Lukas 12
12
Ajaran husus tong kawan murid
(Mat. 10:26-27)
1Pas desung iro, na'an be ribu-ribu ulun bekumpul te dani Yesus, ye ngene kawan ulun empe beke'ajek leka deo bene ulun ye. Sa ola Yesus ngulek tong ka kawan murid Da. Ulek Da: “Bebuen ko noi ko jaji ulun ye munafik ngunaw kawan ulun Farisi. 2Iya'a ngunaw dali leka se ye na siok sagar toan Tuhan, ko beloh kate nyiok ye. 3Koe iro, se ye na sengkonis ko tong ka kawan ulun ye te suang kamar sagar na ulek te one wae ulun deo, ye ngene kawan ulun deo keringa ye. 4Yesus nempelos engan Da, ulek Da, Dinga bebuen, kawan uyang A'ap, Iya'a takut ali meresia. Mele dali tau munu ko. Tapi meresia iro beloh kate ngene koe gawi bali tong ka ko! 5Tapi ko harus takut ali Tuhan. Da sa je be kuasa munu ulun, tapi be kuasa di pelitep dali tong suang neraka. Maka ye iro, A'ap ngulek tong ka ko, kaye ko harus takut ali Allah iro. 6Me sa lime ti tempulu empit ye na jual be uman due ti logam tembaga? Ngunaw ro ade beloh erai ke dali ye sa na ingat Allah. 7Tapi tong ka ko, Allah ketoan su'uh balo te utek ko. Aji iya'a takut, leka ko iro be di bene te ma'te Allah dari pada kawan tempulu empit. 8A'ap ngulek tong ko, Kaye na'an ulun ye ngulek da iro murid A'ap te one wae ulun, maka A'ap ihe, Anak Meresia, ade sagar ngulek te one wae Allah ali kawan malaikat Da kaye ulun iro murid A'ap. 9Tapi nome ye ngulek te one wae ulun kaye da ba murid A'ap, A'ap ade sagar ngulek kaye da ba murid A'ap te one wae Allah ali kawan malaikat. 10Allah kate ngampuni nome ye ngekupe A'ap, Anak Meresia, tapi Da sa sagar ngampuni kaye ngekupe Roh kudus. 11Kaye kam na oit tong belai ibadah ulun Yahudi, di na tenes te one wae kawan penguasa ali pimpinan leka kam iro kawan murid A'ap, iya'a empe ngeno se ye harus na ulek kam di ngamar kam ley-ley. 12Koe iro, pas desung iro Roh Kudus sagar ngulek tong ko se ye na ulek pas te biro”
Paribasa ulun sugih ye rengarai
13Ukah iro na'an erai ulun upo ye te pulau ulun deo ngulek tong Yesus: “Guru, awat ulek Ko tong erai butung upo a'ap di da ngebagi harta warisan di na a'ap.” 14Yesus ngulek tong da: “Erai butung, beloh erai ulun ye nundru A'ap jaji hakim di nyempunah urusan warisan kam due iro?” 15Ukah iro, Yesus ngulek tong dali li: “Bebuen! Kam iya'a serakah ali se ye na'an. Leka arti pengebolum iro sa je neke deo harta ko daeh.”
16Ukah iro, Yesus ngulek paribasa tong dali: “Bayuh na'an erai ke ulun ye sugih ye be ume ye be hasil buen bene.” 17Aji, da bepikir: “A'ap he beloh runa li di ngonok hasil a'ap ihe, aji se ye harus na ene a'ap.” 18Da ade ngulek tong da ley: “A'ap kakan ngebungkar runa pare ihe belalu a'ap kakan ngene ye solai eso. Di a'ap kate ngonok hasil ye te biro. 19Ukah iro a'ap kate ngulek tong a'ap ley, kaye a'ap kate ngonok se ye na parlu a'ap. Mele empe betaun-taun. A'ap sa harus begawi li! A'ap kate ngene acara pelos be sanang-sanang!” 20Tapi, Allah ngulek tong da: “Ko iro ulun ye rengarai! Malem ihe ade, ko sagar mate. Ukah iro, se ye na onteh ko iro sagar jaji pu'un ulun, ba pu'un ko! 21Aji ngunaw ro pengejaji ye ali ulun ye ngonteh harta di pu'un da ley, kaye da sa sugih te one wae Allah.”
Yesus nguni kawan murid Da di percaya tong ka Allah ye sagar ngegaduh dali
(Mat. 6:25-34)
22Ukah iro Yesus ngulek tong murid-murid Da: “Leka iro A'ap ngulek tong ka ko, iya'a ko ngeno se ye na okan ko di bolum ali empeng ye na pakai ko.” 23Leka bolum iro be di eso neke pengokan ye na okan ko. Unuk ko iro be di eso neke empeng ye na pakai ko. 24Teneng kawan tempulu ka'ak. Dali sa ngeto atawa mahan pengokan, dali ade sa be gudang ali runa pengonok pare, tapi Allah ngokoi dali pengokan. Ro nanga oro eso ko be di bene neke tempulu-tempulu iro. 25Nome te antara ko ye ngeno maka iro kate nameh umur bolum ko? 26Koe iro kaye ko beloh kate ngene koe gawi ye sa uyuh, be arti ko sa parlu ngeno ye bali te pengebolum ko. 27Teneng bunge ye mula tumu iro, dali sa begawi te ume atawa ngene empeng di nali ley. Tapi A'ap ngulek tong ka ko kaye da Raja Salomo sa be empeng ye larang nelang segah bene neke bunge iro. 28Dinga ihe kawan ulun ye sa empe percaya! Allah apu ngehias ikut te ume segah bene, mele ikut iro sa ola na suru. Hai ko ye sa beka percaya, me sa Da sagar yakin eso di ngokoi empeng tong ka ko? 29Aji, iya'a ko bepikir se ye na okan ko ali se ye na isep ko. Iya'a ngeno awus ye iro. 30Leka iro ye na eto kawan ulun, ye sa ketaru ali Allah. Belalu Ma ko ye te surga apu ketoan se ye na akan ko. 31Koe iro, eto dile Kerajaan Allah iro, maka Tuhan sagar nyedia se ye na akan ko.
32Murid-murid A'ap ko sameh ngunaw kawan domba ye halus. Iya'a takut ali me-me leka Ma ko ye te surga apu ego ngokoi Kerajaan Da tong ka ko.
33Aji, jual se ye na'an te ko belalu okoi duit tong ka kawan ulun susah. Kumpul harta di engko ley pas te surga nene. Harta surga iro beloh tau jaweh su'uh ye leka beloh erai ulun ye kate dako atawa singet ye kate pehansur ye. 34Leka te kame harta ko be onok, maka te biro ade ate pikiran ko be onok. Hamba Yesus harus tatap waspada ali be iman
Siap Sedia pas Yesus sulet li
(Mat. 24:43-51)
35Belalu Yesus nempelos engan Da ulek Da: “Siap sedia ko di penyulet A'ap nene, sameh ngunaw kawan batak ripen ye nyua empeng di begawi ali lampu ye waha bene” 36Kam harus ngunaw batak ripen ye ngema temangung ye, ukah ke acara peruku. Belalu pas temangung iro mulik tong belai nyentotok jaweng, da kate nengaw jaweng iro. 37Pas temangung iro sulet da kite kawan batak ripen da apu siap sedia di nyamut penyulet da, maka kawan batak ripen da iro sagar jaji ulun ye na berkati. Belalu a'ap jamin da sagar makai empeng gawian pelos nyiu kawan batak ripen iro tue'et man pelos ngene pengokan. 38Belalu kaye temangung ye uli botuk malem atawa pas doyeng, pas da sulet da kite kawan batak ripen apu bu'et belalu siap kaye da di sulet, da sagar ego bene kite kawan batak ripen da iro. 39Tapi kaye ye pu'un belai ketoan ke deme ulun dako sulet di dako se ye na'an te suang belai iro, da sagar durung belai da.
Batak Ripen ye setia ali ye sa setia
40Ngunaw iro ade ko harus siap sedia, leka A'ap, Anak Meresia ihe, sagar mula sulet ye sa na kira-kira ko 41Ukah iro, da Petrus nyituk tong Yesus: “Tuhan, me Ko je bekisah paribasa ihe di pu'un kain daeh atawa bekisah di pu'un kawan ulun bali daeh atawa di pu'un awus kawan ulun ye keringa ye.” 42Ulek Tuhan: “Na'an erai ulun ye ngurus belai ulun ye setia. Temangung da nundru da di ngurus kawan batak ripen ye bali belalu dali je man pas wayah ye daeh.” 43Ukah iro, pas temangung ye uli tong belai, temangung iro kite batak ripen da iro ngene koe gawi se ye na siu da, belalu ye ngene temangung da ego bene ali da. 44A'ap nge jamin kaye temangung da sagar ngokoi tangung jawab di ngurus harta benda ye na'an te belai. 45Tapi, batak ripen iro bepikir kaye temangung da iro sagar usang moko uli, belalu da mupuk kawan batak ripen upo ali bawe. Belalu da ade man isep empe da mabuk, 46Belalu pas te olo ye bali li temangung da mula sulet, batak ripen iro sa ngeharu kaye temangung da sagar sulet, belalu temangung da iro sagar munu batak ripen iro, pelos ngirim batak ripen iro tong kawan ulun ye sa ngeringa ali engan da.
47Na'an ade erai ulun batak ripen ye ketoan se na akan temangung da, tapi sa ngene koe gawi se ye na akan temangung da, maka da sagar kune pupuk tamam bene. 48Tapi, batak ripen ye sa ketoan me-me ye na akan temangung ye sagar kune pupuk bebaya daeh. Ali cara ye sameh, erai ke ulun temangung kaweng deo neke ulun ye apu deo na okoi da, belalu temangung kaweng deo neke ulun ye apu na percaya da.
Yesus ngoit pemisah
(Mat. 10:34-36)
49Ukah iro Yesus ngulek: “Ye na tuju a'ap ihe sulet tong denia di nemolum apui te ekang meresia. Belalu A'ap ngebehe apui iro apu bolum! 50Tapi ye penela dile A'ap harus na baptis lalo menaya. A'ap sagar nyelalo menaya tamam bene empe iro punah. 51Mekira kam A'ap ihe sulet di ngoit kedamaian tong denia ihe? Nyata beaw! A'ap ihe sulet di ngoit pemulo te antara meresia. 52Ke nehe kaye na'an lime ulun te suang keluarga ye, dali sagar bulo. Tolu ulun sagar ngelawen due ulun belalu due ulun sagar ngelawen tolu ulun. 53Sagar na'an pemulo te antara ma ali anak upo ye, ne'e ali anak bawe, mena bawe ali dokong bawe ye.”
Yesus neneng le'en zaman
54Ukah iro Yesus ngulek tong kawan ulun deo: “Kaye ko kite jaun denem neke arah barat, ko pasti ngulek olo kakan uran belalu ukah iro uran lopa.” 55Pas ko kesa enus neke selatan, ko ngulek: “Olo ho tau sih langet bene,” belalu ukah iro layeng tamam bene. 56Ko ulun ye munafik! Ko je tau ngulek le'en langit ali denia daeh, tapi se di ko sa tau ngejelaskan ngetme sih le'en zaman ihe?
57Se di ko sa tau bepikir ley-ley ye hame ye pas na ene ko? 58Kaye erai ulun nenes ko belalu kakan ngoit tong hakim, sempunah masalah ko ali da pas te alan di da sa ngoit ko tong ka kawan hakim belalu hakim iro ngokoi ko tong pengawal, belalu pengawal iro sagar pelitep ko tong suang penjara 59A'ap ngulek ihe, ko sa kate losek neke penjara kaye sengke male bayar utang empe punah.
Currently Selected:
Lukas 12: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
