Di Mulakata 29

Baki’ Yakub mondok lo’a Mesopotamia

1Jaji baki’ Yakub mansangapi lamba’a mondok lo’a daerah tau lalako’en maro timur. 2Jaji mondok inang, dabeleang matana di lapanganen inang, andian dinen loang kali danum. Loang kali dinen de’i inang palanan danum painyuman ambata gulungan dombaan. Jaji andian bea alenga’en inang talu bangkulungan dombaan, marungi dinen. Batu pangaputi loanga dinen baraa. 3Jaji kabiasa’an, ati’en mamin akaus mondok gulungan dombaan baru’ dabae’. Dagoleng barik dinen batu baraa’en kole’a panuntuani dombaan, dapainyumi. Akaus mainyum dinen dombaan, dakaput bua barik dinen baba’ loanga, datatari nanna batuun.

4Jaji barik baki’ Yakub mangatoani lo’a panuntuani dombaan dinen, “Urang aikin daikin di’en?” ingka kenang.

“Urang Harankam,” ingka kenang.

5“Ai te’ lo’a, sitamukin nanna i Laban, ampuna i Nahor?” ingka kenang.

“Sitamu,” ingka kenang.

6“Ai lo’a, maam bua daia dinen?” ingka.

“O maam bua,” ingka. “Na belejo, mondok bua anaka yang babainyeen mawa gulungan dombana, to’ dapainyumi. I Rahel asanna,” ingka kenang manyautina lo’a.

7Jaji manjarum barik baki’ Yakub lo’da’, “Adu, maisi ibabangkulunga kakaru’ dombaan awandi’en. Nampi balangke matasoon. Suba di’en painyumi gulungan dombaan. Mamin ipainyumi iawa bapi lo’a rimputen,” ingka kenang lo’da’.

8Jaji dasauti kole’da’, “Na’ankam pande. Batu pangaputi loang kaliin na’an pande igoleng ti’en nampi mondok kausa gulungan dombaan. Ati’en akaus mondok, baru’ igoleng batu dinen laloang ipainyumi dombaan,” ingka kenang manjaruma manyautina lo’a baki’ Yakub.

9Jaji baki’ Yakub dinen mansangapi dinen manjaruma lo’da’, mondok bea piang Rahel dinen mawa dombana amana. Kole’a ia yang karaja manuntuani dombaan. 10Jaji dakita dinen sanak toana, nanna dombana kamona, baki’ Yakubpi dinen manggoleng batu yang mangaputiin lo’a painyuman dombaan dinen. Dapainyumi dombana baki’ Laban dinen. 11Maminna dinen laloang lamba’ lo’a piang Rahel dinen. Dasum lasana manyarina. Sarata nangis dinen manjaruma. 12Manjarumang iana lalo dinen sairunna amana, anaka i Ribka. Jaji piang Rahelpi dinen laloang arari manjarumang lo’a amana kole’a mondoka dinen baki’ Yakub.

13Jaji maminna dinen datamuna dongona anak kamanakanna, laloang arari yang baki’ Labanen dinen karuru-karuru pasidua’ang kalena nanna anak kamanakanna. Mondok inang laloang dadakap baki’ Yakuben. Dasum. Laloang daawa lo’a saona. Baki’ Yakubpi dinen manutul samuana lo’a baki’ Laban. 14Jaji manjarum dinen baki’ Laban, “Iko lalo sairunku’, sadara’ sadaginen nanku’,” ingka kenang. Laloang baki’ Yakubpi lalako’ di saona sabulan launna.

15Tampus dinen sabulan lalako’a inang rabarik nanna kamo amanna, baki’ Laban dinen manjarum lo’a baki’ Yakub, “Daiki’ tapatki’ saparanak, poangsi na’anko patut bakaraja kenang poang nanku’. Arung andian bua ona’ opa’u. Insa’ poang pamitanu?” ingka kenang.

16Jaji dinen anaka baki’ Labanen, dua anaka babainyeen. Anaka sera dinen yang atoaan, piang Lea. Yang imundiin, piang Rahel. 17Yang anaka atoaan dinen, matana kurang. Poangsi anak imundiin yang i Rahelen dinen maam batora. Maam bea ayuan mantuarina. 18Baki’ Yakuben daia mangasaang lo’a i Rahel. Jaji ingka lo’a baki’ Laban, “Jaji kenang poang opa’ku’. Ti’enak bakaraja tuju taun nannu, meangak barik anaku yang imundiin itiang bainyeku’,” ingka kenang.

19Jaji dasauti barik jarum dinen kole’a baki’ Laban, “Kenang mainya’. Dari pada siala nanna tau bokanen, labi maam siala nannu,” ingka kenang. “Karajako poang nanku’,” ingka kenang baki’ Laban dinen lo’a baki’ Yakub. 20Bakaraja barik dinen baki’ Yakuben, dalam tuju taun launna bakarajana inang. Dalam tuju taunenpi dinen na’an darasa balaun. Darasa poang dinen duang talung aso poang. Darasa sikadang kole’a dinen mainya’a, lasana mangasaanga lo’a i Rahel.

Baki’ Yakub daakal kole’a baki’ Laban

21Jaji maminna tuli tuju taunen dinen de’i, lamba’ dinen baki’ Yakuben manjarum lo’a baki’ Laban, “Na, di’en maminak tuli tuju taun bakarajaan nannu. Barik to’ managi opa’ku’ak,” ingka kenang. “To’ sialaak nanna anaku, i Rahel,” ingka kenang.

22Jaji barik datamuna dinen baki’ Laban, laloang barik dinen rami-rami. Mangampitang tau inang. 23Di malam dinen barik okan i Rahel daantaten inang lo’a baki’ Yakub. I Lea yang daantaten. Jaji barik baki’ Yakub sitindo’an nanna i Lea. 24Laloang daunjukang bea dinen suro’anna i Lea, i Silpa asanna.

25Jaji barik makapen, dakilala barik dinen kole’a baki’ Yakub.#29:25 Ratina na’anna dakilala i Lea dinen kole’a di adatda’ babainye yang daantaten mamakai selendang. Datamu okanna i Rahel dinen daantaten lo’a. I Leaan pan itiang gantina. Jaji manjarum lo’a baki’ Laban, “Ai kenang maam-maama pakatu, makalen lo’ku’,” ingka kenang. “Okan dinen i Lea yang itiang opa’ku’. Yang janjika’ duaan, i Rahel dinen to’ kuala bainyeen,” ingka kenang arasina lo’a matoana.

26Jaji manyauti barik dinen baki’ Labanen lo’a baki’ Yakub, “Jaji kenang. Adat tau indi’angen, na’an pande anak imundiin tajolo alakina. Memang anak atoaan tajolo alakina,” ingka kenang. 27“Poangsi maam. Patulipi dalam minggu di’en rami sialanu nanna i Lea. Mamin dinen idunjukang bapi dinen i Rahel lo’u itiang bainye kaduanu. Daikopi arung mangadani karajanu nanku’, tuju taun bapi,” ingka kenang manjaruma dinen baki’ Laban lo’a baki’ Yakub.

28Maminna dinen mainya’ bea baki’ Yakub. Sukup dinen dalam saminggu nanna piang Lea, daunjukang bea dinen piang Rahel lo’a baki’ Yakub itiang bainye kaduanna. 29Laloang daunjukang bea dinen suro’anna piang Rahel, i Bilha asanna. 30Jaji baki’ Yakub sarilao’ bea nanna piang Rahel. Dua bainyena barik. Silalako’an barik ira dinen, sabenara labi dakasaang dinen yang piang Rahelen dari pada piang Lea. Bakaraja bapi dinen baki’ Yakuben sampai tuju taun launna.

Baki’ Yakub mandua’ang anak

31Jaji maminna dinen barik, dabele kole’a i Yahuwe piang Lea na’an dakasaang kole’a lakina, dagulungi barik mainto’ dapata araunting. Awan piang Rahel dinen, kosan anaka, tamanang. 32Jaji araunting barik piang Lea daparanakang anaka dinen, babaka. Dameang asanna dinen, i Ruben.#29:32 Ratina ruben ilalam jarum Ibraniin, belejo anak babakaan. Mainso’ unyina nanna jarum yang berartiin, dakita susaku’. Kole’a ingka, “Kole’a i Yahuwe dinen mamin mamele susaku’. Ialalo dameangku’ anak. Tentu mainya’ barik laki’ku’ mangasaang lo’ku’,” ingka kenang.

33Jaji maminna dinen piang Lea dinen araunting bapi. Dalam arauntinga dinen daparanakang anaka dinen, babaka bapi. Jaji manjarum piang Lea, “Ialalo dameangku’ anak babakaan sampai dua awan di’en, kole’a i Yahuwe. Kole’a datamuku’ na’anku’ dakasaang kole’a lakiku’,” ingka kenang manjaruma piang Lea. Jaji dameang barik asan dinen i Simeon asanna.#29:33 Ratina simeon ilalam jarum Ibraniin, tau mandalingaan.

34Jaji maminna dinen, piang Lea araunting bapi. Jaji daparanakang bapi anaka dinen, babaka bapi. Jaji manjarum piang Lea, “Na, mainya’ di’ barik lo’ku’. Dakasaangak. Sampai talu anaka babakaan nanku’,” ingka kenang manjaruma piang Lea. Ialalo barik dameang asan anaka, i Lewi asanna.#29:34 Ratina lewi dinen mainso’ unyina nanna jarum Ibraniin yang berarti malakat.

35Maminna dinen piang Lea araunting bapi. Daparanakang anaka, babaka bapi. Jaji manjarum piang Lea, “Di’en barik mamudiak lo’a i Yahuwe,” ingka kenang. Jaji dameang asanna anaka, i Yehuda asanna.#29:35 Yehuda mainso’ unyina nanna jarum Ibraniin yang berarti mamudi. Maminna dinen tadang barik aranaka.

Currently Selected:

Di Mulakata 29: EBE

Highlight

Copy

Compare