Tutulan Karajana Imamen 20
20
Ukum lo’a tau mamolaan basa na’anen baguna
1Jaji manjarum bapi i Yahuwe lo’a baki’ Musa, 2“Awa jarumku’ di’en lo’a ambata anak kanturunanna baki’ Israel dinen. Intain poang lalako’en di negerinin inang, yang pamindaraangen anaka lo’a jalu isembaan dinen yang iasanen Molok, tetap idukum. Maam urangin, maam bea tau bokan yang lalako’en nannin, arung idukum mate. Ambata tau sabanuaan nanna dinen arung mamarati lo’a nanna batuun sampai mate. 3Tau dinen tetap kulawan. Kutampusi sampai putus hubunganna nanna uranga. Kole’a nanga anaka dinen dapamindaraanga lo’a Molok, daia pajau’ lo’a saoku’, pajau’ bea lo’a asanku’ yang bareseen. Kenang ratina idukuma.
4“Ati’en tau pamindaraangen anaka lo’a Molok laloang dabele poang kole’a ambata tau sabanuaan nanna, ati’en daia na’an daukum mate, 5iak diri’ku’ barik malawanen lo’a tau dinen nanna ambata suang kayanna. Kutampusi sampai putus hubunganna nanna uranga. Intain poang talola’anen barik lo’a basana dinen kutampusi. Basa dinen kusama’ang lo’a basa pandayangen. Awan lalo bainyeku’kin yang marantang unjangen lo’ku’ laloang silola’ lamba’ nanna jalu isembaan bokanen.
6“Intain poang mamalinangen lamba’a awan pandayangen dinen, yang manyariin panamu lo’a panuntuten atau balianen yang pandeen kalo’a sijarumanen nanna tau maminen mate, tau dinen tetap kulawan. Kutampusi sampai putus hubunganna nanna uranga.
7“Arungkin bakamas, arung laanang kalenin lo’a jalu ajau’en supayakin padari barese ijolona aroku’, kole’a iak lalo di’en i Yahuwe, Alatala yang isembaan ikin. 8Arungkin parandam lo’a ambata gulungan parintaku’, arung ilola’ani. Kole’a iak lalo di’en i Yahuwe, Alatala yang isembaan ikin, yang maminen pasilaanang lo’in itiang lo’a diri’ku’.
9“Na, ati’en andian tau mangutukiin lo’a amana atau induna, daia arung idukum mate. Okan sala’ idukum. Ia yang tanggung jawapen lo’a matena kole’a mamin daia mangutuki lo’a indu-amana.
10“Ati’en babakaan manyiuk bainye tau, bainyena kawanna, ia nanna babainye dasiuken arung dua-duana idukum mate.
11“Ati’en babaka sitindo’an nanna bainyena amana, daia mamin pawa’-awa’ani lo’a amana. Ira sitindo’anen dua-duana arung idukum mate. Okan sala’ idukum. Diri’a arung tanggung jawap lo’a matena.
12“Ati’en andian babakaan sitindo’anen nanna anak inantuna, daira duaan tetap idukum mate. Mamin ira parabor kalena na’an malola’ani kabiasa’an mantuariin. Okan sala’ idukum. Diri’a arung tanggung jawap atas matena diri’a.
13“Ati’en andian tau mamola basa sitindo’anen babaka sama babakaan, balu’ babaka polaan kalena babainyeen, kaduada’ mamin mamola’ basa manyuro’ kagaring-garingen. Tetap arung idukum mate. Okan sala’ idukum. Diri’a arung tanggung jawap atas matena diri’a.
14“Ati’en babaka sarata mala lo’a babainye dua paanaken, itiang bainyena dua-duana, dinen lalo karaja yang palin ajau’en. Arung idukum talu-taluna, iduno’ itutungi mainto’ kosanna lagi’ basa kakanjianen awan dinen idua’angen antaranin.
15“Ati’en andian babakaan sibasanan nanna inatangen, daia arung idukum mate. Inatangpi arung iduno’.
16“Babainyeenpi ati’en daia mainso’i inatangen suro’ basai kalena lo’a, babainye dinen nanna inatangen arung iduno’ dua-duana. Diri’a arung tanggung jawap atas matena diri’a.
17“Ati’en andian babaka mala lo’a sairun jaita, kapi sarilao’ amana, kapi sarilao’ induna, ti’ adari daia sitindo’an nanna, dinen lalo basa yang palin ajau’en. Ira duaan arung itampusi ijolona arona uranga. Daia mamin pawa’-awa’ani lo’a sairunna babainyeen. Ia yang tanggung jawapen.
18“Ati’en andian babaka sitindo’anen nanna babainyeen nampina tadang kamamase’a, daia mamin mamae’ang akat dara’a, babainyepi dinen mainya’ bua, ira duaan arung kosan lagi’ hubunganna nanna uranga.
19“Ada’ sitindo’anen nanna ampe’ indu’ka’. Kapi sairun saata ama’ka’, kapi sairun saata indu’ka’ na’an pande. Kole’a basa awan dinen tentu pawa’-awa’aniin lo’a sairun yang siapit-apiten. Intain mamolaan basa awan dinen arung tanggung jawab atas basana diri’a. 20Ati’en andian babakaan sitindo’anen nanna bainyena sairunna amana, daia pawa’-awa’ani lo’a kamona. Daira tetap tanggung jawap lo’a basana dinen, kosan ira mandua’ang anak sampai mondok lo’a aso matena.
21“Ati’en andian babakaan siala nanna bainyena sairun saata, dinen lalo yang basa kotoren. Daia dinen pawa’-awa’ani lo’a sairunna dinen, kosan ira mandua’ang anak.
22“Arungkin malola’ani parintaku’, lo’a ambata gulungan ukum adatku’. Arung ilola’ani kausa mainto’ na’annin daruru dari tana’ to’ ilalako’iin ikin dinen. Sama’ jarumku’, arung ilola’ani panamuku’ mainto’ na’annin damunta’ang kole’a tana’ to’ ilalako’iin ikin dinen lasana ajau’a basanin. 23Ada’ ilola’ani ikin adata ambata suku kuburoon suro’ arari ijolonin inangen di Kana’an. Kole’a awan dinen lalo basada’. Ialalo kukalibakangen iak. 24Poangsi andian mamin jarum kurantangen nannin, tana’ negerida’ dinen kumeang lo’in. Ikin manudukiin, ikin mandua’angen tana’ yang palin baraselen dinen. Iak lalo di’en i Yahuwe, Alatala yang isembaan ikin, yang maminen mamasilaanangen lo’in lo’a ambata gulungan suku bokanen.
25“Arung ibeda ikin inatang bareseen nanna inatang yang na’anen bareseen, ibeda burung bareseen nanna burung na’anen barese. Ada’ sampai daikin padari ajau’ ijolona aroku’ kole’a inatang, burung, atau jalu meleten yang maminen kulaanang, yang kuasanen inatang kotoren. 26Daikin arung laanang kalenin lo’a jalu kotoren supayakin tio’ itiang lo’ku’. Kole’a iak di’en i Yahuwe bareseak. Kenang bea daikin dinen mamin kupasilaanang lo’a suku bokanen padari diri’ku’ ampunaan.
27“Ati’en andian antaranin panuntut atau balianen yang asanen kalena datamu sijaruman nanna tau maminen mate, daia arung idukum. Maam babaka, kenang bea babainyeen, arung idukum mate. Arung iparati nanna batuun sampai mate. Diri’a arung tanggung jawap lo’a matena diri’a.”
Currently Selected:
Tutulan Karajana Imamen 20: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
