Di Mulakata 44

Baki’ Benyamin daasan mangalit

1Jaji barik baki’ Yusup dinen, daparinta dinen suro’anna, “Na ira di’en isi’i kausa ambata gulungan gunina di’en nanna gandomen sajangka’-jangka’ dakule’a daawa kole’da’,” ingka kenang. “Ambata duitda’ dinen pole’ kausa kira mantuarina ilalam baba’ guni diri’a. 2Kenang bea anak yang imundiin dinen, pole’ bea duit dinen de’i sarata gelas pirak dinen painyumanku’, apis inang di baba’ gunina,” ingka kenang. Laloang dalola’ani kole’a suro’anna dinen.

3Imbara asoon barik daparuarang lamba’ ira nanna ambata kaledaina dinen. 4Maminna dinen ira minsaluan dari banuaan. Na’anpi bajao’ lamba’a manjarum bapi dinen baki’ Yusup lo’a suro’anna, “Na malola’ko lo’da’ dinen. Ti’ mamin irambit, manjarumko lo’da’, Ai kalakuannin yang awan dinen? Basa maam ibalas nanna basa ajau’en. 5Asi dinen gelasa paraampuanku’. Gelas dapakaien kiraso itiang painyumanna, dapakaien itiang mananung. Daikin di’ ajau’ tapatkin, iko kenang manjarumu dinen lo’da’.”

6Jaji barik lamba’ lalo dinen suro’anna baki’ Yusup, ira dinen darambit. Manjarum bua awan jaruma baki’ Yusup dinen de’i. 7Jaji dasauti barik kole’da’, “Na’an itamu ikam ratina jarumu dinen. Bajao’kam yang karaja jalu bansana dinen. 8Sedangkan duit idua’angen ikam ilalam guni gandomam, ipole’ bua ikam. Iawa dari Kana’an. Apa lagi’ yang mangalit ambata gulungan amas piraken dari saona paraampuannu,” ingka kenang. 9“Poangsi de’i ti’ andian balu’a dinen kalo’in, paraksa poang. Ti’ andian, daikam di’en pande itiang pangkamkam. Anu yang manaro’en dinen pande iduno’,” ingka kenang ira lo’a suro’anna baki’ Yusup dinen.

10Jaji dasauti barik kole’a pasuro’a baki’ Yusup, “Na din maam. Isari. Nanna intain ona’ idua’anga, dinenla yang dariin pangkamen. Yang ikin bokanen, alapaskin. Bebaskin,” ingka kenang manjaruma dinen suro’anna baki’ Yusup.

11Maminna dinen barik samuana ira dinen de’i babariar paindora ambata gulungan gunida’. Dabae’. 12Jaji dapariksa barik kole’a suro’an dinen dari anaka atoaan sampai mondok lo’a anak imundiin, lo’a baki’ Benyamin. Baru’ andian dinen gelas piraken. 13Maminna barik dabele awan dinen kole’a arasairunna, terus sama daripak sape diri’da’ lasana susada’. Irapi dinen terus mauwatang bebe’da’ lo’a kaledaien tarangkat. Mole’ bua ilalam banuaan, lo’a saona baki’ Yusup.

14Maminna mondok di banuaan dinen baki’ Yehuda nanna arasairunna, baki’ Yusuppi lagi’pi andian di saona. Laloang intama ira dinen malingkutut samuana manyemba. 15Jaji barik manjarum baki’ Yusup, “Ai ipolaan ikin balu’aan dinen lo’ku’? Asi na’an itamu ikin kutamuna mananung?” ingka kenang baki’ Yusup lo’da’.

16Jaji dasauti kole’a baki’ Yehuda, “Taua. Na’an itamu ikam manyauti jarumu, Pa’. Na’an itamu ikam pandua’ kalenam. Kole’a di’en patora Alatala manyuro’ paita kajau’annam. Daikam di’en samuanam dari pangkamu sampai mondok lo’aan tau yang manaro’ gelasen,” ingka kenang manyautina baki’ Yehuda.

17Jaji dadalinga jarum dinen kole’a baki’ Yusup, “Na’an kenang. Bajao’ak to’ mamola basa awan dinen. Suma de’i intain manaro’ gelasku’ dinen, din yang arantangen nanku’ dari pangkamku’. Yang ikin bokanen mole’kin lo’a amanin nanna maamen,” ingka kenang jaruma baki’ Yusup lo’da’.

18Jaji barik dinen baki’ Yehuda mainso’i dinen lo’a baki’ Yusup. “Kutamuko Bapa’e, saraako nanna raja Mesiren. Poangsi mamitaak lo’u. Suba paruarangak manjarum ijolo. Ada’ko arasiin lo’ku’,” ingka kenang. 19“Jaji kenang. Ijolo waktu mulakata mondokam lo’a di’en, ikatoanang iko amanam. Ikatoanang iko arinam. 20Ijarumang ikam, Andian amanam yang atoaan. Andian arinam yang daparanakangen di atoana. Kakana arinam dinen mamin mate. Tinggal poang ia yang sama induun. Ialalo arinam dinen dakasaang jaji kole’a amanam, ikam kenang manyautiin lo’u.

21“Barik dinen isuro’ awa iko arinam dinen yang imundiin, Arinin ti’ andianpi awa lo’ku’ mainto’ dinen kukitana, iko kenang. 22Jaji barik isauti ikam, Arinam dinen na’an dapat iawa. Na’an dapat silaan nanna amanam. Ti’ silaan, mate amanam manyarina, ikam lo’u. 23Jaji barik isauti iko jarumam, Ti’ na’an iawa ikin arinin, na’ankin pande sidua’ nanku’, iko kenang. 24Jaji barik jarum dinen lalo yang iawaan ikam lo’a suro’annu, lo’a amanam dinen.

25“Kole’a de’i, Se’ tarangkatkin tabalikkin lo’a Mesir mala jalu kaan, ingka kenang amanam. 26Jaji barik manjarumkam, Na’ankam dapat tabalik lo’a dinen. Kole’a pasana tau dinen de’i, ti’ na’an dari arinam dinen iawa lo’a dinen, daia alibak sidua’ nannam. Ti’ tamba arinam baru’kam tarangkat, ikam kenang lo’a amanam.

27“Jaji barik dinen dasautikam, Itamuna ikin indu’ dinen jangka’a dua anaka. 28Yang atoaan dinen mate na’an itamu-tamu. Tentu dasarikang jalu. Mondok aso di’en na’anak kala’ sidua’ bapi nanna. 29Ti’ di’en iawa bapi ikin laloang dadua’ jalu bahayaan di dalanen, mateak la ona’ yang tamatoaan di’en manyariin lo’a. Ti’ mate bapi anak dinen, ingka kenang jaruma amanam lo’am.

30-31“Jaji barik awandi’en ti’enak mole’ lo’a amanam, arinam na’an kuawa, dabele ona’ kosan arinam, to’ mate barik daia. Kole’a saate amanam nanna arinam. Jaji ikam barik yang manyuro’ mateen amanam di atoanna, lasana susana manyarina. 32Kole’a dinen tanggunganku’. Ti’ arinam na’an kuawa mole’ lo’a, iak mananggungen dosaku’ di aronu salangke-langke tio’ku’, uka’ kenang lo’a ama’ku’.

33“Jaji barik kupita jaji lo’u, labi maam anak di’en mole’. Iak arantangen itiang pangkamu. 34Asi lo’a mole’ku’ ti’en na’an tamba arinam? Ada’ak mamele susana ama’ku’ ti’ mamin adari awan dinen,” ingka kenang jaruma baki’ Yehuda lo’a baki’ Yusup.

Currently Selected:

Di Mulakata 44: EBE

Highlight

Copy

Compare