Di Mulakata 33

Baki’ Yakub sidua’ nanna baki’ Esau

1Jaji barik dabeleang matana baki’ Yakub dinen, mondok kakana dinen, baki’ Esau. Jaji yang tambaan nanna andian babakaan ampat ratus bayu’a. Jaji anaka dabagi lo’a induna sera-serana, lo’a piang Lea, piang Rahel nanna pangkamda’ duaan. 2Yang dapajoloon, ia dinen pangkama nanna araanaka. Mamin dinen dasusun inang piang Lea nanna araanaka. Dapamundiin rabarik piang Rahel nanna anaka dinen, baki’ Yusup. 3Mamin dinen daia pola kalena ijolona ira dinen nanna lamba’a ungge’-ungge’ang kalena manyorong hormata lo’a kakana. Tuju kali ungge’anga kalena sampai mondok siaroan nanna kakana.

4Laloang dakita kole’a baki’ Esau, laloang arari dinen baki’ Esau, pasidua’ang kalena nanna baki’ Yakub. Laloang sidua’ ira dadakap dinen baki’ Yakub. Dasum laloang sinangisan ira duaan. 5Jaji dabeleang lo’a dinen matana, “Intain dinen yang tambaan nannu?” ingka kenang. Dabele arabainyena nanna araanaka baki’ Yakub.

“Dinen gulungan bainyeku’, araanakku’. Dinen lalo pameanga Alatala lo’ku’ suro’annu. Kamaamanna atena lo’ku’,” ingka kenang jaruma baki’ Yakub lo’a baki’ Esau.

6Jaji barik lamba’ bea pangkama duaan dinen nanna araanaka. Malola’ani ungge’-ungge’ang kalena. 7Kenang bea malola’ piang Lea dinen nanna araanakaan. Ungge’ang kalena di arona baki’ Esau. Imundiin rabarik malola’ bea baki’ Yusup nanna induna, piang Rahel dinen. Ungge’ang kalena pasidua’ang kalena nanna baki’ Esau.

8Jaji barik manjarum baki’ Esau, “Itiang ai iko gulungan bangkulungan inatang nanna rombonganna dinen yang maminen sidua’ nanku’?” ingka kenang manjaruma lo’a baki’ Yakub.

“O dinen pameangku’ lo’u mainto’ mainya’u manyialo lo’ku’. Dinen kudunjukang lo’u,” ingka kenang.

9Jaji dasauti kole’a baki’ Esau, “Na’an paruluak imeang jalu iko pamaam nyawaku’. Daiak mamin bayu’ hartaku’,” ingka kenang. “Daiko poang gulungan inatang dinen,” ingka kenang manyautina baki’ Esau.

10“O na’an,” ingka kenang baki’ Yakub. “Ti’enko tapat-tapat mangamainya’i lo’ku’, tarima’ poang jalu kudunjukangen lo’u. Kole’a di’en maitaku’ lo’u sasau tapat nyawaku’. Awan laloon sidua’enak nanna Alatala sasauna nyawaku’. Sabangon. Kole’a ikamainya’iku’ iko,” ingka kenang manjaruma baki’ Yakub lo’a baki’ Esau. 11“Tarima’ poang kaka’e jalu kudunjukangen lo’u dinen. Kole’a bayu’ mamin kamaamanna atena Alatala lo’ku’. Sukup mamin hartaku’,” ingka kenang pamiya’a lo’a kakana. Balik-balik bua jarum pamiya’a lo’a kakana. Baru’ datarima’.

12Jaji manjarum bapi baki’ Esau, “Se’ tarangkatki’. Lamba’ak ijolonin mauluang lo’in,” ingka kenang lo’a baki’ Yakub.

13Poangsi manyauti baki’ Yakub, “Itamu iko kaka’e, gulungan nangkanaken na’an dakule’. Gulungan inatangenpi yang panusu’en lo’a anakaan, to’ ipakaruru badidit bea. Saso poang ati’en ipakaruru, mainya’ mate gulungan inatangku’,” ingka kenang. 14“Ijoloko poang. Daikam malola’kam imundinu. Lao’-lao’am poang lamba’am. Bele ada’a lo’a gulungan inatangam, lo’a gulungan araanakam. Salao’-lao’a poang mondokam sidua’am nannu inang di Seir,” ingka kenang jaruma baki’ Yakub lo’a kakana.

15Jaji manjarum baki’ Esau, “Ti’ kenang, kurantang poang nannin anak buaku’ sapa dua,” ingka kenang.

Poangsi manyauti baki’ Yakub, “Ambakinto’ karu-karu kalenu. Sukup mamin ti’enko mangamainya’i lo’ku’,” ingka kenang baki’ Yakub lo’a baki’ Esau.

16Jaji aso dinen mole’ bua dinen baki’ Esau lo’a Seir. 17Jaji barik baki’ Yakub dinen lamba’ lo’a Sukot. Mondok inang di Sukot mamola sao. Mamola dinen gulungan kandang inatanga inang. Ialalo dinen iasan Sukot.#33:17 Ratina sukot ilalam jarum Ibraniin, kakalang.

18Jaji dalam palamba’anna dinen dari Mesopotamia, mondok nanna maamen lo’a banua Sikem di negeri Kana’an. Mainso’ inang rabarik dinen dapakadeng kakalanga. 19Dabali barik tana’en inang dari nanna anaka Hemor, amana i Sikem datiang dudukanna kakalanga dinen. Ragana dinen saratus papak duit. 20Inang lalo dinen dapolaan kosan panutung pamindarana. Asanna kosan dinen kole’a, El Alatalana Israel.

Currently Selected:

Di Mulakata 33: EBE

Highlight

Copy

Compare