Di Mulakata 40
40
Baki’ Yusup datamu ratina mui
1Jaji maminna dinen andian tau babakaan dua yang manyorongiin rajaan. Yang tau urusan jalu dainyumen kole’a rajaan nanna tau urusan mamola rotina. Jaji barik ira dinen duaan andian kasala’anna lo’a rajada’ dinen. 2Ajau’ barik nyawana rajaan. Arasi lo’a ira duaan dinen. 3Laloang dataan inang di saona kapala’ panyagaien, inang jaji di sao ukumanen kosanna baki’ Yusup. 4Jaji baki’ Yusupla datugasen kole’a kapala’ panyagaien itiang maurusi lo’da’. Laloang ia yang manuntuaniin lo’da’.
Balaun barik inang, 5ira tau paurus danum nanna paurus rotiin, mamui dua-duana. Sarata mamuina ira duaan di malam seraan, poangsi silaan muina. Silaan bea ratina.
6Jaji imbara asoon dalamba’i kole’a baki’ Yusup, dabele susa ira duaan. 7Jaji dakatoani, “Maisi susana lindo’in di aso di’en?” ingka kenang baki’ Yusup lo’da’ duaan anak buana rajaan yang sama dataanen di saona paraampuanna dinen.
8Jaji dasauti barik kole’da’ duaan, “Asi na’annam kenang? Pamalamen mamuikam. Poangsi kosan tau indi’angen itiang marati muinam lo’am,” ingka kenang jarumda’ ira paurus danumen nanna paurus rotiin.
Jaji manjarum baki’ Yusup, “Yang marati muiin, tentu Alatala maratien,” ingka kenang. “Jarumangjo muinin lo’ku’,” ingka kenang baki’ Yusup lo’da’ duaan.
9Jaji barik manjarum dinen paurus danumen, “Jaji muiku’ kenang,” ingka kenang jaruma lo’a baki’ Yusup. “Andian ijolona aroku’ bararan anggur, 10talu dinen daanna. Jaji mondok dinen timbukasa laloang aradangar. Mamin aradangar dinen laloang dari, laloang sasak,” ingka kenang jaruma paurus danumen. 11“Laloang andian bea dinen sawanna rajaan di tanganku’. Laloang kupara’ dinen bua’ angguren,” ingka kenang. “Laloang kuantat sawanen lo’a rajaan nanna danum angguren dinen,” ingka kenang manjaruma.
12Jaji manjarum barik baki’ Yusup, “Ratina muinu dinen, daan yang taluun, ratina talung aso. 13Antarana talung aso, daikopi to’ iangkatko, to’ mole’ko bua lo’a tugasu. Jaji sawanen dinen iantat bua iko, idunjukang danum angguren lo’a rajaan awan joloon,” ingka kenang.
14“Poangsi daiko,” ingka, “ti’ mamin maam, ti’ko mamin mole’ lo’a tugasu, ada’ ililu’ku’. Parandamak bua. Ti’ko mainya’ maam lo’ku’ arung itutul urusanku’ mainto’ dalapasangku’. 15Kole’a kosan kajau’anku’. Tarangkatku’pi di banua Ibraniin, ikalitak. Mondokku’pi indi’angen kosan kajau’anku’ yang pandeku’ imasokangen ilalam sao ukumanen,” ingka kenang baki’ Yusup dinen lo’a paurus danumen.
16Jaji barik maminna dadalinga dinen ratina mui seraan maam ratina kole’a baki’ Yusup, manutul bapi paurus rotiin, “Jaji daiak andian bea muiku’,” ingka kenang. “Babakulen talu kuawa di tompok uluku’. Idisi’i taluna nanna rotiin. 17Yang iboen dinen bayu’ baranana rotiin. Bayu’ baranana koeen itiang lo’a rajaan. Poangsi mondok gulungan burungen, dakaan roti di babakul iboen dinen,” ingka kenang.
18Jaji barik dasauti kole’a baki’ Yusup, “Jaji kenang. Babakul taluun dinen, ratina talung aso. 19Dalam talung aso daikopi dinen to’ daangkatang. Karampang ulunu to’ datataki. Daangkatang mantuarinu dagantung di akat kayuun. To’ akaus datotoki, akaus dakaan gulungan burungen,” ingka kenang dinen jaruma baki’ Yusup lo’a paurus rotiin.
20Jaji barik dalam aso taluun dinen, raja Mesiren dinen mangampitang tau maramiang hari ulang taunnaan. Tamba kausana ambata anak buana inang. Jaji barik dinen paurus duaan dapainsaluan, daawa lo’a pestaan. 21Paurus danumen dinen dapole’ bua lo’a tugasa dinen. Jaji ia bapi mantaten danum angguren lo’a rajaan. 22Yang paurus rotiin dagantung lalo awan dinen jaruma baki’ Yusup maratiin muina.
23Awan paurus danumen dinen awan pasanna baki’ Yusup dinen, dalilu’ poang kenang. Na’an lagi’ daparandam. Dalilu’ mate jaji.
Currently Selected:
Di Mulakata 40: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
