Di Mulakata 47

1Jaji lamba’ barik dinen baki’ Yusup madap lo’a rajaan manjarumang mondoka amana, “Mamin mondok ama’ku’ nanna arasairunku’ di Kana’an lo’a Gosen. Daawa bea gulungan ambata inatangda’, ambata jaluda’,” ingka kenang manjarumanga lo’a rajaan. 2Laloang daawa arasairunna. Daile’i lima mantuariin. Laloang dapasidua’ang nanna rajaan.

3Jaji barik dinen dakatoani kole’a rajaan, “Ai daikin karajanin?” ingka kenang lo’da’ limaan dinen.

Dasauti barik, “Daikam karajanam, karaja manunutani inatang. Tarangkat dari nanna arabakinam memen manuntuani inatangam,” ingka kenang. 4“Mondokkam to’ lalako’ indi’angen kole’a kuat jaji karaparanen inang di Kana’an. Kosan kaananna gulungan inatangam, ambata gulungan rimput inang,” ingka kenang. “Jaji andian jalu to’ ipitaan lo’u, to’ lalako’kam di daerah Gosen ti’ iparuarang iko, Raja’e,” ingka kenang dinen jaruma arasairunna baki’ Yusup lo’a rajaan.

5Jaji manjarum barik dinen rajaan lo’a baki’ Yusup, “Na di’ barik, mamin mondok amanu nanna arasairunnu. 6Paraksa poang di tana’ Mesir. Mameleko tana’ yang maamen itiang kosanda’. Na’an bea sala’ dinen lalako’ di daerah Gosen. Intain di antarana arasairunnu yang palin pintar manuntuani inatangen, dinen itugas iko itiang panuntuani inatangku’,” ingka kenang jaruma rajaan lo’a baki’ Yusup.

7Jaji daawa bapi dinen amana lo’a rajaan. Mondok inang rabarik amana, baki’ Yakub laloang bado’a mando’aang rajaan pamondokang jalu maamen lo’a. 8Jaji barik matoani raja dinen lo’a baki’ Yakub, “Ai lo’a daiko, insa’si mamin umuru?” ingka kenang manjaruma dinen rajaan.

9“O umurku’ na’an bea balaun. Suma 130 taun lalako’ku’ di duniaan. Kenang bayu’ jaji parinsa’ku’. Umurku’ na’an sampai umura arabaki’ku’ manumpanga di duniaka’ di’en,” ingka kenang baki’ Yakub lo’a rajaan. 10Maminna dinen bado’a bapi baki’ Yakub mando’aang bapi lo’a rajaan pamondokang jalu maamen. Mamin dinen irapi dinen minsaluan.

11Jaji barik baki’ Yusup dinen mameang kosan lo’da’, lo’a amana nanna arasairunna inang di daerah Ramses di tana’ yang palin maamen, awan lalo paba’ina rajaan. Daerah Ramses ialalo dinen Gosen. 12Dameang bea ambata jalu kaanen itiang katio’anda’ sikule’ nanna ambatda’ ilalam loang kayanda’ sasukup-sukupda’ angkaanen dinen.

Baki’ Yusup padari indu banuaan

13Jaji insang kaya karaparanen kuliling. Negeri Mesir, negeri Kana’an, kosan kausa jalu kaanna. To’ manggatu’ kausa tauen lasana karaparanen. 14Akaus dinen ambata gulungan duit tauen takapulung nanna baki’ Yusup di Mesir, di Kana’an. Daapis ilalam saona rajaan duit pamali jalu kaanen dinen. 15Akaus barik duit tau Mesiren, tau Kana’anen, mondok barik tauen, ira tau Mesiren lo’a baki’ Yusup. “Meangkam jalu kaanen. Kosan jalu pamali jalu kaannam lagi’. Ada’ sampaikam mate ona’ ijolona aronu,” ingka kenang tauen lo’a baki’ Yusup.

16Jaji manyauti barik baki’ Yusup lo’da’, “Na, ti’ kosan jaji duitin, kosan jalu palanin, awajo ambata gulungan inatangin,” ingka kenang. “Bele kutukara iak nanna jalu kaanen supayakin angkaan nanna suang saonin, nanna urangin,” ingka kenang baki’ Yusup lo’da’. 17Jaji daawa barik kole’da’ ambata gulungan inatangda’ dinen, ambata gulungan kudaan, gulungan dombaan, gulungan sapiin kaledaien. Datawa’i jalu kaan barik. Jaji taun dinen baki’ Yusup matio’ lo’da’. Inatangda’ dala panyurangi jalu kaanda’.

18Maminna dinen, taun sera bapi, mondok bapi tauen, “Na, di’ kosan lagi’ jalu itiang paala ikam. Gulungan duitam akaus. Inatangam kosan lagi’. Mamin daiko ampunaan. Ai lagi’ ilamunna lo’u. Suma poang yang andianen nannam, mantuarinam nanna tana’am. 19Ai gunana ti’kam na’an ikatio’. Arusak ona’ tana’am ti’ na’an itanami. Suba iala diri’am nanna tana’am panyurangi jalu kaanen nanna banyia’en. Ai poang lo’a kole’u. Itiang pangkamkam mainya’,” ingka kenang jaruma dinen tau Mesiren lo’a baki’ Yusup.

20Jaji barik dinen dabali gulungan ambata tana’ urang Mesir dinen nanna jalu kaanen, padari raja ampunaan. Akaus dapet gulungan ambata tana’da’. Kole’a kuat jaji karaparanen. 21Dabali dinen nanna diri’a. Padari pangkam rajaan kausa tau Mesiren dari batas sabala’ mondok lo’a batas sabala’en. 22Suma poang yang na’anen dapet tana’a, ira ambata gulungan imamen. Kole’a mamin ira datanggung kole’a rajaan. Tio’ kole’a pameang rajaan. Ialalo na’anna dapet tana’da’ dinen.

23Jaji manjarum barik baki’ Yusup lo’a tauen, “Na, aso di’en, kubalikin barik mantuarinin nanna ambata gulungan tana’in, padari raja ampunaan,” ingka kenang. “Jaji kumeangkin barik ambata gulungan banyia’en. Banyia’ dinen tanam di umanin. 24Ti’kin mamin matam ona’, mole’ lo’a rajaan dua pulo’ paresen. Yang lapan pulo’ paresenen dinen mole’ lo’in yang mangarajaan itiang banyia’in, itiang pangkaan saloang kayannin paanak-anak dalam saonin,” ingka kenang baki’ Yusup lo’a urang Mesiren dinen.

25Jaji manyauti barik tauen, “Ibalikam mainya’, maminenko di’en matio’ lo’am. Itiang pangkam raja mainya’ ti’ko mainya’ manarima’ lo’am,” ingka kenang jarumda’ lo’a baki’ Yusup.

26Jaji barik dinen dapadari undang-undang kole’a baki’ Yusup, yang dapakaien di negeri Mesir mondok aso di’en.#47:26 Maksuta sampai mondok lo’a aso datulisa buku’ Di Mulakata di’en kole’a baki’ Musa. Samuana asel tana’en mole’ dua pulo’ paresen lo’a rajaan. Suma poang yang na’anen padari raja ampunaan, tana’a ambata gulungan imamen.

27Jaji baki’ Israel saranakan dinen lalako’ di Mesir di daerah Gosen. Hartada’ batamba bayu’ inang. Kanturunanda’ batamba bayu’.

28Jaji tuju belas taun lalako’a baki’ Yakub di Mesir. Umura samuana mamin mondok saratus ampat pulo’ tuju taun. 29-30Mainso’ to’ mateen rabarik, paba’ang lo’a baki’ Yusup, dasuro’ mondok. Jaji manjarum, “Ti’ tapat andian pangasaangu lo’ku’,” ingka kenang, “Surukang tangannu inyaunga bankangku’, basumpako lo’ku’. Arungak ipainsaluan dari negeri di’en. Arung sarilao’ kuburku’ nanna araama’ku’, arabaki’ku’. Ada’ak ikuburen indi’angen. Sumpa kalenu kole’a daiko to’ malola’ani paba’iku’,” ingka kenang.

Jaji barik dasauti kole’a baki’ Yusup, “Paba’inu dinen lo’ku’ kulola’ani kausana,” ingka kenang.

31“Na, ti’ kenang, basumpako barik,” ingka kenang amana. Jaji barik basumpa dinen baki’ Yusup. Laloang baki’ Israel dinen manangkayut inang di tungkata manyembana lo’a Alatala.

Currently Selected:

Di Mulakata 47: EBE

Highlight

Copy

Compare