Lukas 1
1
Pendahuluan
1Teofilus ye mulia, deo ulun ye apu nulis se ye terjadi te antara kain. 2Dali apu nulis kawan kisah iro tong ka taka. Kawan ulun iro apu na'an te biduh akat tela pas kejadian iro, belalu dali ngisah iro tarus akat iro. 3A'ap ley ye apu ngentoan sendro se ye terjadi akat tela. Aji a'ap ngepe keputusan kaye a'ap ade harus nulis laporan ye be urutan di engko. 4A'ap kakan ko ketoan kaye se ye apu na kisah kawan ulun tentang Yesus iro bene.
Malaikat Nyenghabar kelahiran da Yohanes Pembaptis
5Pas da Herodes merentah te provinsi Yudea, erai ulun imam Yahudi ye be aran Zakharia nono te biduh. Da iro kelompok imam Abia. Da ali sao da ye be aran Elisabet iro turunan imam penela Israel ye be aran Harun. 6Da Zakharia ali da Elisabet iro ulun ye bene te one wae Allah. Belalu dali due ade taat ali perentah Allah. 7Belalu, dali due beloh pini be anak leka da Elisabet mandul nelang apu tuha bene.
8Pas di kune wayah kelompok imam Zakharia mahan giliran begawi te Bait Allah te ja'a Yerusalem. Ukah iro da Zakharia begawi te biduh jaji imam te one wae Allah. 9Apu jaji kebiasan kawan imam di ngepe undian pelos meli nome ye sagar litep tong suang Bait Allah di nyuru dupa. Pas desung iro ade ye kune peli da Zakharia. 10Pas da Zakharia nyuru dupa, deo kawan ulun te natar Bait Allah desung bedoa tong ka Tuhan. 11Pas da Zakharia desung te suang Bait Allah, erai ti malaikat ye na siu Tuhan petendre unuk ye tong ka da Zakharia te sila sanan mezbah dupa. 12Pas da Zakharia kite malaikat iro, da tengkejet nelang takut-takut. 13Tapi malaikat iro ngulek tong ka da: “Zakharia, iya'a takut, leka Allah apu ngeringa doa ko ali sao ko da Elisabet iro, sagar be erai ti anak upo. Ko harus ngokoi aran ye Yohanes. 14Anak upo ko sagar ngoit arai ego ali sanang tong ka ko belalu ade kawan ulun bali ye sagar nyang ego leka da lahir. 15Leka da sagar jaji ulun ye solai te one wae Tuhan. Aji, da beloh ahan isep pengisep anggur ye na tembenes atawa isep pengisep alkohol bali ye. Da sagar na temponu koe Roh Kudus akat da te suang butung ne'e da. 16Da sagar ngoit kawan ulun Israel di uwa ngene dosa ali ngeringa se ye na ulek Tuhan Allah dali. 17Da sagar pesiap kawan ulun di penyulet Tuhan ali kuasa ye sameh ngunaw da Nabi Elia. Da sagar ngoit damai te suang ate ma ali anak da, belalu da sagar ngubah kawan ulun ye sa patuh di nerima hikmat ilahi. Da ngene koe gawi ye di kawan ulun jaji siap sedia pas Tuhan sulet.” 18Ukah iro da Zakharia ngulek tong ka malaikat iro: “A'ap apu tuha bene, belalu sao a'ap ade apu tuha bene ye ngene da beloh kate be anak. Aji, ngunaw me a'ap kate percaya kaye se ye na ulek ko iro sagar bujur-bujur terjadi.” 19Malaikat iro ngulek tong ka da: “A'ap ihe malaikat Gabriel belalu a'ap jakat te one wae Allah di ngelayani Da. Allah apu nyiu a'ap di ngoit habar buen ihe tong ka ko tentang anak ko. 20Tapi dinga ihe. Ko sagar jaji ongo beloh kate besurah empe anak ko lahir. Ihe sagar terjadi leko ko sa percaya ali se ye na ulek a'ap tong ka ko. Awus ye apu na ulek a'ap sagar terjadi pas wayah nene.” 21Pas desung da Zakharia ali malaikat besurah te suang Bait Allah, kawan ulun nete natar ngema da Zakharia losek. Dali nyituk se di da ola bene te suang bait suci. 22Pas da Zakharia losek neke Bait Allah, da beloh kate besurah tong ka dali. Ukah iro kawan ulun ketoan kaye da ukah kite pengite neke Tuhan te bait suci leka da ngode pakai kami tong ka dali tapi sa tau be engan atawa ongo. 23Pas pelayanan da te olo minggu te Bait Allah apu punah, da uli tong belai da te provinsi Yudea.
24Ukah iro, sao da Zakharia, da Elisabet entung, da ade lime bulan kengola ye da beloh pini tulak tong ka pulau kawan ulun deo. 25Ulek da: “Tuhan apu ngokoi a'ap erai ti anak. Da apu buen tong ka a'ap Da ade apu pejaweh mangen te a'ap tong ka kawan ulun leka a'ap beloh be anak.”
Malaikat Nyenghabar tong ka da Maria kaye Yesus sagar lahir
26Pas da Elisabet desung entung onum bulan kengola ye, Allah nyiu malaikat Gabriel tong ja'a ye be aran Nazaret provinsi Galilea. 27Tong ka runa bawe lolang ye be aran Maria. Da Maria desung tunangan ali erai ti upo ye be aran Yusuf, turunan Raja Daud. 28Malaikat iro litep tong suang belai pelos ngulek: “Arai ego tong ka ko Maria. Tuhan buen bene tong ka ko. Tuhan nyendro ko di ngeberkati ko.” 29Tapi pas da Maria keringa se ye na ulek malaikat iro, da tengkejet. Ulek da te suang aseng: “Se arti ye na ulek iro.” 30Belalu malaikat iro ngulek tong ka da: “Iya'a takut, hai Maria. Leka Allah apu ngeberkati ko. 31Dinga ihe. Ko sagar entung pelos belolos tia upo. Ko harus ngokoi aran ye Yesus. 32Da sagar be kuasa belalu Da sagar na taru ulun sebagai Anak Allah ye Mahaemo. Tuhan Allah sagar pejaji Da Raja te munan umat Da ngunaw ye apu na janyi Da tong ka ulun tuha bayuh, Daud. 33Da sagar jaji raja te munan turunan da Yakub empe seola-ola ye. Belalu Da sagar merentah Kerajaan Da seola-ola ye.” 34Ukah iro da Maria nyituk tong ka malaikat iro: “Ngunaw me a'ap kate be anak? Nelang a'ap kea bawe lolang ngetehe?” 35Malaikat iro ngulek tong ka da, Roh Kudus sagar dolui te munan ko Arti ye, kuasa Allah Ye Mahaemo sagar be kuasa tong ka ko. Koe iro, tia mea ye sagar lahir ye sagar na ulek Anak Allah. 36Dinga ihe: “Erai butung ko, Elisabet, ade sagar be tia mea upo, mele da apu tuha bene. Kawan ulun ketoan kaye da sa kate be anak, tapi da apu entung onum bulan. 37Leka beloh ye sa kate ye se na ene Allah.” 38Belalu da Maria ngulek: “A'ap ihe pu'un Tuhan belalu Tuhan iro ye jaji hamba Ye. Dion awus ye na ulek ko iro tong ka a'ap terjadi tong ka a'ap, Ukah iro malaikat iro tulak ngikah da.”
Da Maria ali da Elisabet
39Ukah iro, da Maria tulak tong provinsi Yudea nete bukit ye. 40Pas da empe te belai da Zakharia, da no'ok da Elisabet. 41Pas da Elisabet keringa da Maria no'ok da, tia mea ye te suang butung da Elisabet langsung begunsang ke'egoan. Ukah iro da Elisabet na semponu ali Roh Kudus. 42Ulek da nelang wale tong ka da Maria: “Ko na berkati eso ene Allah dari pada bawe bali. Belalu Allah apu ngeberkati anak ye te suang butung ko iro. 43Ko ihe ne'e Tuhan a'ap ye apu sulet nyeruku a'ap! A'ap sa layak nerima berkat ye solai ihe. 44Leka pas a'ap keringa ko no'ok a'ap. Tia mea ye te suang butung a'ap mula begarak leka ego tamam bene. 45Na berkatilah ko leka ko harap kaye Allah sagar ngene koe gawi se ye na ulek Da.”
Nyanyian pujian da Maria
46Ukah iro da Maria ngulek:
“Ali seganap ate a'ap, a'ap memuji Tuhan
47A'ap ego bene leka Tuhan apu jaji Juruselamat a'ap.
48Leka Da apu memperhati a'ap hamba ye rendah hati,
belalu akat nehe dali awus ye sagar ngotus a'ap arai ego.
49Koe Da ye Mahaemo apu ngene koe gawi ye solai tong ka a'ap. Aran Da iro kudus.
50Tuhan sagar petendre belas kasih Da empe seusang-usang ye.
51Da apu petendre tong ka awus kawan ulun kuasa Da ye solai.
Da apu ngelawen kawan ulun ye ketonek te suang ate atawa pikiran dali.
52Da apu pejaweh kawan pimpinan ye be kuasa neke runa dali,
tapi Da apu pekemo kawan ulun ye sa ketonek.
53Da apu nempuas dali ye semer ali se ye na akan dali,
tapi Da nyiu dali ye sugih di tulak beloh ngoit me-me.
54Da apu ngawat taka ulun Israel umat ye na peli Da,
55Ngunaw ye na janyi Da di petendre kasih setia Da tong ka da Abraham ali kawan turunan da empe seusang-usang ye.
Dami ngunaw ro, Da apu ne pati janyi ye apu na ene Da tong ka datu nini taka.”
56Ukah iro, da Maria nono te runa da Elisabet kurang labih tolu bulan ke ngusang ye, ukah iro da uli tong belai da.
Da Yohanes Pembaptis Lahir
57Pas wayah ye da Elisabet di belolos tia upo. 58Kawan ulun ye nono te biro ali kawan aben da keringa kaye Tuhan apu petendre belas kasih tong ka da Elisabet ye na okoi anak upo, dali bersukacita sendro da Elisabet ye. 59Pas tia iro be umur erai mengo, dali sulet tong belai da Zakharia di nyunat tia iro. Ukah iro dali ngulek: “Da sagar be aran Zakharia sameh ngunaw ma da.” 60Tapi, da Elisabet, ngulek: “Iya'a na ene aran Zakharia da iro.” Tapi. Taka harus ngene aran tia iro Yohanes. 61Ulek dali tong ka da: “Tapi beloh erai te suang keluarga ko ye be aran ngetro!” 62Ukah iro dali ngokoi kode tong ka ma tia iro da Zakharia di nyituk na to'ok me tia ihe. 63Da Zakharia kaweng erai ti papan, belalu da nulis engan ye te munan iro: “Aran da iro da Yohanes.” Kawan ulun te biduh tengkejet kite se ye na tulis da iro. 64Pas desung iro selenga te buka bowa ali lola da Zakharia ye ngene da tau besurah belalu da langsung memuji Allah.
65Awus kawan ulun ye nono te biro gaer. Ukah iro ade awus kawan ulun ye te gunung te Provinsi Yudea iro nyurah ye desung terjadi iro. 66Kawan ulun ye keringa iro ngulek: “Pasti tia ihe sagar bolum jaji ulun ye be di. Dali ngulek ngunaw ro leka Tuhan apu nyendro da.”
Nyanyian pujian da Zakharia
67Belalu da Zakharia ye ponu ali Roh Kudus ngulek paket neke Allah. Ulek da,
68“Segala puji tong ka Tuhan, Allah ye na sembah ene bangsa Israel.”
Leka Da pasti sagar sulet di nowus kawan umat Da.
69Tuhan apu nyiu erai ke ulun ye be kuasa di ngawat taka.
Da sagar jaji turunan hamba Da, Raja Daud.
70Tuhan ngene se ye apu na ulek ke bayuh pas Da be firman tong ka umat Da lalo kawan nabi Da ye kudus.
71Da nyiu erai ke ulun ye be kuasa di ngawat taka neke kawan musuh taka,
Ye iro neke kuasa kawan ulun ye sa rigi ali taka.
72Allah apu ngene koe gawi ihe di petendre kebuenan Da tong ka datu nini taka
Lalo koe gawi ye na janyi Da te suang perjanjian Da ye kudus.
73Ihe perjanjian ye na okoi Da tong ka datu nini taka, da Abraham. Ulek da: “A'ap sagar ngawat ko,
74Di ko na awat neke kami kawan musuh ko,
Belalu kate ngelayani Allah ye beloh penya'an gaer.
75Da kakan taka setia tong ka Da belalu taat tong ka Hukum Da empe taka mate.”
76Belalu ko iro nabi Anak Allah ye Mahaemo.
Ko sagar nyedia kawan ulun pas penyulet Tuhan ye ngene dali siap pas Tuhan sulet nene.
77Ko sagar ngawat umat Da di ketoan kaye Tuhan sagar sulet di ngawat dali pelos ngampuni dosa-dosa dali.
78Allah taka iro Allah ye ponu ali kasih sayang.
Mesias sagar sulet neke surga tong ka taka ngunaw
Ma'te olo ye be ama.
79Da sagar ngawat taka ye bolum suang denem ali kesusahan belalu takut leka dali
bepikir sagar mate ye ngene dali kate bolum sendro Tuhan pelos damai sejahtera.
80Tia upo iro tumu solai belalu unuk da jaji kuat. Da nono te padang jone ye karing empe da solai. Ukah iro da mulai bekhotbah te one wae kawan ulun bangsa Israel.
Currently Selected:
Lukas 1: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
