Matius 26

Tauen pasipakatang to' mauno' lo'a i Yesus

Mk. 14:1-2; Lk. 22:1-2; Yoh. 11:45-53

1Jaji barik mamin akaus dinen jaruma, manjarum bapi i Yesus lo'a palola'a, 2“Mamin itamu ikin asona, duang aso poangpi to' maramiang Palaloien. Jaji di rami dinen ona' iak di'en yang Anak Mantuarin to' daseraak lo'a tanganda', to' dauno'ak dapanandapa di kayu salipen,” ingka kenang.Pal. 12:1-27.

3Jaji barik gulungan imam baraa'en, ambata toa adaten, kombong di saona imam baraa'en yang iasanen i Kayapas. 4Jaji manikom ira dinen, sipakat manyari akal to' mauno' lo'a i Yesus. To' manyuro' sala' lo'a i Yesus mainto' andian kasala'anna yang pandeen idukum mate. 5“Poangsi na'anki' pande,” ingka kenang, “manu lo'a di aso rami-ramiin, di tau babangkulungen. Ona' manyuro' aru,” ingka kenang jarumda'. Kole'a atakut ira dinen lo'a tau bayu'en.

I Yesus dainyaki di Betania

Mk. 14:3-9; Yoh. 12:1-8

6Jaji barik i Yesus daawa angkaan di saona i Simon di Betania. I Simon lalo dinen tau akudungenjo. Jaji angkaan inang 7andian barik babainye sera mainso'iin lo'a i Yesus mawa sabotol isi' inyak yang maamen bauna. Botola dinen dari batu pualam. Inyakapi dinen jalu baragaan tapat. Jaji dapoloi botola dinen, jaji barik dainyakang lo'a i Yesus, daolongang di uluna.Lk. 7:37-38.

8Jaji mamele dinen palola'a i Yesus, ajau' nyawada'. Jaji manjarum ira, “Ai ratina daparugina inyak dinen? 9Suba de'i ipet, kule' duit bayu' dini. Suba de'i daunjukang ragana lo'a tau masikinen, baru' mandua',” ingka kenang jarumda' pasala'a lo'a babainye dinen.

10Jaji manjarum i Yesus kole'a datamuna pikiranda' balu'a dinen, “Ai ratina mangarunin lo'a, mamase'angen?” ingka kenang lo'da'. “Basana dinen palin maam lo'ku,” ingka. 11“Ti' tau masikinen, andian lapoang, poangsi daiak diri'ku' okanak salaun-launna lalako'ku' nannin,” ingka kenang lo'da'.Ul. 15:11. 12“Daia dinen dainyakina mantuariku', mangamasanga lo'a aso ikuburku'. 13Kujarumang tapat-tapat lo'in, disa ona' dajarumanga Dongo Maamen maira tatak banuaan inyaunga galung suanen, to' dajarumang bea basana babainye dinen. Daparandamang babainye dinen,” ingka kenang i Yesus manyautina lo'da' yang ira arasiin lo'a babainye dinen.

I Yudas sipakat nanna imamen to' maduang lo'a i Yesus mainto' dakule'a datingkam

Mk. 14:10-11; Lk. 22:3-6

14Mamin dinen, andian di dua belasen tau asanen dinen i Yudas Iskariot. Jaji lamba' lo'a gulungan imam baraa'en 15manjarum, “Ti' kuaduang i Yesus lo'in mainto' dakule'a datingkam, jalu ai poang yang imeangen ikin lo'ku',” ingka kenang dinen manjaruma i Yudas. Jaji barik dameang lo'a tiga pulo' papaka duit pirak. 16Jaji mulai nanga dinen barik i Yudas manyari akala mainto' dakule'a datingkam dinen i Yesus.

I Yesus angkaan palaloien nanna palola'a

Mk. 14:12-26; Lk. 22:7-23; Yoh. 13:21-30; 1Kor. 11:23-25

17Jaji di ramina maramiang Roti Na'anen Araragi, aso mulakataan, mondok barik palola'a manjarum lo'a i Yesus, “Disa ona' kadakuun kosannam mangamasangen lo'u angkaan rami Palaloien?” ingka kenang palola'a lo'a.

18Jaji dasuro' palola'a, “Lamba'kin intama banuaan, sijarumankin nanna tau seraan dinen. Jaji kenang jarumin lo'a, Manjarum Guruka', mamin mainso' ijoloku'. Jaji di'en to' lo'a saonuak, to' maramiang aso Palaloienak nanna palola'ku', ikin ona' lo'a,” ingka kenang paba'ina i Yesus lo'da'. 19Jaji barik dinen palola'a malola'ani jaruma i Yesus dinen. Jaji dakamasang barik, daurusi kausana itiang maramiang Palaloien.

20Jaji mondok pamamalamen barik i Yesus angkaan di mejaan nanda' dua belasen. 21Jaji angkaan inang rabarik, “Jaji manjarumak tapat-tapat lo'in,” ingka kenang i Yesus lo'da'. “Di antaraka' pakawanen di'en, andiankin sera yang to' maduangen lo'ku' mainto' dakule'ku' datingkam kole'a musuku',” ingka kenang lo'da'.

22Jaji barik ira dinen mandalinga jaruma dinen, susa ateda'. Jaji mulai mangatoani sera-serana, “Intainaka Paraampuane? Iakaka?” ingka kenang.

23Jaji manyauti barik i Yesus lo'da', “Yang sarata manyalapangen rotina lo'a mangkoken nanku', dinen lalo yang iaan to' maduangen lo'ku',” ingka kenang.Msm. 41:10. 24“Daiak di'en Anak Mantuariin tentu talalo ona' mate awan lalo ambata baya yang datulisangen ilalam Jaruma Alatala. Poangsi mase' tapat tau yang maduangen lo'ku'. Maam alit ti'en na'an memen daparanakang,” ingka kenang lo'da'.

25Jaji barik manjarum dinen i Yudas, “Intainaka Pa' Guru? Iakaka?” ingka kenang.

Jaji manyauti bua i Yesus lo'a, “Ikona kenang,” ingka kenang i Yesus lo'a.

26Jaji angkaan ira inang barik, i Yesus mala dinen rotiin laloang dado'aang. Mamin dinen dabala'-bala', dameang lo'a palola'a. “Na, di'en,” ingka, “roti di'en mantuariku'. Angkaankin,” ingka kenang lo'da'.

27Maminna dinen dala sawan dinen, dado'aang. Laloang dapanyorongang lo'da'. “Na, di' angguren di'en,” ingka, “mainyumkin kausanin lo'a dinen. 28Di'en lalo dara'ku' yang manyautiin lo'a dosana tau bayu'en, yang manatap bayaan,” ingka kenang i Yesus lo'da'.Pal. 24:8; Yer. 31:31-34. 29“Manjarumak tapat-tapat lo'in, asel bua' angguren na'anku' lalo mainyum lagi'. Mainyum na'an mainyum tabalikku',” ingka, “mainyum nannin di kangkamanna Ama'ku',” ingka kenang i Yesus lo'da'.

30Mamin dinen laloang banyanyi dinen nyanyian Masmur. Mamin banyanyi dinen tarangkat barik lo'a ukit Saitun.Msm. 113—118.

I Yesus manjarumang kole'a i Petrus ona' to' manasal

Mk. 14:27-31; Lk. 22:31-34; Yoh. 13:36-38

31Jaji manjarum barik i Yesus lo'da', “Malam di'en bua daikin di'en to' sorot. Bibitak kausanin kole'a jaluun to' adariin lo'ku',” ingka kenang i Yesus lo'da'. “Kole'a andian bayana memen yang datulisangen ilalam Jaruma Alatala yang manjarumangen mateku',

“Panguluan dombaan to' kuduno'. Laloang gulungan ambata dombaan to' tambor-ambor, Sak. 13:7.

ingka kenangjo ilalam Jaruma Alatala. 32Poangsi daiak di'en, maminak tio' balik, to' lamba'ak tajolo lo'in lo'a Galilea,” ingka kenang i Yesus lo'da'.Mat. 28:16.

33Jaji barik manjarum dinen i Petrus, “Kapisi bibitak kausa ira bokanen kole'a jalu adariin lo'u, daiak na'anak bibitak,” ingka kenang i Petrus.

34“Na'an. Manjarumak tapat-tapat lo'u, malam di'en bua, nampina manunturunguk manuken, daikopi to' mamin talung kali manasalu lo'ku',” ingka kenang i Yesus lo'a.

35Poangsi i Petrus manjarum, “Kapisi sarata nannu mateku', na'anak manasal,” ingka kenang i Petrus lo'a. Kenang kausa ira manjarumen.

I Yesus bado'a di Getsemani

Mk. 14:32-42; Lk. 22:39-46

36Jaji barik i Yesus nanna palola'a lamba' lo'a kosan yang daasanen Getsemani. Mamin mondok inang, i Yesus manjarum lo'a palola'a, “Indi'angkin aduduken,” ingka. “Marungkin indi'angen. To' lo'a dinenakpi bado'aan,” ingka kenang. 37Jaji yang daawaan barik, suma poang ari Petrus, nanna anaka i Sebedeus dua pariin dinen. Laloang atena dinen mulai to' susa, to' atakut. 38Jaji manjarum lo'da', “Daiak nyawaku' di'en laan parasa'anku', awan jalu to' mateenak,” ingka kenang. “Indi'angkin poang maruangiin,” ingka kenang lo'da' taluun.

39Jaji lamba', na'an bea bajao' lamba'a i Yesus, dasunsumang lindo'a lo'a tana'en, laloang bado'a, “Ama'e bado'aak, ti' dapat ikapi'ang yang jalu ajau'en to' adariin lo'ku' mainto' na'anna mondok lo'ku', ikapi'ang,” ingka kenang. “Poangsi daiko poang panamunu yang ipakaien. Daiak na'an ipakai,” ingka kenang i Yesus dalam do'ana.

40Mamin dinen rabarik i Yesus mole' lo'da' taluun, tindo' ira. Jaji manjarum, “Asi tindo'in? Ai na'an ikule' ikin maruangi nanku' sajam poang launna?” ingka kenang lo'a i Petrus. 41“Arungkin manyagai, arung bado'a mainto' na'annin akaru ona' manyuro' alao' lo'a dosaan. Tapat mainya' nyawaka' to' malola'ani panamu maamen. Poangsi alowe' dinen panamu diri'ka'. Badidit malola'aniin. Ialalo arung bayokka' bado'aan,” ingka kenang lo'da'.

42Jaji tabalik bapi kaduang kalina bado'aan, “O Ama'ku', ti' parinsa'en di'en na'an dapat ikapi'ang, ti' arung adari lo'ku', daiko poang panamunu ipakaien,” ingka kenang do'ana.

43Mamin dinen mole' bua lo'da'. Tindo' bapi ira kole'a alolo' tapat matada'. 44Jaji marantang lo'da' lamba' bapi bado'a. Awan dinen bua jarum do'ana.

45Jaji mole' bua dinen lo'a palola'a, manjarum lo'da', “Ai tindo'kinpi, sangarian? Belejo, di' to' mondok bayana. Iak di'en Anak Mantuariin daduangak lo'a tanganna tau badosaan,” ingka kenang. 46“Asadingkin, se'. Tarangkatki', mondok lalo tau to' maduangen lo'ku' mainto' dakule'ku' datingkam kole'a musuku',” ingka kenang i Yesus lo'da'.

I Yesus datingkam

Mk. 14:43-50; Lk. 22:47-53; Yoh. 18:3-12

47Jaji barik mansangapi manjaruma i Yesus, mondok lalo i Yudas yang di dua belasen dinen. Andian bea tau tambaan nanna i Yudas dinen ambata tau babangkulungen yang dasuro'en kole'a gulungan imam baraa'en, gulungan toa-toaan. Andian yang mawa basiin, andian yang mawa balantanen. 48Yang tau maduangen de'i dameang tanda lo'da', “Intain ona' kusumen,” ingka, “dinen yang iaan. Tingkam ikin,” ingka kenang lo'da'. 49Jaji mondok lo'a dinen laloang mainso'i lo'a i Yesus, “Mase'ko Pa' Guru,” ingka kenang. Laloang dasum.

50Jaji manjarum i Yesus, “Kawane, to' maiko mondoku lo'a di'en?” ingka kenang.

Jaji barik maju dinen tauen manangko' lo'a i Yesus, maningkam. 51To' maningkam dinen, andian bea tau ibiringa i Yesus yang manarik basina dinen, dayo'ang laloang dasapa' talingana pangkama imam baraa'en. Akatu talingana.

52Jaji manjarum i Yesus lo'a, “Pole' dinen basinu lo'a awanga. Kosan ratina. Tau yang mayo'ang basiin, din bua yang mateen kole'a basiin,” ingka kenang. 53“Ai na'an itamu ikin, ti' to' manu jalu kenangen, ti'en mangalongak lo'a Ama'ku' tentu dasuro'ang malaikata lo'a di'en baribu-ribu bayu'a. 54Poangsi to' ianu awan dinen, ai lo'a adarina bayana yang datulisangen ilalam Jaruma Alatala yang manjarumangen jalu to' adariin lo'ku'?” ingka kenang lo'a tau manjaput basiin.

55Jaji inang rabarik i Yesus manjaruma lo'a tau babangkulungen dinen, “Asi to' mawa basiin, mawa ambata balantanen? Iasanangak ikin to' parampok? Padahal mairaso adudukku' di Saona Alatala, majarku' lo'a tauen. Nanga dinen ti' to' itingkamak ikin, suba na'an ikule' itingkam ikin,” ingka kenang i Yesus lo'da'.Lk. 19:47; 21:37. 56“Poangsi maam. Arung ipadari gulungan baya yang datulisangen ilalam Jaruma Alatala,” ingka kenang i Yesus. Maminna dinen, gulungan palola'a dinen, samuana marantang unjang lo'a, arari.

I Yesus daawa mamutusi

Mk. 14:53-65; Lk. 22:54-55,63-71; Yoh. 18:13-14,19-24

57Jaji barik tau maningkamen lo'a, mawa lo'a i Yesus lo'a i Kayapas yang imam baraa'en. Inang bea dinen gulungan toa adaten babangkulung nanna toa-toaan. 58I Petrus dinen malola' bea ibalakang dari bajao'en sampai mondok ilalam lo'a pakar saona imam baraa'en. Jaji intama bua lo'a dinen ilalam pakaren, aduduk barik inang nanna panyagai saoen, to' mamele jalu to' adariin.

59Jaji barik dasari saksi panganung-nganungen kole'a ambata imam baraa'en, kole'da' samuana Paurusen yang tau manyaksiin lo'a kasala'anna i Yesus mainto' idukum matena. 60Isari saksi lo'a dinen, kapisi bayu' tau mawaan saksina, yang saksi panganung-nganungen, na'an dadua'ang.Pal. 20:16.

Imundiin rabarik, andian tau dua yang akadengen laloang 61manjarum, “Andian idalinga ikam jaruma i Yesus dinen ingka, Saona Alatala di'en pande darurun laloang dalam talung asoon, ingka, pande dapola bapi,” ingka kenang pangaduanda'.Yoh. 2:19.

62Mamin dinen akadeng dinen imam baraa'en matoani lo'a i Yesus, “Ai lo'a saksina ira di'en maduanga lo'u? Ai daiko, kosan sautinu?” ingka kenang. 63Poangsi na'an kakaji' i Yesus.

Jaji manjarum imam baraa'en lo'a i Yesus, “Ai daiko, iko lalo Kristus dinen Anaka Alatala? Manjarumak lo'u atas asanna Alatalaka' yang tio'en, kusuro'ko jarumang kalenu lo'am,” ingka kenang lo'a i Yesus.

64Jaji barik dasauti kole'a i Yesus, “Kenang lalo, awan bua jarumu,” ingka. “Poangsi manjarumak lo'in samuanin, ka' bea ona' ikitaku' ikin. Iak Anak Mantuariin ikitaan aduduk ibiring katona Tau Bakuasaan,” ingka kenang. “Andian bua ona' ikitaku' ikin mondok di domen,” ingka kenang i Yesus manjaruma lo'da'.Dan. 7:13.

65Maminna dinen, imam baraa'en dinen, daripak sapena lasana ajau'a nyawana mandalingana jaruma i Yesus dinen de'i.Im. 21:10. “Dinen lalo jarum pajau'-jau'a lo'a Alatala. Ai lagi' isaksina iki' balik-balik, ikatoananga iki'? Itamu lalo iki', mamin idalinga pajau'-jau'a lo'a Alatala,” ingka. 66“Ai kaputusanka'?” ingka kenang.

“Daia dinen arung idukum mate,” ingka kenang ira manyautina.Im. 24:16.

67Mamin dinen ira dinen mame'i lindo'a, mabal lo'a. Andian bea manamparen lo'a,Yes. 50:6. 68sarata manjarum, “O daiko Kristusen, suba asan kira-kira. Intain mabalen lo'u?” ingka kenang ira.

I Petrus asasal lo'a i Yesus

Mk. 14:66-72; Lk. 22:56-62; Yoh. 18:15-18,25-27

69Di nanga dinen i Petrus dinen adudukpi di pakar saoen. Jaji barik andian suro'an babainyeen mondok manjarum, “Daikopi balu'-balu' kawanna i Yesus tau Galilea dinen,” ingka kenang lo'a i Petrus.

70Poangsi i Petrus dinen panasalang kalena di arona tauen, “O na'an kutamu ratina jarumu,” ingka kenang manasala.

71Mamalin bapi di mambangan pakaren. Jaji andian bapi suro'an babainyeen inang manjarum lo'a tau ibiringaan, “Tau di'en balu'-balu' tau nanna i Yesus tau Nasaret dinen,” ingka kenang.

72Jaji asasal bapi dinen i Petrus sampai mamang kalena atas asanna Alatala, “Okan! Na'anak mangilala lo'a tau dinen,” ingka kenang.

73Mamin dinen, na'an balaun gulungan tau ibiringaan dinen manjarum lo'a i Petrus, “Daiko tentu tau nanda', kole'a unyi jarumu sabalu' bua nanda',” ingka kenang lo'a i Petrus.

74Daiapi dinen asasal bapi, sampai mamang kalena, “Saja na'anak mangilala mantuari dinen yang ijarumangen ikin!” ingka.

Manukenpi dinen manuturunguk barik. 75Daiapi dinen parandam barik jaruma i Yesus sijarumanda' dinen lo'a soal to' manasala de'i, “Nampina manunturunguk manuken, daikopi to' mamin talung kali manasalu lo'ku',” ingka kenang dinen. Jaji i Petrus dinen anangis barik, sampai sikuk-sikuk anangisa barik dinen i Petrus parandama lo'a jaruma i Yesus.

Currently Selected:

Matius 26: EBE

Highlight

Copy

Compare