Matius 20
20
Tau ampuna kobonen dala sama' jarum
1Jaji manjarum bapi i Yesus, "Jaji kangkaman Surga adarina awan lalo tutulan tau ampuna kobonen. Andian tau ampuna kobon angguren. Jaji malam-malam tarangkata daia manyari tau to' dasuro' bakaraja di kobon angguren, to' dagaji. 2Jaji mandua'ang dinen tau, ilalam bayana lo'da', gajida' dalam saso to' dameang sapapak duit dinar. Jaji dasuro' tarangkat barik bakaraja di kobonna. 3Jaji kira-kira jam sumilan barik, lamba' bapi tau ampuna kobonen, lamba' lo'a pasaren. Mondok inang, dakita andian bapi tau lalako' poang inang, kosan karajana. 4Jaji manjarum lo'da', Jaji ikin bapi bakarajaan di kobonku'. Bele poang kugajinin, baranga mandua'en, ingka kenang tau apuna kobonen dinen. 5Jaji tarangkat ira bakaraja di kobonen.
"Kira-kira jam dua belas lamba' bapi daia. Jam tiga kenang bapi. Awan dinen bua manjaruma lo'a tau sidua'en nanna di pasaren. Dasuro' bakaraja bua di kobonna.
6"Maminna dinen, jam lima bapi pamamalamen lamba' bapi tau ampuna kobonen dinen. Andian bua dinen tau inang di pasaren, lalako' poang, kosan karajana. Jaji barik dakatoani, Asi daikin tumbas adudukkin saso-aso na'ankin lagi' bakaraja? ingka kenang.
7"Jaji manyauti, Kosanpi tau manyuro' lo'am, ingka kenang.
"Jaji barik, Ati'en kenang, se' tambakin bea nanku' bakaraja di kobonku', ingka kenang dinen tau ampuna kobonen.
8"Pamamalamen jaji, manjarum barik tau ampuna kobonen lo'a suro'anna yang tau kapala' karajaan. Na, gulungan tau to' igajiin dinen, suro' mondok barik. Anu yang imundiin masoka, dinen tajolo bayara. Anu yang mulakat masoken, dinen imundiin bayara, ingka kenang dinen jaruma tau ampuna kobonen.Im. 19:13; Ul. 24:15.
9"Jaji barik dabayar dinen, anu yang imundiin masoka dinen, yang jam limaan, sapapak duit dinar bayara kira mantuariin. 10Jaji barik dabele awan dinen kole'da' yang mulakat masoka, daasanang to' labi dinen gajina, tawa'ina. Poangsi bayara dinen sapapak duit dinaren bua kira mantuariin. 11Jaji amumut ira lo'a tau ampuna kobonen, 12Asi lo'a ipasisamaanga lo'am. Ira dinen de'i yang imundiin, sajam bua karajada'. Daikam di'en saso-asokam alolo' tolangam bakarajaan di sisiaken, ingka kenang ira lo'a tau ampuna kobonen.
13“Poangsi dinen barik dasauti kole'a tau ampuna kobonen, lo'a tau seraan, Na'anak sala' lo'u kawane. Asi lo'a sala'ku'? Kole'a bayaka' de'i sapapak duit dinar saso, ingka kenang. 14Awa poang gajinu dinen, mole'ko, ingka. Saja kenang kamainya'anku'. Tau imundiin to' kupasisamaang gajina nanna di'en yang mulakataan. 15Asi lo'a, okan duitku' de'i? Ai daiko dinen, kapiayo atenu kole'a maamku' lo'a tauen? ingka kenang lo'a tau amumuten,” ingka manjaruma i Yesus mala sama' jaruma lo'a tau ampuna kobon angguren.
16“Jaji kenang lalo. Na'an awan yang isangkaan iki',” ingka. “Ti' tau akeke'en pakaina awandi'en kalo'ka', yang imundiin dinen, bayu' ona' baraa'en pakaina. To' ipajolo. Yang baraa'en pakaina kalo'ka', tau tajoloon dinen, bayu' ona' akeke'an pakaina. To' ipamundiin,” ingka kenang manjaruma i Yesus lo'da'. Mat. 19:30; Mk. 10:31; Lk. 13:30.
Katalung kalina i Yesus manjarumang matena nanna tio' balika
Mk. 10:32-34; Lk. 18:31-34
17Jaji barik i Yesus mawa lo'a palola'a ibiringa. Jaji manjarum i Yesus lo'da'. 18“Jaji lamba'ka' di'en lo'a Yerusalem, daiak di'en Anak Manturiin to' daduang tauak lo'a gulungan imam baraa'en, lo'a ambata toa adaten mainto' dakule'ku' datingkam. To' dalao'ak lo'a ukum mateen kole'da'. 19Laloang to' daseraak bapi lo'a tanganna tau bokanen,” ingka kenang i Yesus. “Yang tau laanen dinen, yang okanen tau Yahudiin barik yang mananawaien mala paradai'an lo'ku', yang manyupeten lo'ku'. Sampaiak idukum mate di kayu salipen,” ingka kenang. “Jaji barik maminak mate, to' dakatio' balikak bua,” ingka kenang manjaruma i Yesus lo'da'.
Andian jalu dapitaan kole'a induna ari i Yakobus nanna i Yohanes
Mk. 10:35-45
20Jaji barik mondok bainyena i Sebedeus nanna anaka lo'a i Yesus, malingkutut ijolona. Andian jalu to' dapitaan lo'a i Yesus.
21“Jalu ai yang ipitaan iko lo'ku'?” ingka kenang i Yesus lo'a.
“Yang kupitaan lo'u, mondoku ona' di kangkamannu, mamin iangkat padari rajaan, mainto' iparuarang iko lo'a anakku' tamba mangkam aduduk di biringu, sera di katonu, sera di kayoko'u,” ingka kenang induna ari Yakobus nanna i Yohanes manjaruma lo'a i Yesus, mamita pangkat yang palin baraa'en.
22Poangsi i Yesus manyauti barik lo'da', “Na'an itamu ikin ratina yang jalu ipitaan ikin. Ikule'aka ikin ona' mainyum dari sawan jalu susaan kudinyumiin?” ingka kenang i Yesus manyama'anga lo'a parinsa'en yang to' tadua'en lo'a.
“Ikule' ikam,” ingka barik ira manyautina lo'a.
23Jaji dasauti bapi kole'a i Yesus, “Ikule' ikin mainyum, ona' mainyumkin bua lo'a sawan kudinyumen,” ingka kenang. “Poangsi yang ipitaan ikin to' aduduk ibiringku', sera di katoku', sera di kayokoku', dinen okan iak matoren. Mamin andian yang ampunaan, mamin dakamasang lo'a tauen kole'a Ama'ku',” ingka kenang manjaruma i Yesus manyautina lo'da'.
24Jaji ira sapulo'en dadalingana jaruma ari Yakobus nanna i Yohanes mamita imeang pangkat yang palin baraa'en, ajau' barik nyawana lo'da' duaan, to' arasi. 25Jaji dabele awan dinen kole'a i Yesus, dasuro' ira mondok ibiringa, “Jaji kenang. Mamin itamu ikin, ati' tau bokan, yang tau okanen Yahudiin, tau yang mamarintaan lo'da' mainya' paraa kalena lo'a gulunganna. Gulungan tau baraa'en pakaina antarada' dinen manyuro'-nyuro' lo'a rayata. Lo'din, lo'din dasuro'a. 26Poangsi antaraka' di'en okan balu'a dinen. Intain yang ona' to' ia jaji baraa'en, arung ia dinen dari suro'annin. 27Intain to' baraa'en pakaina arung padari ulun maama arakawanna bokanen,” ingka kenang i Yesus lo'da'.Mat. 23:11; Mk. 9:35; Lk. 22:25-26. 28“Awan laloon iak. Kole'a daiakpi di'en Anak Mantuariin pamondokku' okan kutiang manyuro'-nyuro' lo'a tauen. Pamondokku' di'en to' kutiang mangarajaang tau bayu'en. Pamondokku' di'en to' manyera nyawaku' itiang mamonang lo'a tau bayu'en,” ingka kenang manjaruma i Yesus lo'da'.
I Yesus pamaami tau bauta duaan
Mk. 10:46-52; Lk. 18:35-43
29Jaji barik i Yesus mondok lo'a banua Yeriko. Mamin dinen, to' marantang bapi kosan dinen nanna palola'a, bayu' tapat tauen babangkulung malola' lo'a. 30Jaji andian tau aduduk di biring dalanen, tau bauta dua. Jaji datamu barik lamba'a i Yesus inang, mamuko ira, “O Paraampuane, anak kanturunanna baki' Raja Daud, kamase'i ikam!” ingka kenang.
31Jaji bayu' tau marada'iin lo'da', manyuro' lalako'. Poangsi insang irada'i, insang dapukoang, “O Paraampuane, anak kanturunanna baki' Raja Daud, kamase'i ikam!” ingka kenang.
32I Yesuspi barik manaat inang. Dasuro' mondok tau bautaan dinen lo'a, “Ai yang to' ipitaan ikin?” ingka kenang i Yesus lo'a tau bautaan dinen.
33“Paraampuane,” ingka, “Kosan jalu ipita bokanen lo'u. Yang ipita ikam lo'u, mainto' maama bautana matanam,” ingka kenang ira tau bautaan lo'a i Yesus.
34Jaji i Yesus mangamase'i lo'da'. Dajaput barik matada'. Laloang maam barik mamelena. Tau dinenpi barik tamba malola' lo'a i Yesus.
Currently Selected:
Matius 20: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
