Di Mulakata 50
50
1Maminna barik mangatu nyawana baki’ Israel, baki’ Yusuppi dinen laloang mandakap lo’a amana. Danangisi. Dasum. 2Maminna dinen laloang daalaang gulungan dokteren. Dasuro’ pole’i bangkayoanna amana mainto’ na’anna bauruk. Jaji dapole’i. 3Ampat pulo’ aso launna dapole’ina awan yang biasaan katatapanna. Tuju pulo’ aso urang Mesiren dinen mangampitina lo’a baki’ Yakub dinen.
4Akaus barik aso mangampitina lo’a amana dinen, manjarum baki’ Yusup lo’a gulungan anak buana raja Mesir, dasuro’ mawa jaruma, “Ti’kin mainya’ manggulungi lo’ku’, suba mawa jarumku’ lo’a rajaan. 5Daiakjo ijolo dasuro’ kole’a ama’ku’ basumpa. Dajarumang kole’a ama’ku’, Daiak, ingka, to’ mateak di’en. Arungak ikubur di Kana’an inang di loang kubur maminen kukamasang dinen, ingka kenang lo’ku’. Na, ti’enak iparuarang iko, daiak di’en to’ mangubur lo’a ama’ku’ di negeri Kana’an. Mamin de’i kukubur, mole’ak bua,” ingka kenang jaruma baki’ Yusup dasuro’ jarumang lo’a rajaan.
6Maminna dinen dadalinga barik kole’a rajaan, “Lamba’ko. Lola’ani jaruma ama’ dinen maminnu dasuro’ basumpa,” ingka kenang.
7Jaji barik maminna dinen, baki’ Yusup laloang lamba’ mawa lo’a amana, to’ dakubur di Kana’an. Tamba kausa ambata gulungan tau bapangkaten di Mesir dinen, gulungan anak buana rajaan, gulungan isi’ saona. 8Tamba bea isi’ saona baki’ Yusup nanna ambata gulungan arasairunna, gulungan isi’ saona amana. Suma yang arantangen di Gosen, gulungan nangkanak, gulungan sapi kambing dombaan. Tamba kausa yang bokanen. 9Andian bapi gulungan kandara’an, gulungan tau mauwati kudaan mairing lo’a bangkayoanna amana dinen. Saja nyangkat tau tambaan lo’a dinen.
10Jaji lamba’ dinen, mondok lo’a kosan tau maromoken isulina sunge Yordan di Atad. Inang barik bakaya tapat nangisa tauen. Okan gampang nangisa tauen. Baraa unyina. Launna dinen nangisa, tuju aso. 11Barik dinen dabele kole’a urang Kana’anen, manjarum, “Baraa tapat upacarada’ urang Mesiren manangisiin tau mateen dinen,” ingka kenang. Ialalo barik kosan dinen daasan Abel-Misraim.#50:11 Ratina abel-misraim, nangisa tau Mesiren.
12Ialalo ira mawana dinen bangkayoanna amana awan lalo jarum dapaba’angen, 13daawa lo’a loang batu Makpela yang maminen dabalijo kole’a baki’ Abraham lo’a i Epron urang Heten dinen. Tana’ tumbalianen nanna Mamre inang yang dabali itiang kubur. 14Maminna barik dakubur dinen amana, baki’ Yusup dinen mole’ lo’a Mesir sarata nanna ambata gulungan sairunna, nanna gulungan tau malola’ manguburen. Mole’ samuana lo’a Mesir.
15Jaji barik dapikir dinen arakakana baki’ Yusup, “Di’ mamin mate ama’ka’, ungka’ andianpi pikir ajau’en i Yusup to’ mamalas lo’ka’. Kole’a basaka’jo mamin ajau’ joloon lo’a,” ingka kenang sijarumanda’. 16Jaji barik dapasanang dinen manyuro’ tau lo’a baki’ Yusup. Daasan andian jarum darantangen kole’a amana. “Di waktu to’ matena dinen ama’ka’,” ingka, “andian paba’ina lo’u, 17Daiko, ingka, arungko mamponi lo’a arasairunnu dosada’ dinen. Kole’a mamin ira basala’ ijolonu, ingka kenang jaruma ama’ka’ lo’u. Jaji daikam di’en mamita amponkam barik lo’u. Amponikam di’en suro’anna Alatala, Alatala yang dasembaan kole’a ama’ka’,” ingka kenang jarumda’ dapasanangen. Maminna dadalinga jarum dapaawaangen dinen, anangis baki’ Yusup.
18Jaji mondok barik arasairunna lo’a. Laloang paraba’ kalena, “Ikam lalo di’en pangkamu,” ingka kenang.
19“Ada’ jarum dinen,” ingka kenang manyautina baki’ Yusup. “Okan iak di’en Alatala,” ingka kenang. “Ada’kin atakuten. 20Tapatkin tujuan ajau’jo lo’ku’, poangsi Alatala laan. Daia tujuanna maam. Mainto’ adari awan di’en jaluun, itiang matio’ tau bayu’en. 21Jaji ada’kin atakuten. Daiak di’en matio’ak lo’in nanna ambata gulungan araanakin. Ambata jalu kaannin kutangung iak,” ingka kenang mamalasa lo’da’. Bayu’ bea jaruma lo’da’ pamaamen nyawada’.
Baki’ Yusup mate
22Jaji baki’ Yusup lalako’ lapoang di Mesir sarata ambata arasairunna dinen. Umura dinen barik mondok 110 taun. 23Daia dinen dapatpi marambit lo’a puita baki’ Epraim. Lo’a ampuna Manase lagi’pi marambit. Anaka baki’ Makir lagi’pi daawin.
24Jaji manjarum barik baki’ Yusup lo’a ambata arasairunna, “Na daiak di’en mainso’ to’ mate,” ingka kenang. “Poangsi daikin ona’ tetap dagulungi kole’a Alatala, daawakin minsaluan dari negeri di’en lo’a negeri dabayaangen to’ daunjukangen lo’ka’. Ialalo bayanajo lo’a baki’ Abraham, lo’a baki’ Isak, lo’a ama’ka’ Yakub. Asan diri’a dala pakarasang bayana.” 25Jaji dasuro’ lo’da’ basumpa, “Alatala tentu manggulungi lo’in ona’, mawa lo’in minsaluan dari Mesir. Poangsi ti’ maminkin minsaluan, tolangku’ awa ikin,” ingka kenang manjaruma baki’ Yusup lo’a arasairunna.
26Jaji barik mate baki’ Yusup di umura saratus sapulo’ taun. Dapole’i bangkayoanna laloang daapis bangkayoanna kole’da’ di lungunen inang di Mesir.
Currently Selected:
Di Mulakata 50: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
