Lukas 18
18
Paribasa tentang hakim ye sala
1Ukah iro Yesus bekisah paribasa di ngajar kawan murid Da di dali tatap setia bedoa ali dali sa murah menyarah. 2Ulek Da tong dali: “Na'an erai ulun hakim ye nono te ja'a ye sa takut ali Allah da ade sa ngehormati ulun bali. 3Te biro ade, na'an erai ulun balu. Ye ketuju sulet tong hakim iro di laku awat di mahan keadilan neke ulun ye kakan pe da'ai da. 4Tela ye hakim iro noi ngawat, tapi pas te ahir ye da ngulek suang aseng da: Mele a'ap sa takut tong Allah belalu a'ap ade sa ngehirau engan ulun bali, 5Tapi leka balu ihe ketuju ngawer a'ap, a'ap sagar ngokoi keadilan ngunaw ye na akan da tong ka a'ap, di da uwa sulet ngawer a'ap.” 6Ukah iro ulek Yesus tong ka dali: “Mele hakim iro sa bene, pikir dile bebuen se ye na ulek da! 7Kaye ulun ye sa adil sagar ngawat ulun, me sa ko ngomon Tuhan pasti sagar ngokoi keadilan tong ka umat ye na peli Da, ye ketuju laku awat tong ka Da? Me Da sagar ngulek sa jaji di ngawat dali? Sa, Da pasti sagar tatap ngawat ulun iro. 8A'ap ngulek tong ka ko kaye da pasti sagar lekah mahan keadilan. Tapi kaye A'ap, Anak Meresia sulet li, me A'ap sagar kite kaye kawan ulun te denia percaya tong ka Allah?”
Paribasa ulun Farisi ali tukang tagih pajak
9Na'an kawan ulun ye yakin ali pendapat dali ley. Dali memandang rendah ulun bali. Yesus bekisah paribasa iro tong ka dali. 10Ulek Yesus: “Na'an due ti ulun ye litep tong ka Bait Allah, di bedoa tong ka Allah. Erai ti ye ulun Farisi ali kawan tukang tagih pajak bali ye. 11Ulun Farisi iro jakat sambil bedoa te suang aseng, Ya Allah, a'ap be syukur tong ka Ko leka a'ap sa bedosa ngunaw ulun bali. A'ap ba perampok atawa ulun ye tuju ngopaw a'ap sa berzinah, a'ap ade sa ngunaw penagih pajak.” 12A'ap puasa due kali tiap mengo belalu a'ap ade ngokoi sepuluh persen neke se ye na hasilkan a'ap. 13Tapi tukang tagih pajak iro jakat ali kerendahan aseng da, da jakat oro neke kawan ulun bali, da ade kesa sa layak neaw Allah te surga. Da mupuk dada da ali kami da, di peteaw nare aseng da. Ukah iro da bedoa, ulek da: “Awat, Tuhan, A'ap ihe ulun ye bedosa. A'ap laku awat Ko, a'ap ade laku ampun maaf neke Ko! 14A'ap ngulek tong ka ko: Tukang tagih pajak iro uli tong belai da jaji ulun ye na ampuni Allah, tapi ulun Farisi iro sa. Ke he taka ketoan, nome ye ketonek, maka da sagar na perendah, belalu nome ye merendahkan da ley, maka da sagar na pekemo.”
Yesus ngeberkati kawan tia
(Mat. 19:13-15; Mrk. 10:13-16)
15Na'an kawan ulun ngoit tia halus dali tong ka Yesus di Da mege ye belalu ngeberkati dali. Pas kawan murid kite ye, dali ngereket kawan ulun iro leka sulet nyeruku Yesus. 16Tapi Yesus no'ok kawan tia iro pelos da ngulek: “Kerajaan Allah pun kawan ulun ye nget kawan tia ihe. Leka iro, dion dali sulet tong ka A'ap. Iya'a na awer dali. 17A'ap ngulek tong ka ko: kaye erai ke ulun sa hakun nerima Kerajaan Allah ali kerendahan aseng ngunaw kawan tia ihe, Ko sa sagar jaji umat Da te suang Kerajaan Da.”
Ulun sugih ye uyuh litep tong suang Kerajaan Allah
(Mat. 19:16-26; Mrk. 10:17-27)
18Na'an erai ke ulun pemimpin Yahudi ye nyituk tong ka Yesus: “Guru, Ko ihe ulun ye buen, se ye harus na ene a'ap di mahan bolum ye kekal?” 19Ulek Yesus tong ka da: “Se ye na maksud ko di ngulek A'ap buen?” Yesus nyituk tong ka da. “Nyata beloh ye buen kaye sa Allah iro ley. 20Ko pasti ketoan perintah-perintah Allah: Iya'a berzinah, iya'a ngebunu ulun, iya'a dako harta bana ulun, iya'a nenes ulun bali, belalu hormati ma ali ne'e ko.” 21Ulun iro ngulek tong ka Yesus: “A'ap apu ngeringa awus ye perintah iro akat a'ap kea bujang.” 22Ukah iro Yesus ngulek: “Kea erai ti ye male na ene ko. Alan tulak, jual harta se ye na'an te ko belalu okoi tong ka kawan ulun susah. Maka ko sagar be harta te surga. Ukah iro, alan tulak tong ka he di jaji murid A'ap.” 23Ukah Yesus ngulek iro, ulun iro kecewa, leka pimpinan iro ulun ye sugih belalu da noi ngokoi se ye na'an te da. 24Yesus nare aseng kite iro. Belalu Da ngulek tong ka kawan ulun te biduh: “Puna uyuh kaye ulun sugih ro litep tong suang Kerajaan Allah. 25Sa mungkin erai ke ulun ye sugih iro litep tong suang Kerajaan Allah ngunaw erai ti unta litep tong suang luang ilos.” 26Pas dali keringa iro, dali nyituk tong ka Yesus: “Kaye ngetro nome, ye kate na awat.” 27Yesus ngulek tong ka dali: “Allah kate ngene koe gawi ye sa mungkin na ene meresia.”
Upa ngedasu Yesus
(Mat. 19:27-30; Mrk. 10:28-31)
28Ukah iro da Petrus ngulek tong ka Yesus, Teneng! Kain ihe apu ngikah se ye na'an te kain di jaji murid Ko. 29Yesus ngulek tong ka dali: “A'ap ngulek tong ka ko: Tiap ulun ye apu ngikah se ye na'an te da, mele iro belai, sao da, erai butung da, ulun tuha da, atawa kawan anak da, leka Kerajaan Allah, da sagar mahan ye li, 30Belalu sagar nerima awus ye iro be kali-kali lipat suang pengebolum te denia ihe. Ukah iro da sagar mahan bolum ye kekal te surga.”
Habar ketolu tentang menaya ye Yesus
(Mat. 20:17-19; Mrk. 10:32-34)
31Ukah iro Yesus ngoit due belas murid Da tulak neke kawan ulun deo sambil Da ngulek: “Teneng, nehe taka desung malan tong ja'a Yerusalem. Awus ye na'an na tulis nabi bayuh nome A'ap ihe, Anak Meresia sagar terjadi te biduh. 32Kawan ulun sagar nyarah A'ap tong ka kawan ulun ye ba Yahudi. Dali sagar ngekupe A'ap, pe da'ai A'ap, mupus A'ap, belalu nyambuk A'ap, dali ade sagar munu A'ap. 33Tapi pas te olo ketolu, A'ap sagar bolum li.” 34Pas Yesus ngulek ihe, kawan murid Da sa paham. Ye ngene kawan murid Da iro sa ketoan se ye na maksud Yesus iro.
Yesus nawas erai ulun ye posa te dani ja'a Yerikho
(Mat. 20:29-34; Mrk. 10:46-52)
35Pas Yesus ali kawan murid Da apu te dini ja'a ye be aran Yerikho, na'an erai ulun posa ye desung tu'et te diding alan sambil kaweng duit tong ka kawan ulun. 36Pas ulun posa iro keringa ulun deo lalo ro, da nyituk tong kawan ulun ye te dani da: “Se ye desung terjadi.” 37Ulek ulun iro tong ka da: “Yesus neke ja'a ye be aran Nazaret desung lalo he.” 38Belalu ulun posa iro ngeraring: “Yesus, keturunan Raja Daud, awat a'ap ihe, kasihilah a'ap!” 39Kawan ulun ye malan te rombongan iro, ngereket ulun posa iro pelos nyiu enteng. Tapi, da nanga ngeraring wale bene: “Anak Daud, awat a'ap kasihilah a'ap ihe!” 40Pas Yesus keringa ye, Da tehur. Da ngulek tong kawan ulun deo: “Oit ulun iro tong ka A'ap.” Pas ulun iro apu dini, Yesus nyituk tong ka ulun iro: 41“Se ye na akan ko ke A'ap?” Ulek ulun iro: “Tuhan, awat tawas a'ap ihe di kate kite li!” 42Ukah iro Yesus ngulek tong ulun iro: “Teneng apu! Iman ko tong ka A'ap apu na tawas neke posa ko.” 43Sa ola ulun iro mula kate kite li. Da ngedasu Yesus sambil be engan: “Segala puji tong ka Allah!” Awus kawan ulun ade ye kite iro be engan: “Segala puji tong ka Allah!”
Currently Selected:
Lukas 18: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
