Tutulan Karajana Imamen 3
3
Pamindara tanda sikamaamanka’ nanna i Yahuwe
1“Awan iki’ yang mawaan pamindara tanda sikamaamanka’ nanna i Yahuwe, kenang. Ati’en umpamana inatang sapiin yang iawaan, maam induna, maam bea laki, arung kosan jaji arabora, kosan sakina. Arung sakala maam ti’en jalu to’ ipamindaraangen lo’a i Yahuwe.
2“Jaji iki’ yang mawaan dinen arung manjalang tanganka’ di karampang uluna inatang dinen. Mamin dinen arung isambeli inatang dinen inang di biringa mambangan Kakalang Pasidua’ang Kaleen nanna i Yahuwe. Maminna barik isambeli, dara’a arung dala kole’a ambata anaka baki’ Harun yang karaja imamen. Arung dapirikang barik inang lo’a biringa kas kosan panutung pamindaraan kuliling. 3Jaji arung dala barik ambata inyaken dari inatang ipamindaraan dinen itiang tanda sikamaamanka’ nanna i Yahuwe. Samuana ambata inyak suang batanga arung itutung awan pamindara jalu itutung di apiin itiang lo’a i Yahuwe. 4Bua’ awaka dua baliin nanna inyaka inang di biring tolang tutuna, arung dala. Inyak panutupiin atena dinen arung dala bea sarata nanna bua’ awaka. 5Laloang samuana dinen barik arung datutung kole’a araanaka baki’ Harun dinen ibona pamindara jalu itutungen, inang di kayu itutungen dinen. Kenang sarana ati’en sapi yang iawaan. Dinen lalo pamindara jalu itutungen di apiin padari jalu maamen bauna yang pasasauiin nyawana i Yahuwe.
6“Ati’en umpamana inatang domba atau kambing yang to’ ipamindaraangen, kenang sarana. Maam induna maam bea laki arung kosan jaji arabora, arung kosan sakina. 7-8Ati’en domba yang ipamindaraangen, iki’ yang mawaan dinen arung manjalang tanganka’ di karampang uluna. Mamin dinen arung isambeli barik inang di arona Kakalang Pasidua’ang Kaleen nanna i Yahuwe. Maminna barik isambeli, dara’a arung dala kole’a ambata anaka baki’ Harun dinen, arung dapiriki barik inang lo’a biring kas panutung pamindaraan kuliling. 9Jaji arung itutung kausa ambata gulungan inyaken dari inatang dinen, inatang yang ipamindaraangen itiang tanda sikamaamanka’ nanna i Yahuwe. Ingko’a yang bainyaken yang isapa’ inang mainso’ lo’a tolang tutuna arung itutung. Samuana ambata inyak yang di suang batanga itutung. 10Awaka dua bali iala. Sarata inyaka yang inang ibiringa tolang tutuna, nanna inyak manutupiin atena dinen iala. Iala kausana sarata nanna bua’ awaka. Samuana dinen arung itutung barik di apiin. 11Datutung inang di kosan pamindaraan kole’a imamen. Kenang sarana ati’en inatang domba yang iawaan. Dinen lalo jalu kaan ipamindaraan lo’a i Yahuwe di apiin.
12“Ati’en inatang kambing yang to’ ipamindaraangen, awan dinen bapi. Arung iawa bea lo’a arona i Yahuwe. 13Iki’ yang mawaan dinen arung manjalang tanganka’ di karampang uluna inatang dinen. Mamin dinen arung isambeli barik iki’ inang di arona Kakalang Pasidua’ang Kaleen nanna i Yahuwe. Maminna barik isambeli, dara’a arung dala kole’a ambata anaka baki’ Harun dinen, arung dapirikang barik inang lo’a biringa kas panutung pamindaraan kuliling.
14“Jaji dari inatang ipamindaraan dinen, arung andian barik yang itutungen di apiin. Itiang pamindara barik, pamindara jalu itutungen lo’a i Yahuwe. Yang arung itutung kenang. Samuana ambata inyaka di suang batanga inang, itutung. 15Awaka dua baliin nanna inyaka yang inang ibiringa tolang tutuna, itutung. Kenang bea inyak manutupi atenaan, arung iala bea sarata nanna bua’ awaka, laloang itutung kausana. 16Arung samuana datutung inang di kas panutung pamindaraan kole’a imamen. Dinen lalo jalu kaan ipamindaraangen lo’a i Yahuwe di apiin padari jalu maamen bauna. Samuana ambata gulungan inyaka mamin i Yahuwe ampunaan. Mamin tawa’a i Yahuwe. 17Na’ankin pande angkaan inyak inatang atau dara’en. Dinen lalo paratoranen yang arung ipakai turun-manurun kapi disa poang kosan lalako’in.”
Currently Selected:
Tutulan Karajana Imamen 3: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
