Tutulan Karajana Imamen 1
1
Pamindara ambata jalu itutungen
1Jaji mangalong i Yahuwe lo’a baki’ Musa, manjarum lo’a dari Kakalang Pasidua’angen Kaleen nanna i Yahuwe, 2“Awa jarumku’ di’en lo’a ambata anak kanturunanna baki’ Israel. Ati’en andiankin yang to mamola pamindaraan lo’ku’ i Yahuwe, mawakin sapi domba atau kambingen. Mawana kenang;
Pamindara sapi itutungen
3“Jalu yang to’ itiang pamindara jalu itutungen dinen, ati’en dari sapika’ kenang sarana. Arung idile’i iki’ sapi lakiin yang maamen, anu kosanen jaji rabora, kosanen sakina. Na’an pande iawa di bokanen. Arung iawa lo’a baba’ mambangan Kakalang Pasidua’angen Kaleen nanna i Yahuwe, na kenang datarima’a rabarik kole’a i Yahuwe. 4Na, ti’ mamin barik iawa lo’a dinen, arung dinen ijalaang tanganka’ di karampang uluna inatang to’ itutungen dinen. Kenanga ijalaang tanganka’ lo’a dinen, iala tanda kole’a dosaka’ dinen itanggungang lo’a inatang dinen, na kenang datarima’a rabarik inatang dinen kole’a i Yahuwe awan pamindara panyauti dosaka’.
5“Maminna ijalaang tanganka’ lo’a uluna dinen, arung isambeli barik inatang dinen inang di arona i Yahuwe. Ti’ mamin isambeli, dara’a dinen mamin itarumai ikapulungang, arung dala barik dara’a dinen kole’a ambata anaka baki’ Harun yang karaja imamen. Arung dapirikang barik kukuliling inang lo’a biringa kosan panutung pamindaraan yang inang di baba’ mambangan Kakalang Pasidua’angen nanna i Yahuwe. 6Maminna dapirikang dara’a inatang dinen kole’a imamen, arung ikaraja barik iki’ tau yang mawaan pamindara dinen. Arung idunjang kulita barik, idinati. Maminna barik idinati, isapa’. 7Maminna isapa’ isina dinen, arung dakamasang api kole’a anaka baki’ Harun yang karaja imamen dinen, darugu’ang kayu api inang di kosan panutung pamindaraan. 8Jaji ambata gulungan sapa’a barik dinen arung dala, arung dasusun jajalu maam dinen kole’a anaka baki’ Harun dinen yang karaja imamen. Maam uluna nanna inyaka dasusun kausa inang. 9Ambata gulungan suang batanga yang pandeen ikaan nanna kakina dinen arung ikusuk iki’ jajalu maam, baru’ barik datutung kausana inang di kosan pamindaraan kole’a imamen. Kenang sarana ati’en inatang sapi yang iawaan. Dinen lalo asanna pamindara yang jalu itutungen, jalu ipamindaraangen di apiin padari jalu maamen bauna. Dinen lalo yang pasasauiin nyawana i Yahuwe rabarik kole’a maminna barik idurusi dosanin.
Pamindara domba itutungen
10“Jalu to’ itiang pamindara jalu itutungen dinen, ati’en umpamana dari dombaka’ atau kambingka’, kenang sarana. Arung idile’i iki’ inatang lakiin yang maamen, anu kosanen jaji rabora, kosan sakina. 11Inatang dinen arung isambeli inang di arona i Yahuwe maro utara lo’a kosan pamindaraan dinen. Maminna isambeli, mamin itarumai ikapulungang dara’a, dara’a dinen arung dala kole’a araanaka i Harun dinen yang karaja imamen. Arung dapirikang barik lo’a biringa kas kosan pamindara kuliling. 12Maminna dinen arung ikaraja barik iki’ yang mawaan pamindara dinen, isapa’ isina. Maminna isapa’ arung dasusun inang ibona kayu atutungen dinen kole’a imamen. Maam isina, maam uluna nanna inyaka, samuana arung dajalaang inang. 13Ikusuk iki’ tajolo ambata suang batanga yang pandeen ikan nanna kakina. Maminna ikusuk, arung daawa lo’a kas kosan panutungan pamindaraan, arung datutung kausana inang kole’a imamen. Kenang sarana ati’en domba atau kambing yang iawaan. Dinen lalo pamindara jalu itutungen, jalu ipamindaraangen di apiin padari jalu maamen bauna. Dinen lalo yang pasasauiin nyawana i Yahuwe rabarik kole’a maminna barik idurusi dosanin.
Pamindara burung itutungen
14“Jaji jalu yang to’ itiang pamindara jalu itutungen dinen ti’ umpamana burung, suma poang yang pandeen iawa, burung takukur atau anak burung dara. 15-16Arung itutung bea di kosan pamindaraan. Sarana kenang. Arung daawa kole’a imamen lo’a biring kosan pamindaraan, laloang kalonga arung dapusalang inang. Dara’a arung daruarang inang di biringa kas kosanna pamindaraan maro timur, sarata gulungan mayama nanna buluna arung daunjang bea inang, di kosan dakapulunganga ambata kutu apiin dinen. 17Laloang arung dajaput burung dinen di sapa dua bali laloang daripak bangkayoanna manyuro’ tabae’. Ada’ poang ibala’ dua. Mamin dinen arung datutung inang di kayu itutungen ibona kosan pamindaraan. Kenang sarana ati’en burung yang iawaan. Dinen lalo asanna pamindara jalu itutungen, jalu ipamindarangen di apiin padari jalu maamen bauna. Dinen lalo yang pasasauiin nyawana i Yahuwe kole’a maminna barik idurusi dosanin.
Currently Selected:
Tutulan Karajana Imamen 1: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
