye nyiu da. 5Dali besurah pede dali ley: “Kaye taka ngulek Allah nyiu da Yohanes di ngebaptis ulun, pasti Da sagar nyituk tong ka taka, Belalu se di ko sa percaya ali da Yohanes?” 6Tapi kaye taka ngulek meresia ye nyiu da Yohanes di ngebaptis ulun, maka kawan ulun Yahudi sagar nurak taka. Ali batu belalu ngebunu taka. Leka awus kawan ulun percaya kaye da Yohanes iro erai ke ulun nabi. 7Belalu dali ngulek tong ka Yesus: “Kain sa ketoan nome ye ngokoi hak tong ka da Yohanes di ngebaptis ulun.” 8Ulek Yesus. “Leka ko noi ngejawab engan A'ap, A'ap ade noi ngulek tong ka ko nome ye ngokoi kuasa tong ka A'ap di ngene koe gawi ihe.”
Paribasa se iro petani-petani kabun anggur
(Mat. 21:33-46; Mrk. 12:1-12)
9Ukah iro, Yesus bekisah paribasa ihe tong ka kawan ulun deo: “Na'an erai ulun ye be kabun anggur. Ukah iro da pesewa ye tong ka petani bali. Ukah iro da tulak tong negeri ye bali pelos nono te biduh ola bene. 10Pas apu empe ye wayah di nginuk bua anggur, ulun ye pun kabun nyiu erai ulun batak ripen tulak tong ka kawan petani ye, di ngokoi hasil neke bua anggur ye na hasilkan neke kabun anggur iro tong ka ulun ye pun ye. Tapi, pas empe biduh, kawan petani iro nanga mupuk da dali ade ngusir da empe erai ti gin sa dali ngokoi. 11Ukah iro, ye pun kabun iro nyiu batak ripen da ye bali di ngepe hasil anggur iro. Tapi, batak ripen iro ade kune pupuk dali ade, na pe da'ai, belalu na siu uli beloh ngoit me-me. 12Da nginam li ngirim batak ripen da ye ketolu, belalu kawan petani iro nanga magin tamam penare ye, dali ade ngusir ye empe losek ke kabun anggur iro. 13Aji ye pun kabun anggur iro bepikir, A'ap ketoan se ye harus na ene a'ap. A'ap sagar ngirim anak upo a'ap ye tungal ye paling na sayang a'ap. Pasti dali sagar ngehormati da.” 14Aji ye pun kabun iro nyiu anak da tulak. Tapi pas kawan petani iro kite anak ye pun kabun iro sulet, dali ngene rencana pede dali, ulek dali: “He ulun ye sagar ngewaris kabun ihe. Yu taka munu da ihe di kabun ihe jaji ampun taka.” 15Kawan petani iro munu anak ye pun kabun anggur iro. Ukah iro Yesus nyituk: “Nehe ulek tong ka A'ap, se ye sagar na ene ulun ye pun kabun anggur iro tong kawan petani iro pas da ketoan se ye na ene dali?” 16Da ye pun kabun iro pasti langsung munu kawan petani iro, ukah iro da ngokoi kabun anggur tong ka ulun bali. Pas kawan ulun keringa paribasa neke Yesus iro, dali ngulek: “Iya'a empe jaji ngunaw paribasa iro!” 17Yesus neaw dali pelos Da nyituk,
“Kaye ko ngulek hal ihe beloh ahan terjadi, belalu se maksud ye pas Allah ngulek te suang Kitab Suci tentang Mesias,
Da ngunaw batu ye na obet kawan tukang bangunan, tapi Allah pejaji ye batu ye paling penela pas nemuet belai iro?
18Ulun ye sa nerima Mesias iro ngunaw ulun ye lotu te munan batu solai. Da sagar hansur bekeping-keping. Atawa da ngunaw ulun ye lotu neke munan batu solai. Da sagar hansur beloh be sisa.”
19Kawan pengajar hukum Musa ali kawan pimpinan imam sadar kaye Yesus bekisah paribasa iro di ngelawen dali. Aji, dali kakan ngedakep Yesus pas desung iro ade. Tapi dali sa ronu ngedakep ye leka takut kawan ulun ye deo nyarang dali.
Ngebayar pajak tong ka Kaisar
(Mat. 22:15-22; Mrk. 12:13-17)
20Ukah iro, kawan pimpinan imam ali kawan pengajar hukum Musa ngeto wayah ye pas di ngedakep Yesus. Dali ngebayar kawan ulun di ngopaw Yesus pura-pura jaji ulun ye jujur. Dali kakan ngejebak Yesus ali engan Da di dali kate nyarah Da tong ka penguasa ye be kuasa di ngehukum ye. 21Ukah iro kawan ulun iro nyituk tong ka Yesus: “Guru, kain ketoan kaye se ye na ajar ko iro kune belalu Ko sa mihak tong antara dali. Ko tuju ngajar ye kune tentang se ye na akan Allah di meresia ngene ko gawi. 22Nehe, ulek tong kain. Ngunaw hukum taka, me bene si sala kaye taka ngebayar pajak tong ka Kaisar Romawi?” 23Tapi Yesus ketoan kaye kawan ulun iro kakan ngejebak Da. Aji, ulek Da tong ka dali. 24“Petendre logam Romawi ye na pakai di ngebayar pajak. Ulek tong ka A'ap gamar ali aran nome ye na tulis ti biro?” Gamar ali aran da Kaisar Romawi, Ulek dali. 25Ukah iro ulek Yesus tong ka dali: “Kaye ngunaw ro, bayar a'a tong ka Kaisar Romawi se ye jaji hak da belalu ade okoi tong ka Allah se ye jaji ampun Allah.” 26Aji, Kawan ulun iro beloh kate ngejebak Yesus ali engan dali te one wae kawan ulun deo. Dali empe enteng lian kemawah keringa se ye na ulek Yesus tong ka dali.
Ulun Saduki nyituk tentang Bolum li ali penganten
(Mat. 22:23-33; Mrk. 12:18-27)
27Ukah iro, kawan ulun Saduki sulet nyeruku Yesus. Kawan ulun ihe sa percaya kaye Tuhan sagar ngene ulun bolum ro mulik ukah dali mate. 28Dali nyituk tong ka Yesus: “Guru, suang hukum Musa ye na tulis da di nan taka, kaye erai butung upo mate ngikah sao ye beloh be anak, maka erai butung da harus peruku ali balu iro di be anak neke upo iro. Tia upo ye penela sagar na anggap anak neke erai butung upo ye mate iro.” 29Aji, nehe, na'an turu ti erai butung. Tuken ye penuha peruku ali bawe tapi da beloh be anak belalu ukah iro da mate. 30Belalu erai butung upo ye kedue peruku ali balu iro tapi sika sameh beloh be anak ukah iro da mate ade. 31Ukah iro, erai butung ye ketolu peruku ali bawe iro sika sameh ade, Ahir ye, turu ti erai butung iro peruku ali bawe iro belalu awus dali mate beloh be anak. 32Ahir ye, bawe iro mate ade. 33Aji nehe, ulek tong ka kain, koe turu ti erai butung iro apu peruku ali bawe iro, erai butung ye hame ye sagar jaji sao ye pas awus kawan ulun ye mate iro bolum li? 34Ulek Yesus: “Nete denia ihe, kaye upo ali bawe ro peruku iro normal. 35Tapi kawan ulun ye na anggap Allah ro layak di na temolum neke kepatean belalu bolum te surga sa sagar peruku. 36Belalu dali sa sagar mate li. Dali sagar ngunaw malaikat belalu sagar jaji anak-anak Allah, leka dali apu na temolum neke kawan ulun mate. 37Belalu, ko sala kaye bepikir kaye ulun mate sa kate bolum li. Koe te suang Kitab Suci, da Musa nulis se ye na ulek Allah tong ka da neke dui ye dolan. Te biduh, Allah ngotus Da leyley sebagai Allah Abraham, Allah Ishak ali Allah Yakub. 38Aji, Da ba Allah di pun kawan ulun ye apu mate. Tapi, Da iro Allah neke kawan ulun ye bolum. Di na Allah, awus kawan umat Da ye kea Bolum.” 39Ukah iro kawan pengajar hukum Musa ye na'an te biro ngulek: “Tuingan ko buen bene, guru” 40Ukah iro, dali sa ronu nyituk tong ka Yesus.
Hubungan Yesus ali Daud
(Mat. 22:41-46; Mrk. 12:35-37)
41Ukah iro Yesus nyituk tong ka kawan ulun ye na'an te biduh, Se maksud kawan guru ko pas dali ngulek kaye Mesias iro Keturunan Daud? 42Suang kitab mazmur, ulek Raja Daud ley,
Allah ngulek tong ka Tuhan a'ap. Ulek Tuhan: “Yu, tu'et te bihe, te sila sanan A'ap, te runa ye paling mulia.
43Pas A'ap ngelawen kawan musuh ko. A'ap sagar ngene dali jaji gaer tong ka ko.”
Yesus nguni di bebuen ali kawan pengajar hukum Musa
(Mat. 23:5-7; Mrk. 12:38-40)
44Aji, kaye Mesias dasar bujur turunan Raja Daud, se di Daud no'ok “Tuhan?” 45Ukah iro Yesus besurah tong ka kawan murid Da belalu awus kawan ulun ngeringa Da. 46Bebuen di sa ngene ko gawi ngunaw kawan pengajar hukum Musa. Dali kakan kawan ulun ye te pasar-pasar iro ngehormati dali. Dali ade kakan tu'et te runa ye paling penting nete kawan belai ibadah ulun Yahudi ali kakan na hormati te runa kawan acara-acara. 47Dali ngepe harta kawan balu iro, belalu dali bedoa panyang bene supaya kawan ulun ngomon kaye dali iro ulun ye bene. Allah sagar ngehukum kawan ulun ihe doyat eso neke ye bali.
Currently Selected:
Lukas 20: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
