Di Mulakata 45

Baki’ Yusup jarumang kalena

1Jaji barik baki’ Yusup maminna dadalinga jaruma baki’ Yehuda dinen na’an lagi’ dakule’ dapanaat atena di arona gulungan suro’anna dinen. Jaji manjarum baki’ Yusup lo’a suro’anna nanna unyi baraana, “Minsaluankin kausa. Babajao’kin lo’ku’,” ingka kenang. Ialalo barik dinen nanga to’ manjarumang kalena lo’a arasairunna, kosan tau bokan inang. Suma poang yang andianen ira yang pari-ariin. 2Maminna barik inyap suro’anna, anangis baki’ Yusup. Baraa tapat unyi nangisa. Sampai tadalinga lo’a gulungan urang Mesiren. Sampai tadongo lo’a saona rajaan.

3Jaji manjarum barik baki’ Yusup lo’a arasairunna dinen, “Iak lalo di’en i Yusup!” ingka kenang. “Ai lo’a, tio’pi ama’ka’, kaungka te’?” ingka kenang. Poangsi ira dinen na’an dapat manyauti lo’a baki’ Yusup kole’a balasa takuta.

4Jaji manjarum bapi baki’ Yusup, “Se’ mainso’-inso’kin lo’ku’,” ingka kenang. Jaji dainso’i kole’a arasairunna dinen. Jaji manjarum bapi lo’da’, “Iak lalo di’en arinin, i Yusup yang ipeten ikinjo lo’a Mesir. 5Jaji barik ada’kin dinen susaan. Ada’ rarasina kalenin kole’a ipetku’ ikin. Kole’a ratina di’en ialalo dasuro’ku’ tajolo kole’a Alatala itiang mangamasang, itiang matio’ lo’a tauen,” ingka kenang.

6“Jaji kujarumang lo’in. Duang taun maminen karaparanen. Masi limang taunpi kosan tau aparuk. Masak na’an, matam na’an, kole’a dinen dadua’ karaparanen. 7Poangsi dalam karaparanen ialalo dasuro’ku’ tajolo kole’a Alatala mainto’ ambata anak kanturunannin yang palin bayu’en ona’ dapat dakatio’ barik dari jalu bahayaan. Mainto’ na’annin atampus,” ingka kenang.

8Jaji manjarum baki’ Yusup lo’da’, “Jaji kenang. Okan ikin sabenara manyuro’en lo’ku’ lo’a Mesir di’en. Yang manyuro’en lo’ku’ Alatala. Alatala padariin lo’ku’ panasihat rajaan. Padariin lo’ku’ panguasai kausa saona rajaan, panguasai kausa negeri Mesir. 9Se’ mole’kin babariar lo’a ama’ka’. Mawa jarumku’ lo’a, Seluru negeri Mesir di’en i Yusup bakuasaan. Dasuro’ mamarinta kole’a Alatala. Suro’ ama’ka’ lo’a di’en. Ada’ balaunen, ikin lo’a ama’ka’. 10Ti’ko mamin lo’a i Yusup, inang di daerah Gosen lalako’in paanak-anak, paampu-ampu nanna ambata gulungan inatangin, gulungan dombanin, gulungan sapinin. Mala mainso’en lo’a, ikin kenang. 11Ti’enko mamin inang ama’e, i Yusup matio’en lo’u kole’a lagi’pi limang taunpi karaparanen. Ada’ko nanna suang saonu talola’ marinsa’ nanna tauen, ikin kenang lo’a ama’ka’,” ingka kenang jaruma baki’ Yusup.

12Jaji manjarum bapi baki’ Yusup, “Na di’en mata diri’in mameleen lo’ku’ manjarumku’ lo’in. Ikilalaak bua ikin nanna ari Benyamin. 13Jarumang lo’a ama’ka’ mamarintaku’. Jarumang kosanna tau bakuasa iboku’. Jarumang kausa yang ikitaan ikin indi’angen. Babariarkin mawaan lo’a ama’ka’ lo’a di’en mainto’ kukitana,” ingka kenang jaruma baki’ Yusup lo’a arasairunna.

14Akaus manjaruma dinen, laloang barik mandakap lo’a baki’ Benyamin. Sarata manangisi lo’a arina. Baki’ Benyaminpi mandakap lo’a baki’ Yusup, manangisi lo’a kakana. 15Arasairunapi bokanen dinen dasum kausana. Dadakap. Danangisi. Maminna dinen laloang sijaruman ira inang.

16Jaji dadalinga barik dongo dinen kole’a raja Mesir andianna mondok arasairunna baki’ Yusup. Jaji sasau nyawana kausana nanna gulungan anak buana. 17Jaji manjarum rajaan lo’a baki’ Yusup, “Jaji manjarumang lo’a arasairunnu suro’ uwatang bebe’da’ lo’a kaledaida’ laloang mole’ lo’a negeri Kana’an. 18Suro’ ala dinen amanin nanna ambata araanaka arabainyena mamalin lo’a di’en. Nanga mondoka lo’a di’en kumeang lo’da’ tana’ yang palin maamen di Mesir. Samuana yang jalu maamen yang andianen di Mesir to’ kudunjukang lo’da’, iko lo’da’,” ingka kenang rajaan lo’a baki’ Yusup.

19Jaji manjarum bapi rajaan, “Kenangkin manjarumangen lo’da’, Mawakin bea garobaken dari Mesir itiang paawa lo’a araanakin, arabainyenin. Ala amanin laloang mole’ lo’a di’en. 20Samuana ambata bebe’in inangen ada’ atakuten marantang. Andian di Mesir di’en. Samuana yang jalu palin maamen indi’angen to’ kudunjukang lo’da’, iko kenang lo’a arasairunnu,” ingka kenang raja Mesiren lo’a baki’ Yusup.

21Jaji akaus dalola’ani parintana rajaan kole’da’ anaka baki’ Israel. Daunjukang garobaken lo’da’ kole’a baki’ Yusup awan lalo paba’ina rajaan. Dameang jalu kaan itiang bokal palamba’anda’. 22Dameang bea kain salinan sera-serada’ sapasang. Poangsi lo’a baki’ Benyamin dinen dameang duit pirak tiga ratus papaka nanna kain salinan limang pasangen. 23Lo’a amana dinen dapaawaang kaledai, sapulo’ kaledaien itiang pauwatang jalu maamen dari Mesir lo’a amana. Sapulo’ bea indu kaledai yang dameangen itiang pauwatang ambata gandom, ambata rotiin nanna jalu kaan bokanen itiang dakaan di palamba’anda’. 24Jaji dapaba’i bapi barik, “Na di’ tarangkatkin. Ada’kin sipaduun di tanga’ dalanen,” ingka kenang paba’ina dinen baki’ Yusup lo’a arasairunna dinen. Dasuro’ tarangkat bea barik.

25Jaji tarangkat ira lamba’ dari Mesir lo’a Kana’an sampai mondok lo’a amada’ baki’ Yakub. 26Jaji datutul lo’a, “Tio’pi pan i Yusup. Maam. Ialalo dinen tau mangkamen seluru negeri Mesir,” ingka kenang jarumda’ lo’a amana. To’ karamatean barik baki’ Yakub dinen mandalingana lo’a jarumda’, awan lalo tau tasansangi buku koroken batak nyawana. Kole’a na’an masok akal kalo’a. 27Poangsi maminna barik dajarumang paba’ina baki’ Yusup dinen sarata dabele ambata gulungan garobaken itiang pauwatang lo’a, baru’ barik arawang nyawana. 28Laloang manjarum, “Jaji lalo. Kukasuang nyawa tio’api pan anakku’. Daiak to’ sidua’ tapat nanna lamanapi tio’ku’. Manyariak,” ingka kenang jaruma baki’ Yakub lo’a araanaka bokanen dinen.

Currently Selected:

Di Mulakata 45: EBE

Highlight

Copy

Compare