Di Mulakata 41

Mamui raja Mesir

1Jaji barik duang taun maminna dinen, mamui raja Mesir. Dalam muina, raja dinen akadeng di biring sunge Nil. 2Jaji andian sapi tuju minsaluanen dari sunge Nil angkaan rimput inang di biring sungeen. Babago’ dinen sapi tujuun, bangas. 3Jaji andian bapi sapi tuju minsaluanen di sungeen akadeng dinen di biringa sapi babago’en dinen. Saja atolang. Ariu’ dinen sapiin. 4Jaji maminna dinen, akaus dakaan dinen sapi yang babago’en kole’a sapi yang atolangen dinen. Kenang ilalam muina rajaan. Jaji asading barik rajaan, datamu andianna muina.

5Maminna dinen tindo’ bapi. Mamui bapi. Ilalam muina andian sera akat gandom, tuju dinen tangkena. Palin baraa tunduna. Barisi’ dinen tangkena gandomen. 6Jaji ilalam muina dinen andian bapi tangkena tio’ inang, tuju bapi. Poangsi akeke’ dinen. Akalas. Kosan isi’a. Ajau’ kole’a angin aduruken yang marusuun dinen. 7Jaji dalam dabelena dinen muina, akaus dakaan barik tangkena gandom yang baraa’en tunduna kole’a gandom yang akalasen dinen. Maminna dinen asading bapi rajaan, datamu barik muina.

8Jaji barik di makapen, kalanggangan rajaan lo’a muina dinen. Dakalong tau andianen ilmuna, andianen panamuna. Jaji datutul barik. Dasuro’ manyari ratina muina dinen. Kosan tau sera manamuun ratina muina.

9Jaji barik manjarum dinen tau paurus jalu idinyumen kole’a rajaan, “Daiak andian kasala’anku’. Baru’ak di’en parandam kasala’anku’ dinen,” ingka kenang. 10“Daikamjo iapiskam ilalam sao ukumanen, ikam nanna paurus rotiin. Arasiko lo’am. Iapiskam di sao ukumanen saona kapala’ panyagaien. 11Jaji mamuikam duaan nanna paurus rotiin, silaan ratina muinam duaan. 12Jaji andian tau dataanen inang, tau Ibraniin. Anak bakas, suro’anna kapala’ panyagaien. Jaji itutul ikam lo’a sera-seranam, Kenang-kenang ratina, ingka kenang, 13sabangon jaji darina nanna jaruma,” ingka kenang. “Daiak di’en ipole’ iko lo’a tugasku’. Poangsi kawanku’ igantung di akat kayuun,” ingka kenang tutulanna paurus danumen lo’a rajaan.

14Jaji barik Raja Mesir dinen manyuro’ painsaluan lo’a dinen baki’ Yusup. Dapakaruru daawana lo’a rajaan. Maminna manyising diri’a i Yusup dinen, maminna manyalini kainna laloang maroi lo’a rajaan rabarik.

15Jaji manjarum barik rajaan, “Jaji kenang, daiak pamalamen de’i mamuiak. Jaji kosan tau serapi manamuun ratina muiku’. Poangsi andian kudalinga jarum tau, daiko ti’ tau manutul muina, itamu iko marati,” ingka kenang rajaan lo’a baki’ Yusup.

16Jaji barik dinen dasauti kole’a baki’ Yusup, “Jaji kenang, okan iak yang manamuun, Alatala yang manamuun. Ia yang manjarumangen lo’u ratina yang tapaten,” ingka kenang baki’ Yusup lo’a rajaan.

17Jaji barik raja dinen manutul dinen muina lo’a baki’ Yusup, “Jaji kenang. Muiku’ dinen, akadengak di biring sunge Nil. 18Jaji maitaak sapi tuju minsaluanen dari sunge Nil, angkaan rimput inang di biring sungeen. Sapi babago’en. Maam tapat. Bangas. 19Jaji kubeleang bapi mataku’, andian bapi sapi tujuun yang atolangen, yang saja ariu’en, minsaluan bapi di sunge Nil. Kosan sapi yang sabalu’en nanna di negeri Mesir di’en dalam kubelena. 20Jaji akaus dakaan sapi yang mulakataan dinen kole’a sapi atolangen. 21Kapi poang dakaan sapi yang babago’en, daiapi masi atolang bua. Kosan jaji bukti maminna dakaanna de’i dalam kubelena. Maminna dinen asadingak.”

22Jaji manjarum bapi Raja Mesiren, “Jaji mamuiak bapi. Andianak maita sera akat gandom, tuju dinen tangkena. Dalam tujuun dinen barisi’. Baraa tunduna, maam dinen tio’a. 23Andian bapi kukita dinen tio’en inang tuju bapi dinen tangkena yang kosanen isi’a. Akeke’. Akalas kole’a angin aduruken. 24Jaji barik dinen akaus dakaan tangkena gandom yang baraa’en tunduna kole’a yang akeke’en dinen. Jaji kututul iak muiku’ lo’a ambata tau andianen panamuna, kosan tau manamuun. Serapi kosan tau pande manjarumang lo’ku’ ratina muiku’,” ingka kenang rajaan lo’a baki’ Yusup.

25Jaji barik maminna datutul muina rajaan, baki’ Yusuppi dinen manyauti, “Dinen ratina, kole’a andianna jalu to’ daanuun kole’a Alatala. Ialalo dajarumanga memen kole’a Alatala,” ingka kenang. “Muinu duaan dinen sama ratina. 26Yang sapi tuju maamen, ratina tuju taun. Kenang bea dinen tuju tangkena gandom yang maamen, tuju taun bea. Sama ratina muinu duaan. 27Yang tuju sapi atolangen yang mondoken imundiin, dinen ratina tuju taun bea. Kenang bea gandom tuju tangkena yang akeke’en, yang akalasen kole’a anginen, tuju taun bea. Ratina tuju taun araparen.

28“Awan lalo de’i jarumku’ lo’u Raja’e. Dinen dajarumang memen lo’u Raja’e kole’a Alatala mainto’ itamuna iko. 29Jaji ratina dinen tuju taun to’ mondoken di’en ona’, bayu’ jaji asela gulungan karaja tauen sasara negeri Mesir di’en. 30-31Jaji tuju taun malola’en, dinen tuju taun karaparanen. Sampai to’ dalilu’ dinen tuju taun baraselen lasana karaparanen tuju taun imundiin. Arusak ona’ negeri di’en kole’a karaparanen. 32Jaji jalu dinen sampai duang kalina mamuinu, jalu tetap adari kole’a mamin kaputusanna Alatala. Na’an lagi’ balaun ona’ adarina kole’a Alatala,” ingka kenang jaruma baki’ Yusup lo’a raja Mesir.

33Jaji manjarum bapi baki’ Yusup lo’a raja Mesir, “Jaji kenang Raja’e. Yang maamen isari tau datamuun pasitimbangang jalu ajau’ nanna jalu maamen, yang datamuun bapikir. Tau dinen iangkat itiang maurus asel uma tauen di seluru Mesir. 34Mamin dinen isari bapi tau panagiin ambata asel tanamanen di uman. Itagi lo’a tauen dua pulo’ paresen launna tuju taun baraselen dinen. 35Jaji samuana asela dinen ikapulungang. Itaro’ di pamoranen maira tatak banuaan atas asanna rajaan. Laloang ijagai. 36Jalu ikapulungangen dinen pande itiang manyagai taun arapar yang tuju taunen dinen. Ona’ ti’ mamin tana’ Mesir di’en mondok karaparanen, jalu dinen ona’ paangkaan. Mainto’ tauen na’an bayu’ matena dalam negeri Mesir di’en,” ingka kenang baki’ Yusup lo’a Raja Mesir.

Baki’ Yusup dapadari wakel rajaan di negeri Mesir

37Jaji raja Mesiren nanna ambata anak buana, satuju kausa nanna panamuna baki’ Yusup. 38Jaji manjarum rajaan lo’a ambata suro’anna, “Kalo’ku’ kosan bokan sabalu’en nanna tau di’en, yang dalalako’iin kole’a Sumangata Alatala,” ingka kenang rajaan lo’a suro’anna.

39Jaji manjarum dinen rajaan lo’a baki’ Yusup, “Jaji kenang, mamin jelas kosan bokanen yang manamuun pasitimbangang jalu ajau’en nanna jalu maamen. Kole’a mamin ratina muiku’ dabae’ang lo’u kole’a Alatala. 40Jaji iko poang kuangkatangen maurus samuana. Kosan barik tau baraa’en lo’u. Suma iak poang baraa’en lo’u awan rajaan. Ambata gulungan rayatku’ arung paduli kausa. Malola’ani kausa parintanu,” ingka kenang dinen jaruma raja Mesiren lo’a baki’ Yusup.

41Jaji manjarum rajaan, “Ialalo di’en kuangkatangu itiang maurusi seluru negeri Mesir,” ingka kenang. 42Laloang sunsum capen daleka’ dari tangan diri’a. Daapis di tanganna baki’ Yusup. Laloang dameang bea kain lenanen, kain alusen itiang kainna baki’ Yusup kole’a raja Mesiren. Dameang bea dinen manik amasen. 43Jaji baki’ Yusup dasuro’ mauwati dinen kandara’anna yang nomor duaan, kandara’anna wakela. Jaji ti’ daawa lamba’ barik dinen baki’ Yusup, tauen dinen daparinta ijolona mangamasaang. Apa bila sidua’ dinen nanna baki’ Yusup, arung manyorong hormat lo’a baki’ Yusup, manurut parintana Raja Mesiren. Ialalo dinen barik ia yang mamarintaan seluru tana’ Mesir.

44Jaji manjarum bapi rajaan lo’a baki’ Yusup, “Iak di’en tetap rajaan. Poangsi ti’ na’an iparuarang iko, samuana tauen kosan barani kakaji’,” ingka kenang. 45Jaji barik baki’ Yusup dinen dameang asan, i Sapnat-Paanea#41:45 Ratina sapnat-paanea dalam jarum Mesir, Alatala manjarum, Alatala tio’. asanna. Dameang bea bainyena, i Asnat anaka i Potipera tau imamen di banua On. Jaji barik baki’ Yusuppi dinen lamba’ mamele ka’ada’an seluru Mesir.

46Jaji baki’ Yusup nanga maroina lo’a Raja Mesir dinen, mamin tiga pulo’ taun umura. Jaji barik baki’ Yusup dinen minsaluan dari saona raja Mesir dinen lamba’ kuliling di negeri Mesir. 47Launna tuju taun baraselen dinen bayu’ lapoang asel uma tauen.

48Jaji launna tuju taunen dinen dakapulungang lapoang asela kole’a baki’ Yusup. Daapis di pamoranen, di gudangen maira tatak banuaan. Asel uma kulilinga banuaan, inang di banua dinen taro’a. Daitung lapoang asel dataro’en. 49Laloang tadang barik baki’ Yusup maitunga. Bayu’ tapat asela tuju taunen dinen yang dakapulungangen kole’a baki’ Yusup. Awan lalo kasiken di biring jawaan bayu’a. Na’an dapat lagi’ dakira lasana bayu’a.

50Jaji barik maminna dinen, nampina mondok karaparanen dinen, andian baki’ Yusup mandua’ang anak nanna piang Asnat dinen, anaka i Potipera imam di banua On. Anaka dinen babaka duana. 51Anaka yang atoaan dinen dameang asan kole’a baki’ Yusup, i Manase asanna.#41:51 Unyina jarum manase dinen mainso’ nanna unyina jarum lilu’. Kole’a andian jaruma baki’ Yusup, “Alatala manyuro’ kulilu’ gulungan parinsa’ku’, manyuro’ kulilu’ suang saona ama’ku’,” ingka kenang. 52Maminna dinen anak yang kaduaan, daasan i Epraim.#41:52 Jarum epraim mainso’ unyina nanna jarum barasel. Kole’a andian bapi jaruma baki’ Yusup, “Alatala manyuro’ lo’ku’ barasel di banua kosan parinsa’ku’,” ingka kenang.

53Jaji barik maminna dinen, akaus tuju taun baraselen dinen di negeri Mesir. 54Jaji mondok barik karaparanen awan jaji jaruma baki’ Yusupjo dinen. Andian karaparanen maira negeriin. Poangsi inang di Mesir andian kausana jalu kaanen.

55Jaji mulai barik tau Mesiren marasa karaparanen, mulai tauen dinen mamita jalu kaan lo’a rajaan, mamita baras gandomen. Jaji manjarum rajaan, “Manjarumkin poang lo’a i Yusup. Inangkin mamitaan. Ai poang kalo’a, dinen poang ilola’aniin ikin,” ingka kenang raja Mesiren lo’a ambata rayata.

56Maminna barik arapar tauen kausa di Mesir, baki’ Yusuppi dinen mulai mamae’ ambata durungen, ambata pamoranen. Dapet barik lo’a gulungan rayata. Kole’a arapar jaji tauen maira tatak banuaan. 57Kenang bea tauen seluru duniaan, lamba’ kausa manyari jalu kaan lo’a Mesir. Mamali baras gandom lo’a baki’ Yusup kole’a karaparanen okan poang di Mesir. Arapar kausa duniaan nanga dinen.

Currently Selected:

Di Mulakata 41: EBE

Highlight

Copy

Compare