Di Mulakata 49
49
Baki’ Yakub pamaam lo’a ambata araanaka
1Jaji barik baki’ Yakub dinen dapaba’ang ambata araanaka babakaan, “Na di’en, kombongkin samuanin anak kanturunanku’,” ingka kenang. “To’ kujarumang lo’in jalu to’ idua’angen ikin di ona’en,” ingka kenang. Jaji manjarum barik inang pamaam lo’a araanaka,
2“Kombongkin kausa ranakana i Yakub, taan talinganin lo’a amanin, i Israel.
3“Na daiko Ruben, anakku’ yang atoaan, anak danginanku’ko. Iko lalo anak bungasku’. Daiko yang palin ipaduliin, palin bakuasaan.
4“Poangsi tadang barik ipadulinu kole’a ilamba’ina iko bainyeku’, ipajau’ iko kosan tindo’anku’. Awan lalo danumen yang na’anen dapat ituntuani daikopi na’an itamu tuntuani kalenu.
5“I Simeon nanna i Lewi sikule’ jaji basada’, sapasaangan ira duaan. Basida’ bataram, basi alat sikayoon. 6Na’anak to’ tamba sipakat nanda’, Ada’ ateku’ talola’en. Suka atena poang mauno’ tauna lasana arasida’. Suka atena parabor sapina lasana ate pebelen. 7Ikutuki arasida’ yang balasaan. Ikutuki arabuluna atena yang na’anen mainya’ mangamase’i. Ipasisarak-sarakang poang ona’ kanturunanna antarana ambata kanturunanna i Yakub yang bokanen. Ipasiambor-amborang antarana banua Israel.
8“ Yehuda, iko lalo ona’ yang dapudiin kole’a arasairunnu. Samuana arasairunnu to’ paduli kausa lo’u. Kalonga dinen lawannu isakak iko di tamagonga. 9Awan lalo anak singaan yang mole’ maningkamen, awan lalo singaan alenga’en, kosan tau barani manyading lo’a. 10Di kanturunanna i Yehuda andian lapoang ona’ yang mangkamen. Andian lapoang tungkat rajaan sampai mondok lo’a tau ampuna tugasen dinen, yang to’ dapaduliin kausa kole’a negaraan. 11Keledaina itunja’ang di bararan angguren, Anak keledaina itunja’ang di bararan angguren yang palin maamen. Ambata gulungan kainna dakusuk di danum angguren. Jubana balu’ jalu isalapangen lalo lo’a dara’ angguren. 12Matana ona’ dinen dadara’ awan bua’ angguren. Isina dinen ute’-ute’ awan lalo danum susuun.
13“I Sebulon dinen ona’ to’ lalako’ di biring jawaan. Banuana dinen to’ padari panyengka’anna kapalen. Mondok ona’ batasanna lo’a banua Sidon.
14“I Isakar kusama’ang lo’a keledai alenga’en antarana baka’ panuan bebe’en. 15Dabele maam kosan sangarianna, dabele maam bea tana’a, daiapi mainya’ iduwati jaluna. Mainya’ bea iala pangkama.
16“Kanturunanna i Dan to’ padari suku yang lalako’ sibiringanen nanna suku kanturunanna arasairunna bokanen. Ia barik padariin toa adaten yang mangkamen lo’a suku diri’a.
17“Kusama’ang awan lalo uraren, urar balasaan di biring dalanen, yang manotoken lo’a kaki kudaan mainto’ alao’a tau mauwaten lo’a kudaan dinen.”
Jaji mangalong barik daia lo’a i Yahuwe, 18“O Yahuwe,” ingka, “kuarung-arungi jaji to’ mondoku itiang matio’ lo’am,” ingka kenang.
19“I Gad dinen ona’ to’ darampas kole’a parampoken. Poangsi kabalikanna, daia to’ marampas bapi lo’da’, manyuro’ arari ijolona.
20“I Aser dinen ona’ to’ angkaan mewa. Ia ona’ mangamasaangen jalu kaanna gulungan rajaan.
21“I Naptali kusama’ang nanna indu piang ipalapasen, yang paranakangen anaka yang palin maamen batora.
22“I Yusup kusama’ang awan bararan bua’en yang tio’en di biring mata danumen. Daanna dinen mambit di pakaren. 23Ambata tau mawa panaan malawan lo’a nanna ate atata’en, to’ mauno’ nanna panaan. 24Poangsi daia dinen tetap bataan. Baliet tanganna manarik panana. Na’an kikirik. Daia dagulungi kole’a tanganna yang Tau Baraa’en Kuasana yang dasembaan kole’a i Yakub. Dagulungiin kole’a Tau dinen yang kusama’angen awan Batu Amparen, yang dasembaan kole’a i Israel, yang mauluangen lo’a i Israel.
25“Bataanko kole’a Alatala yang manggulungiin lo’u, Alatala yang dasembaan kole’a amanu. Bataanko kole’a Tau Palin Bakuasaan dinen yang pamaamen lo’u.
“Dameangko sauranen diaset, Dameangko danumen diawa’. Dasuro’ aranak insang bayu’, maam bainyenin kenang bea inatangin. Insang bangas samuana kole’a susu’a induna. 26Berkat kutarima’en dari nanna Alatala Ama’, bajao’ maama lo’a berkat kutarima’en dari nanna arabaki’ joloon. Labi batako’ lo’a asel idua’angen di gulungan ukit yang andianen tatulak ijoloon. Muda-muda samuana berkat dinen mondok ibona uluna i Yusup, ibona kaninganna tau yang labiin lo’a arasairunna bokanen.
27“I Benyamin kusama’ang lo’a asu toanen yang mase’ jaji batanga. Makapen dakaan jalu datingkamen. Pamamalem datawa’-tawa’ parampasanna, ingka kenang jaruma baki’ Yakub pamaama lo’a araanaka.
28“Ialalo dinen de’i kanturunanna baki’ Israel yang dua belasen sukuna. Awan dinen lalo jaruma baki’ Israel dado’aanga ira kanturunan dua belas sukuun dinen, sikule’ nanna jalu to’ adariin di ona’en.”
29-30Jaji barik darantangang jarum kole’a baki’ Israel, “Na daiak di’en, to’ malola’ak lo’a arabaki’ka’. Ti’enak mamin talalo, arungak ikubur lo’a tana’ dabaliin dinen kole’a baki’ Abrahamjo, di loang batuun. Anu tana’ dabaliinjo dari i Epron urang Heten dinen. Loang batu dinen di tana’ Makpela mainso’en lo’a Mamre negeri Kana’an. Arungak ikubur ibiringa arabaki’ inang. 31Kole’a inang lalojo kubura baki’ Abraham nanna piang Sara. Inang bea kubura baki’ Isak nanna piang Ribka. Inang bapi kubura kole’ku’ indu’ Lea. 32Tana’ dinen sarata loang batuun dabaliin lo’a urang Heten dinen.”
33Mamin akaus barik dinen paba’ina baki’ Yakub lo’a araanaka, laloang alenga’ bapi terus mangatu nyawana malola’ lo’a arabakina.
Currently Selected:
Di Mulakata 49: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
