Tutulan Karajana Imamen 11
11
Ambata jalu dapase’ang ikaan nanna adat pamareseen
1Jaji manjarum bapi i Yahuwe lo’a baki’ Musa nanna baki’ Harun, 2“Awa jarumku’ di’en lo’a ambata anak kanturunanna baki’ Israel. Na’ankin pande angkaan samuana ambata gulungan baranana inatang yang tio’en di tana’en. Poangsi di’en yang pandeen ikaan ikin: 3Kakina dinen ti’ abala’ kukuta, sarata angkaanna dinen ati’en maminna datalan laloang dabaliki dakunya’ang bapi jalu kaanna, inatang dinen baru’ pande ikaan,” ingka kenang.
4“Na, inatang sapa dua andian yang dabaliki mangunya’ang jalu kaannaan poangsi kukut kakina na’an abala’. Andian bea yang abala’en kukut kakina poangsi na’an dabaliki mangunya’ang jalu kaanna. Umpamana inatang untaan. Untaan dinen mangunya’ang jalu kaanna duang kali, poangsi kukut kakina na’an abala’, sakala. Inatang dinen na’an pande ianggap barese, ianggap kotor. 5Kenang bea inatang koni, mangunya’anga jalu kaanna dinen dabaliki bea, poangsi kukut kakina dinen na’an abala’, sakala. Inatang dinen na’an pande ianggap barese. 6Awan dinen bapi inatang kalinciin. Angkaanna kalinci dinen tapat dabaliki mangunya’anga jalu kaanna, poangsi kukut kakina na’an abala’. Inatang dinen na’an pande ianggap barese. 7Awan inatang bawiin, kukut kakina dinen abala’ dua, poangsi angkaanna dinen na’an dabaliki mangunya’anga jalu kaanna. Inatang dinen arung ianggap kotor. 8Inatang dinen na’an pande ikaan ambata isi’a. Bangkayoanna na’an pande ijaput. Samuana arung ianggap kotor.#11:8 Umpamana sapi, ampat daia batanga. Nanga lamba’a di rimputen, kunya’a lo’a rimputen dinen kakapit poang. Bariar datalanna laloang masok jalu kaanna dinen lo’a batang mulakataan. Ona’ ati’en daia sangarian, dabaliki jalu kaanna. Balaun bua barik dakunya’anga. Mamin dinen masok lo’a batang kaduaan. Duang kali lagi’ maminna dinen dakunya’anga jalu kaana, baru’ lansung lamba’a jalu kaana.
9“Antarana ambata inatang tio’en di danumen, di jawaan nanna sungeen, ti’ andian janga, andian sisika, pande kausa ikaan ikin. 10Poangsi ti’ de’ kosan janga, kosan sisika, na’an pande ikaan ikin. Arung ikagaringang ikin. Kapi poang inatang lembak-lembak bayu’ arananga di danumen, kapi poang inatang bokanen yang tio’en di danumen, ti’ kosan janga atau sisika arung ikagaringang. 11Isina na’an pande ikaan, bangkayoanna na’an pande ijaput. Arung ikalibakang. 12Ai poang yang tio’en di danumen ti’ kosan janga nanna sisika arung ianggap jalu ikagaringangen.
13“Jaji burung yang arung ikagaringang ikin, yang na’anen pande ikaan, ialalo awang baja’, burung ering, burung janggut nanna burung bau jawa, 14jenis burung bau dara’ adong, bau tunjang, 15jenis burung kakao’, 16burung unta, jenis burung antu, camar nanna elang sikap, 17burung lambukan, burung dendang air, nanna burung buak, 18burung buak puti’, burung undan, burung ering, 19burung jenis tantakuan, saggoan, meragai nanna jingkawat, samuana arung ikagaringang ikin. Kenang burung ipase’ang ikaan.
20“Ambata inatang mainsapen, yang meleten di tana’en arung ikagaringang ikin. 21Andian poang yang pandeen ikaan antarana inatang mainsap melet, anu yang arabuku bangkang kakina, yang marajuk-rajuk lamba’a nanna kakina. 22Dinen pande ikaan ikin. Ambata jenis buntak, buntak belalang gambar, buntak surangkale, buntak kunding, buntak belalang padi pande kausa ikaan. 23Poangsi lo’a ambata inatang mainsap bokanen, yang meleten, arung ikagaringang ikin.”
....................
29“Antarana inatang melet di tana’en yang arung ianggap kotor ialalo dinen: tikus buta, balao, burongkong, reket, nanna bujak menurut jenisa, 30ambata titung, mendarat, nanna bulilik, ambata bulelang, kalambue nanna bulongkok. 31Antarana ambata inatang melet di tana’en, dinen lalo yang arung ianggap ikin kotor.
“Ti’ mamin mate inatang dinen, ti’ ijaput, tau manjaputen dinen arung ianggap kotor sampai mondok pamamalamen. 32Ti’ andian mate inatang dinen alao’ lo’a jaluka’, jalu dinen kapi balu’ ai gunana arung ianggap kotor. Kapi jalu ipola dari kayuun, kapi kain, kapi kulit inatangen, kapi kain guni, arung iapis barik di danumen. Arung ianggap kotor sampai mondok pamamalamen, baru’ pande ianggap barese. 33Ati’en inatang mateen dinen alao’ lo’a bakamen, jalu ilalam bakam dinen arung ianggap kotor rabarik. Bakam dinen arung ibala’ barik. 34Jalu yang pandeen ikaan ati’en idanumi dari bakam dinen de’i arung ianggap kotor. Danumapi ti’ jalu pande idinyum arung ianggap kotor rabarik. 35Ai poang yang dalao’iin kole’a inatang mateen dinen umpamana bakaran rotiin atau sitak parikoanen arung ibala’ ikin. Mamin kotor rabarik, arung ianggap ikin kotor. 36Poangsi ti’ mata danum dalao’iin nanna inatang mateen dinen, ataupun tongen, pandepi ianggap barese. Poangsi tau manjaputen jalu mateen dinen arung ianggap kotor rabarik. 37Ati’en inatang mateen dinen alao’ lo’a banyia’en, pandepi ianggap barese. 38Poangsi ati’en banyia’ iraram dalao’i nanna jalu mateen dinen, arung ianggap kotor rabarik.”
Currently Selected:
Tutulan Karajana Imamen 11: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
