Tutulan Karajana Imamen 12
12
Pamareseanna babainye aranaken
1Jaji manjarum i Yahuwe lo’a baki’ Musa, 2“Awa jarumku’ di’en lo’a ambata anak kanturunanna baki’ Israel. Babainye arauntingen yang laloang paranakang anaka dinen babakaan, arung ianggap kotor tuju aso launna, sama awan di mondoka kotoranna maira bulanen. 3Mamin barik tuju aso dinen, di kalapanna, anaka dinen arung isunat. 4Maminna isunat anaka dinen, iarungi tiga pulo’ tiga asopi. Baru’ pande babainye dinen mawa adat pamareseen mainto’ baresena barik dari kotoran dara’a dinen. Launna nampi mawa adat pamareseen dinen, na’an pande daia manjaput jalu yang maminen ilaanang itiang lo’a i Yahuwe. Na’an pande daia lamba’ lo’a saona i Yahuwe.
5“Aranaka dinen, ti’en babainye anaka, ampat belas aso launna daia arung ianggap na’an barese, sama awan di mondoka kotoranna maira bulanen. Mamin barik ampat belas aso, iarungipi anam pulo’ anam aso launna, baru’ pande daia mawa adat pamareseen mainto’ baresena rabarik dari kotoran dara’a dinen.
6“Jaji babainye dinen, ti’ mamin tuli asona itiang mawa adat pamareseen, arung daia mawa pamindarana lo’a imamen. Kapi anaka dinen babaka, kapi babainye ka’ mawana. Arung daawa lo’a imamen inang di mambangan Kakalang Pasidua’ang Kaleen nanna i Yahuwe anak domba umur sataunen itiang pamindara jalu itutungen. Sarata arung andian anak burung takukur atau burung dara itiang pamindara panyauti dosaan. 7Arung dapamindaraang barik kole’a imamen di arona i Yahuwe itiang mawa pasikule’angen antarana babainye dinen nanna i Yahuwe. Baru’ barik pande daia ianggap barese dari kotoran dara’a dinen.
“Kenang paratoranna lo’a babainye aranaken, kapi babaka anaka, kapi babainye anaka. 8Ati’en na’an mampu daia mawa pamindara anak dombaan, arung daia mawa burung takukur, atau burung dara duaan. Burung sera dinen itiang pamindara jalu itutungen, sera itiang panyauti dosaan. Awan dinen imamen mawa pasikule’angen antarana babainye dinen nanna i Yahuwe. Laloang daia to’ ianggap barese rabarik.”
Currently Selected:
Tutulan Karajana Imamen 12: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
