Di Mulakata 37

Baki’ Yusup andian muina

1Jaji baki’ Yakub dinen lalako’ di negeri Kana’an yang dakosaniin kole’a amana, yang lalako’ajo awan tau asingen, awan lapoang tau mondoken. 2Jaji tutulanna kenang.

Jaji barik anaka baki’ Yakub dinen, i Yusup mamin tuju belas taun umura, anak bakas. Daia bakaraja manuntuani dombana amana nanna ambata kakana dinen, anaka piang Bilha nanna piang Silpa. Jaji mole’ karajana dinen, dajarumang lo’a amana kajau’anna arakakana.

3Jaji baki’ Yusup dinen dakasaang tapat kole’a amana, labi lo’a arasairunna bokanen kole’a dinen i Yusup tamasok anaka yang imundiin, anaka di toana. Jaji baki’ Yusup dinen dapolaang sape kole’a amana, sape yang palin maamen. 4Dabele dinen palin maam kole’a arakakana, datamu barik mangasaanga amana labi mangasaanga lo’a baki’ Yusup dari pada ira bokanen. Inang rabarik timbula arasina gulungan arasairunna. Alibak dampe dinen ira manjarum lo’a arina nanna maamen.

5Jaji barik waktu malamen, tindo’ dinen baki’ Yusup, mamui. Jaji barik datutul dinen muina lo’a arasairunna yang bokanen dinen. Maminna barik dadalinga tutulan muina dinen, insang kaya ira mangalibakanga lo’a baki’ Yusup. 6Muina datutulen dinen kenang, “Jaji andian muiku’. Taantalinganinjo, kututul lo’in,” ingka kenang. 7“Daiki’ samaki’ mamin manyapa’ akat gandomka’, matam. Jaji gandom maminen isapa’, ijarat. Jaji jaratan gandomku’ dinen laloang akadeng inang. Kadengang kalena. Laloang jaratan gandomin dinen mondok mangulilingi daiaken. Laloang tunduk kausa. Tadong tuntunga lo’a jaratanna gandomku’,” ingka kenang datutula muina lo’a arakakana.

8Jaji barik manjarum arakakana lo’a, “Asi daiko, to’ dari rajako? To’ mangkamko lo’am dalam pikirannu?” ingka kenang. Jaji barik arakakana dinen insang kaya ajau’a nyawana kole’a muina dinen baki’ Yusup, kole’a jaruma dinen.

9Maminna dinen andian bapi muina. Datutul bapi lo’a arakakana, “Jaji andian bapi muiku’. Taantalinganinjo, kututul bapi lo’in,” ingka. “Jaji kubele dinen dalam muiku’ matasoon, bulanen, bintang yang sabelasen mondok manyemba kausa lo’ku’,” ingka kenang dinen jaruma baki’ Yusup lo’a arakakana. 10Datutul bea lo’a amana.

Jaji barik alibak manaantalinga yang amanaan lo’a jaruma dinen. Dajarumi anaka, “Ai ratina muinu dinen? Ai daikam di’en nanna indu’ nanna arasairunnu to’ manyembakam lo’u, isunsumang lindo’am lo’a tana’en?” ingka kenang jaruma amana. 11Ialalo dinen kapiayona arakakana baki’ Yusup. Poangsi awan amana dinen, muina anaka dinen dataro’ lapoang ilalam batak nyawana. Dapikirang lapoang ratina.

Baki’ Yusup dapet kole’a arakakana

12Jaji arakakana baki’ Yusup dinen manuntuani bangkulungan domba manyari rimput di banua Sikem. 13Jaji manjarum baki’ Yakub lo’a baki’ Yusup, “Arakaka’ itamu manuntuani bangkulungan domba di banua Sikem,” ingka kenang. “Daiko to’ kusuro’ko lo’da’,” ingka kenang jaruma baki’ Yakub.

“O’. Kenang mainya’,” ingka kenang baki’ Yusup.

14Jaji manjarum bapi amana, “Se’ lamba’ijo arakakanu, ti’ ai lo’a ka’ada’anna arakaka’ nanna bangkulungan dombaan, ti’ maam, ti’ ajau’. Mamin dinen, mole’ko barik manutul ka’ada’anda’,” ingka kenang baki’ Yakub lo’a baki’ Yusup dinen. Jaji dasuro’ lamba’ barik tarangkat di Hebron lo’a Sikem.

Jaji barik mondok baki’ Yusup lo’a Sikem 15kuliling-kuliling lamba’a inang di lapanganen, sidua’ nanna tauen. Jaji mangatoani tau dinen, “Maiko dinen? Jalu asi yang isariin iko?” ingka kenang.

16“Daiak manyariak lo’a arakakaku’,” ingka kenang. “Itamu iko ai kosanda’ manuntuani bangkulungan dombaan?” ingka kenang baki’ Yusup lo’a tau dinen.

17Jaji barik manjarum tau dinen, “Arakaka’ talalo mamin. Kole’a andian jarumda’ kudalingaan, Se’ lo’a Dotanki’, ingka kenang dalam kudalingana. Tentula inang,” ingka kenang jaruma tau dinen manyautina lo’a baki’ Yusup. Jaji dalola’ barik dinen arakakana. Sidua’ lalo barik dinen baki’ Yusup nanna arakakana inang di Dotan.

18Jaji barik baki’ Yusup dinen, nampina de’i mondok lo’a dinen, dakita kole’a arasairunna dari bajao’en. Jaji barik arasairunna dinen sipakat. Pakata dinen to’ mauno’ lo’a baki’ Yusup. 19“Na mondok. Ialalo dinen tau tukang pamuiin,” ingka kenang. 20“Se’ iduno’ iki’. Itampeang iki’ di loang kaliin. Iasan iki’ barik lo’a tauen dakaan inatang paita’en,” ingka kenang. “Ka’ bea itamuna iki’ ti’ ai lo’a ona’ darina muina,” ingka kenang sijarumanna.

21Jaji dadalinga dinen kole’a baki’ Ruben, daia to’ matio’ lo’a arina. Dapase’ang mate. “Ambakinto’ iduno’ iki’. 22Ada’ dara’a itumbangang iki’,” ingka kenang. “Suma poang itampeang lo’a loang kali di’en, di kosan ateengen. Ada’ iai-aina iki’,” ingka kenang. Ratina dinen kenanga, daia baingin to’ matio’ lo’a sairunna dari tanganda’. To’ dapole’ lo’a amana. Kenang pikiranna dinen baki’ Ruben.

23Jaji barik mondok baki’ Yusup lo’a dinen. Laloang dinen datingkam. Daleka’ sapena yang maamen dinen. 24Laloang i Yusup dinen datampeang di loang kaliin. Jaji loang kali dinen de’i akaring. Kosan danuma.

25Jaji barik maminna dinen, aduduk ira angkaan. Patanga’an angkaanna, dabeleang matana, andian tau malaloi inang, gulungan kanturunanna baki’ Ismael. Lamba’ ira basusun nanna ambata gulungan untana mawa garu. Mawa ambata jalu maamen bauna dari Gilead. To’ mamet dinen lo’a negeri Mesir.

26Jaji manjarum dinen baki’ Yehuda, “Ai untungka’ ti’ sairunka’ iduno’ laloang to’ ilamun basa dinen,” ingka kenang. 27“Labi maam sairunka’ dinen ipet poang iki’ lo’a tau kanturunanna baki’ Ismael dinen iala ragana, dari pada mate parasuma. Ambakinto’ bayu’ basai iki’ kole’a dinen sairunka’ bua, dara’ daginka’,” ingka kenang jaruma lo’a arasairunna.

28Jaji mondok lalo gulungan padagangen dari Midian dinen. Jaji barik daruarang dinen baki’ Yusup dari loang kaliin. Dapet lo’a tau badagangen dinen. Datarima’ dinen ragana barik, dua pulo’ papaka duit piraken ragana. Baki’ Yusup barik daawa lo’a Mesir.

29Jaji maminna dapet dinen arina, mole’ baki’ Ruben. Dalamba’i loang kaliin, dabele kosan arina inang. Jaji susa. Daripak sape dapakaien dinen lasana susana. 30Jaji lamba’ lo’da’ bokanen, “Inyap arika’, kosan inang!” ingka kenang. “Ai lo’ku’ barik awandi’en yang kenangen?” ingka kenang lo’a arasairunna bokanen.

31Jaji barik dala kole’a sairunna dinen sapena baki’ Yusup, sape yang maamen dinen. Dauno’ dinen kambingen barik. Dala dara’a, dasalapang inang sapena baki’ Yusup. 32Maminna dinen barik, dapaawaang lo’a amana. “Na, di’en idua’ang ikam. Bele ti’ sapena anaku, ti’ okan,” ingka kenang jaruma araanaka dapaba’angen lo’a amana.

33Jaji dapariksa barik dinen, “Ialalo. Sapena anakku’! Tentu dakaan kole’a inatang paita’en. Tentu dasarik-sarikang mantuarina,” ingka kenang jaruma amana lo’a anaka. 34Laloang dinen daripak sape yang dapakaien. Laloang dala dinen kain maulita, dalilitang di awaka. Balaun jaji susana kole’a matena anaka.

35Jaji anaka yang babainyeen dinen to’ pamaam nyawana, anaka babakaanpi ka’ kenanga. Daia dinen alibak lapoang dapamaam nyawana. “Susaak di’i,” ingka kenang. “Mateak kole’a matena anakku’,” ingka kenang. Danangisi anaka.

36Jaji baki’ Yusup de’i, mamin dapet kole’a padagang dari Midian dinen. Dapet lo’a anak buana dinen raja Mesir, i Potipar asanna. I Potipar lalo dinen yang mauluangen samuana ambata tau manyagaien lo’a rajaan.

Currently Selected:

Di Mulakata 37: EBE

Highlight

Copy

Compare