Tutulan Karajana Imamen 2
2
Pamindara tepung itutungen
1“Ti’en andianki’ yang to’ mawa pamindara ambata jalu balu’ ase lo’a i Yahuwe, ambata asel umaan, kenang sarana. Arung ipola tepung yang palin alusen, imeang inyak, imeang manyan. 2Laloang iawa barik lo’a ambata araanaka baki’ Harun yang karaja imamen dinen. Mondok inang, arung dala sakauk tepung dinen kole’a imamen, datutung inang ibona apiin. Ratina tepung dinen sakauken, iala panjarumang tepung iawaan dinen yang jalu isorongangen lo’a Alatala. Dinen lalo pamindara jalu itutungen, jalu ipamindarangen di apiin padari jalu maamen bauna. Dinen lalo yang pasasauiin nyawana i Yahuwe. Kenang sarana ati’en tepung poang yang iawaan.
3“Jaji sisana tepung yang na’anen itutung dinen barik padari baki’ Harun ampunaan, ampunaan ambata araanaka. Antarana ambata gulungan jalu ipamindarangen di apiin itiang lo’a i Yahuwe, dinen lalo yang palin bareseen, jalu maminen ipasilaanangen itiang lo’a. Dinen lalo tawa’a.
4“Jaji ambata balu’ ase, ambata asel umaan yang to’ isorongangen dinen lo’a i Yahuwe, ti’ to’ jalu maminen ibakar, kenang sarana. Roti dinen na’an pande imeang ragi.#2:4 Tamasok ambata ragi ipola tau, ambata indu roti. Na’an tamasok ambata soda atau baking powder. Arung ipola dari tepung palin alusen, arung ibarokang nanna inyaken. Ataupun ti’ to’ ipola roti alimpisen, arung ipalitang nanna inyaken di maminna ibakar. 5Ati’en itumpi’ di sitaken ibona apiin, awan dinen bapi. Na’an pande imeang ragi. Arung ipola bea dari tepung palin alusen. Maminna barik itutung, arung ibarok nanna inyaken. 6Arung ibobor laloang arung idolongang nanna inyaken. Dinen lalo asanna pamindara balu’ ase dari asel umaan. Awan dinen sarana ati’en tepung dinen to’ iawa maminna itutung.
7“Ati’en to’ iawa pamindara asel umaan yang ipolaan di sitaken, kenang sarana. Arung ipola bea dari tepung palin alusen, arung imeang inyak. 8Maminna ipola, pamindara dinen arung iawa barik lo’a i Yahuwe, isera lo’a tanganna imamen. Ia barik mantaten lo’a kosanna pamindaraan. 9Mondok lo’a kosan pamindaraan rabarik, arung dala jalu kaan dinen sapolo datiang panjarumang jalu dasorongangen dinen. Arung datutung inang di kosanna pamindaraan. Dinen lalo pamindara jalu itutungen di apiin, jalu maamen bauna yang pasasauiin nyawana i Yahuwe. Awan dinen sarana ti’ to’ iawa jalu ipolaan di sitaken.
10“Jaji tunana barik dinen padari baki’ Harun ampunaan, ampunaan ambata araanaka. Antarana ambata gulungan jalu ipamindaraangen di apiin itiang lo’a i Yahuwe, dinen lalo yang palin bareseen, jalu maminen ipasilaanangen itiang lo’a. Dinen lalo tawa’a.
11“Jaji gulungan asel dari umaan balu’ ase yang to’ ipamindaraangen lo’a i Yahuwe, samuana na’an pande imeang ragiin. Dapase’angki’ manutung ragiin atau danum wanyiin di jalu ipamindaraangen lo’a i Yahuwe di apiin. 12Jalu to’ isorongang lo’a i Yahuwe, ti’ na’an to’ itutung di apiin, pande imeang ragi atau danum wanyiin. Umpamana ambata bua’ bungasen balu’ ase. Poangsi na’an pande ipamindarang ibona api di kosan pamindaraan awan pamindara jalu itutungen yang maamen bauna dinen. 13Samuana ambata asel uma yang ipamindaraangen arung isia’i. Ada’ jalu iawaan yang na’anen imeang sia’a. Arung tetap iparandam sia’en awan bua yang dasuro’angen lo’ka’ ilalam kaputusan bayana Alatalanin. Samuana ambata balu’ ase, ambata asel umaan yang isorongangen lo’a i Yahuwe arung imeang sia’en.
14“Ati’en lalo to’ iawa lo’a i Yahuwe asel umaan dari bua’ bungasen, kenang. Arung iawa paam, iawa umpinna. 15Arung imeang inyaken nanna manyanen. Dinen lalo pamindara balu’ ase dari asel umaan. 16Barik umpin yang maminen ibarokang nanna inyaken nanna manyanen dinen, arung datutung barik sapadua kole’a imamen. Datutunga sapadua dinen, iala panjarumang tunana dinen yang jalu isorongangen lo’a i Yahuwe. Dinen lalo jalu itutungen di apiin itiang jalu ipamindaraangen lo’a i Yahuwe.
Currently Selected:
Tutulan Karajana Imamen 2: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
