Di Mulakata 38

Baki’ Yehuda mamola kajau’an

1Jaji barik baki’ Yehuda nanga dinen rantang kalena lo’a arasairunna, to’ lalako’ nanna i Hira. I Hira dinen urang Adulam. 2Jaji barik nanga lalako’a inang sidua’ nanna babainye anak urang Kana’an. I Sua asanna urang Kana’an dinen. Jaji barik siala nanna anaka i Sua dinen. Maminna barik siala, 3araunting bainyena, andian dinen anaka babakaan. I Er asanna. 4Maminna dinen araunting bapi, andian bapi anaka babakaan. I Onan asanna. 5Maminna dinen andian anaka bapi, i Sela asanna. Babaka bapi. Paranakanga i Sela dinen di Kesib.

6Jaji barik baki’ Yehuda dinen manyariang bainyena anaka yang atoaan, lo’a baki’ Er dinen. Yang daalaan dinen i Tamar asanna. 7Poangsi baki’ Er dinen anaka baki’ Yehuda, ajau’ basana di arona Alatala. Jaji dapoloi tio’a kole’a Alatala, dauno’.

8Jaji mate barik anaka, yang baki’ Eren dinen, manjarum baki’ Yehuda lo’a baki’ Onan, “Lamba’ijo bainye baluna tumate i Er, malola’ani adatka’. Arungko sitindo’an nanna itiang patio’ purina kaka’,” ingka kenang jaruma baki’ Yehuda lo’a baki’ Onan. 9Poangsi baki’ Onan dinen ti’ sitindo’an nanna piang Tamar, anggar dinen to’ mondok napsuna, dakapi’ang dinen insaluan. Dalao’ lo’a tana’en. Kole’a datamuna ti’ patio’ anak, dinen okan purina, purina kakana. Jaji alibak. 10Jaji ajau’ kalakuanna dinen di arona Alatala. Jaji dapoloi bapi tio’a baki’ Onan dinen kole’a Alatala.

11Maminna dinen manjarum baki’ Yehuda lo’a piang Tamar, “Biar bainye balunu dinen lalako’ko di saona ama’ka’. Tio’ lapoang awan bainye baluun inang marung baraana i Sela di’en,” ingka kenang manjaruma baki’ Yehuda. Kole’a bapikir baki’ Yehudaan, “Jangan-jangan anakku’ mate bapi awan arakakana,” ingka kenang dinen dalam nyawana. Jaji piang Tamar dinen mole’ lo’a saona amana.

12Jaji balaun barik, mate dinen bainyena baki’ Yehuda, anaka i Sua. Maminna dinen akaus baluna, daia dinen lamba’ lo’a tau manggunting bulu dombana di Timna. Andian bea kawanna tambaan, i Hira urang Adulam dinen.

13Jaji barik dinen piang Tamar datamu dongona matoana manggunting bulu dombaan di Timna. 14Jaji barik datamuna dinen, daiapi maleka’ kain bainye baluna. Dasalini. Laloang dala kain salendangen. Dabongang di uluna datiang pamumbuni lindo’a. Jaji aduduk dinen di biring dalanen lo’aan Timna dinen di mambangan pakar tagapa banua Enaim. Daia kenanga, kole’a dabele baki’ Sela dinen mamin baraa poangsi daia na’an dala itiang bainyena.

15Jaji lalo barik matoana inang, dakita dinen babainyeen inang yang piang Tamaren. Daasanang dinen pandayangen kole’a damumbunina dinen lindo’a. 16Na’an daasanang dinen inantuna. Laloang dinen dainso’i babainye dinen. “To’ lo’uak, mainso’iak lo’u,” ingka kenang manjaruma.

Jaji barik dasauti dinen kole’a piang Tamaren, “Ai tiang pamayaru, mainso’inu lo’ku’?” ingka kenang.

17“Ona’. Andian anak kambingku’ di bangkulungan inatangku’, bisa kukirim,” ingka kenang baki’ Yehuda.

“Ti’ kenang,” ingka piang Tamar, “arungko mameang tanggungan sampai dinen ikirim iko anak kambingu,” ingka kenang.

18“Ai tanggung jawapku’?” ingka kenang.

“Itiang tanggung jawapen iko, capu nanna tali manika, sarata tungkatu,” ingka kenang jaruma piang Tamar. Laloang daleka’ manik capen, daunjukang lo’a piang Tamar nanna tungkata. Laloang sitindo’an ira. Laloang araunting piang Tamar. 19Piang Tamarpi dinen laloang mole’ barik. Daleka’ kain selendangen. Dasalini kainna mamakai kain bainye baluna barik.

20Jaji barik baki’ Yehudaan dinen paawaang pakirima dinen yang anak kambingen lo’a babainye pandayangen dinen. Dasuro’ awa lo’a kawanna yang urang Adulamen. Laloang to’ mala mole’ tanggunganna dinen. Jaji lamba’ kawanna, kosan barik babainye dinen. 21Sampai dakatoanang lo’a tauen, “Disasi dinen pandayangen yang biasaan aduduk ibiring dalanen indi’ang?” ingka kenang.

“Bo! Kosankam maita pandayangen aduduken indi’ang,” ingka kenang tauen.

22Jaji mole’ balik kawanna lo’a baki’ Yehudaan, “Kosan babainye dinen kudua’ang. Panduduk inangpi kosan tau manamu babainye pandayangen inang,” ingka kenang kawanna lo’a baki’ Yehuda.

23aji manjarum baki’ Yehuda, “Koronga. Inang la’a jaluku’. Ona’ datatawai tauki’. Okan na’an kupaawai, na’an poang idua’ang iko,” ingka kenang baki’ Yehuda lo’a kawanna.

24Kira-kira tiga bulan maminna dinen tadongo barik, “I Tamar inantunu dinen araunting. Pola kalena pandayang,” ingka kenang dongona.

“Ti’ araunting, awa lo’a di’en. Arung dinen idukum itutungi,” ingka kenang jaruma baki’ Yehudaan.

25Jaji dapainsaluanna dinen piang Tamar, daia paawaang jarum barik lo’a matoana, “Yang mainso’iin lo’ku’ manyuro’ araunting, ia yang tau ampunaan jalu di’en. Di’en tanggung jawapa, cap nanna manika sarata tungkata. Suba pariksa ti’ intain ampunaan,” ingka kenang.

26Jaji dabele kole’a baki’ Yehuda, dakilala tanggunganna. “Daia yang mandua’en. Sala’ak di’en kole’a na’an kupasialaang nanna i Sela. Na’anak balolok lo’a,” ingka kenang jaruma baki’ Yehuda. Na’an lagi’ sitindo’an maminna dinen.

27-28Jaji barik piang Tamar dinen mondok lo’a bulanna, to’ aranak. Jaji aranak barik, mondok tanganna anak yang seraan, kole’a anaka dinen duang kampit. Dajarati dinen tanganna kole’a tau maniangiin dinen nanna banang dadara’en. “Di’en tajolo daparanakangen,” ingka kenang. 29Maminna dinen bibitak. Laloang mondok yang seraan, kampita dinen. Jaji manjarum bapi tau maniangiin, “Kajungusi juluanga kalenu tajolo,” ingka kenang lo’a nangkanaken. Jaji dameang asan nangkanak dinen, i Peres.#38:29 Ratina peres ilalam jarum Ibraniin, juluang. 30Jaji mondok barik dinen sera yang imundiin, anu andianen jarat tanganna, dameang asan barik dinen i Serah.#38:30 Ratina serah ilalam jarum Ibraniin antara dua. Pande dadara’, pande bea arawang.

Currently Selected:

Di Mulakata 38: EBE

Highlight

Copy

Compare