Lukas 13
13
Doa ali menaya
1Pas desung iro, na'an ulun ngulek tong ka Yesus kaye da Pilatus apu munu ulun Galilea. Pas dali desung ngokoi persembahan kurban belalu daya dali salir besampur ali daya setua kurban dali ley. 2Ulek Yesus tong ka dali: “Iya'a ko ngomon kaye kawan ulun neke ja'a Galilea iro na bunu ngunaw iro, leka dali apu bedosa solai neke kawan ulun Galilea ye bali. 3Beaw! Ba iro alasan ye. A'ap ngulek tong ka ko, kaye ko sa betobat neke kawan dosa ko, kam awus ye sagar mate. 4Ngunaw me walo belas ulun ye mate pas menara te dani kolam Siloam tempong tipan dali? Ngetme kira ko me dali iro tamam dosa ye ke kawan ulun bali ye nono te ja'a ye be aran Yerusalem? 5Beaw! Ba iro alasan ye. A'ap ngulek tong ka ko, kaye ko sa betobat neke kawan dosa ko iro, ko sagar mate.”
Paribasa tonga ara ye beloh tau bebua
6Yesus ade bekisah paribasa ihe: “Na'an ulun ye be pengule'e tonga ara ye na ule nete kabun anggur. Pas da sulet di ngeto bua ye, da sa ruku. 7Aji, da ngulek tong tukang kabun iro, Apu tolu taun a'ap ngema tonga ara ihe di bebua, tapi selenga beloh erai ye bebua. Toweng a'a tonga ara ihe! Se di ngu'le kaye beloh bua? 8Koe iro, tukang kabun iro nuing, Temangung, ngetme kaye ngema erai taun li di bebua. Dion A'ap ngokoi pupuk tong tonga ihe di bebua, 9Ahe tonga ihe bebua taun odi. Kaye tonga ihe sa bebua. maka temangung kate noweng tonga ye.”
Nawas ulun beroten pas te olo ye na tentukan di beranai
10Pas te olo ye na tentukan di beranai, Yesus desung ngajar kawan ulun te erai ti belai ibadah ulun Yahudi. 11Te biro na'an bawe ye kesarungan roh jahat ye ngene da beroten walo belas tahun, ye ngene unuk bawe iro bungkuk nelang sa kate rata jakat ye. 12Pas Yesus kite ye, Da no'ok bawe iro ulek Yesus: “Ko apu molak neke roten ko iro.” 13Ukah iro, Yesus mege kami bawe iro sambil bedoa belalu selenga molak bungkuk bawe iro ukah iro da pelos memuji Allah leka roten da apu na tawas. 14Koe iro, Ulun pimpinan belai ibadah iro bereket tong ka Yesus leka nawas ulun pas te olo ye na tantukan di beranai. Ulek pimpinan iro tong kawan ulun ye deo: “Na'an onum olo te suang erai mengo iro di begawi. Aji pas te olo-olo iro aweng neke Allah di nawas ko. Iya'a sulet te olo ye na tentukan di beranai leka iro sala.” 15Tapi Tuhan ngulek tong ka ulun iro: “Ko kawan ulun munafik! Me sa ko ye nguntis lembu atawa keledai neke kanang ye pas te olo ye na tentukan di beranai belalu ngoit ye tong runa isep? 16Koe iro, teneng bawe keturunan da Abraham ihe. Iblis apu ngene da sa tau malan walo belas taun ke ngusang ye! Ngetme tau sala kaye A'ap nawas da pas te olo ye na tentukan di beranai.” 17Pas Yesus ngulek iro, awus kawan ulun mangen keringa ye. Tapi kawan ulun deo ego bene leka dali apu kite ye na ene Yesus ye ngene kawan ulun iro empe kemawah.
Paribasa ensoi sesawi ali ragi
(Mat. 13:31-33; Mrk. 4:30-32)
18Ukah iro, Yesus ngulek: “A'ap kakan ngulek paribasa Kerajaan Allah tong ka ko ngunaw me sih Kerajaan iro. 19Ihe ngunaw umang sawi ye na ule te kabun. Umang iro tumu jaji tonga kayu ye solai, belalu kawan tempulu te langit ngene salai te da'an ye.” 20Ukah iro Yesus ngulek li: “A'ap sagar bekisah paribasa se iro Kerajaan Allah, 21Ihe ngunaw ragi ye deo bene na epe bawe pelos na onok tong suang tepung ye ngene awus adonan tepung iro ngambang.”
Nome ye na awat
22Pas Yesus ali kawan murid Da tong ja'a Yerusalem, Yesus nyelalo kawan ja'a pelos ngajar kawan ulun se iro Kerajaan Allah. 23Pas empe ja'a na'an erai ulun nyituk tong ka Yesus: “Tuhan, Me Tuhan je ngawat kawan ulun bali neke dosa?” 24Ulek Yesus tong ka kawan ulun te biro: “Ko harus gagis, Di ngatek letep tong suang Kerajaan Allah, jaweng ye kipit. Koe iro A'ap ngulek tong ka ko, deo kawan ulun ye kakan letep tong ka ro, tapi dali beloh kate. 25Kaye ulun ye pun belai apu jakat belalu nalep jaweng belai ye, ye ngene ko jakat te ongon sambil ko nyentotok jaweng nelang ngulek, Awat tengaw ko jaweng ye. Tapi Tuha ye pun belai ngulek, Ya'a sa ku ronu mula tengaw A'ap beloh ketaru ko nelang neke kame asal ko ihe. 26Ukah iro, ko ngulek, Tapi Kain ihe apu pini man isep sendro Ko. Ko ade apu ngajar te alan-alan nete ja'a kain. 27Tapi, Da ngulek, A'ap sa ketaru ko belalu A'ap ade sa ketoan keme asal ko. Alan tulak ke he, kam awus ye kawan ulun jahat! 28Pas desung iro ko sagar ngerodoi nelang kukut begenter koe bereket, leka ko kite da Abraham, da Ishak ali da Yakub, nyang kawan nabi te suang Kerajaan Allah, tapi ko sagar na pelosek neke Kerajaan iro. 29Belalu deo kawan ulun ye sulet neke timur ali barat ye ba ulun Yahudi, sendro ulun neke utara ali Selatan ye ba ulun Yahudi ade sagar sulet. Belalu man te acara te Kerajaan Allah. 30Sebujur ye, kawan ulun ye beloh di sagar jaji ye paling be di belalu kawan ulun ye be di sagar jaji ulun ye sa be di.”
Yesus tekasi ali kawan ulun te ja'a Yerusalem
(Mat. 23:37-39)
31Pas desung iro ade sulet kawan ulun Farisi pelos ngulek tong ka Yesus: “Ko harus ngikah runa ihe, leka da Herodes, ulun ye be kuasa, kakan munu Ko.” 32Tapi Yesus ngulek tong dali: “Da Herodes iro sameh ngunaw sarigala ye da'ai akal. Alan ulek tong da, Olo ihe ali tane, A'ap sagar ngunur kawan uwok pelos nawas kawan ulun erep-erep daeh, belalu A'ap sagar tulak ke he ukah nyempunah koe gawi A'ap ihe, 33Leka mele ngunaw me, A'ap harus nempelos pengalan A'ap tong ja'a be aran Yerusalem. Leka ja'a Yerusalem iro runa kawan nabi na bunu! 34Hai kam kawan ulun neke Yerusalem! A'ap tekasi ali kam! Ko ketuju ngebunu kawan nabi ye apu na siu Allah, ko ade apu nurak dali ali batu empe mate! Senu kali A'ap kakan ngamar kam, ngunaw tekuyung ye ngamar kawan anak da te mat ilar, tapi ko noi ngunaw iro. 35Leka iro, dinga ihe, Allah sagar ngikah ko ali ja'a ko. Belalu sa kate kite A'ap li empe ko be engan:
Kira ye Allah ngeberkati kawan ulun ye sulet te suang aran Tuhan.”
Currently Selected:
Lukas 13: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
