Matius 21

I Yesus mondok lo'a Yerusalem awan rajaan

Mk. 11:1-11; Lk. 19:28-40; Yoh. 12:12-19

1Jaji lamba' barik i Yesus nanna palola'a, mainso' bua lo'a banua Yerusalem, inang di banua Betpage di ukit Saitun. 2Jaji manjarum i Yesus dapaba'i palola'a duaan, “Lo'a dinenkin, lo'a banua tumbalianen nanka'. Intamakin ona' lo'a banua dinen, laloang to' ikita inang keledaien yang itunja'angen. Andian bua anaka inang ibiringa. Dinen laka'i ikin, awa lo'di',” ingka kenang i Yesus lo'da'. 3“Jaji ti' andian ona' tau mamele dinen matoani lo'in, jarumang poang, to' daparulu kole'a Paraampuanen, ikin kenang manjarumen. Ka' bea daparuaranga,” ingka kenang manjaruma i Yesus lo'da'.

4Jaji ratina awan dinenna, itiang padari jarum bayana panjaruma Alatalajo yang kenang,

5 Na, jarumang lo'a tau banua Sion, Belejo rajanin mondoka lo'in, yang tau alowe'en. Aduduk mauwat di keledaien, di anak keledai baruun dinen, Sak. 9:9.

ingka kenangjo panjaruma Alatala.

6Jaji barik tarangkat dinen palola'a duaan dinen, malola'ani paba'ina i Yesus dinen lo'da'. 7Daawa barik anak keledaien nanna induna mole' lo'a i Yesus. Laloang daampari balakanga nanna ampuroda', dauwati barik kole'a i Yesus. 8Tauenpi dinen bayu' yang mamparang ampurona di' dalanen. Sapa dua dinen manyapa' daun kayu di belean umaan itiang palapisi dalanna manyialona lo'a. 9Andian lamba'en ijolona. Andian lamba'en imundina mamukoang, “Balangke tio'u anak kanturunanna baki' Raja Daud! Dapamaamko tau mondoken atas asanna Paraampuanen. Balangke tio'a Alatalaka' di kosanna di Surga,” ingka kenang tauen mamukona.Msm. 118:26.

10Jaji intama barik i Yesus lo'a Yerusalem, bagado tauen indinangen. “Intainsi dinen?” ingka kenang.

11“O dinen lalo i Yesus panjaruma Alatala yang tau banua Nasaret di Galilea,” ingka kenang tauen manyautina.

I Yesus mamarese Saona Amana

Mk. 11:15-19; Lk. 19:45-48; Yoh. 2:13-16

12Jaji barik i Yesus lamba' intama lo'a pakar saona Alatala. Jaji mondok ilalam, andian ambata tau badangangen inang. Akaus dauser barik, dasuro' mamalin, dasuro' minsaluan. Gulungan mejada' tau panukar duiten dapasunsang. Gulungan kursina tau mamet burung merpatiin ka' kenanga. 13Laloang manjarum i Yesus lo'da', "Asi lo'a jalu datulisangen ilalam Jaruma Alatala dinen,

“Saoku' di'en to' iasan sao kosan bado'aan, Yes. 56:7; Yer. 7:11.

ingka kenangjo ilalam Jaruma Alatala. Poangsi daikin laan polana kole'in. Ipola ikin sao parampasen,” ingka kenang manjaruma i Yesus lo'da'.

14Jaji barik mondok tauen lo'a saona Alatala inang, ambata tau bautaan, ambata tau araiten, dapamaam kausa kole'a i Yesus. 15Jaji barik andian nangkanaken mamuko dinen mamudi, “Dapamaamko anak kanturunan baki' Raja Daud!” ingka kenang. Jaji gulungan imam baraa'en nanna toa adaten mamele maama panyunyuana i Yesus, sarata mandalinga jaruma nangkanaken dinen, ajau' barik nyawada'. 16Jaji manjarum lo'a i Yesus, “Ai na'an idalinga iko nangkanaken dinen manjaruma?” ingka kenang. “Ai na'anna irada'i iko?”

“Kudalinga,” ingka kenang i Yesus. "Ai daikin, na'ankin kala' mandalinga, na'an kala' mambasa jalu datulisangen ilalam Jaruma Alatala di ayat di'en,

“Dari baba' nangkanaken lalo, nangkanak manusu'enpi, pande ibobosang iko jarum isuro'en mamudi lo'ku', Msm. 8:3.

ingka kenangjo ilalam Jaruma Alatala,” ingka manyautina i Yesus lo'da'.

17Mamin dinen laloang inyap i Yesus marantang unjang lo'da'. Lamba' minsaluan banuaan lo'a Betania laloang samalam inang.

I Yesus aramamang lo'a akat araan

Mk. 11:12-14,20-26

18Jaji makapen barik, malam-malam, i Yesus dinen mole' lo'a Yerusalem. Jaji i Yesus dinen mase' batanga. 19Jaji dakita di biring dalanen, andian akat ara, laloang dalamba'i kole'a i Yesus to' manyari bua'a. Dabele barik, kosan bua'a, daunna poang. Jaji manjarum, “Tadangko barik ambua'en, ada'ko lagi' ambua'en,” ingka kenang. Laloang akalas barik akat kayuun dinen.

20Jaji dabele kole'a palola'a awan dinen, tatakau ira, “Asi kenanga pandena bariar akalasa akat araan dinen?” ingka kenang dinen palola'a lo'a i Yesus.

21Jaji dasauti kole'a i Yesus, “Manjarumak lo'in tapat-tapat. Ati'enkin parasaya', ti' na'an dua-talu atenin, daikinpi dinen pandekin mamola awan dinen bua. Okan dinen poang pande ilola'aniin. Manjarumki' lo'a ukiten isuro' angkatang kalena, tampeang kalena lo'a danoon, pande bua adari.Mat. 17:20; 1Kor. 13:2. 22Jalu ipitaan iki' di do'aka' pasti itarima' iki', asal poang parasaya',” ingka kenang i Yesus lo'da'.

Tauen mangatoanang kuasana i Yesus

Mk. 11:27-33; Lk. 20:1-8

23Jaji barik i Yesus dinen intama lo'a pakar saona Alatala majar. Patanga'an majara dinen, mondok bea inang imam baraa'en nanna toa-toaan. Jaji barik matoani lo'a i Yesus, “Intain manugasen lo'u, yang mameang kuasaan lo'u itiang manu jalu di'en? Kuasana intain ipakaien iko?” ingka kenang ira lo'a i Yesus.

24Jaji barik manyauti lo'da', “Mangatoaniak bapi lo'in. Jarumang ikin lo'ku'. Ati'enkin manjarumang lo'ku', kujarumang bea daiak lo'in kuasa yang jalu kupolaan di'en,” ingka kenang lo'da'. 25“Jaji waktu nanga i Yohanes mambaptis tauna dinen, intain manugasen lo'a? Kuasa dari nanna Alatalaaka, kuasa dari mantuariinaka?” ingka kenang i Yesus lo'da'.

Jaji barik sijaruman ira, “Iasan iki' ona' kuasa dari Alatala, daiapi tentu mamalas lo'ka', Maisi daikin pandenin na'an parasaya' lo'a, tentu ingka lo'ka',” ingka kenang ira sijarumanna. 26“Sabalika to' iasan iki' kuasa mantuariin, ai lo'a? Atakutki' daanu kole'a tau bayu'en, kole'a samuana parasaya' lo'a i Yohanes dinen awan panjaruma Alatala,” ingka kenang ira.

27Jaji barik manyauti ira lo'a, “Taua. Na'ankam manamu,” ingka kenang.

“Na, ati'en na'an itamu ikin, na'anak bea daiak manjarumang lo'in kuasa yang jalu kupolaan di'en,” ingka kenang i Yesus lo'da'.

Tau dua pariin yang dasuro' bakaraja dala sama' jarum

28“Na, ai lo'a daikin kapikirannin?” ingka kenang i Yesus bapi lo'da', "Andian tau, dua anaka, babaka duana. Jaji anaka yang atoaan dasuro' kole'a amana, Iko aso di'en bakarajako di kobon angguren, anake, ingka kenang lo'a.

29"Jaji barik dasauti kole'a anaka atoaan dinen, Alibakak, ingka kenang dinen anaka. Mamin dinen barik bapikir, manasal barik. Jaji tarangkat bua inyap bakaraja lo'a kobon angguren dinen.

30"Jaji barik manjarum dinen lo'a anaka yang kaduaan bapi manyuro' bakaraja.

“O', mainya'ak, ingka kenang anaka yang kaduaan. Poangsi na'an bea tarangkat,” ingka kenang tutulanna i Yesus.

31Jaji matoani lo'a imamen nanna toa adaten, “Inde yang mamatiangen lo'a amana antarana anaka duaan dinen?” ingka kenang i Yesus lo'da'.

“Anaka atoaan,” ingka kenang barik manyautina ira.

Jaji manjarum bapi i Yesus lo'da', “Na, kenang lalo. Manjarumak lo'in tapat-tapat. Tajolo dinen tau panarima' sukaien lo'in, tajolo alit dinen babainye pandayangen masoka padari panduduk kangkamanna Alatala. 32Kole'a i Yohanesjo dinen mondok mamin manjarumang lo'in dalan tapaten. Poangsi daikin alibakkin. Na'ankin parasaya'. Ambata tau panarima' sukaien, ambata pandayangen parasaya' lo'a jaruma i Yohanes. Ikita bua ikin ira. Itamu bua parasaya'a, sampai to' maunjang lo'a pikiranna yang sala'en itiang malola' lo'a panamuna Alatala. Kapi poang mamin ikita awan dinen, na'anpi buakin mainya' to' maunjang pikirannin yang sala'en. Na'anpi buakin parasaya',” ingka kenang i Yesus lo'da'.Lk. 3:12; 7:29-30.

Tau manyewa kobon angguren dala sama' jarum

Mk. 12:1-12; Lk. 20:9-19

33“Jaji andian bapi sama' jarum kujarumangen lo'in, taan talinganin. Andian tau mananam kobon angguren. Jaji kobon anggur dinen dapakar. Dapolaang bak palatan bua' angguren paala danuma. Dapolaang tampara' itiang paruangi kobonen,” ingka kenang i Yesus lo'da' sama' jaruma. "Jaji barik kobon anggur dinen dasewaang lo'a tauen. Mamin dinen tarangkat daia dinen tau ampuna kobon dinen, lamba'.Yes. 5:1-2. 34Ada'a barik asona dasuro' suro'anna lo'a dinen managi pamagian asela angguren dinen.

35"Jaji barik gulungan tau manyewaan dinen maningkam lo'a suro'anna dinen. Yang seraan datiang, seraan dauno', seraan bapi daparati nanna batuun. 36Jaji barik dasuro'ang bapi suro'anna lo'a dinen, labi bayu' lagi' lo'a joloon. Daanu bapi ira, awan bua yang maminen. 37Jaji imundiin rabarik anaka dasuro'en lo'a dinen. Pasti dapaduli anakku', ingka kenang nyawana.

38“Poangsi mondok rabarik lo'a dinen, sijaruman ira tau manyewaan dinen, Na, di'en anak daarapen lalo di'i yang dasuro'en. Barik ona' iana lalo ampunaan. Se' iduno' iki', na kenang kobona di'en iala iki', ingka kenang sijarumanna sera lo'a seraan. 39Jaji dala barik anaka dinen, datampeang insaluanna kobonen, dauno'.”

40“Jaji ai lo'a barik urusanna tau ampuna kobonen dinen?” ingka kenang i Yesus lo'da'.

41“Gulungan tau ajau'en dinen tentu labi ajau' bapi matena,” ingka kenang ira manyautina lo'a i Yesus. “Tentu kobonna dinen dasewa lo'a tau bokanen yang tau mainya'en mameang pamagianna lo'a ti' mondok musim matamen,” ingka kenang ira.

42Jaji manjarum bapi i Yesus, “Na, kenang lalo ti'en jalu dakamainya'iin kole'a Alatala ikalibakang iki'. Asi dinen jalu datulisangen ilalam Jaruma Alatala manyama'angen lo'a tau dabayaangen dinen, na'an kala' ibasa ikin? Jaji kenang jalu datulisangen inang,

Andian batu yang na'anen dapaguna kole'a tau pamola saoen, daunjang. Batu dinen barik yang padari batu palin pentingen di pambungunan. Dinen lalo karajana Alatala yang maamen jaji kalo'ka',” Msm. 118:22-23.

ingka kenangjo ilalam Jaruma Alatala.

43“Jaji manjarumak lo'in, to' dapase'ang lo'in padari panduduk kangkamanna Alatala. To' daparuarang barik lo'a tau bokanen yang tau mainya'en mawa basa maamen, basa yang patuten lo'a tau panduduk kangkamanna Alatala, yang tau datamuun panyanjak kangkamanna Alatala. Isama'ang iki' awan tau manyewa kobon dinen de'i, anu mainya'en manyera bua'a lo'a tau ampuna kobonen. 44[Jaji awan batu dinen yang dakalibakangen de'i, intain ona' tatoroon lo'a batu dinen, dinen to' apolo barik. Intain ona' dalao'iin batu dinen to' abobor jaji,”] ingka kenang i Yesus lo'da'.

45Jaji barik sama' jarum dinen datamu kole'a imam baraa'en, kole'a tau Parisiin, to' manyama'ang lo'da' awan tau mangalibakangen dinen lo'a pasuro'a tau ampuna kobonen dinen. Jaji dasari dalanna to' maningkam lo'a i Yesus. 46Poangsi kamainya'anna dinen na'an adari kole'a atakut ira daanu kole'a gulungan tau bayu'en. Kole'a samuana masan lo'a i Yesus panjaruma Alatala.

Currently Selected:

Matius 21: EBE

Highlight

Copy

Compare