Di Mulakata 34

Anaka baki’ Yakub manampusi lo’a banua Sikem

1Jaji barik inang di Sikem lamba’ piang Dina, anaka piang Lea nanna baki’ Yakub. To’ aramen dinen lo’a babainye di banua inangen. 2Jaji aramen barik inang, dakita kole’a i Sikem, anaka i Hemor, tau Hewi dinen. Ialalo tau mamarintaan inang. Laloang barik piang Dina dinen datingkam. Dapaksa, dabasai. 3Jaji daia dinen mainya’ tapat lo’a piang Dina anaka baki’ Yakub. Mamis tapat jaruma lo’a. Dakasaang. 4Manjarum barik daia lo’a amana, “Mainya’ak lo’a babainye dinen. Suba iala itiang bainyeku’,” ingka kenang.

5Jaji dadalinga barik dongo dinen kole’a baki’ Yakub, kole’a piang Dina darusak kole’a i Sikem. Poangsi daia na’an kakaji’ kole’a gulungan anaka dinen nampi mole’ manuntuani inatangen di lapanganen. Jaji baki’ Israel dinen marung poang mole’da’.

6Jaji mondok barik i Hemor, amana i Sikem. To’ pasijarumang soal to’ dapasialaanga anakda’ dinen. 7Ambata anaka baki’ Yakub dinen mamin mole’ di lapanganen, maminna de’i dadalinga dongo jalu adariin dinen. Ajau’ jaji nyawada’ mandalingaan. Arasi lo’a i Sikem. Kosan ratina kalo’a basana lo’a arina dinen. Mawa bawa’ lo’a gulungan tau Israelen. Pajau’.

8Jaji barik manjarum i Hemor, “Jaji anakku’ i Sikem dinen baingin tapat lo’a anaku. To’ ipita ikam itiang bainyena anakku’,” ingka kenang manjaruma i Hemor. 9“Suba lalako’kin indi’angen nannam. Anakka’ ipasialaang. Gulungan anak babainyenin ipalakiang lo’a anak bakasam. Anak babainyenam ipalakiang lo’a anak bakasin. 10Jaji bebaskin indi’angen di banuanam. Badaggangkin. Mamali tana’kin. Sama-samaki’,” ingka kenang dinen i Hemor lo’a baki’ Yakub.

11-12Jaji barik manjarum i Sikem dinen lo’a baki’ Yakub, lo’a ambata gulungan sairunna, “Ti’kin mainya’ lo’ku’, ai poang ipitaan ikin ona’, kumeangkin, ambata gulungan kain ingko’ku’,” ingka kenang. “Asal poangkam dari,” ingka kenang jaruma i Sikem dinen lo’a gulungan ambata arasairunna piang Dina.

13Jaji ambata anaka baki’ Yakub dinen makal poang jarumda’ manyautiin. Kole’a de’i mamin darusak arida’ piang Dina dinen. 14“Jaji kenang,” ingka, “daikam adatam na’an awan dinen. Na’an pande arinam ipasialaang nanna tau na’anen isunat. Bawa’kam ti’ awan dinen. 15Ti’kin mainya’ dinen malola’ani adatam, pande. Banua di’en arung akaus isunat. 16Baru’ pande barik siala nanna babainyenam. Anak babainyeninpi pande bea iala ikam. Ti’ awan dinen mainya’kam lalako’ nannin,” ingka kenang. 17“Ti’kin alibak malola’ani adatam, daikampi lamba’kam marantang banua di’en, iawa poang arinam,” ingka kenang jaruma sairunna piang Dina.

18Jaji barik dadalinga jarum dinen kole’a i Sikem nanna i Hemor, kakadaka. Kole’a jalu dinen mandua’ kalo’a. 19Na’an lagi’ balaun maminna dinen daurusi bua kole’a i Sikem. Bariar daurusina, lasana mainya’a lo’a piang Dina. Kole’a ia poang antarana suang saona amana yang palin dakatakutangen di banua dinen.

20Jaji na’an balaun maminna dinen ari Sikem nanna i Hemor dinen amana laloang lamba’ lo’a gulungan tau atoaan aduduken di mambangan pakar tagapa banuaan inang. Jaji manjarum, 21“Mainya’ ira dinen lo’ka’. Jaji kalo’ku’, ira di’en arung bebas lalako’a nanka’, badagangen. Kole’a baraa bea di’en banuaka’. Sumaka’. Gulungan anak babainyeda’ pande ipalakiang lo’a anak bakaska’. Anak babainyenam pande ipalakiang lo’a anak bakasda’. 22Suma poang andian sera poang pamitada’, iki’ gulungan babakaan arung isunat kausa awan bua ira. Baru’ mainya’ ira sarilao’ nanka’,” ingka kenang manjaruma. 23“Asal dinen ilola’ani panamuda’, ambata gulungan kamaamanda’ dinen tentu tambaki’ bea ampuna,” ingka kenang. “Suba ilola’ani panamuda’ mainto’ mainya’a ira sarilao’ nanka’,” ingka kenang ira duaan lo’a gulungan tau atoaan.

24Jaji barik manaantalinga dinen gulungan panduduk banua Sikem lo’a jaruma i Hemor nanna anaka. Dasunat kausa dari tamatoa sampai mondok lo’a gulungan nangkanaken. Akaus dasunat.

25Jaji barik talung aso maminna dinen, jaji lamba’ barik arakakana piang Dina dinen nanna basina, ari baki’ Simeon nanna baki’ Lewi. Gulungan babaka tau inangen masipi apadis kole’a dasunata. Na’an lagi’ datamu-tamu mondokda’. Akaus dauno’ gulungan babaka yang dasunaten dinen samuana. 26Tamba bea dinen i Sikem nanna i Hemor dauno’. Piang Dinapi dinen dala mole’ kole’a ira dua pariin dinen.

27Maminna dinen gulungan tau mateen dalamba’i kole’a ambata anaka baki’ Yakub dinen. Akaus darampasi banua dinen di kosan darusaka arida’ dinen. 28Ambata gulungan dombada’ dala. Ambata gulungan sapi, kaledaida’ akaus dala. Samuana kamaamanna yang di banuaan, maam bea insaluanna banuaan, dala kausa kole’da’. 29Gulungan ambata babainyeda’, ambata gulungan nangkanaken, ambata gulungan jalu ilalam saona dala kausa itiang pamalasang bawa’da’ dinen.

30Jaji barik manjarum baki’ Yakub dinen lo’a baki’ Simeon nanna baki’ Lewi, “Susaak tapat kole’in di’en,” ingka. “Ajau’ tapat asanku’ di antarana tau negeri di’en, ira tau Kana’an nanna tau Peres. Daiki’pi tau na’anki’ bea bayu’. Suba ira dinen bagumpul pasikapulungang kalena ira dinen malawan lo’ka’, tentu iki’la ataloon. Atampusak ona’, iak nanna gulungan suang saoku’,” ingka kenang manjaruma lo’a araanaka.

31Jaji barik dasauti kole’a araanaka dinen duaan, kole’a baki’ Simeon nanna baki’ Lewi, “Ai yang arinam, pande dapola tau pandayangen, dapola palacur, ti’ na’an ibalasang? Ai, na’anki’ bawa’?” ingka kenang jaruma manyautiin lo’a amana.

Currently Selected:

Di Mulakata 34: EBE

Highlight

Copy

Compare