Tutulan Karajana Imamen 10
10
Matena baki’ Nadab nanna baki’ Abihu
1Jaji maminna barik araanaka baki’ Harun dinen mulai mawa tugasa, andian jalu adariin. Araanaka dinen, baki’ Nadab nanna baki’ Abihu, mala bokor panutung manyanen. Dataro’ bara apiin, dataro’ manyanen. Laloang dinen daawa di arona i Yahuwe, datutung inang awan yang na’anen sikule’ nanna parintana i Yahuwe. Laan jarum dasuro’angen, laan dalola’anina. 2Jaji minsaluan barik apiin dari arona i Yahuwe yang manutungen lo’da’ duaan. Mate dua-duana inang di arona i Yahuwe. 3Jaji manjarum barik baki’ Musa lo’a baki’ Harun, “Na, dinen lalo ratina jaruma i Yahuwe dinen,
“Antarana tau mainso’iin lo’ku’, kupaitang kaleku’ tau yang bareseen, yang bajao’ laanku’ lo’a samuana ambata gulungan jalu isemba bokanen,
ingka kenang i Yahuwe.
“Arungak dapaduli kole’a tau mainso’iin lo’ku’, dakitana kole’a tau bayu’en,
ingka kenang memen,” ingka kenang manjaruma baki’ Musa lo’a baki’ Harun. Baki’ Harunpi barik na’an lagi’ kakaji’.
4Maminna dinen barik baki’ Musa daia mangalong lo’a baki’ Misael nanna baki’ Elsapan, anaka baki’ Usiel. Baki’ Usiel lalo kamona baki’ Harun. Jaji manjarum lo’da’, “Lo’di’kin,” ingka kenang. “Na, angkat ikin bangkayoanna arasairunnin. Ala dari arona kakalanga i Yahuwe inang. Awa insaluanna banuaan,” ingka kenang lo’da’. 5Jaji lamba’ barik ira, daangkat bangkayoanda’ duaan nanna sape imamda’ bua. Daawa minsaluan dari banuaan awan lalo yang dajarumangen kole’a baki’ Musa.
6Jaji manjarum bapi baki’ Musa lo’a baki’ Harun nanna araanaka dinen, baki’ Misael nanna baki’ Elsapan, “Daikin dinen ada’ mauliten. Bukin dinen ada’ ipalaloang asasut, kainin ada’ iripaka,” ingka kenang. “Ti’kin maulit, ona’ matekin. Manyuro’ poang arasi i Yahuwe lo’da’ gulunganka’, marampit lo’a samuana arasairunnin anak kanturunanna baki’ Israel. Poangsi ambata arasairunnin bokanen, ambata anak kanturunanna baki’ Israel pande maulit mangajau’ang nyawa lo’a apina i Yahuwe yang dadale’a mauno’en lo’da’ duaan. 7Daikin ada’kin maruaren lo’a mambangan Kakalang Pasidua’ang Kaleen nanna i Yahuwe. Ti’kin lamba’, ona’ matekin, kole’a maminkin dadua’ tugas. Dalulukikin nanna inyaken datiang malaanang lo’in itiang mawa karajana i Yahuwe,” ingka kenang manjaruma baki’ Musa lo’da’. Jaji dalola’ani awan bua jaruma baki’ Musa lo’da’.
8Jaji manjarum i Yahuwe lo’a baki’ Harun, 9“Daikin nanna araanaku dinen ti’kin intama lo’a Kakalang Pasidua’ang Kaleen nanna i Yahuwe, na’ankin pande mainyum anggur atau jalu balasaan. Ati’enkin ona’ mainyum, matekin. Paratoran dinen arung ipakai ikin turun-manurun. 10Ada’ sampai akaruna pikirannin. Arung itamu ikin pasitimbangang antarana jalu maminen dalaanang padari i Yahuwe ampunaan nanna jalu na’anen, antarana jalu kotoren nanna jalu bareseen. 11Daikin lalo yang arung majar lo’da’ ambata anak kanturunanna baki’ Israel. Arung iparajari mainto’ datamuna samuana ambata gulungan parinta yang dajarumangen lo’da’ malaloi i Musa,” ingka kenang manjaruma i Yahuwe lo’a baki’ Harun panak-anak.
Currently Selected:
Tutulan Karajana Imamen 10: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
