Di Mulakata 39

Baki’ Yusup to’ daawa sitindo’an kole’a bainyena i Potipar

1Jaji baki’ Yusup dinen mamin daawa lo’a negeri Mesir. Dapet inang kole’a tau Ismaelen lo’a i Potipar. I Potipar dinen anak buana raja Mesir. Ia mauluangen lo’a ambata tau manyagaien lo’a rajaan.

2Jaji barik baki’ Yusup dinen lalako’ di saona paraampuanna dinen i Potipar. Jaji dagulungi kole’a Paraampuan Yahuwe manyuro’ barasel kausa karajana. 3Dabele barik baki’ Yusup dinen dagulungi kole’a Paraampuan Yahuwe sampai maam mole’a kausana karajana, 4inang maam nyawana mamelena i Potipar lo’a baki’ Yusup. Jaji daangkatang barik padari suro’an yang palin daarapen. Dasuro’ tuntuani saona nanna gulungan ambata tau maama dinen. Samuana dasuro’ang lo’a tanganna baki’ Yusup. 5Maminna barik daangkatang lo’a tugas dinen, dapamaam jaji dinen i Potipar kole’a Paraampuan Yahuwe. Dapamaam katagal baki’ Yusup dinen. Maam jalu di saoen, maam di umaan, dapamaam kausana rabarik. 6Maminna dinen barik awan i Potipar dinen, na’an lagi’ mau tau lo’a urusan dinen. Soal jalu kaanna poang yang daurusiin.

Jaji baki’ Yusup dinen baka maam. Maam batora. Mantuarinapi sakalao’an kausana. 7Jaji insa’-insa’ launna barik bakarajana inang, bainyena i Potipar dinen baingin lo’a baki’ Yusup. Jaji manjarum lo’a baki’ Yusup, “Se’ sitindo’anki’,” ingka kenang.

8Poangsi baki’ Yusup alibak, “Jaji kenang,” ingka, “na’anak bisa. Kole’a maminak di’en daparasaya’i. Ti’en iak maurusiin, paraampuanku’ na’an lagi’ mau tau lo’a urusan saona. Samuana kakaya’anna dasera kausana lo’ku’. 9Suma iak yang palin baraa’en kuasaku’ di sao di’en. Kosan baraa’en lo’ku’. Kenang bapi kosan jalu dapase’angen lo’ku’. Dasera kausana lo’ku’. Suma iko poang na’anen dasera lo’ku’, dapase’angen. Kole’a iko lalo yang bainyenaan. Ai lo’a bisaku’ mamola kajau’an balu’a awan dinen? Na’anak pande mamola dosa dinen di arona Alatala,” ingka kenang jaruma baki’ Yusup lo’a bainyena i Potipar.

10Jaji na’an dapaduli jaruma dinen kole’a bainyena i Potipar. Mairaso-mairaso lapoang dinen malilika mawa sitindo’an lo’a baki’ Yusup. Poangsi baki’ Yusup alibak manaantalinga lo’a. Alibak sitindo’an nanna. Alibak mainso’i.

11Jaji mondok asona barik baki’ Yusup intamana lo’a saoen, to’ bakaraja awan kirasoon. Kosan suro’an bokanen ilalam saoen inang. 12Jaji intama inang, dapanangko’ sapena baki’ Yusup dinen, “Se’ sitindo’anki’,” ingka kenang. Baki’ Yusup dinen alibak. Laloang poang daleka’ sapena dinen arari insaluanna saoen. Darantang poang sapena di tanganna babainye dinen.

13Bainyena i Potipar dinenpi barik, dabele arari dinen baki’ Yusup, sapena darantang poang di tanganna, 14daiapi laloang mangalong gulungan suro’anna. “Na, belejo,” ingka, “tau Ibraniin mamolana lo’ku’. Daawa lo’a sao di’en itiang mala paradai’an lo’ka’. To’ mainso’i de’i lo’ku’. To’ mawa sitindo’an. Poangsi daiak alibakak. Ialalo mamukoku’, baraa unyiku’. 15Dadalinga barik mamukoku’, daia arari minsaluan. Sapena darantang indi’ang di biringku’,” ingka kenang jaruma dinen bainyena i Potipar mangaduna.

16Jaji barik sapena baki’ Yusup dinen dataro’ ibiringa dinen sampai marung mole’a paraampuanna baki’ Yusup dinen. 17Jaji mole’ barik i Potipar, dinla datutulen lo’a lakina. “Pangkamu tau Ibraniin yang iawaan iko lo’a sao di’en, to’ mala paradai’an lo’ku’. 18Sampaiak mamuko. Barik dadalinga mamukoku’, sape di’ darantang ibiringku’, darantang rari insaluanna saoen,” ingka kenang jaruma lo’a lakina maduanga dinen lo’a baki’ Yusup.

19Jaji dadalinga barik kole’a i Potipar dinen, iapi arasi. 20Laloang datingkam dinen baki’ Yusup. Damasokang di sao ukumanen, di sao tahannaan rajaan.

Ilalam sao ukumanenpi dinen 21dagulungi bapi kole’a Paraampuan Yahuwe. Dapayoang kamaamanna atena lo’a baki’ Yusup sampai dasuro’ maam nyawana kapala’ sao ukumanen mamelena lo’a baki’ Yusup. 22Samuana urusanna dasera kausa lo’a baki’ Yusup. Samuana ambata tau dataanen inang, baki’ Yusup maurusiin. 23Kapala’ sao ukumanen dinen na’an mau tau lagi’ lo’a urusan dinen. Kole’a baki’ Yusup dinen dagulungi kole’a Paraampuan Yahuwe manyuro’ barasel kausa karajana.

Currently Selected:

Di Mulakata 39: EBE

Highlight

Copy

Compare