Pangiraan Suku Israel 12
12
Piang Miriam nanna baki’ Harun malawan lo’a baki’ Musa
1Jaji di Haserot inang, mulai dinen piang Miriam nanna baki’ Harun pajau’ lo’a baki’ Musa. Yang dapajau’en dinen kole’a bainyena dinen tau suku Kus, kole’a andian de’i daia mala bainye lo’a tau Kus. 2Jaji jarumda’ pajau’-jau’en kenang, “Aiaka malaloi i Musa poang i Yahuwe manjaruma lo’ka’? Okan daia manjarum bea malaloi lo’am?” ingka kenang jarumda’ pajau’en. Jaji jarumda’ dinen dadalinga bua kole’a i Yahuwe.
3Jaji awan baki’ Musa dinen, daia palin alowe’ atena. Kosan labi lo’a yang mainya’en pakeke’ kalena antarana ambata anak mantuariin yang tio’en inyaunga galung suanen.
4Jaji sikadang kayana rabarik manjaruma i Yahuwe lo’a baki’ Musa, baki’ Harun nanna piang Miriam, “Se’, lo’di’kin taluun, lo’a Kakalang Pasidua’ang Kaleen nanna i Yahuwe,” ingka kenang. Jaji minsaluan barik ira taluun lo’a dinen. 5Maminna mondok lo’a dinen, tador barik i Yahuwe di pakayu domen dinen laloang akadeng ibiringa mambangan Kakalang dinen. Jaji mangalong lo’a baki’ Harun nanna piang Miriam manyuro’ madap.
Jaji mainso’i barik lo’a dinen ira duaan, 6laloang manjarum i Yahuwe,
“Taan talinganin lo’a jarumku’ di’en. Mai baraninin pajau’ lo’a suro’anku’? Andianpi bokanen yang lalako’en antaranin dinen yang kusuro’ awan panjarumku’, ti’ andian jalu to’ kupanamuangen lo’a, okan daia sikita nanku’. Manyuro’ itamuun, kole’a andianna jalu kupaitangen lo’da’. Manjarumku’ lo’da’ ilalam muina. 7Poangsi nanna suro’anku’ i Musa di’en laan. Ialalo yang palin dapat kuparasaya’i ilalam samuana ambata suang gulunganku’. 8Manjarumku’ nanna siajap baba’, manjarum terus terang. Okan manjarumku’ nanna balu’ pasan-asanan, okan. Daia sikita jaji nanku’. Na, ti’ mamin awan dinen mai baraninin kakaru’ pajau’-jau’ lo’a suro’anku’ i Musa? Maikin na’an atakut?”
ingka kenang manjaruma i Yahuwe lo’da’.
9Jaji bakaya arasina i Yahuwe lo’da’, laloang anyap daia.
10Jaji maminna inaita pakayu domen dinen dari Kakalang Pasidua’ang Kaleen nanna i Yahuwe, piang Miriam akadengpi inang itamu barik mamin akudung. Ute’-ute’ kulita, tungan salju ute’-ute’a. Jaji koeangang kalena barik baki’ Harun dabeleang matana lo’a i Miriam, dabele akudung barik. 11Jaji manjarum baki’ Harun barik lo’a baki’ Musa, “Adu paraampuane, kupita jaji lo’u, ada’ ibalasa dosanam di’en yang rabor-raboren. 12Ada’ tio’a i Miriam balu’ nangkanak mateen memen nampina iparanakang, yang maminen bauruk kulita,” ingka kenang pitana lo’a baki’ Musa.
13Jaji mangalong baki’ Musa lo’a i Yahuwe, “O Alatala, kupita jaji lo’u, pamaamijo padisa i Miriam,” ingka kenang.
14Jaji manyauti barik i Yahuwe, “Asi lo’a ipamaamina takarang. I Miriam di’en, ti’ umpamana dape’i lindo’a kole’a amana, na’an kurang tuju aso daia mananggung bawa’a. Dalam urusan di’enpi arung daia marasa. Daia dinen arung ikapi’ang insaluanna banuaan tuju aso launna. Baru’ barik pande daia iawa mole’ ilalam banuaan,” ingka kenang. 15Jaji piang Miriam barik dakapi’ang insaluanna banuaan tuju aso launna. Launna nampi daawa mole’ ilalam banuaan, na’an mamalin ira ambata anak kanturunanna baki’ Israelen. 16Maminna dinen tangkat barik ira dari Haserot mamalin lo’a kasik Paranen.
Currently Selected:
Pangiraan Suku Israel 12: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
