Di Mulakata 43

Arakakana baki’ Yusup mole’ lo’a Mesir

1Jaji insang kaya karaparanen inang di Kana’an. 2Gandom yang daawaan dinen lo’a Kana’an mamin akaus. Jaji barik manjarum amana lo’a araanaka, “Se’ tarangkatkin bapi mala jalu kaan. Mala baras gandomkin lo’a Mesir,” ingka kenang.

3Jaji dasauti barik kole’a baki’ Yehuda, “Na’an. Ti’ na’an tamba ariku’, na’ankam tarangkat. Kole’a mamin jaruma wakel rajaan lo’am, Ti’, na’an tamba arinam, ingka, na’ankam pande sidua’ nanna. Na’ankam pande sikita. 4Ti’ arinam iparuarang iko tamba nannam, daikam tetapkam lo’a dinen malakam jalu kaan. 5Poangsi ti’ na’an tamba arinam, na’ankam lo’a Mesir. Kole’a mamin bayana lo’am,” ingka kenang manyautina baki’ Yehuda.

6Jaji manjarum barik baki’ Israel lo’da’, “Ajau’insi lo’ku’. Ijarumangen ikin arinin lo’a wakel rajaan. Ialalo din to’ ipamondokangen ikin jalu ajau’en lo’ku’,” ingka kenang.

7“Na’an awan dinen, Ama’e. Okan ikam manjarumangen. Ai na’annam manjarumang? Daikam jarum tapat. Kole’a ia mangatoaniin lo’am, Lagi’pi tio’ amanin? Andian bapi arinin? ingka kenang wakel rajaan. Barik isauti ikam, ijarumang ikam nanna yang tapat-tapaten. Okan dinen itamuna ikam to’ balu’anna dinen, to’ dasuro’ awa arinam lo’a Mesir,” ingka kenang manyautida’ lo’a amana.

8Jaji barik manjarum baki’ Yehuda lo’a amana, “Tamba poang ariku’. Labi maam bariar tarangkatam dari pada mateka’ nanna araanakka’ na’an angkaan. 9Maam, iak tanggung jawapen. Ti’ ariku’ na’an kuawa mole’ lo’u, salangke-langke tio’ku’ kutanggung dosaku’ ijolona aronu. 10Ti’en de’i na’an ipase’ang iko jolo memen, maminkam duang kali lamba’en mala jalu kaan lo’a dinen. Poangsi kole’a balaun to, bayu’ pikir. Dinen lalo manyuro’ balaunen lo’ka’,” ingka kenang jaruma baki’ Yehuda.

11Jaji barik maminna dadalinga jarum dinen kole’a baki’ Israel, “Asi poang lo’a ti’ awan dinen. Awa ambata gulungan asel negeri di’en yang palin maamen di guninin. Awa ikin lo’a tau dinen ambata gulungan balsam, gulungan danum wanyiin, gulungan garu, gulungan bua’ kemiri nanna bua’ badam. 12Sarata dinen duit yang iawaan ikinjo dinen yang talola’en di baba’ guninin. Ungka’en de’i talilu’an. Duitin dinen awa duang kali lipat. 13Adi’ di’en awa. Tarangkatkin awandi’en mole’ lo’a tau dinen. 14Muda-muda Alatalaka’ yang Palin Bakuasaan manyuro’ lo’a tau dinen mangamase’i lo’in. Muda-muda ipalapas sairunnin nanna arinin. Iparuarang mole’ lo’ku’,” ingka kenang. “Poangsi ti’ na’an, aiaka poang lo’a yang bagi daiaken di’en, ti’ talalo mamin kenang kole’a Alatala to’ inyap anakku’,” ingka kenang jaruma baki’ Israel lo’a araanaka.

15Jaji barik ira dinen siap lalo itiang bokalen tangkata. Duiten dinen daawa duang kali lipat. Sarata pameanga dinen daapawaangen kole’a amana, daawa bea. Tamba bea dinen baki’ Benyamin. Laloang siap ira tarangkat lo’a Mesir. Jaji barik dinen mondok lo’a Mesir. Laloang madap dinen lo’a baki’ Yusup.

16Jaji dabele kole’a baki’ Yusup dinen, ira dinen mondok manurut jaji lo’a jaruma yang dapaba’angen dinen, lo’a baki’ Benyaminen. Jaji manjarum baki’ Yusup lo’a suro’anna dinen, “Ira di’en awa lo’a saoku’. Manyambelikin inatang. To’ kuawa angkaan nanku’ tanga’ asoon,” ingka kenang jaruma baki’ Yusup lo’a suro’anna.

17Jaji barik ira dinen laloang daawa lo’a saona, awan bua jaruma baki’ Yusup. 18Nanga daawana, atakut ira dinen kole’a daawana lo’a saona baki’ Yusup. Jaji sijaruman sama diri’da’, “Ungka’en dinen manyuro’ sala’ lo’ka’, duit yang dapole’en ilalam guni gandomka’ waktu mulakata mondokka’ lo’a di’en. Ungka’en kole’a dinen daawaka’ lo’a saona,” ingka. “Ungka’en dala pangali-ngali sala’ka’. To’ damangsangiki’ inang, to’ dala pangkamki’. Sarata kaledaika’ to’ dala,” ingka kenang sijarumanda’.

19Jaji barik ira dinen daawa sampai mondok lo’a biring baba’ mambangan di saona baki’ Yusup. Mondok lo’a dinen, manjarum ira lo’a suro’anna baki’ Yusup, 20“Bapa’, daikam mamin duang kalikam lo’a di’en. Duang kalinam di’en. Yang mulakataan, to’ mamali gandomkam. 21-22Mondokkam barik dinen di kosan samalamam, ibae’ ikam guninam, andian duit pamayaram sera-seranam. Andian kausa inang. Intain te’ poang mapisen inang? Saja na’an itamu ikam. Di’ lalo duit pamayaram. Ipole’ lo’u. Andian bapi iawaan itiang mamali baru,” ingka kenang manjaruma dinen lo’a suro’anna baki’ Yusup.

23Jaji dasauti kole’a suro’anen dinen, “A, dinen maam. Kosan jalu mai. Ada’kin kalangganganen. Alatala yang isembaan ikin nanna ama’, ia yang mameangen lo’in jalu maamen. Daapis ilalam guninin. Duitin dinen mamin kutarima’,” ingka kenang suro’anna baki’ Yusup lo’da’. Laloang dapainsaluan barik dinen baki’ Simeon, sairunda’ yang dataanen dinen.

24Jaji barik ira dinen daawa intama lo’a saoen. Laloang daalaang danum dinen datiang pangusuk kakida’. Sarata dinen kaledaida’ dinen dapangkaan. 25Laloang dakamasang kole’da’ sabelasen dinen jalu to’ datiang pameangda’ ona’ di mole’a baki’ Yusup tanga’ asoon. Kole’a andian dadalingaan to’ sarata inang angkaan tanga’ asoon.

26Jaji di mole’a baki’ Yusup dinen, daawa ilalam barik dinen pameangda’, dameang lo’a. Laloang ira dinen manyemba. Dasunsumang dinen lindo’a lo’a tana’en. 27Jaji baki’ Yusup barik mangatoanang dongoda’, “Ai lo’a ama’ yang ijarumangen ikin dinen lo’ku’, lagi’pi tio’?” ingka kenang lo’da’.

28Jaji dasauti barik kole’da’ dinen, “Tio’pi suro’annu dinen. Bakajungpi bua,” ingka kenang ira lo’a baki’ Yusup. Laloang manyemba bapi ira ijolona baki’ Yusup.

29Jaji barik dabeleang bapi matana dinen baki’ Yusup, dakita dinen baki’ Benyamin, arina yang sama induun nanna. Jaji barik dakatoanang lo’da’, “Di’ lalo arinin yang imundiin, yang ijarumangen ikin lo’ku’?” ingka kenang.

“Ia lalo,” ingka ira.

Jaji barik manjarum lo’a baki’ Benyamin, “Muda-muda Alatala mamayoang kamaamanna atena lo’u,” ingka kenang. 30Ka’ mase’-mase’a tapat mamelena lo’a arina. Jaji tarasa to’ anangis dinen yang baki’ Yusupen, pakaruru minsaluanna dari kamar dinen. Kapi’ang kalena lo’a kamar diri’aan, anangis.

31Maminna anangis dinen barik, dakusuk lindo’a. Baru’ minsaluan. Dapanaat poang nyawana. Jaji manjarum lo’a suro’anna, “Sorongang ikin barik jalu kaanen,” ingka kenang manjaruma baki’ Yusup.

32Jaji barik dinen daawa lalo ambata gulungan jalu ikaanen dinen. Jaji daator dinen jalu kaanen. Baki’ Yusup laan. Urang Mesiren dinen laan duduka. Arasairunnapi dinen ka’ kenanga. Ratina dapasilaan-laanang, na’anna pande sarilao’ angkaan, kole’a urang Mesiren alibak sarilao’ angkaan nanna urang Ibraniin.#43:32 Tau Ibraniin kanturunan i Eber. Suba mamele Di Mulakata 10:21. Agaring. 33Jaji daleleanang duduka arasairunna kole’a baki’ Yusup, dari anak atoaan mondok lo’a anak imundiin. Jaji dabele awan dinen, tatakau ira. “Dari sa itamuna umurka’,” ingka kenang nyawada’. 34Jaji ti’ dasorongi jalu kaan, datawa’i dari mejana baki’ Yusup, laan tapat dinen baki’ Benyamin tawa’ina. Limang kali lipat bayu’a dari pada sairunna bokanen. Jaji angkaan mainyum ira inang sampai bosor.

Currently Selected:

Di Mulakata 43: EBE

Highlight

Copy

Compare