Lukas 19
19
Da Zakheus tukang tagih pajak
1Ukah iro, Yesus ali kawan murid Da empe te ja'a ye be aran Yerikho pelos lalo ro. 2Te biro na'an erai ke ulun upo be aran Zakheus, da iro ulun tukang tagih pajak da ade ulun ye sugih. 3Pas Yesus nyelalo ja'a, da Zakheus kakan bene kite nome Yesus iro, tapi da sa kate kite leka unuk da udok nelang deo bene ulun ye ngerumung Yesus. 4Aji, da Zakheus mensit nyempone kawan ulun ye ngerumung Yesus iro belalu da mengket tonga ara di da kate neneng Yesus leka Yesus sagar lalo ro. 5Pas Yesus empe tonga ara iro, da neneng pelos Da ngulek tong ka da Zakheus: “Zakheus, golek dolui ke tonga kayu iro, leka A'ap kakan onsan te belai ko malem he.” 6Belalu, da Zakheus dolui ke tonga ara iro pelos da ngoit Yesus tong belai da sambil arai ego. 7Pas kawan ulun te biduh kite Yesus tulak tong belai da Zakheus, dali nyentiko Yesus ulek dali: “Da tulak tong belai ulun ye bedosa.” 8Tapi da Zakheus jakat sambil da ngulek tong ka Tuhan Yesus: “Dinga ihe, Tuhan. A'ap sagar ngokoi setengah harta a'ap tong ka kawan ulun susah, belalu kaye a'ap pini ngakal ulun, A'ap sagar nempuli ye opat pulu kali lipat neke jumlah ye penela.” 9Ukah iro ulek Yesus tong ka da: “Olo ihe, Allah apu ngawat ko ali erai butung ko neke dosa-dosa, leka ko ihe turunan da Abraham 10Leka A'ap, Anak Meresia, sulet tong denia di ngeto dali ye jaweh pelos ngawat dali neke hukuman kawan dosa ye na ene dali.”
Paribasa se iro 10 duit mina
(Mat. 25:14-30)
11Pas kawan ulun deo keringa se ye na ulek Yesus. Yesus bekisah li erai ti paribasa tong ka dali leka dali apu dini empe te ja'a ye be aran Yerusalem, kawan ulun ye deo iro ade ngomon kaye Kerajaan Allah sagar timul pas Yesus litep tong suang ja'a iro. 12Ulek Yesus tong ka dali: “Na'an erai ke ulun bangsawan tulak tong negeri ye oro di jaji raja di biduh, Belalu ukah da jaji raja, da mulik tong negeri da, di jaji raja. 13Tapi semale tulak, da nyiu sepuluh ulun batak ripen da pelos da ngokoi logam amas ye be uman sameh ngunaw gaji dali.” Ulek da tong ka dali: “Pakai ihe di ngatek duit ye deo eso di na'ap empe a'ap mulik li.” 14Tapi kawan ulun nete daerah iro sa rigi ali da, ye ngene dali ngirim ulun di ngulek tong ka kaisar: “Kain noi ulun ihe jaji raja kain.” 15Tapi, kaisar meli da jaji raja ukah iro da mulik tong belai. Da kakan ketoan senu ye apu na ahan dali neke duit iro. 16Batak ripen ye penela sulet belalu ngulek tong ka da: “Temangung, a'ap apu mahan sepuluh ti logam amas ke logam ye na okoi ko tong a'ap.” 17Ulek raja iro tong ka da, Ko ihe batak ripen ye buen belalu ko apu ngene koe gawi ye buen. Leka ko apu peteneng ye a'ap kate percaya tong ka ko mele iro koe gawi ye halus ye na okoi a'ap tong ka ko, aji a'ap sagar ngokoi kuasa di merentah sepuluh ja'a. 18Belalu batak ripen ye kedue sulet tong ka da ulek ye: “Temangung, a'ap apu mahan lime ti logam amas neke logam ye na okoi ko tong ka a'ap.” 19Ulek raja iro, A'ap ngokoi ko kuasa di merentah lime ti ja'a. 20Ukah iro batak ripen ye ketolu sulet pelos ulek da, Temangung, duit amas ko na'an te bihe. A'ap apu ngonteh ye di aman te suang erai ti empeng ihe. 21A'ap ngetehe leka a'ap sa ronu ali ko leka ko ulun ye keras. Ko ade ngepe duit ye ba ampun ko belalu ko nginuk hasil ye sa na hamur ko. 22Ulek Raja iro ap sagar ngehakimi ko ali engan ko ley. Hai batak ripen ye sa ngeringa engan a'ap! Ko ley ye ngulek kaye a'ap ihe ulun ye sa ngeringa, belalu a'ap ngepe ampun ulun bali ye sa na kumpul a'ap belalu ngepe hasil ye lain na ule a'ap. 23Kaye ngetro, se di ko sa ngonok duit a'ap te ulun ye tau mege duit ye? Kaye ko ngene koe gawi iro, di pas a'ap mulik li, a'ap sagar nerima duit a'ap na'an untung ye. 24Ukah iro ulek raja iro tong ka kawan ulun ye desung jakat te dani da, Epe a'a duit amas iro belalu okoi tong ka batak ripen ye be sepuluh ti duit amas. 25Tapi kawan batak ripen iro ngulek tong ka da: Tapi raja, batak ripen ihe apu be sepuluh ti kapeng duit amas! 26Raja ngulek, a'ap ngulek tong ka ko, ulun ye kate na percaya sagar na okoi deo eso. Tapi ulun ye sa kate na percaya, mele ye dis apu na okoi tong ka da sagar na epe ke da. 27Tapi kawan musuh a'ap ye sa hakun a'ap jaji raja dali, oit dali tong ka he belalu bunu dali te one wae a'ap.
Yesus na amung te ja'a Yerusalem
(Mat. 21:1-9; Mrk. 11:1-10; Yoh. 12:12-15)
28Ukah Yesus ngulek awus ye iro, Da ali kawan murid Da tulak tong ja'a Yerusalem.
29Pas dali apu dani te ja'a ye be aran Betfage ali Betania, te dani gunung Zaitun, Yesus no'ok due ti murid Da belalu Da ngulek tong ka dali. 30Ulek Da tong dali: “Alan tulak tong ka ja'a ye te one ko. Pas ko empe te biduh, ko sagar kite erai ti anak keledai bujang ye na suruk te biduh. Beloh erai ye pini nungang ye. Lapas ko ye penyuruk ye belalu oit tong ka he. 31Kaye na'an ulun nyituk tong ko: ‘Se di ko ngelapas ye?’ Ulek tong ulun iro: Tuhan kakan makai ye.” 32Ukah iro, tulak due ti murid Yesus ye na siu Da iro belalu dali kite se ye na'an te biduh sameh ye na ulek Yesus tong ka dali. 33Pas dali ngelapas penyuruk anak keledai iro. Ye pu'un ye nyituk tong ka dali se di kam ngelapas penyuruk ye iro. 34Ulek dali: “Tuhan kakan nungang ye.” 35Ukah iro, dali ngoit anak keledai iro tong Yesus belalu ngonok empeng te munan keledai iro, ukah iro dali ngawat pekengket Yesus tong munan ye. 36Pas Yesus nungang keledai ye, kawan ulun ngonok empeng dali te alan nete one wae Da di menghormati Yesus. 37Pas Yesus desung malan, Da empe Bukit Zaitun te alan di dolui saing nuju Yerusalem. Pas dali sendro malan awus kawan murid Da langsung be nyanyi wale sambil arai ego, memuji Tuhan leka awus mujizat ye luar biasa leka kite se ye na ene Yesus luar biasa. 38Ulek dali:
“Na berkatilah Da ye sulet na ulek Raja ali kuasa Allah. Mudahan na'an damai sejahtera ali Allah te surga mudahan ade na'an kemulian neke Allah ye bolum te surga.”
39Na'an kawan ulun Farisi te pulau ulun deo iro ngulek tong ka Yesus: “Guru, ulek tong ka kawan murid Ko di dali sa ngulek hal-hal iro.” 40Ulek Yesus tong ka dali: “A'ap ngulek tong ka ko, kaye kawan murid A'ap sa memuji A'ap, maka kawan batu ihe sagar ngeraring memuji A'ap!”
41Pas Yesus apu dini ali ja'a Yerusalem Da neaw ye. Da nare aseng kite kawan ulun te ja'a iro. 42Ulek Da: “Hai kam kawan ulun Yerusalem, kajaka bangsa ko ketoan olo ihe se ye sagar ngoit kedamaian tong dali! Tapi nehe ko sa kate ketoan. 43Leka sagar na'an wayah uyuh ye kune ko. Pas desung iro, kawan musuh ko sagar nemuet dining te keliling ko, dali sagar ngerubut ko. Ukah iro dali sagar nyarang neke awus sisi ye. 44Dali sagar perata ja'a ko ali tana belalu munu awus kawan ulun, dali ade sa sagar pedion erai batu ye be onok te munan batu ye bali. Awus ye ihe sagar terjadi tong ka ko leka ko sa memperhati pas desung Allah peteaw belas kasih Da tong ka ko.”
Yesus pesuci Belai Ibadah atawa Bait Allah
(Mat. 21:12-13; Mrk. 11:15-18; Yoh. 2:13-16)
45Ukah iro Yesus litep tong ja'a Yerusalem belalu litep tong natar Bait Allah. Ukah iro Da ngusir kawan ulun ye desung be dagang te biro. 46Ulek Yesus tong ka dali: “Na'an na tulis te Kitab Suci: Bait Allah harus jaji runa di bedoa. Tapi ko pejaji ye ngunaw liang perampok.”
47Ukah iro, Yesus ngajar ulun deo tiap olo nete natar Bait Allah. Tapi kawan pimpinan imam ali kawan pengajar hukum Musa, sendro pimpinan kawan ulun Yahudi, ngeto cara di munu Yesus 48Tapi, beloh mahan cara di ngene koe gawi iro, leka awus kawan ulun ngeringa Yesus belalu memperhati Da.
Currently Selected:
Lukas 19: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
