Lukas 11
11
Yesus ngajar cara bedoa
(Mat. 6:9-13; 7:7-11)
1Pas Yesus desung bedoa te runa ye lain, ukah da punah bedoa na'an erai murid Yesus ngulek tong Da: “Tuhan ajar kain bedoa sameh ngunaw da Yohanes ngajar kawan murid da.” 2Ukah iro ulek Yesus tong dali. “Kaye ko bedoa ulek,”
Bapa na muliakan lah aran Ko ye kudus belalu;
Sulet lah Kerajaan Ko.
3Okoilah tong ka kain tiap olo pengokan ye sukup.
4Belalu ampuni kawan dosa kain ngunaw kain ngampuni ulun ye na'an sala tong ka kain,
belalu ya'a ngoit kain tong suang pencobaan di ngene dosa.
5Ukah iro ulek Yesus tong dali: “Kaye ko tulak tong belai uyang ko botuk malem belalu ngulek, Erai butung a'ap, me kate ko ngokoi tolu ti wadai tong a'ap?” 6Leka na'an uyang a'ap ye mela sulet kotew tong belai, tapi a'ap beloh pengokan ye kate na payak tong da. 7Ukah iro uyang da ye te suang belai nuing: “Iya'a ngehaur leka a'ap apu nyikong jaweng, belalu kawan anak a'ap apu turui. Aji, a'ap beloh kate bu'et ngokoi se ye na akan ko.” 8Ukah iro Yesus ngulek: “A'ap ngulek tong ka ko, kaye da iro sa ngokoi wadai mele ko iro uyang da. Tapi da nanga sagar bu'et ngokoi wadai deo bene leka ko pulew no'ok nelang beloh budas kesa mangen.”
9Leka iro, A'ap ngulek tong ka ko, aweng a'a maka Tuhan sagar ngokoi ye tong ka ko, eto dile maka ko sagar ruku ye belalu sentotok jaweng maka jaweng ye sagar na tengaw. 10Leka nome ye kaweng pasti sagar na okoi. Nome ye ngeto pasti sagar ruku. Belalu nome ye nyentotok jaweng, pasti sagar na tengaw. 11Pasti beloh te antara ma kam ye ngokoi nipe tong anak ye kaye anak ye iro kaweng esa? 12Atawa ngokoi kelewangu, kaye anak ye kaweng tolui di okan? 13Mele kam ulun jahat, kam tau ngokoi ye buen tong kawan anak kam, Aji, Ma ko ye na'an te surga apu siap di ngokoi Roh Kudus tong kawan ulun ye kaweng ke Da.
Yesus lebih kuat neke Iblis
(Mat. 12:22-30; Mrk. 3:22-27)
14Pas te olo iro, na'an erai ke ulun ye ongo koe na rasuk uwok, belalu Yesus ngunur uwok iro, ye ngene ulun iro tau bepaner. Kawan ulun deo kemawah kite ye. 15Tapi, na'an ulun bali ngulek: “Da iro ngunur uwok pasti pakai kuasa da Beelzebul, pimpinan kawan uwok.” 16Na'an ade ulun bali ye kakan mencobai Da, dali laku petendre mujizat kaye kekuatan iro be asal neke Allah. 17Tapi Yesus ketoan se ye na te pikir dali belalu Da ngulek tong dali: “Kaye na'an Kerajaan ye te suang ye na'an raja ali rakyat ye tapi ketuju bulo, pasti kerajaan iro sagar hansur. Sameh ade, kaye bolum manak mensao ye ketuju bulo, pasti sagar sa beke aben li. 18Ngunaw ro ade te suang kerajaan Iblis kaye dali sa tau rasuk pede dali, iro pasti ngene kerajaan sagar hansur. A'ap ngulek nget te he leka ko ngulek A'ap pakai kuasa da Beelzebul di ngunur uwok iro. 19Kaye iro puna bene, belalu ngunaw me kawan murid Ko iro? Me dali sa pakai kuasa Beelzebul di pelosek uwok iro. Koe iro, dali ley ye sagar jaji hakim ko pelos ngulek ye bene kaye Ko iro sala. 20Tapi A'ap makai kuasa Allah di ngunur uwok iro, belalu ihe arti ye Kerajaan Allah apu sulet tong ka ko. 21Uwok iro kate na umpama ngunaw ulun ye galak nelang lengkap ali senjata. Pas da ngedurung belai da ley beloh erai ye kate dako atek belai ye. 22Tapi, kaye na'an ulun ye kuat bene sulet di ngelawen da, belalu ulun iro sagar ngerampas kawan senjata ye na andalkan da, ukah iro ngebagi harta ye na rabut tong ka ulun bali.
23Nome ye sa sendro A'ap be arti ngelawen A'ap, belalu nome ye sa begawi sendro A'ap be arti ngelawen A'ap.”
Roh jahat mulik li
(Mat. 12:43-45)
24Ukah iro Yesus nempelos engan Da: “Kaye roh jahat losek ke unuk ulun iro, roh iro sagar tulak tong runa ye luai di nono te biro. Kaye da beloh ruku ye, da ngulek suang aseng pikiran da, A'ap sagar mulik tong runa nono a'ap ye tela. 25Pas da mulik tong ulun ye na ono da tela, da kite kaye beloh erai ye nono te suang unuk ulun iro. Ulun iro ngunaw belai ye na sapu berasih, na ite rapi. 26Ukah iro, roh jahat iro tulak ngoit turu roh ye jahat eso ke da belalu da ngoit roh iro di litep tong suang ulun iro. Ye ngene magin tamam eso ke penela ye.”
Yesus ngajar ngunaw me di na berkati
27Ukah Yesus besurah iro, na'an bawe ye te biro ngulek: “Na berkati bawe ye nge lahir Ko ali ye petete Ko.” 28Tapi ulek Yesus: “Na berkatilah kam ye ngeringa Firman Allah ali ngelaku ye.”
Kawan ulun kaweng siri tong ka Yesus
(Mat. 12:38-42)
29Pas deo kawan ulun ngerumung, ulek Yesus: “Kam ye bolum te zaman ihe jahat bene! Leka kam ye nyiu A'ap ngene mujizat di siri kaye A'ap ihe na siu Allah. Tapi je erai ti siri ye na ite kam pas nabi Yunus te zaman bayuh daeh. 30Sameh ngunaw nabi Yunus ngokoi bukti tong kawan ulun ye nono te ja'a ye be aran Niniwe kaye Allah apu nyiu da, ngunaw iro ade A'ap ihe, Anak Meresia, sagar jaji siri tong ka kawan ulun te zaman ihe kaye Allah apu nyiu A'ap. 31Pas te olo penghakiman nene, kawan ulun Niniwe ade sagar bolum li sendro kawan ulun te zaman ihe, belalu dali sagar nenes kawan ulun ye bolum te zaman ihe kaye apu ngene penyala. Koe iro kawan ulun Niniwe betobat ukah ngeringa engan ye na ulek da Salomo belalu A'ap ngulek tong ka ko kaye na'an ulun ye solai eso neke da Salomo te bihe. Tapi ko sa nerima ye di betobat. 32Pas te olo penghakiman, kawan ulun Niniwe iro bangkit sendro kawan ulun te zaman ihe belalu dali ngehukum ye, leka kawan ulun Niniwe iro apu betobat sadang keringa nabi Yunus bekhotbah, belalu sebujur ye te bihe na'an ye solai eso ke nabi Yunus, tapi ko sa nerima ye.”
Ma'a ali denem
33Nome ye nemolum lampu pasti sagar ngonok ye te runa lampu iro ye ngene lampu iro pema'a tong ka awus kawan ulun ye litep tong olang. Da sa sagar nemolum lampu di nyiok ye atawa ngonok te mat runa ye. 34Ma'te ko ngunaw lampu ye na'an te unuk ko. Kaye erai ke ulun kate kite jelas, unuk ye ponu ali ama. Tapi kaye erai ke ulun sa kate kite jelas bene, awus unuk tonga da ponu ali denem. 35Leka iro, bebuen iya'a empe ama te suang unuk ko iro jaji denem. 36Koe iro, kaye bolum ko ponu ali ama belalu te suang unuk ko beloh erai ye denem, maka suang pemolum ko sagar ponu ali ama, sameh ngunaw lampu ye pema'a ko ali ama ye.
Yesus pesala kawan ulun Farisi ali kawan guru hukum Musa
(Mat. 23:1-36; Mrk. 12:38-40; Luk. 20:45-47)
37Ukah Yesus besurah iro, na'an erai ke ulun Farisi ngoit Yesus di man te belai da. Belalu, Yesus litep tong suang belai ulun iro pelos Da tu'et man. 38Ulun Farisi iro kemawah kite Yesus sa mui kami Da pas kakan man. 39Tapi, Tuhan Yesus ngulek tong ulun Farisi iro: “Ko ulun Farisi sameh ngunaw ulun ye je mui ongon sangker ali lumah, tapi kea bere sa na rasih ko. Ko mui kami ko, tapi te suang aseng ko ponu keserakahan ali kejahatan. 40Kam iro kawan ulun ye beloh be akal! Tuhan apu ngene unuk meresia, Da ade ngene ate ali pikiran kam. 41Koe iro, iya'a serakah ali jahat tong ka ulun, tapi okoi se ye na'an te ko tong kawan ulun susah, belalu iro sagar ngene ko berasih di one wae Allah.” 42Hai kawan ulun Farisi, ko sagar selaka, leka ko sa tau adil ali ulun bali belalu sa tau mengasihi Allah. Tapi ko harus begamat ngokoi persepuluhan neke rerampah ali bumu-bumu ke atang ko tong ka Allah. Tapi ko sa ngeringa hal-hal ye penting, Buen ye kaye ko ngokoi persepulahan, tapi iya'a sa kingat di ngelaku adil tong ulun bali ali mengasihi Allah. 43Selaka kam kawan ulun Farisi, leka kam kakan tu'et te belai ibadah ulun Yahudi belalu kam kakan na hormati kawan ulun te pasar. 44Selaka kam kawan ulun Farisi, leka kam iro ngunaw lebeng ye beloh be ori. Kawan ulun malan te munan ye, tapi beloh ye ke toan.
45Ukah iro, na'an erai ulun pengajar hukum Musa ngulek tong ka Yesus: “Guru, Kaye Ko ngulek ngunaw ro, be arti Ko ngekupe kain ade.” 46Yesus ngulek: “Selaka ade kam kawan guru pengajar hukum Musa, leka kam kakan ngene aturan ye poye ye ngene kawan ulun iro uyuh, tapi ko ley sa ngeringa aturan iro. 47Selaka kam, kawan pengajar hukum Musa, leka kam ne'muet ori atawa nameh kawan batu di pebuen lebeng kawan nabi ye apu na bunu datu nini ko bayuh. 48Leka iro ko ngene koe gawi iro, ko ngebuktikan kaye ko pe bene se ye na ene datu nini ko, leka dali apu ngebunu kawan nabi iro belalu ko nemu'et lebeng ye. 49Koe iro te suang hikmat Allah, Allah be firman, A'ap nyiu kawan nabi ali rasul tong ka ko. Tapi nabi ali rasul ye bali iro sagar na bunu pelos na uro dali. 50Koe iro, kawan ulun te zaman ihe harus nangung jawab leka ulun tuha bayuh ro apu ngebunu kawan nabi akat denia na ene. 51Ihe awus ye akat da Habel empe da Zakharia, da na bunu te dani runa persembahan kurban ali Bait Allah. Kawan ulun te zaman iro harus nangung iro. 52Selaka kam, kawan guru pengajar Hukum Musa, leka kam ngehalang kawan ulun, ye ngene dali sa ketoan ye hame ye bene alan nuju Allah. Ko sa nemasu alan iro tapi ko ngelamen dali di nemasu alan ye.” 53Pas Yesus di tulak ngikah belai ulun Farisi iro, kawan ulun Farisi ali kawan pengajar hukum Musa bereket belalu dali nyituk tamam bene tong Yesus. 54Dali kakan ngejebak Yesus ali se ye na engan Yesus di dali kate nenes Da.
Currently Selected:
Lukas 11: LBX
Highlight
Copy
Compare
Share
Want to have your highlights saved across all your devices? Sign up or sign in
Bawo Bible by Beyond Translation is licensed under Creative Commons Attribution-ShareAlike 4.0 License
