Di Mulakata 31

Baki’ Yakub rariang kalena dari arona baki’ Laban

1Jaji andian dongo dadalingaan kole’a baki’ Yakub. Amumut dinen araanaka baki’ Laban, “Gulungan ambata tau maama i Yakub, gulungan ambata jaluna dinen yang andianen paita karajana dinen i Yakub, tatulak kausa dari nanna ama’ka’. Darampas kole’a i Yakub,” ingka kenang kajau’anna nyawana dinen anaka baki’ Laban. 2Jaji barik baki’ Yakub mamele lo’a baki’ Laban, laan lindo’a. Bajao’ laanna lo’a dinen yang maminen, mamelena lo’a baki’ Laban.

3Jaji barik manjarum dinen Paraampuan Yahuwe lo’a baki’ Yakub, “O Yakub, mole’ko barik lo’a banuana amanu, lo’a ambata gulungan arasairunnu,” ingka kenang. “Ona’ko kulola’, sarataak bua nannu,” ingka kenang dinen Paraampuan Yahuwe lo’a baki’ Yakub.

4Jaji barik baki’ Yakub dinen paba’ang, manyuro’ mondok di lapangan dombaan inang lo’a piang Rahel nanna piang Lea. 5Jaji mondok lo’a lapangan dombaan dinen, sidua’ barik ira inang, “Na, di’en barik launna di’en, ama’ka’ laan lindo’a lo’a yang maminen. Ajau’ lapoang lo’ku’en,” ingka kenang. “Poang maam. Andian lapoang Alatala nanku’, yang dasembaan kole’a ama’ku’,” ingka kenang.

6“Jaji itamuna bua ikin,” ingka kenang baki’ Yakub, “bakarajaku’ nanna ama’ka’ launna di’en. Karaja nanna bakajungku’, nanna akaus panamuku’ bakarajaan nanna. 7-8Di’en opa’u, ti’ ingka kenang lo’ku’, ka’ kukaya’i mainya’ak. Sapulo’ kali mamin mamungkira dinen ama’ mamayana lo’ku’. Okan gampang makala lo’ku’,” ingka kenang. “Poangsi Alatala na’an mainya’ palaloang lo’a ajau’a lo’ku’. Dinen inatang tatampang-tampangen opa’u, ti’ ingka, ka’ mainya’ku’. Ti’ mamin awan dinen bayana, inatangen barik terus aranak tatampang-tampangen. Dasuro’ kole’a Alatala. Mamungkir bapi ona’ bayana lo’ku’, din yang susurat-suraten opa’u, ti’ ingka, anaka susurat-suraten insang bayu’. 9Na awan dinen lalo darampasa dinen kamaamanna ama’, gulungan inatanga kole’a Alatala. Daunjukang barik lo’ku’,” ingka kenang jaruma baki’ Yakub lo’a piang Lea nanna piang Rahel.

10“Jaji kenang,” ingka baki’ Yakub. “Nanga adaluna gulungan inatangen dinen, andian muiku’. Jaji ilalam muiku’ kubeleang mataku’ lo’a inatang laki yang mandaluun dinen, samuana laan buluna. Andian susurat-suraten buluna, andian tatampang-tampangen, andian babintik-bintiken. 11Jaji manjarum dinen malaikata Alatala lo’ku’, Yakub, ingka kenang.

“Jaji barik kusauti, Indi’angak, uka’ kenang.

12“Jaji manjarum bapi malaikaten, Beleangjo matanu lo’a gulungan kambing laki yang mandaluun dinen. Andian susurat-suraten buluna, andian tatampang-tampangen, andian babintik-bintiken. Ratina kenanga, kole’a maminak maita jau’a i Laban lo’u, ingka kenang. 13Iak lalo Alatala yang sidua’en nannu di Beteljo dinen, ingka kenang, di kosan tanda batu yang ilulukiin iko. Inang lalojo marantang bayanu lo’ku’ waktu mamanga kalenu dinen, ingka kenang dinen malaikaten lo’ku’. Jaji dapaba’iak barik, Mole’ko lo’a banuanu. Marantang banua di’en, ingka kenang malaikaten marantang jaruma Alatala nanku’,” ingka kenang jaruma baki’ Yakub lo’a arabainyena.

14Jaji barik manjarum dinen piang Lea nanna piang Rahel, “Daikam di’en kosan lagi’ tawa’am ilalam saona amanam. 15Maminkam di’en dapet kole’a amanam. Tungan tau bokankam barik kalo’a. Ragana mameta lo’am, dinenpi mamin akaus kole’a. 16Ialalo barik samuana tau maama yang darampasen kole’a Alatala lo’a, dinen lalo baginamen. Dinen lalo bagina anakka’,” ingka kenang jaruma ira duaan. “Jaji ai poang yang dajarumangen kole’a Alatala lo’u, lola’ani poang,” ingka kenang jarumda’ duaan lo’a baki’ Yakub.

17Laloang bakamas dinen barik baki’ Yakub. Gulungan ambata anaka bainyena dinen dauwatang kausa di ambata untaan dinen. 18Gulungan inatang yang dakapulungangen inang di Mesopotamia, samuana daawa lamba’. Ambata kamaamanna, ambata kakaya’anna dakamas kausa. Daawa dinen kole’a to’ mole’a lo’a Kana’an, lo’a baki’ Isak.

19Jaji baki’ Laban dinen inyap manggunting buluna gulungan dombana. Jaji barik di inyapa dinen, piang Rahel mangalit dinen alat jalu dasembaan kole’a amana. 20Baki’ Yakubenpi dinen makal lo’a baki’ Laban. Kole’a na’anna jarumang kalena mole’a lo’a Kana’an. To’ rariang kalena. 21Jaji barik maminna kamas, baki’ Yakub dinen rariang kalena nanna gulungan hartana manarear sunge Eprat. Manuju lo’a gulungan ukiten di daerah Gilead.

Baki’ Laban malola’ lo’a baki’ Yakub

22Jaji barik talung aso maminna dinen, baru’ andian tau manjarumang dinen lo’a baki’ Laban. 23Jaji dakapulungang dinen gulungan ambata sairunna baki’ Laban. To’ malola’ lo’a baki’ Yakub. Jaji barik dalola’ tuju aso dinen, launna malola’a lo’a baki’ Yakub, darambit inang di daerah ukit di Gilead. 24Mondok barik inang malam asoon, mondok dinen Alatala lo’a ilalam muina, “Maam-maam jarumu lo’a i Yakub,” ingka. “Ada’ sampai ipase’anga iko mole’ lo’a amana, kapi nanna jarum alowe’u, kapi nanna jarum bakarasu,” ingka kenang jaruma Alatala ilalam muina baki’ Laban.

25Jaji di nanga mondoka baki’ Laban nanna uranga lo’a ukiten inang, mamin de’i baki’ Yakub pakadeng kakalang palamba’a. Baki’ Labanpi barik pakadeng bea daia kakalang palamba’a inang. 26Jaji barik manjarum dinen baki’ Laban lo’a baki’ Yakub, “Ai kenang maam-maama makalu lo’ku’? Irariang iko araanakku’. Awan jaji tau kule’ kayoon. Awan lalo pangkamuun,” ingka kenang manjaruma dinen baki’ Laban lo’a baki’ Yakub. 27“Ilamun iko tunjuannu kakaru’. Suba ti’ ijarumang iko lo’ku’, maam nyawaku’. Nanga tarangkatin dinen pandeki’ mamola rami-rami, manaba’ rebana, manaba’ kecapiin. Pandeki’ banyani,” ingka kenang. 28“Na’an jaji iparuarang iko manyumak lo’a anakku’, lo’a ampu’ku’. Arabor jaji karajanu dinen,” ingka kenang. 29“Andian kuasaku’ to’ mamola ajau’ lo’u. Kole’a poang dinen andianna Alatala mondok lo’ku’ mamase’angen. Jaruma lo’ku’, Maam-maam jarumu lo’a i Yakub. Ada’ sampai ipase’anga iko mole’ lo’a amana, kapi nanna jarum alowe’u, kapi nanna jarum bakarasu, ingka kenang jaruma dinen Alatala yang dasembaan kole’a ama’,” ingka kenang jaruma baki’ Laban. 30“Jaji ararikin di’i kole’a bainginnin to’ mole’ lo’a saona ama’. Poangsi dinen sampai ikalitiak ikin. Sampai ikalit ikin ambata gulungan jalu kusembaan,” ingka kenang baki’ Laban.

31Jaji barik manjarum dinen baki’ Yakub, “Soal arariku’, alibakku’ manjarumang kaleku’, atakutak. Ungka’en iala mole’ bainyeku’ iko,” ingka kenang. 32“Poangsi lo’a soal mangaliten dinen, andian gulunganka’ manyaksiin. Sari poang di aroda’. Ti’ andian jalu idua’ang iko, itamu iko, ti’ andian ikalit talola’ indi’ang ambata gulungan jalu isembaan iko dinen, pande iala mole’ iko. Yang tau mangalit dinen pande idukum mate,” ingka kenang. Kole’a de’i, na’an datamu yang mangaliten dinen piang Rahel.

33Jaji barik baki’ Laban intama di kakalanga baki’ Yakub, manyari jalu dasembaan dinen. Dasari dinen, kosan. Dasari bea dinen lo’a kakalanga piang Lea. Daintamai bea dinen pangkamda’ duaan, lo’a kakalanga piang Bilha nanna piang Silpa. Kosan bea dadua’ang jalu dasembaan dinen yang jalu to’ dasariin. Akaus poang atena manyarina. Maminna dinen intama barik lo’a kakalanga piang Rahel dinen. 34Akaus dasari kuliling dinen ilalam kakalang dinen, ka’ kosanna. Na’an barasel manyarina. Kole’a jalu dinen mamin dalamun kole’a piang Rahel. Andian alat dinen palas balakanga untaan itiang dudukan tau mauwaten inang. Mamin daawa ilalam kakalang palamba’en. Jaji jalu dasembaan de’i daapis ilalam dudukan dinen. Maminna daapis inang laloang daduduki.

35Jaji manjarum barik dinen piang Rahel, “Ada’ko arasiin ama’e. Di’ na’anak manyambut lo’u. Na’anak dapat akadeng kole’a ajau’ buruk kainku’,” ingka kenang dinen manjaruma. Barik dinen na’an barasel, na’an dadua’ang dinen jalu yang to’ dasariin kole’a baki’ Laban.

36Jaji barik arasi dinen baki’ Yakub. Dapadu dinen baki’ Laban, “Jalu asi yang kenang maam-maamen? Sampaiak ilola’ lo’a di’en. Sampaiak ikejar. Ai sala’ku’? Ai dosaku’? 37Jalu asi yang andianen maminen isari iko sasara jaluku’? Ti’ andian jalunu idukasang lo’a di’en, iawa di ale’ kasaan mainto’ dinen dabelena kasaksianna kole’a gulungan arasairunka’. Inang bea ira barik manyelikidiin, inde yang sala’en, inde mandua’en. Ukasang jalunu ti’ andian,” ingka kenang jaruma baki’ Yakub lo’a baki’ Laban.

38“Launna di’en dua pulo’ taun bakarajaku’ nannu, kosan yang arugiin. Gulungan ambata kambing, gulungan ambata dombaan, kosan anaka yang mondok loloon. Kambing lakiin kosan kukaanen iak. 39Kutanggung poang rugina. Maam yang datingkam inatang paita’en, na’an kuawa lo’u. Andianpi yang dakalit tauen, kapi malam, kapi asoon, itanggungang iko lo’ku’. 40Launna di’en ka’ada’anku’, asoon dinen daanu sisiak balasaanak. Malamen balasa dinginku’. Alolo’a mataku’, na’anku’ tindo’ kupanaat. 41Dua pulo’ taun lalako’ku’ nannu. Ampat belas taun yang dea’anen paalaan lo’a bainyeku’. Anam taun dinen itiang paala dinen gulungan ambata dombaan. Dinenpi mamin sapulo’ kali mamungkira jarumu soal opa’ku’. 42Ti’ na’an Alatala yang dasembaan dinen kole’a ama’ku’, daiak di’en kosan asela karajaku’ launku’ lalako’en nannu. Isuro’ mole’ak kenang poang, kosan jalu kuawa mole’. Poangsi dinen Alatala andian nanku’, Alatala yang dasembaan kole’a baki’ Abraham, yang dakatakutangen kole’a ama’ku’ Isak. Ialalo dinen muinu, dabeleak bea bakarajaan nannu nanna lolo’ tolangku’. Ialalo dajaruminu pamalamen,” ingka kenang jaruma baki’ Yakub lo’a baki’ Laban.

43Jaji manyauti barik dinen baki’ Laban lo’a baki’ Yakub, “Bainyenu, dinen anakku’,” ingka kenang. “Anaka bainyenu, dinen ampu’ku’. Ambata gulungan inatang dinen inatangku’ kausana yang andianen ikita indi’ang,” ingka kenang. “Asi lo’a dapata mamola jalu ai-aienak, to’ bayu’ basaku’ lo’a anakku’, lo’a araampu’ku’? Na’an dapat,” ingka kenang. 44“Suma kenang poang. Mamola perjanjianki’ itiang padari saksi antaraka’ duaan,” ingka kenang jaruma baki’ Laban lo’a baki’ Yakub.

45Jaji barik dinen dala batuun kole’a baki’ Yakub. Dapakadeng inang itiang tanda perjanjianda’ duaan, ari baki’ Yakub nanna baki’ Laban. 46Jaji barik manjarum baki’ Yakub lo’a arasairunna, “Mangapulungangkin batu. Rugu’ang ikin inang,” ingka kenang. Jaji maminna barik dakapulungang inang, angkaan ira inang di biring batuun. 47Jaji baki’ Laban masan lo’a batu dakapulungangen dinen Yegar-Sahaduta. Poangsi baki’ Yakub masan dinen jalu dakapulungangen Galed.#31:47 Yegar-sahaduta dinen jarum Aram, galed dinen jarum Ibrani. Dua-duana ratina pulungan batu yang dala saksi.

48Jaji barik manjarum dinen baki’ Laban, “Aso di’en batu yang irugu’angen indiangen, dinen padari saksi perjanjianka’ duaan.” Ialalo barik daasan kosan dinen Galed. 49Andian bapi dinen asanna, Mispa.#31:49 Ratina mispa, tampara’en. Ratina daasan Mispa, kole’a andian jaruma baki’ Laban, “Muda-muda Paraampuan Yahuwe manyagai antaraka’ duaan launna silaanka’, na’anka’ sidua’,” ingka kenang. 50“Ti’ anakku’ duaan iparinsa’i iko, ti’enko arainye lo’a babainye bokanen, Alatala yang manyaksien. Kapisi kosan arasairunka’ manamuun, Alatala manamuun,” ingka kenang jaruma baki’ Laban lo’a baki’ Yakub.

51Jaji manjarum bapi baki’ Laban lo’a baki’ Yakub, “Belejo batu kukapulungangen dinen, batu kupakadengen antaraka’. 52Kuala itiang saksi lo’a perjanjianka’. Ilalam janjika’ dinen, daiak na’anak pande malaloi batu di’en itiang papadisi lo’u,” ingka kenang. “Daikopi na’anko pande malaloi batu kukapulungangen atau batu ipakadengen di’en itiang papadisi lo’ku’,” ingka kenang jaruma baki’ Laban. 53“Alatala yang dasembaan kole’a baki’ Abraham, kole’a baki’ Nahor, yang dasembaan bea kole’a amana, ia yang mamutusiin antaraka’ ati’ ilanggar janjika’ di’en,” ingka kenang jaruma baki’ Laban lo’a baki’ Yakub.

Jaji barik baki’ Yakub dinen mamangi kalena atas asanna yang Tau Dakatukutangen kole’a amana. 54Dasembeli inatang inang di gulungan ukiten itiang pamindarada’ lo’a Alatala. Jaji dakampitang barik dinen gulungan kawan saparanakda’ dinen yang andianen inang. Maminna dinen angkaan ira inang. Maminna malam asoon, tindo’pi ira inang. Samalam.

55Maminna dinen imbara asoon, malam-malam jaji asadinga baki’ Laban. Dasum barik ambata araanaka, araampuna. Dado’aang dapitaang jalu maamen. Baru’ barik mole’ dinen baki’ Laban di makapen dinen.

Currently Selected:

Di Mulakata 31: EBE

Highlight

Copy

Compare