Di Mulakata 42

Arakakana baki’ Yusup lamba’ lo’a Mesir

1Jaji barik dinen, andian tadongo lo’a baki’ Yakub inang di Kana’an kole’a di negeri Mesir andian jalu kaan. Na’an arapar. Jaji barik manjarum baki’ Yakub lo’a araanaka, “Mai daikin dinen tumbas sibele poang, sikatoanan?” ingka kenang. 2“Andian dongo kudalingaan di Mesiren andian gandom. Se’ lo’a dinenkin mala jalu kaanen mainto’ na’anka’ mate,” ingka kenang baki’ Yakub lo’a araanaka.

3Jaji tarangkat barik dinen arakakana baki’ Yusup sapulo’en. To’ mala jalu kaan lo’a negeri Mesir. 4Poangsi arina baki’ Yusup dinen dapase’ang tamba kole’a amana. Ungka’en ia bapi dadua’ bahayaan. 5Ialalo barik antarana tau to’ mala baras gandomen lo’a Mesir andian bea dinen arakakana baki’ Yusup tambaan. Kole’a arapar bea tauen di negeri Kana’an.

6Jaji barik nanga dinen baki’ Yusup lalo mamarintaan seluru negeri Mesir dinen. Ialalo dinen mamet jalu kaanen lo’a tauen. Jaji mondok tauen dari Kana’an, mondok bea arasairunna lo’a. Laloang dinen manyunsumang lindo’a lo’a tana’en manyembana dinen lo’a baki’ Yusup. 7Dabele barik kole’a baki’ Yusup, dakilala bua arakakana. Poangsi daia na’an jarumang kalena. Pola kalena tau bokan barik manjaruma lo’da’, jarum laanen. Bakaras manjaruma lo’da’. “Dari sakin dinen?” ingka kenang.#42:7 Tau Mesiren nanna tau Kana’an silaan jarumda’. Na’an sitamu ti’ kosan tau pasidua’ang jarum. Bele Di Mulakata 42:23.

“O daikam di’en dari Kana’ankam. To’ mala jalu kaankam,” ingka kenang arasairunna lo’a baki’ Yusup.

8Arasairunna dinen na’an bea mangilala lo’a. Poangsi baki’ Yusup dinen mangilala lo’da’. 9Barik baki’ Yusupen dinen parandam lo’a muina, mui arakakana manyembaan. Jaji manjarum lo’da’, “Tentu daikin di’en tau panojamkin. Mamaraksakin ka’ada’an tana’am mainto’ itamuna ikin kakurangannam,” ingka kenang jaruma dinen baki’ Yusup lo’a arakakana.

10-11“O na’an paraampuane. Daikam di’en to’ mamali jalu kaankam. Tau ate maamenkam. Okan tau panojam. Sarilao’ amanam,” ingka kenang manyautina dinen lo’a baki’ Yusup.

12Jaji manjarum bapi baki’ Yusup, “Na’an, daikin dinen saja tau panojamkin. Inde yang na’anen ijagai to’ inangkin mameleen ajau’a atenin,” ingka kenang.

13Jaji manjarum bapi arasairunna, “Okan kenang, paraampuane. Daikam di’en sarilo’ amanam. Dua belas ambatam pariin. Amanam lalako’ di negeri Kana’an. Suma sera arinam yang arantangen nanna amanam, anu imundiin. Sera mamin talalo mate,” ingka kenang.

14Jaji dajujulang bua kole’a baki’ Yusup, “Saja awan jarumku’ dinen. Tau panojamkin,” ingka. 15“Kutiang pangilalai lo’in. Basumpa’ak atas asanna Raja Mesir. Ti’en nampi mondok arinin lo’a di’en, nampikin kuparuarang mole’. 16Maile’ikin antaranin intain ona’ seraan yang to’ isuro’ itiang mala lo’a arinin yang arantangen dinen kalo’in. Arung iala ikin ti’ tapat jarumin. Daikin bokanen kutaankin. Atas asanna rajaan, ti’kin na’an tapat, ti’ pako-akokin, daikin lalo panojamkin,” ingka kenang jaruma baki’ Yusup lo’a arasairunna dinen. 17Jaji barik ira dinen daapis samuana ilalam sao ukumanen talung aso launna.

18Jaji barik akaus talung aso dinen, “Jaji kenang,” ingka kenang baki’ Yusup, “daikin di’en lola’ani ikin jarumku’ supayakin tio’. Mangamase’iak barik lo’in. Kole’a daiak di’en paduliak lo’a Alatala. 19Ti’kin tapat tau balolok, arantangkin sera di sao ukumanen. Yang bokanen mole’kin mantat jalu kaankin lo’a suang saonin yang to’ manggatu’en dinen,” ingka kenang. 20“Suma poang de’i sairunnin yang imundiin arung iawa ikin lo’a di’en mainto’ kutamuna tapat jarumin, mainto’ na’annin mate,” ingka kenang jaruma baki’ Yusup lo’a arasairunna. Jaji mainya’ ira malola’ani jaruma baki’ Yusup dinen.

21Jaji sijaruman arasairunna sama diri’a dinen ijolona baki’ Yusup, “Adu, kenang lalo. Sampai ajau’ka’ lo’a i Yusupjo dinen. Na’anka’ mangamase’i lo’a arika’. Ikita bua iki’ susana. Sampai mamita-mita lo’ka’ suro’ lapasang kalena, na’anki’ paduli. Dinen lalo manyuro’ dadua’ susaka’ di’en,” ingka kenang sijarumanna arasairunna ijolona baki’ Yusup.

22Jaji barik manjarum baki’ Ruben, “Ialalo dinen alibakkin manaantalinga jarumku’. Ambakinto’ badosa lo’a nangkanak di’en, uka’a memen lo’in. Alibakkin paduli. Awandi’en barik to’ dabalaski’ kole’a Alatala. Dasuro’ki’ tanggung jawab lo’a dara’ matena arika’,” ingka kenang jaruma baki’ Ruben. 23Daasanang baki’ Yusup dinen na’an manamu jarumda’. Kole’a silaanna jarumda’ nanna tau Mesiren. Sijarumanda’ nanna wakel rajaan de’i, samuana malaloi tau pasidua’ang jarum.

24Jaji dadalinga jarumda’ awan dinen kole’a baki’ Yusup, daiapi koengang kalena anangis. Mamin dinen koengang bapi kalena lo’da’. Dala barik dinen baki’ Simeon laloang daingkat tanganna di aroda’.

25Mamin dinen manjarum barik baki’ Yusup dinen lo’a suro’anna. Dasuro’ isi’i gunida’ nanna baras gandomen. Duitda’ dinen dasuro’ pole’ lo’da’. Daapis ilalam gunida’ sera-serada’. Dasuro’ manawa’i lo’da’ jalu kaan itiang palamba’anda’. Mamin akaus dalola’ani dinen kole’a suro’anna, 26ira dinen laloang mauwatang gunida’ lo’a ambata kaledaien. Laloang tarangkat lamba’.

27Jaji lamba’ dinen barik, malam asoon, sengka’ to’ samalam. Jaji andian sera mamae’en gunina, to’ pangkaan kaledaina. Dabele inang andian duita. 28Jaji manjarum lo’a sairunna, “Adu dapole’ pan duitku’. Belejo inang di baba’ guniku’,” ingka kenang. Jaji kalanggangan barik nyawada’. Saja kikirik sijarumanna inangen, “Ai dapadariin di’ kole’a Alatala lo’ka’?” ingka kenang sijarumanda’.

29Jaji lamba’ mole’ lo’a amana, lo’a baki’ Yakub di Kana’an. Mondok inang datutul barik kausana. 30“Mondokkam lo’a Mesir, ama’e, andian wakela rajaan bakaras jaji manjaruma lo’am. Daasankam tau panojam. 31Isauti barik ikam, Okankam tau panojam. Tau ate maamenkam. 32Dua belas ambatam pariin. Sarilao’ amanam. Yang sera mamin talalo. Yang imundiin arantang inang di Kana’an nanna amanam, ikam kenang lo’a.

33Rabarik manjarum bapi tau dinen lo’am, Daiak di’en mangilalaiak lo’in mainto’ kutamuna atenin, baloloka nanna na’anna. Sairunnin sera arung arantang nanku’. Gandom awa ikin mole’ lo’a suang saonin yang araparen. 34Poangsi arinin yang imundiin dinen arung iawa lo’a di’en mainto’ kutamuna atenin baloloka, okankin tau panojam. Ti’ mamin kenang sairunnin kupalapas barik lo’in. Daikin barik pande mainjawe balanja indi’angen, ingka kenang jaruma lo’am,” ingka kenang tutulanda’ lo’a amana.

35Maminna akaus tutulanda’ lo’a amana, laloang dabae’ gunida’. Dabae’ barik, dapoangi, dabele inang andian duitda’ sera-serana di gunina. Jaji dabele awan dinen ira dinen nanna amana, palin atakut ira. 36Laloang manjarum amana, “Akaus ateku’ kole’in. Akaus inyap araanakku’. I Yusup mamin talalo inyap. I Simeon inyap. Awandi’en barik to’ iawa bapi lagi’ i Benyamin lo’a Mesir. Iak barik marinsa’en,” ingka kenang jaruma baki’ Yakub lo’a araanaka.

37Maminna dinen manjarum bapi baki’ Ruben, “Na’an. Iak tanggung jawapen. Ti’en Benyamin na’an kuawa mole’ lo’a di’en, anakku’ duaan yang babakaan, pande iduno’ iko. Suro’ang poang ariku’ lo’a tanganku’. Pasti kuawa mole’,” ingka kenang baki’ Ruben lo’a amana.

38“Ti’en adi’ na’an. Kupase’ang. Maminjo mate kakana dinen. Ona’ ti’ mamin iawa ikin adi’, andian jalu manu di tanga’ dalanen manyuro’ mate, manyuro’ mate bea lo’ku’ di atoaku’. Mate manyari lo’a anakku’,” ingka kenang jaruma amana lo’da’.

Currently Selected:

Di Mulakata 42: EBE

Highlight

Copy

Compare