Di Mulakata 35

Baki’ Yakub mamalin lo’a Betel

1Jaji manjarum Alatala dinen lo’a baki’ Yakub, “Se’ mamalinko lo’a banua Betel. Lalako’ko inang,” ingka kenang. “Mamolako kosan panutung pamindaraan inang. Ipola itiang lo’ku’ yang paitangen kaleku’ lo’u nanga ararinu di arona kakanu,” ingka kenang jaruma Alatala lo’a baki’ Yakub.

2-3Jaji manjarum barik baki’ Yakub lo’a ambata gulunganna yang tau nannaan dinen, “Daiki’ di’en to’ mamalinki’ lo’a Betel. To’ mamola pamindaraak di Betel inang, pamindara lo’a Alatala,” ingka kenang. “Se’, ambata gulungan jalu isembaan dinen unjang ikin. Arungkin mamarese kalenin. Ambata gulungan kainnin isurangi ikin nanna jalu bareseen,” ingka kenang. “Pamindaraki’ inang lo’a Alatala, Alatala yang manyautiin do’aku’jo dinen nanga marinsa’ku’. Isa-isa lamba’ku’ Alatala tetap malola’ lo’ku’,” ingka kenang jaruma baki’ Yakub lo’a uranga dinen.

4Jaji barik ira dinen ambata gulungan jalu dasembaan, ambata gulungan antin-antinen daunjukang lo’a baki’ Yakub. Dakaliang barik inang di akat kayu keramaten di banua Sikem. 5Jaji barik ira dinen tarangkat. Ambata gulungan banua kulilingen dinen, kosan yang malola’en. Kosan malawanen. Samuana balasa takuta. Kole’a baki’ Yakub dinen dalindungi kole’a Alatala.

6Mondok barik ira nanna baki’ Yakub lo’a banua Lus di Kana’an, yang iasanen bea Betel. 7Ialalo dinen dapola barik kosan panutung pamindarana lo’a Alatala. Kosan dinen daasan barik El-Betel.#35:7 Ilalam jarum Ibraniin ratina El-Betel, Alatala yang di Betel. Kole’a inang lalojo paitanga kalena Alatala lo’a baki’ Yakub nanga ararina di arona kakana.

8Inang lalo dinen matena i Debora, suro’anen yang tau manuntuaniin dinen lo’a piang Ribka dari akeke’a. Dakaliang di akat kayu keramat. Ialalo daasan barik akat kayu dinen, akat kayu Nangisanen.

9Maminna dinen Alatala payoang bapi kalena lo’a baki’ Yakub di mole’a dari Mesopotamia. Jaji dapamaam baki’ Yakub dinen, 10“Asannu i Yakub. Poangsi rabarik asannu awandi’en i Israel,” ingka kenang. Yang awan dinen baki’ Yakub dameang asan i Israel kole’a Alatala.

11Jaji manjarum bapi Alatala lo’a, “Iak lalo di’en Alatala yang Palin Bakuasaan. Aranakko bayu’ insang bayu’ kanturunannu, padari banua bayu’, padari negara bayu’, padari rajaan,” ingka kenang pamaama. 12“Kenang bea tana’ kudunjukangen lo’a bakinu Abraham, lo’a ama’ Isak, kumeang bua lo’u nanna ambata anak kanturunannu,” ingka kenang manjaruma Alatala lo’a baki’ Yakub. 13Maminna dinen Alatala barik mole’ inait dari kosan sijarumanda’ dinen.

14Maminna dinen barik baki’ Yakub pakadeng batu itiang tanda. Batu dinen terus daolongiin nanna angguren. Daolongiin nanna inyak saitunen itiang pamindarana lo’a Alatala. 15Ialalo asanna kosan dinen barik kole’a baki’ Yakub, Betel.

Piang Rahel mate

16Jaji lamba’ barik ira, lagi’pi bajao’ lamba’a lo’a Eprat, bainyena dinen apadis batanga to’ aranak. Saja balin tapat piang Rahel dinen. 17Jaji patanga’an balinna to’ aranak, manjarum barik babainye to’ maniangiin dinen, “Ada’ko kalangganganen,” ingka kenang. “Anaku di’en babaka bapi,” ingka kenang dinen manjaruma. 18Poangsi piang Rahel dinen to’ mangatu nyawana. To’ akaus batak nyawana dinen, dameang asan anaka dinen Ben-Oni.#35:18 Ratina ben-oni dalam jarumda’, anak dalam susaku’. Poangsi daasan kole’a amana Benyamin.#35:18 Ratina benyamin dalam jarumda’, anak di tangan katoku’.

19Jaji piang Rahel mate patanga’an lamba’da’ lo’a Eprat. Ialalo Betlehem. Jaji barik baki’ Yakub dinen mangaliang lo’a bainyena inang. 20Dapakadeng batuun di kubura itiang tanda. Ialalo sampai aso di’enpi andian tanda dinen.

21Maminna dinen lamba’ bapi baki’ Israel isulina dinen tampara’ Eder. Dapakadeng kakalanga inang. 22Nanga lalako’a inang lalo baki’ Ruben anaka piang Lea dinen manindo’ina lo’a madu’a induna yang iasanen dinen i Bilha. Datamu bua dinen barik kole’a amana, yang baki’ Yakuben dinen.

Di’en tutulanna anaka baki’ Israel

Jaji anaka baki’ Yakub yang babakaan andian dua belas bayu’a. 23Anaka nanna piang Lea, baki’ Ruben yang atoaan. Mamin dinen baki’ Simeon, baki’ Lewi, baki’ Yehuda, baki’ Isakar, baki’ Sebulon. 24Anaka baki’ Yakub nanna piang Rahel, baki’ Yusup nanna baki’ Benyamin. 25Anaka baki’ Yakub nanna piang Bilha pangkama piang Rahel, baki’ Dan nanna baki’ Naptali. 26Anaka baki’ Yakub nanna piang Silpa, pangkama piang Lea, baki’ Gad nanna baki’ Aser. Samuana gulungan anaka dinen daparanakang di Mesopotamia.

27Jaji barik baki’ Yakub dalam palamba’anna dinen mole’ lo’a banuana dinen di Mamre yang mainso’en lo’a Kiryat Arba. Ialalo dinen Hebron. Inang lalojo lalako’a arabakina dinen, baki’ Abraham nanna amana baki’ Isaken dinen yang balu’a tau asingen lalako’a, awan tau mondoken lapoang. 28-29Jaji amana dinen, yang baki’ Isaken, sukup bea atoanna. Mamin 180 taun umura, inang lalo barik mangatu nyawana baki’ Isak. Talalo salalao’ nanna gulungan arabakina yang joloon. Dakaliang kole’a anaka, ari baki’ Esau nanna baki’ Yakub.

Currently Selected:

Di Mulakata 35: EBE

Highlight

Copy

Compare