Di Mulakata 48

Baki’ Manase nanna baki’ Epraim dapamaam

1Jaji barik maminna dinen, andian tau mawa jarum lo’a baki’ Yusup, “Apadis amanu,” ingka kenang. Jaji barik datamu kole’a baki’ Yusup dinen, laloang lamba’. Daawa anaka duaan dinen, ari baki’ Manase nanna baki’ Epraim. 2Jaji barik di mondoka lo’a baki’ Yakub, manjarum tauen, “Anaku mondok, i Yusup,” ingka kenang. Barik dadalinga jarum dinen de’i kole’a baki’ Yakub, dapakaya aduduk.

3Jaji manjarum baki’ Yakub lo’a baki’ Yusup, “Inang di banua Lusjo negeri Kana’an, Alatala yang palin bakuasaan paitang kalena lo’ku’. Dapamaamak. 4Jaji manjaruma lo’ku’ inang, Daiko kanturunannu kupabayu’ sampai padari negara baraa’en, sampai padari banua bayu’. Tana’ di’en kutawa’ang lo’a kanturunannu sampai mondok lo’a anak ituntung, lo’a anak ipuit, ingka kenangjo bayana lo’ku’.”

5Jaji manjarumpi lo’a baki’ Yusup, “Na, di’ barik anaku duaan di’en yang iparanakangen indi’angen di Mesir di nampiku’ mondok lo’a di’en, ampu’ku’ dinen kuaangkat anak diri’ku’, panyurang lo’u. Sadarajat nanna ari Ruben nanna ari Simeon. 6Jaji ti’ andian bapi anaku imundida’ dinen, ilalam soal panurunan tikaan, daira ona’ to’ mandua’ang tawa’ sama nanna anaka ari Manase nanna ari Epraim. 7Anaku dinen kuanggap barik awan anakku’ nanna indunu, kuala kalimongonan lo’a indunu i Rahel. Ratina kenangku’ kole’a waktujo ijolo mandua’ang susa’ak di tanga’ dalanen lamba’ku’ di Mesopotamia. Maminna mainso’ dinen lo’a banua Eprat mate indu’ i Rahel. Ikubur barik ibiringa Eprat inang yang iasanen bea Betlehem dinen,” ingka kenang jaruma baki’ Yakub lo’a baki’ Yusup.

8Jaji barik dakita dinen anaka baki’ Yusup, dakatoani, “Intainsi dinen?” ingka kenang.

9“O dinen lalo anakku’ duaan yang dameangen kole’a Alatala lo’ku’ indi’angen di Mesir,” ingka kenang.

Jaji dasauti kole’a baki’ Yakub, “Awajo lo’di’en araampu’ku’, to’ kudo’aang, kupitaang lo’a Alatala.”

10Jaji matana baki’ Yakub dinen akabur, mamin ajau’ kole’a atoanna. Jaji daawa mainso’ barik dinen araampuna baki’ Yakub kole’a baki’ Yusup. Laloang dasum anak duaan dinen kole’a baki’ Yakub, dadakap.

11Jaji manjarum dinen baki’ Yakub lo’a baki’ Yusup, “Na’an kusangka sidua’ka’. Kuasanang to’ mateko,” ingka kenang. “Barik sidua’ki’ bua. Labi lo’a dinen, daparuarangak bapi kole’a Alatala sidua’ nanna anaku.”

12Maminna dinen laloang dala dinen anaka duaan dari awinana amana, kole’a baki’ Yusup. Sarata ungge’ang kalena ijolona amana. Dasunsumang lindo’a lo’a tana’en. 13Laloang anaka dinen daawa lo’a amana. Yang baki’ Epraimen dinen daawa nanna tangan katona lo’a tangan kayoko’a amana. Yang baki’ Manaseen dinen daawa nanna tangan kayoko’a lo’a tangan katona amana. 14Poangsi rabarik baki’ Yakub dinen daanuang tangan katona lo’a uluna baki’ Epraim. Daanu tangan kayoko’a lo’a uluna baki’ Manase, padahal dinen baki’ Manase yang atoaan. Dapasibinte’ang tanganna baki’ Yakub manjalaanga lo’a araampunaan duaan dinen.

15-16Jaji dado’aang, dapamaam baki’ Yusup, “Daiak di’en mando’aangak lo’a nangkanak di’en, kupitaang dari Alatala yang dapaduliin kole’a baki’ Abrahamjo, yang dapaduliin kole’a ama’ Isak, yang manuntuaniin bea lo’ku’ salangke tio’ku’ mondok aso di’en, ia dinen malaikat yang malindungiin lo’ku’ lo’a jalu ajau’en, lo’a gulungan jalu bahayaan. Yang kupitaan, arung tio’ lapoang asanku’ nanna asanna baki’ku’ Abraham nanna ama’ku’ Isak kole’a nangkanak di’en. Arung aranak bayu’ insang bayu’,” ingka kenang ilalam do’ana.

17Jaji barik dabele kole’a baki’ Yusup, na’an berapa maam nyawana dabelena dajalaanga tanganna amana. Jaji datangko’ tanganna, to’ dapalinang tangan katona amana lo’a uluna baki’ Manase. 18“Na’an kenang ama’e. Di’en anak yang atoaan. Tangan katonu arung indi’ang,” ingka kenang jaruma baki’ Yusup lo’a amana.

19Jaji dasauti barik kole’a baki’ Yakub, “Kutamu anake, kutamu. Okan dinen to’ isuro’ ajau’. To’ baraa bea dinen asanna. Bayu’ bea kanturunanna,” ingka kenang. “Poangsi dinen labi maam asanna arina. Labi bayu’ kanturunanna padari bayu’ banuaan, labi lo’a kakana,” ingka kenang. 20Jaji dado’aang di aso dinen, dapitaang jalu maamen,

“Anak di’en ona’ datiang akat jarum kole’a tauen, Maamko. Muda-mudako awan baki’ Epraim nanna baki’ Manase, ingka ona’ tauen, mala asanna araampu’ku’ duaan di’en,” ingka kenang manjaruma baki’ Yakub.

Jaji baki’ Epraim dinen kapi daia imundi, dapatoai asanna, dapajolo lo’a baki’ Manase.

21Jaji manjarum barik baki’ Yakub lo’a baki’ Yusup, “Na, daiak di’en to’ mateak, poangsi daikin nanna gulungan kanturunannin to’ mole’kin bua lo’a asalka’, lo’a tana’a arabaki’ka’. Dagulungikin bea kole’a Alatala,” ingka kenang. 22“Jaji andian kalabianna jalu kudunjukangen lo’u, lo’a arasairunnu,” ingka kenang. “Tana’ yang kualaan ilalam tanganna tau Amoriin, kualaanjo malawan nanna panaan, malawan nanna pedangen, dinen kudunjukangen lo’u,” ingka kenang manjaruma.

Currently Selected:

Di Mulakata 48: EBE

Highlight

Copy

Compare