Di Mulakata 30

1Jaji piang Rahel dinen darasa diri’a na’an paranakang anak lo’a baki’ Yakub. Jaji barik manjarum daia lo’a baki’ Yakub, “Meangak anak. Ati’enak na’an imeang anak, mateak yang awan di’i,” ingka kenang dinen manjaruma lo’a lakina. Kapiayo dinen lo’a kakana.

2Jaji barik arasi baki’ Yakub. Jaji manjarum lo’a manyauti, “Asi lo’a mameang anakku’ lo’u? Saja Alatala lalo yang na’anen mameang anak lo’u. Daiak di’en okanak Alatala,” ingka kenang manjaruma manyautina lo’a bainyena.

3Jaji barik dasauti bapi dinen baki’ Yakuben kole’a piang Rahel, “Na, ati’en kenang kumeang poang dinen pangkamku’. Sitindo’ankin barik duaan. Dari nanna barik andianna anakku’ barik, ati’en andian ona’ daia anaka,” ingka kenang manjaruma. 4Jaji barik dameang dinen suro’anna, i Bilha. Sitindo’an barik suro’anna piang Rahel nanna baki’ Yakub, padari bainyena.

5Jaji mamin sitindo’an dinen, araunting. Anaka dinen daparanakangen, babaka. 6Jaji manjarum piang Rahel, “Ialalo Alatala yang maminen mamutusi lo’ku’. Jaji dameangak anak barik kole’a dadalingana do’aku’,” ingka kenang jaruma piang Rahel. Ialalo barik dameang asan anaka dinen, i Dan asanna.#30:6 Ratina dan ilalam jarum Ibraniin, dabalas.

7Mamin dinen araunting bapi piang Bilha, pangkama piang Rahel. Daparanakang anaka, babaka bapi. 8Jaji manjarum piang Rahel, “Mate-mateak silawanen nanna kakaku’. Manaloak barik,” ingka kenang. Jaji dameang asan anak dinen, i Naptali asanna.#30:8 Ratina naptali dalam jarumda’, silawanku’.

9Jaji barik yang piang Leaan, kakana dinen, kole’a darasa daia na’anna lagi’ matio’ anak dinen, dala bapi daia suro’anna seraan. I Silpa asanna. Dapalakiang bapi lo’a baki’ Yakub. 10Jaji araunting barik piang Silpa dinen, aranak bapi babaka. 11Jaji manjarum piang Lea, “Bauntungak. Andian bapi anaka daia suro’anku’en,” ingka kenang manjaruma piang Lea. Jaji dameang asan anaka dinen, i Gad asanna.#30:11 Ratina gad dalam jarumda’, bauntung.

12Jaji barik pangkama dinen araunting bapi dinen, aranak bapi, babaka bapi anaka. 13Jaji manjarum piang Leaan, “Na, di’en okan gampang sasauna nyawaku’. Samuana gulungan babainyeen to’ masan lo’ku’ sasau nyawaku’,” ingka kenang manjaruma dinen piang Leaan. Jaji dameang asan anaka dinen, i Aser asanna.#30:13 Ratina aser dalam jarumda’, sasau nyawaan.

14Jaji barik di musim matam gandomen dinen, lamba’ baki’ Ruben di lapanganen inang sidua’ dinen nanna akat jalu padari pole’. Pole’a dinen itiang manyuro’ mandua’ang anak. Jaji darabut barik, daawa lo’a induna. Jaji barik dakita kole’a piang Rahel bua’ jalu dinen, manjarum barik lo’a piang Lea, “Bua’ jalu dinen yang daawaan kole’a anaku, tawa’i iak,” ingka kenang manjaruma.

15Jaji dasauti barik kole’a piang Lea, “Asi bapi ialana iko bua’ jalu dadua’angen kole’a anakku’. Mamin iala iko lakiku’, to’ iala bapi bua’a anakku’,” ingka kenang.

“Na’an. Biar malam di’en i Yakub tindo’ nannu pamayar bua’a anaku,” ingka kenang.

16Jaji barik pamamalamen dinen, mole’ barik baki’ Yakub dari lapanganen, to’ mole’ lo’a kakalanga, piang Lea pasidua’ang kalena nanna baki’ Yakub. Jaji manjarum barik lo’a baki’ Yakub, “Na, di’en barik malam di’en tindo’ko nanku’. Maminko kusewa,” ingka, “kole’a dinen bua’ padari pole’ dadua’angen kole’a anakku’ dala dinen kole’a i Rahel,” ingka kenang manjaruma piang Lea lo’a baki’ Yakub. Jaji malam dinen mole’ barik baki’ Yakub lo’a piang Lea tindo’a.

17Jaji maminna dinen barik, Alatala mandalinga lo’a do’ana piang Lea. Jaji araunting barik. Daparanakang barik anaka babakaan yang kalimaan. 18Jaji barik manjarum, “Kole’a lalo kupalakianga pangkamku’ lo’a i Yakub. Ialalo dameangku’ anak bapi sera datiang paopa’i lo’ku’ kole’a Alatala,” ingka kenang manjaruma piang Lea. Jaji dameang asan anaka dinen, i Isakar asanna.#30:18 Isakar dinen mainso’ unyina nanna jarum Ibraniin yang berarti, opa’.

19Jaji barik piang Lea araunting bapi, daparanakang barik anaka babaka yang kaanamen. 20Jaji barik manjarum, “Na, tentula damole’iak barik kole’a lakiku’,” ingka kenang, “kole’a di’en kaanamen barik anakku’ babakaan. Di’en hadiaku’ yang maamen yang dameangen kole’a Alatala,” ingka kenang manjaruma. Jaji dameang asan anaka dinen, i Sebulon asanna.#30:20 Ratina sebulon dalam jarumda’, paduli.

21Jaji maminna dinen aranak bapi piang Lea dinen. Anaka dinen babainye, i Dina barik asanna.

22Jaji maminna dinen Alatala parandam lo’a piang Rahel barik. Dadalinga barik do’ana laloang manyuro’ pande mandua’ang anak. 23Jaji araunting dinen barik, daparanakang anaka, babaka. Jaji manjarum, “Alatala lalo yang maamen, paunjang bawa’ku’ kole’a tamanangku’ dinen,” ingka kenang. 24Jaji dameang barik asan anaka dinen, i Yusup asanna.#30:24 Ratina yusup dalam jarumda’, muda-muda datambai. Jaji bado’a bapi piang Rahel dinen, “Muda-muda i Yahuwe manawa’i lo’ku’ bapi anak babakaan,” ingka kenang dalam do’ana.

Insang bayu’ inatanga baki’ Yakub

25-26Jaji maminna barik daparanakanga baki’ Yusup, manjarum baki’ Yakub lo’a baki’ Laban, “Na di’en, to’ mole’ak barik lo’a banuaku’,” ingka kenang. “Gulungan bainyeku’ nanna araanakku’ yang kukatio’en indi’angen di’en to’ kuawa mole’ kausa lo’a banuaku’. Dinen lalo yang opa’ku’en,” ingka kenang. “Kole’a launna bakarajaku’ indi’angen itamuna bua iko basaku’, ambata pulikanku’,” ingka kenang. “Jaji jarumang kaleku’ lo’u, Ama’e, mamita’ak lo’u paruarangak mole’ lo’a banuaku’,” ingka kenang jaruma dinen baki’ Yakub lo’a matoana dinen, baki’ Laban.

27Jaji maminna dadalinga dinen jaruma baki’ Yakub, manjarum baki’ Laban, “Jaji kenang poang, ati’enko mainya’ to’ mamayoang ate maamu lo’ku’, lalako’ko poang nanku’,” ingka kenang. “Kenangku’ manjarumen, kole’a kutamuna mamin ilalam tanungku’, kole’a dinen Alatala pamaama lo’ku’ launna di’en katagalu,” ingka kenang. 28“Insa’ poang iasana iko, ona’ko kumeang opa’,” ingka kenang manjaruma dinen baki’ Laban lo’a baki’ Yakub.

29Jaji manjarum barik baki’ Yakub manyauti jaruma baki’ Laban dinen, “Jaji kenang lalo. Itamuna bua iko launna bakarajaku’ nannu, samuana ambata gulungan inatangen, ambata kambingu, dombanu, insang sikadanan bayu’a. 30Disa poang bakarajaku’, inangko mandua’ang untung kole’a Alatala. Di nampiku’ mondok lo’a di’en kosan bea jalu ijaputen iko. Poangsi awandi’en barik, insang tau maamko. Poangsi ai lo’ku’ daiak manuntuaniin lo’a gulungan anak bainyeku’, lo’a ambata anak suang saoku’? Suba pikir bua,” ingka kenang jaruma baki’ Yakub lo’a matoana.

31Jaji manjarum baki’ Laban lo’a baki’ Yakub, “Ai poang yang kumeangen lo’u di’en?” ingka kenang jaruma baki’ Laban.

“Jaji na’anak to’ managi opa’. Na’anak to’ managi jalu,” ingka kenang. “Suma poang ti’ko mainya’ malola’ani panamuku’, daiak tetap manuntuani gulungan dombanu nanna kambingu indi’ang. 32Jaji panamuku’ kenang, mamita ijinak lo’u. Aso di’en lamba’ak antara bangkulungan gulungan dombanu, kambingu. To’ kudile’i inde yang nanarumen, yang tatampang-tampangen, yang barapantik-pantiken. Dinen kupasilaanang ona’. Bulu dinla yang itiang gajiku’,” ingka kenang. 33“Ati’enko ona’ mondok lo’ku’ rabarik mamaraksa jalu kuawaan, ati’en andian buluna laanen dari pada dinen, tanda na’anku’ balolok. Ratina inatang dinen jalu kukalit. Jaji dinen yang padari saksiku’,” ingka kenang baki’ Yakub lo’a baki’ Laban.

34Jaji barik manjarum baki’ Laban, “Mandua’,” ingka. “Ilola’ani iki’ awan bua jarumu,” ingka kenang jaruma lo’a baki’ Yakub. 35Jaji barik aso dinen bua dapasilaananga kole’a baki’ Laban dinen ambata kambing lakiin anu susurat-suraten buluna atau yang babintik-bintiken. Kenang bea ambata indu kambingen ka’ dapasilaananga yang tatampang-tampangen atau barapantik-pantiken buluna. Ti’ andian ute’-ute’a kakapit, dapasilaanang. Gulungan dombaanpi, ti’ andian nanaruma, dinen bapi dapasilaanangen. Mamin dapasilaanang barik, dasuro’ang lo’a araanaka. 36Dasuro’ palinang dinen dalam lamba’an talung asoon jao’a, dapasilaananga dinen inatangen lo’a baki’ Yakub. Yang sisana dinen barik, dinen lalo yang datuntuaniin kole’a baki’ Yakub.

37Jaji barik baki’ Yakub dinen mala daan kayu dari akat kayu hawar, dari pada akat badan, dari akat berangan, kayu baru iala di akata. Jaji kayuun dinen dakupak dariri’ mainto’ paitana luntanga. 38Jaji daawa ijolona gulungan inatang dinen, daapis di panuan danuma, di kosan mainyumda’ dinen. Jaji barik nanga babangkulunga gulungan inatangen inang to’ mainyum, sidalu barik inatangen. 39Sidaluna dinen, inang lalo darina rabarik susurat-surat atau tatampang-tampang atau barapantik-pantik kausa bulana anaka, kole’a adaluna inang di kayu yang dariri’en kole’a baki’ Yakub dinen.

40Jaji barik baki’ Yakub, dakapulungang gulungan anaka dinen, dapasilaanang nanna induna. Sisana rabarik dapasiaroang nanna inatanga baki’ Laban dinen, anu susurat-suraten atau nanarumen buluna. Poangsi inatang diri’aan, dapasilaanang. Na’an daparuarang adalu nanna inatanga baki’ Laban.

41Jaji mondok to’ adaluna gulungan inatangen, ti’ inatang bakaras, bakajung, daapis barik kayu dariri’en di danumen, mainto’ inang ibiring danumen adaluna. 42Ti’ inatang alowe’en yang to’ adaluun, na’an daapis kayuun di danuma. Ialalo barik inatanga baki’ Laban, samuana alowe’. Poangsi inatanga baki’ Yakub, samuana bakaras, bakajung. 43Jaji barik kapanjanganna dinen, insang bayu’ dinen gulungan ambata inatanga baki’ Yakub, gulungan domba kambing, gulungan unta, gulungan kaledaien. Suro’annapi babaka, babainye, bayu’ bea. Batamba kamaamanna barik baki’ Yakub.

Currently Selected:

Di Mulakata 30: EBE

Highlight

Copy

Compare