Di Mulakata 32

Baki’ Yakub bakamas to’ sidua’ nanna baki’ Esau

1Jaji barik dalam palamba’anna baki’ Yakub dinen, andian sidua’ nanna ambata malaikata Alatala. 2Jaji barik manjarum baki’ Yakub, “Indi’angen lalo pan nyonyona ambata balana Alatala,” ingka kenang. Ialalo kosan dinen daasan barik kole’a baki’ Yakub Mahanain.#32:2 Ratina mahanain dalam jarumda’ balana dua pihak.

3Jaji barik baki’ Yakub manyuro’ lo’a suro’anna ijolo lamba’a lo’a kakana, lo’a baki’ Esau dinen di negeri Seir daerah Edom. 4Jaji daparinta barik, “Ti’kin mamin sidua’ nanna kaka’ku’, jarumang ikin lo’a, Andian jaruma suro’annu dinen i Yakub dapaawaang lo’u, ikin kenang. Daia, ingka, launna di’en lalako’ di saona kamo’ Laban. 5Daia barik ampuna ambata gulungan inatangen, gulungan sapi, gulungan keledai, gulungan kambing, domba. Andian bea gulungan ambata suro’anna babaka babainye yang daawaan mondok lo’u. Jaji daia, ingka, paawaang jarum tajolo malaloi lo’am, mainto’ mainya’u manyialo lo’a,” ingka kenang jaruma baki’ Yakub dapaawaangen lo’a baki’ Esau.

6Jaji barik dinen suro’anna baki’ Yakub mole’ balik, sidua’ bapi nanna baki’ Yakub. Jaji dajarumang mamin mondoka lo’a kakana, “Maminkam sidua’ nanna kakanu mawa jarum dinen. Andian bea tarangkaten lo’a di’en. To’ lo’u. Yang babakaan ampat ratus yang tambaan nanna,” ingka kenang manjaruma suro’anna.

7Jaji barik baki’ Yakub dinen atakut tapat mandalinga dongo dinen de’i. Kalanggangan jaji. Jaji gulungan inatanga dinen dabagi dua. Kenang bea tau yang tambaan nanna, dabagi dua. 8“Ti’en de’i silawan nanna kalompok seraan, yang seraan dinen pande alapas,” ingka kenang ilalam tujuanna baki’ Yakub.

9Jaji baki’ Yakub dinen, bado’a barik daia, “O Alatala, Alatala yang dasembaan kole’a baki’ku’ baki’ Abraham nanna ama’ku’ Isak,” ingka kenang, “ikojo manyuro’ mole’en lo’ku’ lo’a banuaan, lo’a ambata sairunku’. To’ pamaamko lo’ku’, iko lo’ku’,” ingka kenang dalam do’anna. 10“Kenang bea de’i, na’an patut kamaamanna atenu lo’ku’ suro’annu di’en sampai iparandama bayanu lo’ku’. Kole’a daiak di waktu tarangkatku’jo, kosan jalu kuawa. Tungkat poang yang kuawaan. Tau ajau’ak. Kabalikanna rabarik, mamin dua kolompok baraa’en kakaya’anku’,” ingka kenang dalam do’anna. 11“Jaji bado’aak lo’u,” ingka kenang. “Daiak di’en katio’ak di tanganna kaka’ku’. Kole’a atakutak lo’a. Ungka’en to’ malawan lo’ku’, lo’a arabainyeku’ nanna araanakku’,” ingka kenang. 12“Kole’a andian mamin bayanu lo’ku’. To’ ipamaamak iko. Ipabayu’ kanturunanku’ sambat nanna kasik di biring jawaan yang na’anen ikule’ ikira bayu’a,” ingka kenang dalam do’ana dinen baki’ Yakub lo’a Alatala.

13Maminna dinen barik, daia dinen samalam inang. Inang bea dinen daile’ina gulungan jaluna itiang pameang dinen lo’a kakana. 14Yang jalu daile’iin dinen, dua ratus indu kambing nanna dua pulo’ kambing lakiin. Mamin dinen dua ratus indu dombaan nanna dua pulo’ domba lakiin. 15Mamin dinen untaan tiga pulo’ yang mansangenpi panusu’a lo’a anaka. Talola’ bea anaka dameang lo’a kakana. Mamin dinen ampat pulo’ indu sapiin nanna sapulo’ sapi lakiin. Mamin dinen andian bapi indu keledai dua pulo’ bayu’a nanna keledai laki sapulo’ bayu’a. 16Mamin kamas, dasuro’ awa dinen lo’a ambata suro’anna. Kira barananna dinen daawa ilalam kalompok diri’a. “Se’ tajolokin,” ingka kenang lo’a suro’anna dinen. “Idintarai ikin gulungan kalompok inatangen yang iawaan di’en,” ingka kenang. 17Jaji manjarum daia lo’da’ yang mawaan kolompok seraan, “Ti’kin sidua’ nanna i Esau, ti’kin dakatoani, Maikin? Suro’anna intainkin? Intain ampunaan ambata inatang di’en, ti’ ingka, 18Di’en inatanga suro’annu, i Yakub dinen. Dasuro’ unjukang lo’u, pameanga lo’a paraampuanku’ Esau, ingka kenang. Daiapi dinen to’ malola’ bea imundinam, ikin kenang lo’a,” ingka kenang paba’ina baki’ Yakub lo’a gulungan suro’anna.

19Jaji kenang bapi paba’ina baki’ Yakub lo’da’ yang mawaan kolompok kaduaan nanna yang kataluun, “Awan dinen bea daikin jarumin lo’a i Esau ti’kin sidua’ nanna. 20Ungka’ ililu’ ikin jarumku’ yang maminen, ada’ poang ililu’a ikin jarum di’en. Suro’annu i Yakub dinen to’ malola’ bea imundinam, ikin ona’ lo’a,” ingka kenang paba’ina baki’ Yakub. Kole’a kenanga jarum paba’ina lo’da’, kole’a ingka nyawana, “Maam dinen jalu pameangku’ kupaawaang ijoloku’ mainto’ dinen maama atena. Ti’enkam siaroan ona’, ungka’en mainya’ barik manyialo lo’ku’,” ingka kenang manjarumina kalena. 21Jaji jalu dapaawaangen dinen dapajolo, poangsi diri’a samalampi inang.

Baki’ Yakub sikaung

22-23Jaji ambata gulungan jaluna dapajolo. Kenang bea de’i di malam dinen dasuro’ tamba arabainyena duaan nanna pangkama duaan nanna anaka sabelasen dinen. Dasuro’ manarear di sunge Yabok dinen nanna jalu yang to’ dapajoloon dinen. 24Jaji daia poang kakalena samalamen isabala’en inang. Barik andian tau mondok sikaung samalam-malam dinen nanna baki’ Yakub, sampai mondok imbara asoon. Kosan ira manaloon.

25Imbara asoon barik tau dinen datamu diri’a na’an manalo, dajaput patamuan tolang awaka dinen baki’ Yakub, mamakup patanga’an sikaunga. 26Jaji barik manjarum dinen, “Lapasangak. To’ imbara asoon di’en, to’ mole’ak,” ingka kenang.

Poangsi manjarum baki’ Yakub, “Na’anko kupalapas ti’ na’anko pamaam lo’ku’ mamitang jalu maamen,” ingka kenang.

27Jaji manjarum barik tau dinen, “Intainsi asannu?” ingka kenang.

“Daiak asanku’ i Yakub,” ingka kenang.

28Dasauti barik kole’a tau dinen, “Na, asannu barik okan lagi’ Yakub. Israel asannu barik,” ingka kenang. “Kole’a maminko silawan nanna Alatala, silawan nanna mantuariin. Manaloko,” ingka kenang.#32:28 Ratina israel ilalam jaruma Ibrani tau silawanen nanna Alatala.

29Jaji barik baki’ Yakub matoani, “Intainsi daiko asannu? Jarumangjo lo’ku’,” ingka kenang.

Jaji barik dasauti kole’a tau dinen, “Ambakinto’ ikatoanang asanku’,” ingka kenang. Mamin dinen laloang dapamaam dinen baki’ Yakub, daberkati.

30Jaji asan kosan dinen barik daasan Peniel. Ratina kosan dinen daasan Peniel, “Maminak siaroan nanna Alatala, lagi’akpi tio’,” ingka kenang baki’ Yakub, daasanang tauen tentu mate ti’ mamin siaroan nanna Alatala.#32:30 Ratina peniel dalam jarumda’, lindo’a Alatala.

31Jaji baki’ Yakub dinen manareara di sunge Yabok inang di Peniel, ambatapi imbara asoon. Daia dinen atimpang lamba’a kole’a dinen mamakupa patamuan tolanga dinen. 32Ialalo kanturunanna na’an pande angkaan isi’ inatang yang manutupi urat di patamuan tolang ponggong inatangen. Kole’a dajaput patamuan tolang awaka baki’ Yakub dinen.

Currently Selected:

Di Mulakata 32: EBE

Highlight

Copy

Compare