Matius 27

I Yudas uno' kalena

Mk. 15:1; Lk. 23:1-2; Yoh. 18:28-32; PalPa. 1:18-19

1Jaji malam-malam barik, gulungan imam baraa'en nanna toa-toaan mamola kaputusan to' maukum mate lo'a i Yesus. 2Jaji barik daingkat i Yesus dinen, daawa lo'a Gubernur Pilatus, daduang.Mk. 15:1; Lk. 23:1; Yoh. 18:28.

3Jaji datamuna dinen kole'a i Yudas, tau maduangen lo'a i Yesus lo'a musuna de'i, daiapi manasal barik. Jaji duit sogo'en dinen yang tiga pulo' papaka duit piraken daawa lo'a gulungan imam baraa'en nanna toa-toaan. 4“Badosa'ak di'en,” ingka kenang. “Tau yang na'anen arasala' kuaduang kakaru',” ingka kenang. To' dapole' duit dinen.

“Asi dinen? Okan urusanam dinen. Dinen tanggung jawapu,” ingka kenang imam baraa'en lo'a i Yudas.

5Rabarik dinen i Yudas, datampeang duit dinen di saona Alatala. Daiapi dinen inyap lamba'. Mamin dinen, daia gantung kalena sampai mate.

6Mamin dinen barik duit dinen daunto'i kole'a gulungan imam baraa'en, “Duit di'en na'an pande itaro' iki' di duit kas saona Alatala. Na'an pande di ukumka' kole'a di'en lalo duit pamayar peti nyawaan,” ingka kenang. 7Barik ilalam kaputusanda' dinen, duit dinen to' datiang pamali tana' lo'a tau tukang bakamen. Inang barik kuburanga tauen yang tau asingen, tau bokanen. 8Dinen lalo ratina tana' dinen sampai aso di'en iasan barik Tana' Dara'.PalPa. 1:18-19. 9Inang lalo adarina bayana baki' Yeremiajo, yang panjaruma Paraampuanen dinen,

Ragana peti nyawana dakira kole'da' kanturunanna baki' Israel, tiga pulo' papaka duit pirak. Rabarik peti nyawana dinen dapaguna kole'da' 10itiang pamali tana' lo'a tukang bakamen awan lalojo paba'ina Alatala lo'ku', Sak. 11:12-13.

ingka kenangjo ilalam Jaruma Alatala.

I Yesus daawa lo'a arona Gubernur Pilatus

Mk. 15:2-5; Lk. 23:3-5; Yoh. 18:33-38

11Jaji barik i Yesus akadeng di arona Gubernur Pilatus. Jaji dakatoani, “Ai daiko di'en, iko lalo rajana tau Yahudiin?” ingka kenang.

“Kenang lalo,” ingka kenang i Yesus manyautina.

12Jaji barik daduang sala'a i Yesus dinen kole'a gulungan imam baraa'en nanna toa-toaan. Poangsi i Yesus dinen na'an kakaji'. 13Jaji barik manjarum bapi dinen Gubernur Pilatus, “Belejo bayu'a kasala'annu daduangen kole'da'. Na'an idalinga iko?” ingka kenang. 14Poangsi i Yesus dinen na'an manyauti pangaduanda'. Sabata'pi kosan. Jaji Gubernur Pilatus dinen raranga' nyawana mamikira kole'a na'anna lagi' dasauti aduanda'.

I Yesus daukum mate

Mk. 15:6-15; Lk. 23:13-25; Yoh. 18:39—19:16

15Jaji di aso rami-ramiin ti' awan atoran kiraso, di antarana tau itaanen di sao ukumanen andian dapalapasen kole'a i Pilatus, intain poang dapitaan kole'da'. 16Nanga dinen andian tau idukumen asanna i Barabas. Datamu kausa tauen lo'a dongona i Barabas dinen. 17Jaji maminna barik tauen babangkulung, i Pilatuspi mangatoani lo'da', “Intain kupalapasen lo'in, i Barabas atau i Yesus di'en yang daasanen Kristus?” ingka kenang lo'da'. 18Ratina to' dasuro' palapas i Yesus, kole'a datamu mamin ratina daduanga i Yesus, kole'a lalo kapiayona ira dinen imam baraa'en.

19Jaji i Pilatus dinen aduduk di ale' kasan. Jaji barik mondok jarum dapawaang kole'a bainyena, “Ada'ko sampur tanganen lo'a urusanna mantuari dinen, yang tau kosanen sala'a. Laan-laan muiku' pamamalamen kole'a tau dinen, susa tapat,” ingka kenang paba'ina bainyena.

20Poangsi dinen gulungan imam baraa'en nanna toa-toaan majo-ajo' lo'a tau babangkulungen. Dasuro' mamita palapas lo'a i Barabas. I Yesus dinen to' dasuro' panandapa salip.

21Jaji barik, “Inde antarana ira duaan kupalapasen lo'in?” ingka kenang i Pilatus mangatoanina lo'a tau bayu'en.

“I Barabas poang ipalapasen!” ingka kenang barik ira tau bayu'en.

22Jaji manjarum barik dinen i Pilatus, “Ati' kenang, ai tau yang iasanen ikin Kristus? Iai?” ingka kenang.

Jaji samuana sarata manjarum, “Uno' poang ipanandapa salip!” ingka kenang.

23Jaji barik i Pilatus manjarum bapi lo'da', “Ai ratina Raja Yahudiin to' idukum mate? Ai sala'a?” ingka kenang.

Poangsi dinen insang dapuko-pukoang kole'da', “Uno' poang, ipanandapa salip!” ingka kenang manjaruma lo'a i Pilatus.

24Jaji i Pilatus dinen datamu diri'a atalo. Tauen dinen mamin marang-arang. Jaji dala danumen laloang daputi' tanganna di arona tau bayu'en. “Daiak di'en lapas tanganak. Na'anak tanggung jawap lo'a dara'a tau di'en. Tanggung jawap diri'in,” ingka kenang dinen Gubernur Pilatus.Ul. 21:6-9.

25Jaji manyauti samuana tauen, “Daikam lalo tanggung jawapen, daikam nanna gulungan anak kanturunannam!” ingka kenang manyautina lo'a Gubernur Pilatus.

26Mamin dinen dapalapas dinen yang i Barabasen. Poangsi yang i Yesusen dasuro' supet. Mamin barik dasupet daparuarang lo'da', to' dapanandapa di kayu salip sampai mate.

Ambata tentaraan mananawai lo'a i Yesus

Mk. 15:16-20; Yoh. 19:2-3

27Jaji rabarik tentarana i Pilatus dinen mawa lo'a i Yesus ilalam saona i Pilatus. Mondok ilalam, dakombongang kausa ambata tentaraan inang. 28Dararak dinen kainna i Yesus, daparakaini nanna kain langkeen, kain rajaan. 29Daanu kambu'a, daanam nanna ambata gulungan pati'en. Daapis di uluna. Dameang tungkat di tangan katona. Mamin dinen rabarik, mulai ira dinen malingkutut ijolona, manyialo lo'a, “Balangke tio'u, iko rajana tau Yahudiin!” ingka kenang jarumda' patatawaina lo'a. 30Malasui sapa dua lo'a. Dala tungkata di tanganna, mabal-abal ira di karampang uluna. 31Mamin akaus patatawaina ira dinen, akaus lapoang panamuna mala paradai'anna lo'a i Yesus dinen, dalaka' bapi kain rajaan, baru' barik parakaini kalena. Daawa barik insaluan to' dapanandapa salip.

I Yesus dapanandapa salip

Ul. 21:22; Mk. 15:21-32; Lk. 23:26-43; Yoh. 19:17-27

32Jaji barik patanga'an lamba'da' mawaan dinen lo'a i Yesus, sidua' barik nanna tau, i Simon asanna, urang Kirene. Jaji barik dapaksa barik dinen mayan salipa i Yesus. 33Jaji barik mondok lo'a kosan yang iasannen Golgota ilalam jarum Ibraniin. Golgota dinen, ti' awan jarumka', karampang uluun.

34Jaji mondok indinang barik ira dinen panyorongang angguren lo'a i Yesus, anu yang dabarokangen nanna jalu apaiten. Poangsi maminna danyanyami, alibak i Yesus mainyum. 35Jaji i Yesus dinen dapanandapa inang. Mamin barik dapanandapa, gulungan kainna i Yesus datawa'-tawa'. Dapakai tanungan itiang manawa'. Intain dinen dadua' tanunganen dinen, dinen malaan.Msm. 22:19. 36Mamin dinen aduduk dinen tentaraan maruangi lo'a.

37Jaji i Yesus dagantung inang, di kayu salipen dinen. Ibona uluun andian tulisan katarangan sala'a yang dapalakaten inang di kayu salipa, datulisa kenang, “Di'en lalo I Yesus Rajana tau Yahudiin,” ingka kenang. 38Dibiringa, andian bapi tau dapanandapaan, tau parampoken, sera di katona, sera di kayoko'a. 39Tau yang lamba'en inang mananawai lo'a i Yesus. Dagiling-gilingang uluna,Msm. 22:8; 109:25. 40“Na daiko dinen yang tau to' marurun saona Alatala kalo'u, yang to' pamaamiin dinen dalam talung asoon,” ingka kenang, “suba katio' kalenu. Tadorko dari kayu salipen ti'ko tapat Anaka Alatala,” ingka kenang.Mat. 26:61; Yoh. 2:19.

41Gulungan imam baraa'en, ambata toa adaten nanna toa-toaan ka' kenanga, 42“Tau bokanen dapat dakatio'. Poangsi diri'a na'an dakule' dakatio' kalena. Na, rajana tau Israelen, suba tador dari kayu salipen mainto' ibelena ikam, mainto' iparasaya'inu,” ingka kenang jarumda'. 43“Daia dinen marap lo'a Alatala. Anaka Alatala, kaingka. Suba Alatala matio'en lo'a ti mainya',” ingka kenang ira.Msm. 22:9. 44Ira dinen tau dapanandapaan dua' baliin tamba bea pajau'-jau' lo'a.

I Yesus mate

Mk. 15:33-41; Lk. 23:44-49; Yoh. 19:28-30

45Mamin dinen barik dari tanga' asoon, araun kausa banuaan. Mondok jam talu araunna. 46Mondok jam talu dinen, i Yesus barik dinen mangalong nanna unyi baraana, “Eli, Eli lama sabaktani!” ingka kenang. Jaji ratina dinen, “Alatalaku', Alatalaku', asi lo'a irantangku' iko?” ingka kenang ratina.Msm. 22:2.

47Jaji andian tau akadengen ibiringa, “Na, belejo,” ingka, “Mangalong lo'a baki' Elia dini,” ingka kenang.

48Jaji arari tauen sera, mala dinen bunga karangen, jalu balu' busaan dinen, daisi'i nanna anggur masamen. Mamin dinen datanggeang di kayuun, dapainyumang lo'a i Yesus.Msm. 69:22. 49“Ona'jo,” ingka ira bokanen, “Ibele iki' ijolo ti' mondok baki' Elia to' mawa tador lo'a,” ingka kenang manjaruma tauen.

50Mamin dinen i Yesus mamuko bapi nanna unyi baraana laloang mangatu nyawana.

51Laloang dinen aripak kain siringen di saona Alatala yang manyiringiin kosan yang palin bareseen. Dari ibo mondok inyaung abala' kain siringen dinen. Tatagar barik tana'en kole'a gempa bumiin. Gulungan batu baraa'en abala'.Pal. 26:31-33. 52Tabongkar barik gulungan loang batu kuburan tauen. Gulungan tau mateen yang malola'enjo lo'a Alatala, bayu' yang tio' baliken. 53Laloang maruar ira dari kuburen. Di ona'a dinen, maminna barik i Yesus tio' balik, tau dakatio'en dinen lamba' intama di banua Yerusalem laloang payoang kalena lo'a tauen inang.

54Jaji barik panguluan tentaraan nanna tau ibiringaan yang manyagaien inang, atakut jaji kole'a dakitana dinen gempa bumiin, kole'a andianna kadarianna balu'a dinen. Jaji barik manjarum, “Tapat lalo pan Anaka Alatala tau dinen!” ingka kenang.

55Inang bua de'i andian tau babainye yang mameleen lo'a dari bajao'en. Daira lalojo dinen malola'en lo'a di Galilea yang manggulungiin lo'a. 56Jaji antarada' dinen andian i Maria Magdalena. Andian bea i Maria tamanga, induna ari Yakobus nanna i Yusup dinen. Andian bainyena i Sebedeus.Lk. 8:2-3.

I Yesus dakubur

Mk. 15:42-47; Lk. 23:50-56; Yoh. 19:38-42

57Jaji pamamalamen barik andian i Yusup yang tau maamen tio'a, tau banua Arimatea. I Yusup mamin bea padari palola'a i Yesus. 58Jaji lamba' dinen lo'a i Pilatus mamita dinen bangkayoanna i Yesus. I Pilatuspi barik paruarang lo'a i Yusup, dasuro' lo'a tentarana maunjukang lo'a. 59Jaji barik dinen daawa lalo kole'a i Yusup bangkayoanna i Yesus dinen, daliliti nanna kain lenan baruun. 60Maminna dinen dapalenga' di kubur diri'a, jalu batu daloangen kole'a i Yusup, yang na'anen kala' dapakai. Mamin dapalenga' inang, baru' barik dagoleng batu baraa'en dinen yang datiang pangaputi baba' loang kubura dinen. Laloang dinen inyap lamba'.

61Jaji andian ari Maria Magdalena nanna Maria tamangaan dinen. Ira aduduk maroi kuburen dinen.

Tentara Roma dasuro' manyagai di kubura i Yesus

62Jaji talalo barik aso Juma'at dinen, yang aso pangamasangen memen lo'a aso Sabaten. Di aso mina'a barik, lamba' ira gulungan imam baraa'en nanna tau Parisiin, to' sijaruman nanna i Pilatus. 63Jaji barik, “O Pa',” ingka', “daikam parandam lo'a jaruma tau makalen dinen, Tuli talung aso, daiak to' tio' balikak, kaingka.Mat. 16:21; 17:23; 20:19; Mk. 8:31; 9:31; 10:33-34; Lk. 9:22; 18:31-33. 64Jaji daikam mondokam di'en, kubura i Yesus dinen arung ijagai talung aso launna. Ungka'en ona' dakalit bangkayoanna kole'a gulungan palola'a. Ungka'en to' daasan lo'a tauen i Yesus mamin tio' balik. Jaji insang kaya ona' makala lo'a tauen,” ingka kenang ira lo'a i Pilatus.

65Jaji manyauti dinen i Pilatus, “O, asi bea ti' kenang. Mawakin panyagaien, se'. Karuangi ikin maam-maam,” ingka kenang i Pilatus lo'da'. 66Jaji lamba' dinen ambata imamen nanna tau Parisiin lo'a dinen. Dacap batu pangaputi kubura dinen, dakasili'i nanna capen. Dasuro' manyagai barik lo'a tentarana i Pilatus dinen.

Currently Selected:

Matius 27: EBE

Highlight

Copy

Compare