Palapasang 1
1
Ambata gulungan tau Israelen daparinsa’i
1Jaji mamalin ambata anak kanturunanna baki’ Israel saranak-ranakan lo’a negeri Mesir. Jaji asanna anak kanturunanna yang mamalinen dinen ialalo asanna:
2baki’ Ruben
baki’ Simeon
baki’ Lewi
3baki’ Yehuda
baki’ Isakar
baki’ Sebulon
4baki’ Benyamin
baki’ Dan
baki’ Naptali
baki’ Gad
baki’ Aser asanna.
5Yang baki’ Yusupen, daia andianna memen lalako’ inang di negeri Mesir. Jaji gulunganna ambata anak kanturunanna baki’ Israelen nanga dinen andian tuju pulo’ mantuari bayu’a.
6Rabarik maminna balaun ira inang lalako’a, mate bea dinen baki’ Yusupen barik. Ambata gulungan arasairunna yang sama amana, ambata dadaran tio’api dinen, mate kausana rabarik. 7Poangsi ira dinen anak kanturunanna baki’ Israel dinen insang balaun inang, insang bakambang tio’a, insang bayu’. Bayu’ ira inang. To’ apano’ tana’ negeri Mesiren dinen nanna ambata gulungan purina baki’ Israelen.
8Jaji barik dinen mamin balaun, andian raja yang mamarintaan inang di negeri Mesiren, raja baruun. Raja dinen de’i na’an mangilala lo’a baki’ Yusup. 9Jaji barik bapikir kole’a dinen ira kanturunanna baki’ Israel dinen insang bayu’, insang batamba. Jaji barik manjarum: “Belejo tau suku Israelen di’en bayu’a. To’ atalo ambatka’ kole’da’. 10Ti’ andian bala ona’ to’ mangayo lo’ka’. Ungka’en mainya’ ira tamba sigulungan nanna musuka’. Ungka’en ataloki kole’a, sampai ira dinen dapat rariang kalena. Se’ manyari akalki’ mainto’ na’anna batamba lapoang bayu’a mantuarina,” ingka kenang manjaruma raja dinen lo’a rayata.
11Jaji barik manugas tau. Daangkat ambata panguluan karajaan itiang mamarinsa’i lo’da’ nanna karaja paksaan. Bakarajana dinen dasuro’ mamola ambata banua baraa-raa’en yang itiang panaro’an kamaamanna dinen rajaan, banua Pitom nanna banua Ramses asanna. 12Poangsi bajao’ ira to’ insang kurang dalam kamarinsa’anna dinen. Insang daparinsa’i, insang batamba bayu’a ira kanturunanna baki’ Israel. Insang atambor sasara negeri Mesir, manyuro’ atakut gulungan urang Mesiren mamelena lo’da’. 13Daparinsa’i ira tau Israelen dinen, dapaksa arung bakaraja bakajung-kajung. 14Palin susa tio’da’ daparinsa’ina kole’a urang Mesiren. Dasuro’ karaja mamola saoen dari batu bataan, karaja dapaksa. Dasuro’ aparuk di umaan nanna karaja karasen. Na’an lagi’ dakamase’i.
15Jaji mamarinta bapi rajaan lo’a ambata babainyeen yang maniangiin lo’a tau yang aranaken, lo’a ira piang Sipra nanna piang Pua. 16Jaji parintana dinen lo’da’ duaan: “Bele ikin maam-maam ti’kin maniangi lo’a ira babainye tau Israelen. Di kalapasanna dinen ati’en anak babaka,” ingka, “arung iduno’ poang ikin. Ti’en anaka babainye, pande ikatio’ ikin,” ingka kenang jarum parintana rajaan lo’a ira dua babainye maniangiin dinen, lo’a ari piang Pua nanna piang Sipraan. 17Poangsi ira dinen barik na’an paduli lo’a parinta dinen, kole’a daira dinen atakut lo’a Alatala. Babaka babainye dakatio’, na’an dauno’ kole’da’ duaan dinen.
18Jaji maminna dinen barik, dakalong dinen paniangiin duaan, dasuro’ madap lo’a rajaan. “Ai kenang maam-maam basanin dinen ikatio’ kausa ikin? Anak babainye ikatio’ ikin, anak babaka ikatio’ ikin,” ingka kenang. “Na’ankin paduli lo’a parintaku’,” ingka kenang manjaruma rajaan.
19Jaji dasauti barik kole’a paniangiin duaan dinen, “Jaji kenang. Okan sama nanna urang Mesiren babainye Ibraniin di’en. Mul. 14:13. Babainye Ibraniin di’en bakajung. Nampikam mondok paniangiin, mamin daia kalapasan,” ingka kenang manyautina lo’a rajaan. 20-21Ialalo dinen insang bayu’ ranakanna baki’ Israelen dinen. Kanturunanna insang bayu’, insang kuat inang di negeri Mesir. Jaji maam barik Alatala lo’da’ paniangiin. Dasuro’ bayu’ bea ira anak kanturunanna kole’a mainya’ ira paduli lo’a Alatala.
22Jaji mamarinta bapi rajaan lo’a ambata gulungan rayata. Yang anak babakaan arung datampeang lo’a Sunge Nil. Babainye poang yang ikatio’en ati’en di kanturunanna baki’ Israel dinen.
Currently Selected:
Palapasang 1: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
