Tutulan Karajana Imamen 24
24
Tau pajau’en lo’a i Yahuwe idukum mate
10-11Nanga dinen andian tau sijai. Andian nangkanak babakaan, amana tau Mesiren, induna tau Israelen. Asanna induna nangkanak dinen i Selomit anaka i Dibri. Daia kanturunan dari baki’ Dan. Jaji minjawe anaka dinen di kosan pakadeng kakalangen laloang mulai sijai nanna tau Israelen. Jaji kapanjanganna arasina, aramamang barik pajau’-jau’ lo’a asanna i Yahuwe. Jaji barik babaka dinen daawa kole’a tauen madap lo’a baki’ Musa. 12Jaji dataanpi marung sampai dajarumang jaji kamainya’anna i Yahuwe.
13Jaji manjarum barik i Yahuwe lo’a baki’ Musa, 14“Tau pajau’en dinen awa insaluanna banuaan. Mondok indinang rabarik, samuana yang mandalingaan lo’a pajau’a de’i, arung ira manjalaang tanganda’ lo’a uluna babaka dinen iala tanda kole’a ia yang tanggung jawapen lo’a kasala’anna. Maminna dinen, arung samuana tau bayu’en tamba mamarati lo’a nanna batuun sampai mate.
15“Jaji manjarumko barik inang lo’a tau Israelen, Intain mangutukiin lo’a Alatalana, arung mananggung jawap lo’a kasala’anna dinen. 16Intain pajau’en lo’a asanna i Yahuwe arung idukum mate. Kapi tau asingen, kapi tau iparanakangen di negerinin, nanga dapajau’a asan dinen, nanga dinen bua arung daia idukum mate, iparati nanna batuun, iko kenang lo’da’.
17“Intain mauno’en lo’a mantuariin, iko kenang, arung daia idukum mate. 18Tau mauno’ inatang tauen, arung daia manyurangi inatang dinen dari katio’an diri’a. Jalu tio’ arung ibayar nanna jalu tio’. 19Ati’en andian tau papadisiin lo’a arakawanna, balu’ ai polana lo’a arakawanna, arung daia ipola bea awan dinen. 20Tolang apoloon arung ibalas nanna tolang apoloon. Mata arusaken arung ibalas nanna mata arusaken. Isi apolo arung ibalas nanna isi apoloon. Balu’ ai polana lo’ arakawanna, arung daia ipola bea awan dinen. 21Intain mauno’ inatangen arung daia manyurangi inatang dinen. Poangsi intain mauno’ mantuariin arung idukum mate. 22Ukumin arung na’an lamba’ babauta, kapi lo’a tau asingen, kapi lo’a tau iparanakangen di negerinin. Taan talinganin kole’a iak i Yahuwe manjarumen, Alatala yang isembaan ikin, iko kenang lo’da’,” ingka kenang manjaruma i Yahuwe.
23Jaji dapamondokang barik jarum dinen kole’a baki’ Musa lo’a ambata anak kanturunanna baki’ Israel. Laloang daawa tau pajau’en dinen insaluanna banuaan. Daparati nanna batuun sampai mate awan bua parintana i Yahuwe yang dajarumangen lo’a baki’ Musa.
Currently Selected:
Tutulan Karajana Imamen 24: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
