Tutulan Karajana Imamen 5
5
Dosa yang padari urusanen
1Jaji dalam urusan tau panakaraan, umpamana andian jalu ikitaan atau jalu idalingaan manyuro’ itamu pantas idukum tau idurusiin. Laloang dalam urusanen, tau mawa panakarana dinen baingin to’ manyuro’ lo’ka’ padari saksi. Ti’ mamin awan dinen, arungki’ manyaksi. Ati’enki’ alibak dala saksi, iki’ lalo barik yang mananggung kasala’anka’. Gal. 6:1; Im. 19:17.
2Atau ati’en andianki’ manjaput jalu kotoren manyuro’ na’an barese dabelena kole’a i Yahuwe, umpamana bangkayaon inatang ilalam toan yang na’anen barese, atau inatang ikatio’en yang na’anen barese, atau inatang meleten di tana’en yang ijaputen iki’, mamin sala’. Kapisi na’an itamu iki’, maminki’ padari kotor di jolona arona i Yahuwe. Tetapki’ mananggung kasala’anka’.
3Atau ati’en andian kotoran dari mantuariin ijaputen, ai poang yang pandeen manyuro’ kotor, kapiki’ na’an manamu, ti’ mamin barik itamu, tetapki’ mananggung kasala’anka’.
4Ataupun umpamana andianki’ yang mamang kaleka’ nanna sambarang-barangen, kapisi jalu maamen to’ ianuun kalo’ka’, kapisi jalu ajau’en, maminki’ sala’ ati’enki’ mamang sambarang-barangen. Ai poang urusanen yang mobosang jarum mamang sambarang-barangen kapiki’ na’an manamu, ti’ mamin barik itamu, tetapki’ mananggung kasala’anka’.
5Jaji nanga inde poang ti’ andianki’ yang mamola sala’ antarana ambata gulungan baranana basa sala’en yang iasanen dinen de’i, arungki’ mangaku’ dosaka’. Arung iasan kasala’anka’. 6Laloang arungki’ mamayar ukuma. Jaji ukuma dinen, arung iawa indu dombaan atau indu kambingen dari antara anak katio’anka’, arung imeang itiang pamindaraka’ lo’a i Yahuwe. Imamen barik yang mawa pasikule’angen antaraka’ nanna i Yahuwe itiang maurusi dosaka’. Kenang sarana.
7Jaji iki’ yang basala’en dinen, ati’enki’ na’an mampu mawa dombaan, arungki’ mawa burung merpati atau burung dara duaan lo’a i Yahuwe. Yang seraan dinen itiang pamindara panyauti dosaan, yang seraan itiang pamindara jalu itutungen. 8Arung iawa lo’a imamen laloang sera dinen arung dapamindaraang kole’a imamen datiang pamindara panyauti dosaan. Arung dapusalang kalonga, ada’ poang akatuna. 9Mamin dinen, dara’a dinen arung dapipirikang di biringa kas panutungan pamindaraan. Tunanna dara’a arung daruarang barik inyaung ibiringa kas panutungan pamindaraan. Dinen lalo pamindaraan yang itiang panyauti dosaan.
10Maminna akaus urusanen nanna burung seraan dinen, burung kaduaan arung dapamindaraangen padari pamindara jalu itutungen awan atoran yang maminen iasan dinen, itiang mawa pasikule’angen antaraka’ nanna i Yahuwe itiang maurus dosaka’. Laloang barik to’ daamponi dosaka’. Im. 1:14; 4:27.
11Ati’en umpamana burung takukur atau burung dara duaanpi dinen na’an mampu mawa, mawa tepungki’ poang. Arungki’ mawa barik tepung palin alusen sakilo bayu’a itiang pamindara panyauti dosaan. Na’an pande imeang inyaken atau manyanen kole’a dinen pamindara panyauti dosaan. 12Arung iawa lo’a imamen. Imamen barik arung mala tepung dinen sakauk iala manjarumang tepung isorongangen dinen. Arung itutung barik ibona ambata pamindara jalu itutungen lo’a i Yahuwe di apiin. Dinen lalo pamindara panyauti dosaan.
13Jaji tunanna tepungen dinen barik padari imam ampunaan sama awan pamindara ambata balu’ ase yang dari asel umaan dinen. Kenang sarana imamen mamolana pasikule’angen antaraka’ nanna i Yahuwe lo’a dosa ipolaan awan dinen. Laloang barik to’ daamponi dosaka’.
Pamindara pamayar sala’
14Jaji manjarum bapi i Yahuwe lo’a baki’ Musa, 15“Jaji mamin andian ambata jalu dinen yang kusuro’ arung ilaanang itiang lo’ku’ i Yahuwe, mamin iak ampunaan. Na, umpamana andiankin basala’ ilalam soal dinen, na’an imeang lo’ku’ poangsi na’an sangaja, arungkin mamayar ukuma sera domba lakiin. Domba dinen arung kosan jaji rabora, kosan sakina.
“Jaji ragana domba yang itiang pamayar utanga dinen arung sesuai. Na’an pande iditung malola’ani papak duit ipakaien kiraso. Arung iditung malola’ani jenis papak duit ipakaien kusus itiang di saoku’ i Yahuwe,” ingka kenang i Yahuwe manjaruma lo’a baki’ Musa.
16“Jaji jalu yang kusuro’ lo’in arung ilaanang itiang lo’ku’ i Yahuwe ti’en nampi iawa lo’ku’,” ingka kenang, “arung iawa barik. Sarata dadua’ ukuma rabarik. Raga ukuma kirana dinen, ikira dua pulo’ paresen dari raga jalu iawaan dinen. Dua pulo’ paresenna barik dinen imeang lo’a imamen. Imamen barik yang maurusiin domba pamayar sala’in dinen itiang mawa pasikule’angen antaranin yang badosaan nanku’ i Yahuwe. Laloang barik tau badosaan dinen to’ kuamponi. Dinen lalo pamindaraan yang itiang pamayar sala’a,” ingka kenang i Yahuwe.
17“Jaji ati’en andiankin badosaan mamola basa kupase’angen lo’in ilalam Ukumku’ i Yahuwe, kapisi na’an itamu sala’a, tetap daia badosa. Tetap daia mananggung kasala’anna. 18Arung tau basala’en mawa pamindara pamayar sala’a sera domba lakiin atau kambing lakiin anu kosanen jaji rabora, kosanen sakina. Raganapi arung sesuai. Awan dinen imamen mamolana itiang mawa pasikule’angen antarana tau basala’en dinen nanku’ i Yahuwe lo’a dosa dapolaan dinen yang na’anen sangaja. Laloang barik tau badosaan dinen to’ kuamponi. 19Dinen lalo sarana pamindara pamayar sala’a kole’a daia mamin mananggung kasala’anna lo’ku’ i Yahuwe,” ingka kenang jaruma i Yahuwe yang darantangen.
Currently Selected:
Tutulan Karajana Imamen 5: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
