Tutulan Karajana Imamen 4
4
Pamindara pasikule’angen
1Jaji manjarum bapi i Yahuwe lo’a baki’ Musa, 2“Na, di’en kupasanangen ukumku’,” ingka kenang, “jarumang lo’a ambata anak kanturunanna baki’ Israel. Ati’en andian yang malanggar Ukuma i Yahuwe poangsi na’an sangaja, kenang parintaku’ lo’in. Jarumang lo’da’,” ingka kenang manjaruma i Yahuwe lo’a baki’ Musa.
Urusan ati’en imam mamola dosana
3“Umpamana tau maminen daluluki nanna inyaken dala malaanang lo’a itiang lo’a karaja imamen, ati’en daia laloang badosa, talola’ kausa barik gulungan tau bayu’en daasan sala’. Jaji ati’en mamin adari awan dinen, kenang sara maurusina. Daia arung mawa anak sapi lakiin lo’a i Yahuwe datiang pamindara panyauti dosana dinen. Sapi dinen arung kosan jaji rabora, kosan sakina. 4Arung daawa inang lo’a mambangan Kakalang Pasidua’ang Kaleen nanna i Yahuwe datiang madap lo’a i Yahuwe. Arung daia manjalang tanganna di karampang uluna inatang dinen dala tanda dosana datanggungang lo’a inatang dinen. Maminna dinen inatang dinen arung dasembeli inang di arona i Yahuwe.
5“Maminna dasembeli dinen, dara’a inatang dinen arung dala sapa dua kole’a imamen, arung daawa ilalam lo’a Kakalang Pasidua’ang Kaleen nanna i Yahuwe. 6Laloang arung dapipirikang dara’ dinen sapa dua nanna tunjuka. Tuju kali dapipirikanga nanna tunjuka di arona i Yahuwe inang sabala’a kain manyiringiin lo’a kosan yang palin bareseen.
7“Maminna dinen arung daawa ilalam lo’a kas panutung manyanen yang inangen di arona i Yahuwe di Kakalang Pasidua’ang Kaleen nanna i Yahuwe. Arung dalulukang dara’ dinen sapadua lo’a jalu balu’ tanduken di susu’ ampata kas dinen. Tunanna dara’ sapiin dinen barik arung daawa insaluan, arung daolongang inyaung kukuliling di kas panutung pamindaraan inang di baba’ mambanganna Kakalang Pasidua’ang Kaleen nanna i Yahuwe.
8“Maminna dinen, samuana ambata inyaka arung iala kausa dari inatang ipamindaraangen itiang panyauti dosaan. Samuana ambata inyak di suang batanga arung ikapulungang. 9Bua’ awaka dua baliin nanna inyaka yang inang ibiring tolang tutuna, iala. Nanna inyak manutupiin atena arung iala bea sarata nanna bua’ awaka. 10Arung ikaraja sama awan sapi ipamindaraangen dinen yang itiang tanda sikamaamanen nanna i Yahuwe. Arung akaus dala inyaka. Mamin dinen arung datutung kole’a imamen inang di kas panutung pamindaraan. 11Poangsi kulita sapi dinen nanna ambata isina arung daawa insaluanna banuaan. Maam uluna, maam kakina, maam suang batanga nanna tai’a arung daawa kausa insaluanna banuaan. 12Samuana ambata gulunganna yang na’anen itutung nanna inyaka dinen arung iawa kausa insaluanna banuaan lo’a kosan idunjanga ambata kutu apiin, kosan yang ianggap barese. Arung itutung inang sampai akaus nanna kayu apiin, itutung ibona kutu apiin yang ibangkulungangen inang,” ingka kenang.
“Kenang urusina ati’en andian imam yang mamola dosaan,” ingka kenang jaruma i Yahuwe yang dasuro’ jarumang lo’a baki’ Musa.
Urusan ati’en tau bayu’en badosaan
13Saumpamana badosa kausa ambata gulungan tau bayu’en, dosa yang na’anen sangaja, mamola basa jalu dapase’angen ilalam Ukuma i Yahuwe. Kapisi nampi datamu sala’a, tetap ira mananggung kasala’anna di arona i Yahuwe. Jaji ati’en mamin dari awan dinen, kenang sara maurusina.
14Maminna barik itamu sala’ka’, arung iawa anak sapi lakiin itiang pamindara panyauti dosaan, iawa di arona Kakalang Pasidua’ang Kaleen nanna i Yahuwe. 15Mondok inang rabarik ambata toa-toaan arung manjalaang tanganna di karampang uluna inatang dinen di arona i Yahuwe, iala tanda kole’a dosana tau bayu’en itanggungang lo’a inatang dinen. Maminna dinen, sapi dinen arung isambeli inang di arona i Yahuwe.
16Maminna barik isambeli inatang dinen, tau maminen daluluki nanna inyaken datiang manugas lo’a padari imamen, arung daia mawa dara’ inatang dinen sapadua ilalam lo’a Kakalang Pasidua’ang Kaleen nanna i Yahuwe. 17Tunjuka arung dasalapang ilalam dara’ inatang dinen laloang arung dapirikang inang insaluanna kain manyiringiin kosan yang palin bareseen dinen, di arona i Yahuwe. Arung tuju kali ipirikanga. 18Maminna dinen dara’ dinen arung daawa lo’a meja panutungan manyanen yang inang di arona i Yahuwe ilalam Kakalang Pasidua’ang Kaleen nanna i Yahuwe. Arung dalulukang dara’ dinen sapadua lo’a jalu balu’ tanduk di susu’ ampata meja dinen. Tunanna dara’ sapiin dinen barik arung daawa insaluan, arung daolongang inyaung di biringa kas panutung pamindaraan, inang di biring mambanganna Kakalang Pasidua’ang Kaleen nanna i Yahuwe.
19Maminna daurus dara’a dinen, arung dakapulungang kausana ambata inyak sapi dinen, arung datutung inyak dinen di kas kosanna pamindara jalu itutungen. 20Sapi dinen arung daanu sabangon nanna sapi dinen yang itiang panyauti dosaan. Kenang imamen mamolana pasikule’angen antarana tau bayu’en nanna i Yahuwe. Laloang to’ daamponi barik dosada’. 21Mamin dinen bangkayoan sapi dinen arung iawa insaluanna banuaan, laloang arung itutung sama awan sapi mulakataan dinen. Dinen lalo asanna pamindaraan maurusiin dosana tau bayu’en. Awan dinen sarana.
Urusan ati’en panguluanen yang badosaan
22Ati’en iki’ panguluanen yang mamola dosa na’anen sangaja dinen, ati’en mawa basa dapase’angen ilalam Ukuma i Yahuwe, tetapki’ mananggung kasala’anka’. Jaji ati’en mamin adari awan dinen, kenang sara maurusiin.
23Maminna barik tarasa lo’ka’ itamuna kasala’anka’, arungki’ mawa pamindara kambing lakiin yang kosanen jaji rabora, kosan sakina. 24Iki’ yang sala’en barik arung manjalang tanganka’ di karampang uluna inatang dinen, iala tanda kole’a dosaka’ itanggungang lo’a inatang dinen. Mamin dinen arung isambeli inang di kosan manyambeliin jalu to’ itiang pamindara jalu itutungen, inang di arona i Yahuwe. Dinen lalo asanna pamindara panyauti dosaan.
25Maminna isambeli dinen, dara’ kambing dinen sapa dua arung dala ilalam kole’a imamen laloang arung dalulukang nanna tunjuka lo’a jalu balu’ tanduken di susu’ ampata kas panutung pamindaraan. Tunanna dara’ dinen arung idolongang inyaung di biringa kas panutung pamindaraan. 26Samuana ambata inyaka inatang dinen arung itutung ibona kas kosan pamindaraan sama awan yang danuun dinen nanna inyak pamindara tanda sikamaamanen. Kenang imamen mamolana pasikule’angen antarana tau dinen nanna i Yahuwe, laloang barik to’ daamponi dosana tau dinen.
Urusan ati’en sera poang antarana tau bayu’en yang badosaan
27Jaji ati’en iki’ kadiri’ka’ mamola dosa na’anen sangaja dinen, ati’enki’ mawa basa dapase’angen ilalam Ukuma i Yahuwe, tetapki’ mananggung kasala’anka’. 28Maminna barik itamu kasala’anka’, arungki’ mawa pamindara indu kambingen, anu kosanen jaji rabora, kosanen sakina. 29Arungki’ manjalang tanganka’ di karampang uluna inatang dinen iala tanda kole’a dosaka’ itanggungang lo’a kambing dinen. Mamin dinen arung isambeli inang di kas panutung pamindaraan.
30Maminna isambeli dinen, dara’ kambing atau domba dinen sapadua arung dala ilalam kole’a imamen laloang arung dalulukang nanna tunjuka lo’a jalu balu’ tunjangen di susu’ ampata kas panutung pamindaraan. Tunanna dara’ dinen arung daolongang inyaung di biringa kas panutung pamindaraan. 31Samuana ambata inyaka inatang dinen arung dakapulungang kausa sama awan yang daanuun nanna inyak pamindara tanda sikamaamanen dinen. Arung datutung barik kole’a imamen ibona kas panutung pamindaraan padari jalu maamen bauna yang pasasauiin nyawana i Yahuwe. Kenang imamen mamolana pasikule’angen antarana tau dinen nanna i Yahuwe, laloang barik to’ daamponi dosana tau dinen.
32Kenang sarana ati’en inatang kambing yang iawaan. Ati’en anak domba yang iawaan itiang pamindara panyauti dosaan, arung domba bainye yang iawaan, inatang kosanen jaji rabora, kosanen sakina. 33Arungki’ manjalaang tanganka’ di karampang uluna inatang dinen, iala tanda kole’a dosaka’ itanggungang lo’a inatang dinen. Maminna dinen barik arung isambeli domba dinen inang di kosan panyambeliin jalu yang to’ itiang pamindara jalu itutungen.
34Maminna isambeli dinen, dara’ inatang dinen sapadua arung daawa intama kole’a imamen. Laloang arung dalulukang dara’ dinen nanna tunjuka lo’a jalu balu’ tunjangen di susu’ ampata kas panutungan pamindaraan. Tunanna dara’ dinen arung idolongang inyaung inang ibiringa kas panutung pamindaraan. 35Samuana ambata inyaka inatang dinen arung dakapulungang kausa sama awan yang daanuun nanna inyak pamindara tanda sikamaamanen dinen. Arung datutung barik kole’a imamen ibona kas panutung pamindaraan padari jalu maamen bauna yang pasasauiin nyawana i Yahuwe. Kenang imamen mamolana pasikule’angen antaraka’ nanna i Yahuwe lo’a dosa ipolaan dinen. Laloang barik to’ daamponi dosaka’.
Currently Selected:
Tutulan Karajana Imamen 4: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
